བཤེར་འཚོལ།
ཡིད་དང་ཡུལ་གྱི་ལེའུ།
ཡིད་ཀྱི་རྒྱ་ཕིབས།
རི་རབ་ཀྱི་བར་སྣང་ན་བྲན་པའི་སྐར་ཚོགས་ཀྱི་རྡང་ཐག
དེའི་རྒྱལ་ཁམས་ཧྲིལ་བོ།
གནམ་སའི་ཁ་ཞེང་གསུར་སྤྱད་ཀྱི་དྲན་པའི་ཡོ་བྱད།
དེའི་སེམས་འགྱུ་ཡོངས་རྫོགས།
དོག་མོ་ས་ལ་སྐྱེས་པའི་མི་ཡུལ་གྱི་ཚེར་མ།
དེའི་ཐོགས་རེག་ཐམས་ཅད།
ཡིད་ཀྱི་འཕྲུལ་སྣང་ལ་ཕུགས་བསམ་གྱི་གཤོག་པ་ཐོགས།
ཉིན་མཚན་དུས་དྲུག་ལ་ཆད་སྣང་མེད་པར་འཕུར།
ཡིད་ནི་ད་སོ་མར་བསྐོལ་པའི་འོ་ཇ་ཚ་པོ་དེ་དང་འདྲ།
ཡིད་ལ་ཤར་བའི་འདས་དོན་དེ།
རྫོགས་མཐའ་མེད་པའི་མིག་ཆུ་ཞིག་ལ་འབྲེལ།
ཡིད་ལ་ཤར་བའི་འབྱུང་འགྱུར་དེ།
སླེབས་ཐབས་པའི་ལམ་བུ་ཞིག་ལ་འཐེན།
སྔོན་ཆད། ང་རང་སང་ཉིན་གྱི་དུས་ཚོད་ལ་དགའ།
ཕྱིས་སུ། ང་རང་ཁ་སང་གི་སྐར་མ་ལ་དགའ།
རིམ་བཞིན། ང་རང་ད་ལྟའི་སྐར་ཆ་དག་ལ།
དུང་བ་བླ་ལྷག་ཅིག་སྐྱེ་བཞིན་ཡོད།
སོས་རྒྱུ་མེད་པའི་འགྱོད་གདུང་གི་ཕོར་བའི་ནང་ལ།
སྲབ་མཐུག་མེད་པའི་རྨི་ལམ་གྱི་ཁ་བ་བར་མེད་དུ་འབབ།
ད་ནི་ཡིད་ཀྱི་ཕོ་བྲང་ལ།
ལྡེ་མིག་དང་བཅས་པའི་སྒོ་མོ་ཞིག་བཟོ་ཐབས་བྲལ།
ཡུལ་གྱི་གདུང་བ།
གོམ་གསུམ་ཕར་ལ་སྤོ་དུས།
རྐང་རྗེས་དང་ལོ་རྒྱུས་ཀྱི་གོ་རིམ་ཅི་ཡང་མི་གསལ།
གོ་གསུམ་ཕྱིར་ལ་སྤོ་དུས།
སྔར་བཞིན་རང་སེམས་ཀྱི་རྨི་ལམ་སྟོང་བ་དག་ཧ་ཅང་འཁྱགས།
རང་ཉིད་ཀྱི་མིན་པ་འདྲ་བའི་ཡ་ཆུང་གི་མུན་པ་དག
ག་དུས་དེངས་མཐའ་མེད་ཀྱང་།
རྣ་ཚར་ཁྲ་ཁྲ་བཏགས་པའི་ཕ་ཡུལ་གྱི་རི་ཆུ་ལ།
བཀྲག་མདངས་ལྷག་མ་ཞིག་འཚེར།
སྨྲ་བ་མེད་པའི་དགུན་ཁ་ཞིག་གི་ཕར་རྒྱབ་ན།
ཁ་མི་གྲག་མི་ཤེས་པའི་རླུང་བུ་དང་ཁ་བ་ཡོད།
དེ་བས། ལོ་ཟླ་གྲངས་མེད་ཅིག་ལ།
ཐ་སྙད་ཀྱི་མེ་བསྒོང་གིས་དྲོས་ཐབས་མེད་པའི་སེམས་འགྱུ་དག
སྒོ་ཁ་ཆག་པའི་ཁང་མིག་གྲུ་བཞི་ལས།
རང་རང་སར་བྲོས།
ཡིད་དང་ཡུལ།
ང་རང་གློག་སྐུད་ཀྱི་དྲ་རྒྱར་ཐོགས་པའི་བྱེའུ་ཆུང་ཞིག་ལ།
ཡིད་སྨོན་སྐྱེས་ཤིང་འཁྲེང་སེམས་ཤོར།
ཞོགས་པ་ཞིག་ལ།
རྟ་རྒོད་ཀྱི་རྟོད་ཐག་ཆད་པ་བཞིན།
ང་རང་སྒམ་ཚུགས་ཀྱིས་འགྱིང་བའི་རི་ཚོགས་ལ།
རེ་བཞག་ཇེ་ཆེར་སོང་།
ནམ་མཁའ་དང་སྤྲིན་པ་ནི།
ཕན་ཚུན་གྱི་སྐྱོ་སྣང་གདེགས་པའི་གྲོགས་པོ་རེད།
2021/10/12 མདོ་སྨད་ཐེམ་ཆེན་དུ་བྲིས།
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།