མཚན་བཟང་དཔེ་བྱད་བརྒྱད་ཅུས་རབ་མཛེས་སྐུ།།

ཡན་ལག་སྙན་འཇེབས་གསུང་དབྱངས་དྲུག་ཅུའི་གསུང་།།

འཁོར་འདས་བོན་ཀུན་མ་ལུས་མཁྱེན་པའི་ཐུགས།།

སྟོན་མཆོག་གཤེན་རབ་མི་བོ་རྣམ་པར་རྒྱལ།།

གང་གི་ཐུགས་མགྲིན་ལས་འཁྲུངས་གཡུང་དྲུང་བོན།།

ཐེག་དགུ་སྒོ་བཞི་མཛོད་ལྔ་ཕྱི་ནང་གསང་།།

དེ་ལས་དང་བོ་ཐེག་པ་རིམ་དགུ་ཡི།།

ནང་གསེས་རིག་པའི་གནས་ལྔ་ཅུང་ཟད་བཤད།།

    དེ་ལ་སྤྱིར་ཚེ་ལོ་བརྒྱ་བའི་མགོན་མཆོག་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་དང་བོ་བྱང་ཆུབ་མཆོག་ཏུ་ཐུགས་བསྐྱེད།བར་དུ་བསྐལ་བ་གྲངས་མེད་གསུམ་དུ་ཚོགས་བསགས།ཐ་མ་མངོན་པར་རྫོགས་པའི་སངས་རྒྱས་ནས་སླར་འོལ་མོ་ལུང་རིང་དུ་ཡབ་རྒྱལ་བོན་ཐོད་དཀར་དང་ཡུམ་རྒྱལ་བཞད་མའི་སྲས་སུ་སྐུ་བལྟམས་པའི་ཚུལ་བསྟན་ནས་གདུལ་བྱའི་དོན་དུ་བཀའ་ཡི་འཁོར་ལོ་ར ྣམ་པ་གསུམ་སྐོར་ཏེ་བཀའ་དང་བོ་ཐེག་པ་རིམ་དགུའི་བཀའ་འཁོར་བསྐོར།བཀའ་བར་བ་སྒོ་བཞི་མཛོད་ལྔའི་བཀའ་འཁོར་བསྐོར།བཀའ་ཐ་མ་ཕྱི་ནང་གསང་གསུམ་གྱི་བཀའ་འཁོར་བསྐོར།བཀའ་དང་བོའི་བཀའ་འཁོར་ལ་ཡང་རིག་པའི་གནས་ལྔའི་བཀའ་འཁོར་སྐོར་བ་དང་།ཐེག་པ་རིམ་དགུའི་བཀའ་འཁོར་གཉིས་སྐོར།དེ་ལས་དང་བོ་རིག་པའི་གནས་ལྔའི་བཀའ་འཁོར་བཤད་པ་ལ།བཟོ་རིག་པ།སྒྲ་རིག་པ།གསོ་བ་རིག་པ།ཕྱིའི་རིག་པ།ནང་རིག་པ་དང་ལྔ་ཡི་བཀའ་འཁོར་ཏེ།བསྟན་པ་རྗེས་བཞག་གི་མདོ་ལས།བཟོ་དང་སྒྲ་དང་གསོ་བ་དང་།།ཕྱི་ནང་རིག་པ་གཉིས་དང་ལྔ།ཞེས་སོ། །

       དེ་ལ་དང་བོ་བཟོ་རིག་པ་བཤད་པ་ལ་ལྔ་ཡོད།གང་ལས་འབྱུང་བའི་ལྷ།གང་ཞིག་བསྟན་པའི་བོན།གང་དུ་བསྟན་པའི་གནས།གང་ལ་བསྟན་པའི་སྣོད།གང་ཕྱིར་བསྟན་པའི་དགོས་པ་དང་ལྔའོ།དང་བོ་གང་ལས་འབྱུང་བའི་ལྷ་ནི།ཡེ་སྲིད་སངས་པོ་འབུམ་ཁྲིའི་ཐུགས་རྗེ་བྱིན་གྱིས་བརླབས་པ་ལས་བྱུང་བའོ།གཉིས་པ་གང་བསྟན་པའི་བོན་ནི།བཟོ་རིག་པའི་བཀའ།དེ་ལ་ཡང་སྤྱིར་སྟོན་པའི་གསུང་པའི་བཟོ་རིག ་པའི་བོན་ལ་ཤིན་ཏུ་གྲངས་མང་ཡང་།མདོར་བསྡུས་ན་འབུམ་གསུམ་ལྟ་བུའོ།དེ་ལ་འབུམ་གསུམ་ནི།བསྐལ་པ་སྣང་སྲིད་འཁོར་ལོའི་འབུམ།སྲིད་པ་མིའུ་རྒྱུད་ཀྱི་འབུམ།འབྱུང་བ་ཆགས་གནས་འཇིག་སྟོང་གི་འབུམ་དང་གསུམ་མོ།གསུམ་པ་གང་དུ་བསྟན་པའི་གནས་ནི།ཁྲི་སྨོན་རྒྱལ་བཞེད་དུ་གཏན་ལ་ཕབ།བཞི་བ་གང་ལ་བསྟན་པའི་སྣོད་ནི།བཟོ་རྒྱལ་གར་མ་ལི་ཤོ་ལ་བསྟན།ལྔ་བ་དགོས་པ་ནི།སངས་རྒྱས་ཀྱི་བསྟན་པའི་གཞི་རུ་གྱུར་ཞིང་།གཞན་དག་རྗེས་སུ་བཟུང་བའི་ཕྱིར་དུ་བཟོ་རིག་པ་གཏན་ལ་ཕབ་པའོ།།

       གཉིས་པ་སྒྲ་རིག་པ་བཤད་པ་ལ་ལྔ་ཡོད།གང་ལས་འབྱུང་བའི་ལྷ།གང་ཞིག་བསྟན་པའི་བོན།གང་དུ་བསྟན་པའི་གནས།གང་ལ་བསྟན་པའི་སྣོད།གང་ཕྱིར་བསྟན་པའི་དགོས་པ་དང་ལྔའོ།དང་བོ་གང་ལས་འབྱུང་བའི་ལྷ་ནི།ཡེ་མཁྱེན་སྒྲ་བླའི་རྒྱལ་པོའི་བྱིན་གྱི་བརླབས་པ་ལས་བྱུང་བའོ།གཉིས་པ་གང་ཞིག་བསྟན་པའི་བོན་ནི།སྒྲ་རིག་པའི་བཀའ།སྟོན་པའི་གསུང་བའི་སྒྲ་རིག་པ་ལ་ཡང་གྲངས་ལས་འདས་པ་ ཞིག་ཡོད་ཀྱང་།མདོར་བསྡུས་ན་སྒྲ་ཚད་ཀྱི་འབུམ་གསུམ་ལྟ་བུའོ།དེ་གསུམ་ནི།ལྷ་སྲིན་འཁྲུགས་འབུམ་ནག་པོ།སྒྲ་ཚད་རྩོད་འབུམ་ཁྲ་བོ།དག་པའི་ལྷ་འབུམ་དཀར་པོ་དང་གསུམ་མོ།དེ་ཡང་སོ་སོར་དབྱེ་ན་སྒྲ་རིག་པ་དང་།ཚད་མ་རིག་པའོ།སྒྲ་རིག་པ་ནི།སྐད་འགྱུར་སོ་སོར་བསྟན་པའི་མདོ་ལ་སོགས་དང་།ཚད་མ་རིག་པ་ནི་སྡེ་བདུན་གྱི་མདོ་ལ་སོགས་སོ།གསུམ་པ་གང་དུ་བསྟན་པའི་གནས་ནི།ལྷ་ སྲིན་བར་དུ་གཏན་ལ་ཕབ་བོ།བཞི་བ་གང་ལ་བསྟན་པའི་སྣོད་ནི།རྨ་ལོ་དང་གཡུ་ལོ་གཉིས་ལ་བསྟན།ལྔ་བ་དགོས་པ་ནི།བསྟན་པ་ལ་མ་རྟོགས་ལོག་རྟོག་ཐེ་ཚོམས་ཀྱི་རྒོལ་བ་མ་ལུས་ཚར་བཅད་ནས།ངེས་དོན་ཡང་དག་པ་སྒྲུབ་པའི་ཕྱིར་དུ་སྒྲ་ཚད་རིག་པ་གཏན་ལ་ཕབ་བོ།

        གསུམ་པ་གསོ་བ་རིག་པ་བཤད་པ་ལ་ལྔ་ཡོད།གང་ལས་འབྱུང་བའི་ལྷ།གང་ཞིག་བསྟན་པའི་བོན།གང་དུ་བསྟན་པའི་གནས།གང་ལ་བསྟན་པའི་སྣོད།གང་ཕྱིར་བསྟན་པའི་དགོས་པ་དང་ལྔ་ཡོད་པས།དེ་ལས་དང་བོ་གང་ལས་འབྱུང་བའི་ལྷ་ནི།ཡེ་རྗེ་སྨན་བླའི་རྒྱལ་པོའི་ཐུགས་རྗེ་བྱིན་གྱིས་བརླབས་པ་ལས་བྱུང་བའོ།གཉིས་པ་གང་བསྟན་པའི་བོན་ནི།གསོ་བ་རིག་པའི་བཀའོ།དེ་ཡང་སྟོན་པའི་གསུང་པའི་གསོ ་བ་རིག་པའི་བོན་གཞུང་དུ་མར་ཡོད་ཀྱང་།ཚུར་བསྡུས་ན་སྨན་འབུམ་གསུམ་དུ་འདུས་སོ།དེ་གསུམ་ནི།གསོ་བྱའི་ནད་འབུམ་ནག་པོ།གསོ་བྱེད་དཔྱད་འབུམ་ཁྲ་བོ།རྣམ་རྒྱལ་སྨན་འབུམ་དཀར་པོ་དང་གསུམ།དེ་བཞིན་གསོ་རིག་འབུམ་ལ་སོགས་མང་བོ།གསུམ་པ་གང་དུ་བསྟན་པའི་གནས་ནི།འོལ་མོ་ལུང་རིང་དུ་གཏན་ལ་ཕབ་བོ།བཞི་བ་གང་ལ་བསྟན་པའི་སྣོད་ནི།དཔྱད་བུ་ཁྲི་ཤེས་ལ་བསྟན།ལྔ་པ་དགོས་པ་ནི །འགྲོ་བ་ནད་ཀྱི་ཟུག་རྔུ་བསལ་ཞིང་ལུས་སྲོག་གསོ་བར་བྱ་བའི་ཕྱིར་དུ་གསོ་བ་རིག་པ་གཏན་ལ་ཕབ་པའོ།

བཞི་བ་ཕྱི་རིག་པ་བཤད་པ་ལ་ལྔ་ཡོད།གང་ལས་འབྱུང་བའི་ལྷ།གང་ཞིག་བསྟན་པའི་བོན།གང་དུ་བསྟན་པའི་གནས།གང་ལ་བསྟན་པའི་སྣོད།གང་ཕྱིར་བསྟན་པའི་དགོས་པ་དང་ལྔའོ།དང་བོ་གང་ལས་འབྱུང་བའི་ལྷ་ནི།ཡེ་དབང་ས་ཡི་རྒྱལ་པོའི་ཐུགས་རྗེ་བྱིན་གྱིས་བརླབས་པ་ལས་བྱུང་བའོ།གཉིས་པ་གང་བསྟན་པའི་བོན་ནི།ཕྱི་རིག་པའི་བཀའོ།དེ་ཡང་མདོར་བསྡུས་ན།ཕྱི་རིག་པའི་འབུམ་གསུམ་ལྟ་བུའ ོ།དེ་གསུམ་ནི།སྣད་སྲིད་གཏོ་འབུམ་ནག་པོ།རིན་ཆེན་ཀུན་འབུམ་ཁྲ་བོ།གཙུག་ལག་དཔལ་འབུམ་དཀར་པོ་དང་གསུམ་མོ།གསུམ་པ་གང་དུ་བསྟན་པའི་གནས་ནི།རི་རབ་ཀྱི་རྩ་བར་གཏན་ལ་ཕབ་བོ།བཞི་པ་གང་ལ་བསྟན་པའི་སྣོད་ནི།ཀོང་ཙེ་འཕྲུལ་རྒྱལ་ལ་བསྟན་ནོ།ལྔ་པ་དགོས་པ་ནི།ལེགས་ཉེས་རྩིས་ཀྱིས་བསྟན་ཞིང་སྣད་སྲིད་ཞི་བདེར་བཅོས་པའི་ཕྱིར་དུ་ཕྱི་རིག་པ་གཏན་ལ་ཕབ་བོ།།

           ལྔ་བ་ནང་རིག་པ་བཤད་པ་ལ་ལྔ་ཡོད།གང་ལས་འབྱུང་བའི་ལྷ།གང་ཞིག་བསྟན་པའི་བོན།གང་དུ་བསྟན་པའི་གནས།གང་ལ་བསྟན་པའི་སྣོད།གང་ཕྱིར་བསྟན་པའི་དགོས་པ་དང་ལྔའོ།དང་བོ་གང་ལས་འབྱུང་བའི་ལྷ་ནི།ཡེ་དབང་མཐུ་སྟོབས་རྒྱལ་པོའི་ཐུགས་རྗེ་བྱིན་གྱིས་བརླབས་པ་ལས་བྱུང་བ་ཡིན།གཉིས་པ་གང་བསྟན་པའི་བོན་ནི།ནང་རིག་པའི་བཀའ་འོ།དེ་ཡང་མདོར་བསྡུས་ན།ཀླུ་འབུམ་དཀར་ནག་ཁྲ་གསུ མ་ལྟ་བུའོ།གསུམ་པ་གང་དུ་བསྟན་པའི་གནས་ནི།ཀླུའི་ཡུལ་དུ་གཏན་ལ་ཕབ་བོ།བཞི་བ་གང་ལ་བསྟན་པའི་སྣོད་ནི།ཡེ་ཤེས་སྙིང་བོ་ལ་བསྟན་ནོ།ལྔ་བ་དགོས་པ་ནི།བགེགས་གདོན་ཐབས་ཀྱིས་བཅོམ་སྟེ་མཆོག་ཐུན་གྱི་དངོས་གྲུབ་སོགས་རང་རྒྱུད་ལ་ཐོབ་པར་བྱ་བའི་ཕྱིར་དུ་ནང་རིག་པ་རྣམས་གསུངས་སོ།

མཐར་འཇུག་བསྡུས་པ་ལ།བྱམས་མ་འབུམ་ལྔ་ལས།རིག་པའི་གནས་ལྔ་ལ་བརྟེན་ནས་སེམས་ཅན་ཐབས་ཀྱིས་འདུལ་བ་སྟེ།ཕས་ཀྱི་རྒོལ་བ་སྒྲ་ཡིས་ཚར་བཅད།ནད་ཀྱིས་གདུང་བ་སྨན་གྱི་གསོ།གདོན་གྱིས་གཙེས་པ་སྔགས་ཀྱིས་བཅོམ།རྒས་རྒུད་འཆི་འཕོས་རྩིས་ཀྱིས་བཏུལ།ཞེས་གསུངས་སོ།སྤྱི་རིག་པའི་གནས་ལྔ་ལ་མ་བསླབ་ན་དུས་ནམ་ཡང་རྫོགས་པའི་སངས་རྒྱས་ཀྱི་གོ་འཕང་མི་ཐོབ་སྟེ།ཀུན་འབུམ་ལས། རིག་པའི་གནས་ལྔར་མ་སྦྱངས་བར།།ཐམས་ཅད་མཁྱེན་པ་མི་འཐོབ་སྟེ།།ཉི་མའི་དཀྱིལ་འཁོར་འོད་འབར་བ།།སྒོ་འགག་དབང་པོས་མཐོང་བ་མིན།།ཞེས་སོ།དེ་ལ་སྦྱང་བཞིན་བྱང་ཆུབ་པར་བྱེད་ན་ཡོན་ཏན་དུ་མ་དང་ལྡན་ཏེ།རིག་པའི་གནས་ལྔའི་བོན་སངས་རྒྱས་རྒྱལ་བ་གཤེན་རབ་མི་བོ་ཆེའི་ཞལ་ནས་གསུངས་པའི་བཀའ་དང་།ཞང་བོད་ཀྱི་གནས་ལྔ་བ་དག་གིས་སངས་རྒྱས་ཀྱི་བཀའ་ལ་བརྟེན་ནས་བསྡེབས་པའི་བ ཀའ་བརྟེན་རྣམས་ལ་མཁས་པར་སྦྱངས་སེམས་ཅན་གྱི་དོན་བྱེད་པ་ལ་ཕན་ཡོན་བསམ་གྱིས་མི་ཁྱབ་སྟེ།འབུམ་ལས།ཕྱི་དང་ནང་དང་བཟོ་དང་སྒྲ་དང་གསོ་བ་རིག་པའི་གནས་ལྔ་ལ་བློ་སྦྱངས་པའི་སྐྱེས་བུ་རྣམས་ནི་ཨེ་མ་ངོ་མཚར་ཆེའོ།ཞེས་སོགས་གསུངས་སོ།

སྔོན་བྱོན་མཁས་དབང་ལེགས་བཤད་དུ་མ་ལས།།

ལྟོས་ཏེ་ཐེག་ཆེན་བོན་གྱི་གཞི་གྱུར་པའི།།

རིག་པའི་གནས་ཆེན་ལྔ་ཡི་འབྱུང་ཁུངས་སོགས།།

ངོ་སྤྲོད་ཅུང་བྱེད་ནོངས་མཆིས་མཐོལ་ལོ་བཤགས།།

ཞེས་རིན་སྤུངས་ཚུལ་བསྟན་ནས་སེ་ར་དགོན་དུ་སློབ་གཉེར་གྱི་བར་གསེབ་ཏུ་མཁས་དབང་འགའི་གསུང་ལས་བཏུས་པའོ།

རྩོམ་ཁུངས། ངེད་དྲ་བ།