འདི་ན་སྔོན་བསགས་ལས་ཀྱིས་བཀོད་པ།།
ཡིད་འོང་གཞོན་པའི་ལང་ཚོའི་མེ་ཏོག།
འདབ་སྟོང་གྲོལ་བའི་འཛུམ་མདངས་ངོམ་ས།།
སྟག་ལུང་དཔལ་གྱི་རི་བོའི་ཉེ་འདབས།།
རྐང་འཐུང་འདབ་ལོའི་མགོ་ལྕོག་ལྡེམ་ལྡེམ།།
མཚར་སྡུག་མེ་ཏོག་ཐགས་སུ་བཀྲ་བ།།
ལྷ་ཡུལ་ལས་ཀྱང་ཉམས་སུ་དགའ་བས།།
བདེ་སྐྱིད་དཔལ་ལ་འབད་པ་མི་དགོས།།
ངག་སྙན་ཀྱ་ཀྱུ་གླུ་ལ་མཁས་པའི།།
བྱ་དང་བྱེའུའི་སྤྲོ་གར་འདི་ལ།།
ངོ་མཚར་ཉམས་ཀྱི་མཛེས་སྡུག་རྫོགས་པ།།
ཡིད་འོངས་སྤྲོ་དགའི་སྣང་བ་བདེའང༌།།
ཟིན་མེད་རྣམ་ཤེས་རྒོད་པོ་གཤོག་ཐོགས།།
སྐད་ཅིག་མིག་གི་འབྱེད་འཛུམ་བར་ནས།།
སྙིང་སྡུག་སྙིང་གི་ལྷ་མོ་སྒྲོལ་མ།།
སྒེའུ་ཁུང་འགྲམ་གྱི་ལྗོན་པའི་རྩེ་ལ།།
བྱམས་པའི་ཟུར་མིག་ལམ་ཅིག་གནོངས་དང༌།།
ང་རང་ཁྱེད་ཀྱི་སྒོ་མཐར་སླེབ་ཡོད།།
བརྩེ་བའི་ཞལ་འཛུམ་མིག་གི་བདུད་རྩི།།
ཡིད་འོངས་འཇོ་སྒེག་ཉམས་ཀྱིས་ཕྱུག་པ།།
གཞུང་བཟང་འགྲོགས་པའི་ཕྱི་ཐག་རིང་བ།།
བུ་ཆུང་ཁོ་བོའི་སྙིང་གི་ཕྱེད་ཀ།
ཡུན་རིང་ཞེ་འདོད་སྙིང་ལ་བཅངས་པ།།
ལྷན་འཛོམས་བདེ་སྐྱིད་འཕེལ་བའི་དུས་ཚིགས།།
རེ་སྒུག་ཉི་མ་ཕྲེང་བར་བགྲངས་ནས།།
ལོ་ཟླ་བརྩེགས་པའི་སྡུག་བསྔལ་འཁོར་ཡོད།།
རྒྱལ་བ་དགྱེས་པའི་སྒྲུབ་ཕུག་དེ་ན།།
གྲོགས་མེད་དཀའ་ཐུབ་བསྟེན་པའི་དྲང་སྲོང༌།།
རྩེ་གཅིག་ཏིང་འཛིན་སྒོམ་པའི་ཉམས་ལེན།།
ངེས་འབྱུང་སེམས་བསྐྱེད་ཡིན་ན་དགའ་བ།།
མ་རུང་རྒས་པའི་འཕྲལ་རྐྱེན་ངན་པ།།
འཆི་བདག་བདུད་པོ་ཁྲོས་པའི་རྐྱེན་ངན།།
གཤིན་རྗེའི་གྲོང་སྒོར་འགྲོ་རན་འདུག་ཀྱང༌།།
འཁྲེང་སེམས་འདོད་དགུའི་ཞེན་པ་མ་ཆོད།།
ཆུ་ཤེལ་སེམས་ཀྱི་མེ་ལོང་དྭངས་མོར།།
ཡིད་འོངས་མིག་འཛུམ་འཛུམ་པའི་ཞལ་རས།།
འགོག་མེད་འཆར་བའི་ངང་ཚུལ་འདི་ལ།།
གཉེན་པོ་གང་གིས་ཟློག་པར་མི་ནུས།།
མཛེས་མཛེས་མིག་ལ་རན་པའི་གཤིས་ཀ།
ཚུལ་མཐུན་ངུར་སྨྲིག་དཀྲིས་པའི་སྣང་བརྙན།།
མི་ཚེ་དབེན་པའི་རི་ནས་ཟད་ཀྱང༌།།
དགེ་སྒྲུབ་འདི་ལ་སྙིང་བོ་མ་ལོན།།

རྩོམ་ཁུངས། ངེད་དྲ་བ།