གསེར་གྱི་སྦྲང་ཆུང་།༼ ཞར་བཀོད་གསུམ་ཡོད ༽

_____1.jpg

སྐུད་པ་ཕྲ་མོས་བཅིངས་བ་ཡི།།
དམ་བཅའ་ཡུངས་འབྲུ་ཙམ་ཞིག་ནི།།
བསྐལ་བ་སྟོང་དུ་མ་ཆད་པར།།
སྙིང་གི་ནང་དུ་འཐེན་ཡོད་སྐད།།
ཆུ་ཡི་ཁ་ན་བཞུགས་པ་ཡི།།
ང་ཡི་རྨི་ལམ་དཀར་པོ་ཨེ།།
རྫི་མ་པིར་གྱིས་མ་བྲིས་ཀྱང་།།
ཚེས་རིས་འདྲ་ཞིག་གུག་གུག་ཤར།།
ཡིད་ནི་དགའ་སྟེ་ལག་པས་སྙོབ།།
ཅི་ཡང་མ་ཟིན་ཅི་ཡང་སྟོང་།།
རྡོ་བ་མ་ངུས་རྡོ་བ་ངུས།།
འཇའ་ཡི་གོན་པའི་འདབ་ཁ་ལ།།
ཡང་ཡང་ཨེ་ཐུག་ལྟ་བཞིན་ངུས།།
ཝ་ཡེ་ང་ནི་སྦྲང་ཆུང་ལགས།།
གཤོག་པ་གསེར་གྱི་གཤོག་པ་ཡིན།།
སྟེང་གི་ལྷ་ཡུལ་འགྲིམ་པ་དང་།།
འོག་གི་འཇིག་རྟེན་ཉུལ་བ་ལ།།
དཀའ་ངལ་ཨེན་ཙམ་ཡོད་མི་གདའ།།

                    ༢༠༡༥་༣་༡༠

             གཉིད་རན་དུས།

རྣམ་རིག་དཔེ་ངོས་སུ་བཟི་བས།།
མཚན་མའི་མུན་པ་ནི་བཞུར་བ།།
ཙི་གུའི་ཁ་སྤུ་བཞིན་རིང་བའི།།
ཡིག་འཕྲེང་དུང་ཕྱུར་གྱི་གསེབ་ན།།
ཞི་ལའི་སྡེར་མོ་བཞིན་རྣོ་བའི།།
སྙན་ངག་ཁྱོར་གང་ནི་ཟགས་པ།།
སྤྲིན་གྱི་ཁ་དོག་དང་འདྲ་བ།།
རླུང་གི་བསིལ་བ་དང་མཚུངས་བ།།
བུ་མོའི་མྱོས་བུམ་དང་འདྲ་བ།།
ཉི་མའི་ལག་པ་དང་མཚུངས་བ།།
སྨིན་མའི་བར་མཚམས་སུ་འཕྲོས་སོང་།།
ཚོར་བའི་ཁ་ནང་དུ་འཚང་བྱུང་།།
ཅི་ཞིག་བློས་བཏང་གི་སྐབས་དེར།།
ང་ནི་དགོད་རྒྱུ་ཞིག་ཡོང་བ།།
ཅུང་ཟད་ངུ་ཁ་ཡང་ལུག་པ།།
ཅུང་ཟད་དོགས་པ་ཡང་ཟ་བ།།
ཆུ་ལ་གྲུ་ཆུང་ནི་དགོས་པ།།
གྲུ་ལ་གྲུ་ཁེམ་ཡང་མེད་པ།།
དེ་དུས་བློ་འགྱོད་ཀྱང་བྱུང་བ།།
དེ་དུས་སྒྱུད་ལུག་ཀྱང་བྱུང་བ།།
རྟོག་པ་འོག་འགྱུ་ཡི་སྤུ་རིས།།
ཆུ་ལ་ཆུ་བཞག་དང་འཁྲུལ་བས།།
ཉིན་མཚན་རེས་མོས་སུ་བཞུད་ཀྱང་།།
འབྱེད་དུ་མེད་པ་འདི་སྐྱོ་ཨང་།།

                 ༢༠༡༥་༣་༡༨་ལ།

              སྙན་ངག་རློན་པ།

ང་ནི་མཚན་མོར་རྒྱུ་བའི་རི་བོང་འཛིན་པ་ཡིན།།
མཐའ་རུ་འོད་ཆུང་རྒྱུ་སྐར་མང་བོ་འཚུབ་ཀྱང་རུང་།།
ཡིད་ཀྱི་ཟེའུ་འབྲུ་མངར་མོ་སྦྲང་ཆུང་གཅིག་ལ་དབང་།།
དེ་ཕྱིར་རྨ་བྱ་ཕྲག་དོག་ཅན་རྣམས་འདུ་བར་བྱེད།།
ཡིན་ཙང་རྨི་ལམ་རི་མགོར་ཁངས་སྐྱ་མར་མར་བབས།།
རྐང་ལམ་ཅི་ཙམ་བཏོད་ཀྱང་ཕྱིར་ཕྱིར་གསུབ་པར་བྱེད།།
མིག་ཟུང་རིག་རིག་རྒྱང་ལ་གཏད་དང་ཕྱིར་ལ་འཁྲེང་།།
གཅེས་སུ་འོས་པའི་མེ་ཏོག་གཅིག་གིས་དྲན་ཤིང་བཞག།
སྣང་བའི་ཕ་རོལ་ང་ཡིས་བཙལ་ཀྱང་མ་རྙེད་པས།།
རྨི་ལམ་ནང་ནས་རྨི་ལམ་སྟོན་མགོའི་སྤྲིན་ལ་འདྲེས།།
འདི་ནི་སེམས་ཀྱི་རྔ་ཆེན་རྡུང་བའི་སྔངས་འདར་ཡིན།།

                                  ༢༠༡༥་༢་༡༩

 

               མི་ཞིག་ལ་བྲིས་པ།

 

སེམས་ཀྱི་ཆུ་བོ་གཅིག་ཏུ་འཁྱིལ་བ་ཡིན།།
ཟབ་ཚད་ང་ལ་མ་འདྲི་ཁྱོས་ཀྱང་རྟོགས།།
ཆུ་ལ་རི་མོ་མི་འབྲི་རྡོ་ལ་འབྲི།།
རྡོ་བ་འབྱུང་བཞིའི་ནང་གི་སྲ་མོ་ཡིན།།
དེ་ལ་སེར་ཁ་གས་པར་ཡིད་མ་ཚོམ།།
དེ་ལ་འགྱུར་བ་འགྲོ་བར་དོགས་མ་ཟ།།
ཤིང་སྡོང་གྲིབ་མར་ཁེན་པའི་ཟོལ་གྱིས་ནི།།
འོ་ཆུ་གཅིག་ལ་འདྲེས་པའི་རྣམ་པས་ནི།།
ལུས་ཀྱི་ཕྱི་ནང་བསིལ་ཞིང་སྣང་བ་བཟི།།
སྣང་བའི་མཁའ་ལ་རླུང་གི་གཤོག་པ་འགུལ།།
སྤྲིན་ཚོགས་དུམ་བུ་དུམ་བུ་འགྲོ་བ་ཀན།།
བྱ་ཁྱུ་སྐོར་རེ་སྐོར་རེ་འཕུར་བ་ཀན།།
གོང་མོ་གཉིས་རེ་གཉིས་རེ་ཚོམས་པ་ཀན།།
ནུབ་ཀྱི་དར་སྐུད་ལྷོ་ལ་འཐེན་པས་ཡིན།།
དགུ་ཚོགས་མི་ཡི་ཡུལ་དུ་དཔྱངས་བས་ཡིན།།
ལས་དབང་ཞེས་པ་རླུང་བུ་ལྡོམ་པོ་ཞིག།
རྩི་ཤིང་དག་ནི་དབང་མེད་སྒུལ་བར་བྱེད།།
ཡིན་ཡང་རང་ཚུགས་ཕ་བོང་སྒོམ་པར་བྱེད།།
ཆར་དང་རླུང་གི་ནང་ནས་སྒོམ་པར་བྱེད།།
ཐོག་དང་སེར་བུའི་དཀྱིལ་ནས་སྒོམ་པར་བྱེད།།
རྨི་ལམ་ཤོག་གྲུར་བསྡད་པའི་ལོ་ཟླ་ནི།།
སྲིད་པའི་རྟེན་དུ་བཞག་པའི་དྲན་ཤིང་ནི།།
ཡིག་ཆུང་ཤོག་ངོར་འཕྱུར་བའི་ཟིན་ཐོ་ཡིན།།
གང་གང་མཐའ་ལ་ཟགས་པར་འགྱུར་བར་རྩོམ།།
ཡོད་ཡོད་མཐའ་ལ་མེད་པར་འགྱུར་བར་རྩོམ།།
འདི་ལ་འཁང་ར་མི་བྱེད་ཆོས་ཉིད་ཟེར།།
ཆོས་ཉིད་གནམ་གྱི་རྒྱལ་མོའི་བཀའ་ལུང་ཟེར།།
འུ་གཉིས་སྤང་ཐང་སྔོན་མོར་བཞུགས་བྱས་ཏེ།།
གློ་ཉལ་བྱེད་བཞིན་འོ་ཇ་དཀར་བོ་འཐུང་།།
མེ་སྒོང་བརྒྱབ་སྟེ་ཁྱིམ་ནི་དྲོན་པར་བྱེད།།
བུད་ཤིང་འཐུས་ཏེ་དྲོད་ལ་དྲོད་ཅིག་སྣོན།།
འདི་ནི་རྨི་ལམ་སྒོམ་པའི་སྔ་ལྟས་ཡིན།།
འདི་ནི་སྐྱེ་བ་བླངས་བའི་ཚུགས་ཀ་ཡིན།།
འདི་ནི་ལས་ཀྱིས་བསྐོས་པའི་ཐང་ཁ་ཡིན།།
ལྷ་ཡུལ་ཞེས་ཀྱང་གཞན་དུ་བཙལ་མི་བྱ།།
མེ་ལོང་མེད་པའི་ང་ཅག་སུ་ལ་རྟོན།།
གཤོག་པ་མེད་པའི་ང་ཅག་གང་ལ་འཕུར།།
འདང་རྒྱག་ཧ་ཅང་མང་བའི་མཚན་མོ་ལ།།
རང་གི་སྒེའུ་ཁུང་ནང་གི་མུན་པ་ལ།།
སེམས་པ་གླན་ཏེ་འདི་ལྟར་ཐལ་སོང་ངོ་།།

                       ༢༠༡༥་༢་༡༦

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

གསེར་གྱི་སྦྲང་ཆུང་།༼ ཞར་བཀོད་གསུམ་ཡོད ༽

2015-10-05 གཏེར་སྣང་བྱེད། ཀློག་གྲངས། མཆན ཡོད།

_____1.jpg

སྐུད་པ་ཕྲ་མོས་བཅིངས་བ་ཡི།།
དམ་བཅའ་ཡུངས་འབྲུ་ཙམ་ཞིག་ནི།།
བསྐལ་བ་སྟོང་དུ་མ་ཆད་པར།།
སྙིང་གི་ནང་དུ་འཐེན་ཡོད་སྐད།།
ཆུ་ཡི་ཁ་ན་བཞུགས་པ་ཡི།།
ང་ཡི་རྨི་ལམ་དཀར་པོ་ཨེ།།
རྫི་མ་པིར་གྱིས་མ་བྲིས་ཀྱང་།།
ཚེས་རིས་འདྲ་ཞིག་གུག་གུག་ཤར།།
ཡིད་ནི་དགའ་སྟེ་ལག་པས་སྙོབ།།
ཅི་ཡང་མ་ཟིན་ཅི་ཡང་སྟོང་།།
རྡོ་བ་མ་ངུས་རྡོ་བ་ངུས།།
འཇའ་ཡི་གོན་པའི་འདབ་ཁ་ལ།།
ཡང་ཡང་ཨེ་ཐུག་ལྟ་བཞིན་ངུས།།
ཝ་ཡེ་ང་ནི་སྦྲང་ཆུང་ལགས།།
གཤོག་པ་གསེར་གྱི་གཤོག་པ་ཡིན།།
སྟེང་གི་ལྷ་ཡུལ་འགྲིམ་པ་དང་།།
འོག་གི་འཇིག་རྟེན་ཉུལ་བ་ལ།།
དཀའ་ངལ་ཨེན་ཙམ་ཡོད་མི་གདའ།།

                    ༢༠༡༥་༣་༡༠

             གཉིད་རན་དུས།

རྣམ་རིག་དཔེ་ངོས་སུ་བཟི་བས།།
མཚན་མའི་མུན་པ་ནི་བཞུར་བ།།
ཙི་གུའི་ཁ་སྤུ་བཞིན་རིང་བའི།།
ཡིག་འཕྲེང་དུང་ཕྱུར་གྱི་གསེབ་ན།།
ཞི་ལའི་སྡེར་མོ་བཞིན་རྣོ་བའི།།
སྙན་ངག་ཁྱོར་གང་ནི་ཟགས་པ།།
སྤྲིན་གྱི་ཁ་དོག་དང་འདྲ་བ།།
རླུང་གི་བསིལ་བ་དང་མཚུངས་བ།།
བུ་མོའི་མྱོས་བུམ་དང་འདྲ་བ།།
ཉི་མའི་ལག་པ་དང་མཚུངས་བ།།
སྨིན་མའི་བར་མཚམས་སུ་འཕྲོས་སོང་།།
ཚོར་བའི་ཁ་ནང་དུ་འཚང་བྱུང་།།
ཅི་ཞིག་བློས་བཏང་གི་སྐབས་དེར།།
ང་ནི་དགོད་རྒྱུ་ཞིག་ཡོང་བ།།
ཅུང་ཟད་ངུ་ཁ་ཡང་ལུག་པ།།
ཅུང་ཟད་དོགས་པ་ཡང་ཟ་བ།།
ཆུ་ལ་གྲུ་ཆུང་ནི་དགོས་པ།།
གྲུ་ལ་གྲུ་ཁེམ་ཡང་མེད་པ།།
དེ་དུས་བློ་འགྱོད་ཀྱང་བྱུང་བ།།
དེ་དུས་སྒྱུད་ལུག་ཀྱང་བྱུང་བ།།
རྟོག་པ་འོག་འགྱུ་ཡི་སྤུ་རིས།།
ཆུ་ལ་ཆུ་བཞག་དང་འཁྲུལ་བས།།
ཉིན་མཚན་རེས་མོས་སུ་བཞུད་ཀྱང་།།
འབྱེད་དུ་མེད་པ་འདི་སྐྱོ་ཨང་།།

                 ༢༠༡༥་༣་༡༨་ལ།

              སྙན་ངག་རློན་པ།

ང་ནི་མཚན་མོར་རྒྱུ་བའི་རི་བོང་འཛིན་པ་ཡིན།།
མཐའ་རུ་འོད་ཆུང་རྒྱུ་སྐར་མང་བོ་འཚུབ་ཀྱང་རུང་།།
ཡིད་ཀྱི་ཟེའུ་འབྲུ་མངར་མོ་སྦྲང་ཆུང་གཅིག་ལ་དབང་།།
དེ་ཕྱིར་རྨ་བྱ་ཕྲག་དོག་ཅན་རྣམས་འདུ་བར་བྱེད།།
ཡིན་ཙང་རྨི་ལམ་རི་མགོར་ཁངས་སྐྱ་མར་མར་བབས།།
རྐང་ལམ་ཅི་ཙམ་བཏོད་ཀྱང་ཕྱིར་ཕྱིར་གསུབ་པར་བྱེད།།
མིག་ཟུང་རིག་རིག་རྒྱང་ལ་གཏད་དང་ཕྱིར་ལ་འཁྲེང་།།
གཅེས་སུ་འོས་པའི་མེ་ཏོག་གཅིག་གིས་དྲན་ཤིང་བཞག།
སྣང་བའི་ཕ་རོལ་ང་ཡིས་བཙལ་ཀྱང་མ་རྙེད་པས།།
རྨི་ལམ་ནང་ནས་རྨི་ལམ་སྟོན་མགོའི་སྤྲིན་ལ་འདྲེས།།
འདི་ནི་སེམས་ཀྱི་རྔ་ཆེན་རྡུང་བའི་སྔངས་འདར་ཡིན།།

                                  ༢༠༡༥་༢་༡༩

 

               མི་ཞིག་ལ་བྲིས་པ།

 

སེམས་ཀྱི་ཆུ་བོ་གཅིག་ཏུ་འཁྱིལ་བ་ཡིན།།
ཟབ་ཚད་ང་ལ་མ་འདྲི་ཁྱོས་ཀྱང་རྟོགས།།
ཆུ་ལ་རི་མོ་མི་འབྲི་རྡོ་ལ་འབྲི།།
རྡོ་བ་འབྱུང་བཞིའི་ནང་གི་སྲ་མོ་ཡིན།།
དེ་ལ་སེར་ཁ་གས་པར་ཡིད་མ་ཚོམ།།
དེ་ལ་འགྱུར་བ་འགྲོ་བར་དོགས་མ་ཟ།།
ཤིང་སྡོང་གྲིབ་མར་ཁེན་པའི་ཟོལ་གྱིས་ནི།།
འོ་ཆུ་གཅིག་ལ་འདྲེས་པའི་རྣམ་པས་ནི།།
ལུས་ཀྱི་ཕྱི་ནང་བསིལ་ཞིང་སྣང་བ་བཟི།།
སྣང་བའི་མཁའ་ལ་རླུང་གི་གཤོག་པ་འགུལ།།
སྤྲིན་ཚོགས་དུམ་བུ་དུམ་བུ་འགྲོ་བ་ཀན།།
བྱ་ཁྱུ་སྐོར་རེ་སྐོར་རེ་འཕུར་བ་ཀན།།
གོང་མོ་གཉིས་རེ་གཉིས་རེ་ཚོམས་པ་ཀན།།
ནུབ་ཀྱི་དར་སྐུད་ལྷོ་ལ་འཐེན་པས་ཡིན།།
དགུ་ཚོགས་མི་ཡི་ཡུལ་དུ་དཔྱངས་བས་ཡིན།།
ལས་དབང་ཞེས་པ་རླུང་བུ་ལྡོམ་པོ་ཞིག།
རྩི་ཤིང་དག་ནི་དབང་མེད་སྒུལ་བར་བྱེད།།
ཡིན་ཡང་རང་ཚུགས་ཕ་བོང་སྒོམ་པར་བྱེད།།
ཆར་དང་རླུང་གི་ནང་ནས་སྒོམ་པར་བྱེད།།
ཐོག་དང་སེར་བུའི་དཀྱིལ་ནས་སྒོམ་པར་བྱེད།།
རྨི་ལམ་ཤོག་གྲུར་བསྡད་པའི་ལོ་ཟླ་ནི།།
སྲིད་པའི་རྟེན་དུ་བཞག་པའི་དྲན་ཤིང་ནི།།
ཡིག་ཆུང་ཤོག་ངོར་འཕྱུར་བའི་ཟིན་ཐོ་ཡིན།།
གང་གང་མཐའ་ལ་ཟགས་པར་འགྱུར་བར་རྩོམ།།
ཡོད་ཡོད་མཐའ་ལ་མེད་པར་འགྱུར་བར་རྩོམ།།
འདི་ལ་འཁང་ར་མི་བྱེད་ཆོས་ཉིད་ཟེར།།
ཆོས་ཉིད་གནམ་གྱི་རྒྱལ་མོའི་བཀའ་ལུང་ཟེར།།
འུ་གཉིས་སྤང་ཐང་སྔོན་མོར་བཞུགས་བྱས་ཏེ།།
གློ་ཉལ་བྱེད་བཞིན་འོ་ཇ་དཀར་བོ་འཐུང་།།
མེ་སྒོང་བརྒྱབ་སྟེ་ཁྱིམ་ནི་དྲོན་པར་བྱེད།།
བུད་ཤིང་འཐུས་ཏེ་དྲོད་ལ་དྲོད་ཅིག་སྣོན།།
འདི་ནི་རྨི་ལམ་སྒོམ་པའི་སྔ་ལྟས་ཡིན།།
འདི་ནི་སྐྱེ་བ་བླངས་བའི་ཚུགས་ཀ་ཡིན།།
འདི་ནི་ལས་ཀྱིས་བསྐོས་པའི་ཐང་ཁ་ཡིན།།
ལྷ་ཡུལ་ཞེས་ཀྱང་གཞན་དུ་བཙལ་མི་བྱ།།
མེ་ལོང་མེད་པའི་ང་ཅག་སུ་ལ་རྟོན།།
གཤོག་པ་མེད་པའི་ང་ཅག་གང་ལ་འཕུར།།
འདང་རྒྱག་ཧ་ཅང་མང་བའི་མཚན་མོ་ལ།།
རང་གི་སྒེའུ་ཁུང་ནང་གི་མུན་པ་ལ།།
སེམས་པ་གླན་ཏེ་འདི་ལྟར་ཐལ་སོང་ངོ་།།

                       ༢༠༡༥་༢་༡༦

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།