ཁ་བྱང་མ་རྙེད་པའི་བཅད་རྩོམ།
ཟག་བཅས་ཕུང་བོ་གཤེད་རེད་མ་གསུངས་རང་ལ་ཡོད་པའི་ལུས་རྟེན་རེད།།
རླུང་མཁྲིས་བད་ཀན་ནད་རེད་མ་གསུངས་མི་གཞི་འདི་ཡི་རང་བཞིན་རེད།།
སྐྱུགས་པའི་ཟ་མ་དུག་རེད་མ་གསུངས་སྔོན་ལ་ཟོས་པའི་ཟས་མཆོག་རེད།།
ཁ་ཡི་སོ་དཀར་མང་གི་མ་གསུངས་སྣ་བུག་གཉིས་ཀྱི་འོག་རོལ་རེད།།
ཏིག་ཏའི་སྨན་ཐུན་ཁ་གི་མ་གསུངས་མཁྲིས་ནད་འཇོམས་པའི་སྨན་མཆོག་རེད།།
སྒོ་ཁྱིའི་ཟུག་སྐད་ཆེ་གི་མ་གསུངས་རྐུན་མ་འགོག་པའི་སྒོ་སྲུང་རེད།།
དབུལ་བོ་ནོར་གྱིས་ཕོངས་འདུག་མ་གསུངས་རྒྱུ་ནོར་སྔ་ལོ་ཕྱི་ལོ་རེད།།
དཔོན་པོ་རྐུབ་སྟེགས་མཐོ་གི་མ་གསུངས་འབངས་ཀྱིས་སྤྲད་པའི་འོས་འགན་རེད།།
དགེ་རྒན་གོ་གནས་དམན་གི་མ་གསུངས་སློབ་བུ་སྐྱོང་བའི་ལྡེ་མིག་རེད།།
འབྲོག་པ་གླེན་རྟགས་ཆེ་གི་མ་གསུངས་མྱི་རུ་བྲོ་བའི་རུས་རྒྱུད་རེད།།
བཟའ་ཟླ་རང་གི་དམན་རེད་མ་གསུངས་མི་ཚེ་འདི་ཡི་གཏན་གྲོགས་རེད།།
གཉེར་མའི་ལུས་པོ་རྒས་ཐ་མ་གསུངས་ལོ་ཟླས་སྤྲད་པའི་བབས་འོས་རེད།།
ཨ་ཇོ་རྒྱང་ལ་བཞུད་ཐ་མ་གསུངས་མི་རབས་ཞིག་གི་ལས་དོན་རེད།།
བུ་མོ་ནུ་འབུར་ཆེ་གི་མ་གསུངས་ལང་ཚོ་རྒྱས་པའི་རྟགས་མཚན་རེད།།
བུ་ཕྲུག་སློབ་གྲྭར་མི་འགྲོ་མ་གསུངས་མ་འོངས་རྐང་འཛིན་ཁྱེད་ཚོ་རེད།།
སྐྱ་ཀས་སྐད་ཅོར་རྒྱག་གི་མ་གསུངས་མགྲོན་པོ་ཡོང་བའི་སྔ་ལྟས་རེད།།
སྲོལ་རྒྱུན་ཆོས་ལུགས་དུག་རེད་མ་གསུངས་འཛིན་མའི་ཁྱོན་གྱི་སྙིང་ནོར་རེད།།
ཕ་མ་སྐད་ཆ་མང་གི་མ་གསུངས་སེམས་ནས་ལྷུང་བའི་བསླབ་བྱ་རེད།།
དགེ་བསྐོས་ཁྲིམས་ཁ་བཙན་གི་མ་ཟེར་དགོན་པའི་བཞག་པའི་ཁྲིམས་འཛིན་རེད།།
ཚན་རིག་དགོས་པ་མེད་ཁུ་མ་གསུངས་དེང་རབས་གསར་བའི་འགྲོ་ཕྱོགས་རེད།།
༢༠༡༣་༤་༣ཉིན་རང་ཤག་ནས་བྲིས་གང་ཤར་བྲིས།
རྩོམ་ཁུངས། ངེད་དྲ་བ།