དོ་ནུབ་སྔར་གྱི་གནས་མལ་ཕག་ཚང་ན།།
གཏམ་ལ་རྫོགས་ཚིག་འབྲི་མཁན་ལྡོམ་པོ་དེ།།
དམ་ཚིག་གཙང་མ་ཡོད་པའི་ཁེར་ཚུགས་ཤིག།
སེམས་དཀར་ཡིན་མདོག་རྣམ་འགྱུར་ཡག་མདོག་གིས།།
ཚུར་ལ་ནུར་ཏེ་འཛུམ་པ་དགོད་རེ་བྲོ།།
སྣ་རྡོག་འབུ་ཁུང་འདྲ་བོའི་མན་ཆད་ཀྱི།
མ་ནེ་འབུག་ཅིག་འདྲ་བོའི་ཡན་ཆད་ཀྱི།།
ཁ་ནི་སྦུག་ཆ་འདྲ་བོའི་ནང་ལོག་གི།
སྐྱག་རྫུན་ལྡད་ཀྱིན་ཡོང་བའི་ཚུགས་ཀ་དེར།
བལྟས་ན་སྙིང་རེ་རྗེ་བའི་རྣམ་པ་འབྱུང་།།
དུང་སོ་སུམ་ཅུ་འཚང་ཁ་ཤིག་ཤིག་གིས།།
སྐད་ཆ་བཤད་སྐབས་གློ་ལ་རྒྱག་ཞོར་དུ།།
མཆི་མས་ངོ་གདོང་རིང་བོ་འདྲུད་ཞོར་དུ།།
རྨ་ཁ་སྒྱོ་བ་གང་བོ་ཕྱེ་ཞོར་དུ།།
སྡུག་གཏམ་ལུང་བ་གང་བོ་འཁྱེར་ཞོར་དུ།།
མནར་གཅོད་རྩུབ་མདོག་བསྟན་ན་སྙིང་རེ་རྗེ།།
ལང་ཚོ་སྒོར་ལ་བརྗེ་བའི་མཚན་མོ་དེར།།
ལུས་ནི་གཅེར་བུ་རྐང་ནི་རྐང་རྗེན་དུ།།
ཨ་ཕའི་འུར་ཆ་ཨ་མའི་བཞོ་ཟུང་སོགས།།
ཅི་ཞིག་བྱིན་ཀྱང་མི་དགོས་ལྷག་མ་ཞེས།།
རྒྱ་གྲོང་སྐྱག་ཚང་འདྲ་བོ་བརྒྱུད་དུས་སུ།།
སྣང་བ་བསོར་མོ་བཙལ་བའི་མིག་ལམ་དུ།།
རང་སྣང་མཐོ་བོ་ངོམ་བཞིན་བུད་སོང་བས།།
ད་ནི་ཕྱིར་འཁོར་ཕ་མེས་སྲོལ་རྒྱུན་ཞེས།།
ཁ་རུ་ཁ་ཡག་མར་ལོ་འཁྱིལ་བཞིན་དུ།།
འགྱོད་པའི་ཕྱག་གསུམ་འཚལ་བཞིན་སླེབས་སོང་ན།།
འཆམ་མཐུན་ཚུལ་ལྡན་ཡིན་མདོག་མ་བསྟན་ཚེ།།
མི་ཚོས་ཕྲག་དོག་ཉོན་མོངས་ཆེ་འདུག་ཅེས།།
མི་ཚོགས་ཁ་ནི་ཤོག་སྦག་བཀད་པ་བཞིན།།
རྒྱ་གྲོང་གླིང་ནས་གྲགས་ན་ཅིས་མི་སྡུག།
ལྟག་རྒྱབ་བསྐོར་ནས་ལག་འཇུ་བྱས་པ་དེ།།
འུ་ཚོས་ཐེངས་གཅིག་ཚོད་ལྟ་བྱས་ཆོག་གམ།།

              ༢༠༡༨/༠༤/༠༤

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།