མཁས་པས་གཞན་ལ་བཤད་པ་འམ།།

ཡང་ན་ཞི་བའི་ནགས་སུ་བསྒྲུབ།།

ནོར་བུ་སྤྱི་གཙུག་རྒྱན་བྱེད་དམ།།

མིན་ན་རྒྱ་མཚོའི་གླིང་ལ་གནས།།

བདག་བས་མཐོ་བའི་དམ་པ་ལ།།

བསྙེན་ན་བདག་ལ་ཕན་པ་སྒྲུབ།།

ལྷུན་པོའི་ངོས་ལ་གནས་པ་ཡི།།

བྱ་རྣམས་གསེར་དུ་སྣང་བར་འགྱུར།།

ཆེན་པོ་ཕྲག་དོག་ལྡན་པ་ལ།།

བརྟེན་ན་ཆེན་པོ་ཐོབ་མི་འགྱུར།།

ཉི་མའི་འོད་ལ་ཉེ་བ་ཡིས།།

ཟླ་བ་མར་ངོར་གྱུར་ལ་ལྟོས།།

མི་གང་མཛའ་བ་མི་བརྟན་པ།།

དེ་དང་འགྲོགས་པར་སུ་ཞིག་འཐམ།།

ནམ་མཁའི་འཇའ་ཚོན་མདོག་མཛེས་ཀྱང༌།།

རྒྱན་དུ་རེ་ན་བླུན་པོ་འཁྲུལ།།

བདག་ཉིད་གང་ལ་མི་དགའ་བ།།

གཞན་ལ་ཀུན་ཏུ་དེ་མི་བྱ།།

གཞན་གྱིས་ཅུང་ཟད་གཙེས་པའི་ཚེ།།

རང་ལ་བསམ་པ་ཅི་འབྱུང་སོམས།།

གང་ཞིག་བདག་ཉིད་གང་དགའ་བ།།

དེ་ཉིད་གཞན་ལ་སྦྱར་བྱས་ན།།

གཞན་གྱིས་བདག་ལ་གང་དགའ་བ།།

དེ་ཡི་ཚུལ་གྱིས་མཆོད་པར་གྱུར།།

དམུ་རྒོད་རྣམས་དང་མཛའ་བ་དང༌།།

རྩོད་པ་གཉིས་ཀ་མཁས་པས་སྤངས།།

འགྲས་པ་དང་ནི་འདྲིས་པའི་ཚུལ།།

གཉིས་ཀ་སྟེག་ལ་བྱར་མི་རུང༌།།

དམ་པ་དག་ལ་བརྟེན་པ་དང༌།།

མཁས་པ་བདག་ལ་འདྲི་བ་དང༌།།

གཞུང་བཟང་པ་དང་འགྲོགས་པ་ནི།།

སུ་ལ་ཡོད་པ་རྒྱུན་དུ་བདེ།།

 དུས་སུ་མ་བབ་པ་ཡི་གཏམ།།

གང་སྨྲས་དེ་ལ་ཀུན་གྱིས་བརྙས།།

མང་པོ་སྨྲ་བའི་གཏན་ཚིགས་ལས།།

སྨོན་པར་རྗེས་སུ་མི་དཔོག་གམ།།

ཉམ་ཆུང་རྣམས་ཀྱིས་རང་ཉིད་ཀྱི།།

སྨྲ་བ་ཐམས་ཅད་འཁྲུལ་བར་བསམ།།

དེ་ལྟར་གོ་ནས་མི་སྨྲ་བའི།།

མི་ལ་གཞན་གྱིས་བཀུར་བ་ཉེ།།

ཡུལ་དང་དུས་ལ་བབ་པའི་ཚེ།།

རབ་ཏུ་བསྒྲིམས་ཏེ་ལན་འགའ་སྨྲ།།

ལེགས་བཤད་ཡིན་ཡང་མང་གྱུར་ན།།

ཚོང་ཟོང་ལྷག་བཞིན་བྲིན་མི་འགྱུར།།

རང་སྐྱོན་མཁས་པ་རྣམས་ཀྱིས་ཀྱང༌།།

སྐྱོན་དུ་གོ་བ་ཤིན་ཏུ་དཀའ།།

མང་པོས་བདག་ལ་དེ་སྒྲོགས་ན།།

སྐྱོན་ཅན་ཡིན་པར་རྗེས་སུ་དཔོག།

གོ་ཡང་སྐྱོན་དེ་མི་འདོར་ན།།

མི་དེ་གདོན་གྱིས་བཏབ་པ་ཡིན།།

ད་དུང་གཉེན་པོ་མི་འཇུག་ན།།

མི་ཡིན་སྙམ་དུ་མ་སེམས་ཤིག།

ཅུང་ཟད་བསམ་པ་ཡོད་རྣམས་ཀྱིས།།

སྐྱོན་དེ་བརྣགས་ལ་གདོན་པར་བྱ།།

དེ་ལྟར་གཉེན་པོ་སྤྱོད་པ་ཡི།།

མི་དེ་གོང་ནས་གོང་དུ་འགྲོ།

བློ་དང་ལྡན་པའམ་བྱམས་ཀྱང་རུང༌།།

བསྒོ་བ་ཉན་པའམ་དཔའ་ཡང་རུང༌།།

གཞན་གྱི་བྱ་བ་མི་ཤེས་ཀྱང༌།།

དེ་དང་དེ་ཡི་སྤྱོད་པས་བསྐྱང༌།།

མི་བསྲུན་པ་ཡི་འབྲེལ་བ་དང༌།།

རིང་ནས་འགྲོགས་ཀྱང་སྤངས་ན་བདེ།།

རྟག་ཏུ་འགུལ་བའི་སོ་བཟང་ཡང༌།།

བཏོན་ན་བདེ་ཞེས་རྒད་པོ་སྨྲ།།

རྒྱུན་དུ་འཁང་ཞིང་འཁོར་བ་ཡི།།

འབྲེལ་བ་ཅུང་ཟད་བྱིན་ལ་བསྐྲད།།

སྦྲུལ་གྱིས་ཟིན་པའི་རྨ་དག་ནི།།

གཅོད་མ་ནུས་ན་སྲོག་དང་འབྲལ།།

གལ་ཏེ་ཆེན་པོ་ཐོབ་གྱུར་ན།།

ཕྲན་ཚེགས་གཞན་ལ་སེར་སྣ་སྤང༌།།

ཡུལ་འཁོར་དབང་དུ་འདུ་བ་ན།།

དབྱིག་ལ་སེར་སྣ་བྱེད་དམ་ཅི།།

མཁས་པ་ལོངས་སྤྱོད་གསོག་འདོད་ན།།

ཆ་ཤས་སྦྱིན་པ་སྲུང་བ་ཆེ།།

ཁྲོན་པའི་ཆུ་ནི་འཕེལ་འདོད་ན།།

འཆུ་བ་ཉིད་ནི་གདམས་ངག་ཡིན།།

གང་ཞིག་ཕུན་སུམ་ཚོགས་འདོད་ན།།

དེ་ཡིས་འདུ་འགོད་མང་དུ་བྱ།།

འདུ་འཛི་སྡུག་བསྔལ་རྒྱུར་མཐོང་ན།།

ཕུན་སུམ་ཚོགས་པའི་རེ་བ་ཐོངས།།

བྱ་བ་གང་ཞིག་བསྒྲུབ་ན་ཡང༌།།

སྐྱོན་དང་ཡོན་ཏན་གཉིས་གཉིས་སོམས།།

གཉིས་ཀ་མཉམ་ཡང་སྤང་དགོས་ན།།

ཉེས་པ་ཤས་ཆེ་སྨོས་ཅི་དགོས།།

མཁས་པ་དྲང་པོ་གུས་པས་བསྟེན།།

མཁས་པ་གཡོ་ཅན་ཤེས་ན་གཟབ།།

རྨོངས་པ་དྲང་པོ་བྱམས་པས་བསྐྱང༌།།

རྨོངས་པ་གཡོ་ཅན་མྱུར་དུ་སྤོངས།།

ནོར་དང་གཡོ་འཁོར་མེད་ན་ཡང༌།།

མཛའ་བོ་བློ་ལྡན་གྲོགས་ཡོད་ན།།

དུད་འགྲོས་ཀྱང་ནི་དོན་གྲུབ་ན།།

མི་ཡི་འགྲོ་བས་སྨོས་ཅི་དགོས།།

གང་ཞིག་ཤེས་པའི་བྱ་བ་བསྒོ།།

མི་ནུས་པ་ལ་འགའ་མི་སྦྱར།།

ཆུ་ལ་ཤིང་རྟས་མི་བགྲོད་དེ།།

ཐང་ལ་གྲུ་ཡིས་ཇི་ལྟར་བགྲོད།།

ཡུན་རིང་འཁོན་པའི་དགྲ་བོ་དང༌།།

མཛའ་བ་བྱེད་ཀྱང་བསྲེ་མི་བྱ།།

ཤིན་ཏུ་ཁོལ་བའི་ཆུ་ཡིས་ཀྱང༌།།

མེ་དང་ཕྲད་ན་མི་གསོད་དམ།།

གཞུང་བཟང་ངོ་ཚ་ཁྲེལ་ཡོད་ན།།

དགྲ་བོ་ལ་ཡང་ཡིད་བརྟན་རུང༌།།

གཞུང་བཟང་དགྲ་ལ་སྐྱབས་སོང་བས།།

སྲོག་གི་བར་དུ་བསྐྱབས་པ་ཐོས།།

རང་ལ་ངན་སེམས་མེད་ཅེས་ཏེ།།

ཕལ་པ་ཀུན་ལ་ཡིད་མི་བརྟན།།

རི་དྭགས་རྒྱུན་དུ་སེམས་བཟང་ཡང༌།།

མཆེ་བ་ཅན་རྣམས་ཟས་སུ་བསྒོམ།།

བླུན་པོ་ལོག་པའི་ལམ་འགྲོ་ན།།

བླུན་པོ་ཉིད་དུ་གོ་བས་ཆོག།

མཁས་པ་ལོག་པའི་ལམ་འགྲོ་ན།།

རྒྱུ་མཚན་གང་ཞིག་དཔྱད་དགོས་སོ།།

མཁས་པས་ལོངས་སྤྱོད་ལྷག་པར་སྤྱད།།

མི་སྟེར་ན་ཡང་འཕྲོག་པ་མེད།།

ལོངས་སྤྱོད་ཉམས་པའི་ས་ཕྱོགས་སྤང༌།།

མི་འཕྲོད་ན་ཡང་གཉའ་སྐྱིས་འཇོམས།།

རང་གིས་ལེགས་པར་ཤེས་ན་ཡང༌།།

བྱ་མ་ཐམས་ཅད་གྲོས་ཀྱིས་བསྒྲུབ།།

མི་གང་གྲོས་ལ་མི་དགའ་བ།།

འགྱོད་པ་རིན་གྱིས་ཉོ་བ་ཡིན།།

ཉམ་ངའི་གྲོས་དག་བྱེད་པ་ན།།

མཛའ་ཡང་གསུམ་དུ་གྲོས་མི་བྱ།།

རོ་ལངས་སྒྲུབ་པའི་གྲོགས་ངན་ན།།

ཐོག་མར་སྒྲུབ་པོ་ཟ་བར་འགྱུར།།

ལེན་ཤེས་སྙོམས་པར་གཏོང་ལ་མཁས།།

དུལ་ཞིང་ཀུན་གྱི་ངོ་བསྲུང་བ།།

འཇིགས་མེད་བྱས་པ་ཆུད་མི་གཟན།།

མི་དེ་འདོད་ན་ས་ཀུན་ཐོབ།།

གལ་ཏེ་དགྲ་བོ་སྐྱབས་འོང་ན།།

དེ་ལ་མཆོད་ནས་སྙན་པ་བརྗོད།།

ཁྭ་ཏས་བྱི་བ་ལ་བརྟེན་ནས།།

བདེ་བ་ཐོབ་ཅེས་སྔོན་རབས་སྨྲ།།

གྲོགས་པོ་ངན་དང་ཐོས་པ་ངན།།

རྟོག་པ་ངན་དང་བྱ་བ་ངན།།

མཁས་པ་རྣམས་ཀྱིས་མི་བྱ་སྟེ།།

བྱེད་ན་བླུན་པོ་གུད་ན་མེད།།

ལེགས་པར་བརྟགས་ནས་བྱེད་པ་ལ།།

བྱ་བ་ཉམས་པ་ག་ལ་སྲིད།།

མིག་ལྡན་བརྟགས་ནས་འགྲོ་བ་ན།།

གཡང་སར་གོམ་པ་འདོར་རམ་ཅི།།

རང་གཞན་གཉིས་ཀ་འཕེལ་འགྱུར་བའི།།

ཡོན་ཏན་སློབ་ན་མཁས་པའི་རྟགས།།

རིག་པ་འགའ་ཞིག་མདའ་མཁན་ལྟར།།

ཤེས་པ་ཉིད་ན་ཆོ་འབྲང་འཇིག།

རང་ཉིད་ཅིས་ཀྱང་མཐོ་འདོད་ན།།

གཞན་ལ་ཕན་པ་འབའ་ཞིག་གྱིས།།

བྱད་ལ་བྱི་དོར་བྱེད་པ་རྣམས།།

སྔོན་དུ་མེ་ལོང་མི་འབྱིད་དམ།།

ཕ་རོལ་ཅི་ནས་གཞོམ་འདོད་ན།།

རང་གི་ཡོན་ཏན་འབད་པས་སྒྲུབ།།

དགྲ་བོ་གསོད་པར་འདོད་པ་རྣམས།།

མཚོན་ཆ་འབད་ནས་སྒྲུབ་ལ་ལྟོས།

རྩོམ་ཁུངས། མི་རིགས་དཔེ་སྐྲུན་ཁང་།