གོ་རིམ་འཁྲུགས་པའི་གླུ།
ཁ་བ་དགུན་ལ་མ་ཐོན།།
དབྱར་ཟླ་བརྒྱད་པར་ཐོན་པས།།
མེ་ཏོག་མགྲིན་པ་འཁྱོགས་ཏེ།།
གནམ་ལ་མིག་ཆུ་གཏོར་བྱུང་།།
རྟ་ཕོ་རྟིང་དཀར་ཞོན་ནས།།
རི་བསང་གཏོང་བར་ཆས་དུས།།
ཕ་བོང་སྐྱ་བོ་ཞིག་གིས།།
གཞི་བདག་ཁོ་ཡིན་ལབ་བྱུང་།།
ཕོ་རོག་ནག་ཆུང་ཞིག་གིས།།
ཤེར་ཕྱིན་འབུམ་པ་བཏོན་ནས།།
གླེགས་ཤིང་སེར་པོ་ཞིག་གི།
ཞལ་ངོ་དམར་པོ་བྱས་ཐལ།།
ཆུ་ལ་ཟམ་པ་ཡོད་དུས།།
ཐང་སྟོང་རྒྱལ་པོ་མི་ཤེས།།
ཟམ་པའི་ལྕགས་ཐག་ཆད་དུས།།
ཐང་སྟོང་རྒྱལ་པོ་ཤེས་བྱུང་།།
ལོ་དང་ཟླ་བ་ཉི་མས།།
དཔྲལ་བར་རི་མོ་བྲིས་བྱུང་།།
སེམས་ལ་རི་མོ་ནག་པོ།།
འབྲི་མཁན་དེས་ཀྱང་མི་ཚད།།
དབུ་སྙུང་རྒྱག་པའི་དུས་སུ།།
བྱི་འུ་ཀྱུར་ཀྱུར་གྲགས་ནས།།
ཨོ་རྒྱན་པད་ཞུའི་རྩེ་ལ།།
བྱིའུ་རྟུག་མང་པོ་བཏང་སོང་།།
མཁར་དེ་སེང་འབྲུག་སྟག་རྩེ།།
འཇིམ་སྐུ་སུམ་ཅུས་གང་འདུག།
ཨ་ཆེན་ཧོར་གྱི་གུར་དཀར།།
འཇིམ་སྐུས་གདུལ་རྒྱུ་ཨེ་རེད།།
བྲག་ལ་བཞེངས་བའི་བྱམས་སྐུ།།
གསེར་དང་དངུལ་གྱི་རིན་ཡིན།།
བྱ་ངན་འོལ་བ་ཞིག་གིས།།
བྱ་བྲུན་བཏང་ནས་བརྫད་འདུག།
དཔོན་པོ་གྲབ་རྒྱགས་ཅན་ཞིག།
ཆང་ཕོར་ནང་ལ་ལྕེབས་སོང་།།
དུར་སར་མ་སྦེད་སྔོན་ལ།།
རྩ་སྦུགས་འབུ་ཡིས་གང་སོང་།།
ཐོས་གྲོལ་དབུ་སྙེས་བྱས་ཏེ།།
སྔུར་བ་འཐེན་པའི་བླ་མས།།
ཚེ་འདས་ཆོས་མེད་ཅིག་གི།
རྣམ་ཤེས་ཐུབ་ཚོད་བཏང་བྱུང་།།
༢༠༡༤ ༧ ༢༢
(མཆོད་མེའི་པར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།