ཡང་འགའ་རེས་སྔར་ཙཱ་རི་རོང་སྐོར་བྱེད་དུས་སུ་ཁྱེད་ཀྱི་ཐུགས་ལ་ཅི་འཁྲུངས་ཟེར་བའི་ལན་དུ་འདི་སྐད་ཅེས་སྨྲས།
     ངོ་མཚར་རྩ་གསུམ་ལྷ་ཡི་ཞིང༌། ། སར་གནས་དག་པ་མཁའ་སྤྱོད་དངོས། ། ཙཱ་རིའི་རོང་སྐོར་བྱེད་པའི་དུས། ། སེམས་ལ་འདི་འདྲ་སྙམ་པ་བྱུང༌། ། ཀློ་ཡུལ་ལམ་འཕྲང་ཆུ་ཟམ་སོགས། ། བགྲོད་དཀའ་བརྒྱུད་ནས་སོང་བའི་
ཚེ། ། བར་དོའི་འཕྲང་ལ་འགྲོ་བའི་དུས། །འདི་འདྲ་ལོས་ཡིན་སྙམ་པ་བྱུང༌། ། ལྟོ་ཡོད་དབང་ཡོད་ཐམས་ཅད་པོ། ། དགའ་བཞིན་འགྲོ་བ་མཐོང་བའི་ཚེ། ། ཆོས་ཡོད་ཕྱི་མར་འགྲོ་བ་རྣམས། ། འདི་འདྲ་ལོས་ཡིན་སྙམ་པ་བྱུང༌། ། ལྟོ་མེད་དབང་མེད་ཐམས་ཅད་པོ། །   སྡུག་བཞིན་འགྲོ་བ་མཐོང་བའི་ཚེ། ། ཆོས་མེད་ཕྱི་མར་འགྲོ་བ་རྣམས། ། འདི་འདྲ་ལོས་ཡིན་སྙམ་པ་བྱུང༌། ། འགའ་རེས་གྲོགས་པོ་ན་བ་དེ། ། བསྐྱུར་ནས་འགྲོ་བ་མཐོང་བའི་ཚེ། ། ཁྲེལ་མེད་གྲོགས་པོ་ཟེར་བ་དེ། །འདི་འདྲ་ལོས་ཡིན་སྙམ་པ་བྱུང༌། ། འགའ་ རེས་ཉམ་ཐག་སྤྲང་པོ་ལ། ། ཟས་སྦྱིན་སྐྱོང་བ་མཐོང་བའི་ཚེ། ། བྱང་ཆུབ་སེམས་དཔའ་ཟེར་བ་དེ། ། འདི་འདྲ་ལོས་ཡིན་སྙམ་པ་བྱུང༌། ། སྐོར་མི་མང་པོ་མུ་གེ་དང༌། ། ནད་ཀྱིས་ཤི་བ་མཐོང་བའི་ཚེ། ། ཆོས་ཕྱིར་ལུས་སྲོག་གཏོང་བ་དེ། ། འདི་འདྲ་ལོས་ཡིན་སྙམ་པ་བྱུང༌། ། སྐོར་མི་ཁྲི་འབུམ་གང་ཡོད་ཚད། ། སོ་སོར་བྲལ་ནས་སོང་བའི་ཚེ། ། ཆོས་རྣམས་མི་རྟག་ཟེར་བ་དེ། ། འདི་འདྲ་ལོས་ཡིན་སྙམ་པ་བྱུང༌། །  ཞེས་སྨྲས་པས་ཀུན་སྐྱོ་ཤས་དང་སྙིང་རྗེ་སྐྱེས་པ་བྱུང༌། །

རྩོམ་ཁུངས། ངེད་དྲ་བ།