འཁོར་བ་མཐའ་ཡས་རྒྱ་མཚོ་ལ།།
འཚོ་བའི་མུ་ཏིག་བརྒྱུས་ཏེ་འོང་།།
གང་ཞིག་གཟིགས་པའི་འཇིགས་པ་ཡིས།།
བདེན་པ་གཉིས་ཀྱི་སྲོག་ཤིང་བཙུགས།།

རྒྱུ་འབྲས་རྟེན་འབྲེལ་ལེན་པ་ན།།
དེ་ལ་རང་བཞིན་སྟོང་ཞེས་གསུངས།།
ཤེར་རབ་གཏུམ་པོའི་རྩལ་དེ་ལ།།
མི་འགལ་བདག་ལྟ་བདེ་བདེ་འོ།།

ཚིག་གི་མགར་ཁང་ཕྱེས་གྱུར་ན།།
བདག་ཉིད་བཀྲི་བའི་སྒོ་དེ་ཉིད།།
ཁྱེད་ཀྱི་ལུང་བ་ཟབ་མོ་འདིར།།
ལུས་སེམས་གསོ་བའི་འགྲིམ་པ་བཀྱགས།།

ལོ་མ་སྐམ་པོའི་ཚལ་དེ་ཡང་།།
ཆ་ཤས་རེ་ཡིས་བརླན་བྱས་སོ།།
མེ་འབར་ནད་ཀྱིས་ཟོས་གྱུར་ན།།
ཚུལ་འདི་མཐོང་ལ་ཨེ་མ་ཧོ།།

གུས་ལུགས་རྙིད་པོའི་གྲོང་མཐའ་ནས།།
གསེར་ཡིག་དྲིན་པོའི་ལམ་དེ་སྐལ།།
ཚད་ཐིག་སྐོར་ཞིག་བླངས་གྱུར་ན།།
རས་རྐྱང་མདའ་གྲི་ཁོག་སྟོང་ངོ་།།

སྐྱེ་འཆིའི་སྙོམ་ཐིག་འདྲེས་ཏེ་ཕེབས།།
ཟླ་བ་ཡར་གྱིས་མུན་པ་བཀྲུས།།
ཨ་གར་དྲི་མཆོག་འཐུལ་གྱུར་ཞིང་།།
དབྱིངས་ཀྱི་མཚམས་ནས་དེ་སྐད་བྲིས།།

མདང་ནུབ་མཇལ་བའི་རྨི་ལམ་ནང་།།
ཡིད་ཀྱི་རྒྱུད་སྐུད་ལྷོད་དུ་ཆས།།
དམིགས་པ་གཏོད་པའི་དཀོན་མཆོག་ཅིག།
ཁྱེད་ཅེས་འབོད་པར་མ་སྤྲོ་ལགས།།

བདག་ཉིད་བདག་གི་མགོན་དེ་ཞེས།།
བསམ་པའི་ནུས་པ་སྤྲོ་བ་འཕེལ།།
མཐའ་མྱེད་དབྱིངས་ཀྱི་རིག་པ་ལ།།
ནམ་ཞིག་གང་གིས་རྙེད་པར་མཆིས།།

ཚུལ་འཆོས་ཤམ་བུའི་ངོ་གདོང་ན།།
ཡི་གེ་དག་ཀྱང་མུན་པ་ཟུག།
ནན་ཏན་སྙིང་པོར་བསྐུལ་བ་ཡིས།།
ཁ་གཏམ་མགྲིན་པ་འགྲིག་ཙམ་གདའ།།

       ༢༠༡༤•༦•༡༢ ལ་བྲིས།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།