བཤེར་འཚོལ།
རྨི་ལམ་གྱི་མི་སེར།(ཞར་བཀོད་གཉིས་ཡོད)
རི་རབ་ཀྱི་གསེང་ལ་སྡེར་མོ་ཆེན་མོ་ཞིག་འཛུལ་ནས་ཡོམ་ཡོམ་འགུལ
དུས་དེར་བྱིས་པ་བརྒྱ་ཡིས་གླུ་དབྱངས་གཅིག་མགྲིན་གཅིག་ཏུ་བླངས
སྲང་ལམ་ན་བཟི་ནས་ར་རོར་གྱུར་བའི་ཁྱེད་ཀྱིས་རང་གི་བྲང་རྡུང་གིན་འདུག
ཁྱེད་ཀྱི་བྲང་ཁོག་ནི་དུར་ཁྲོད་དུ་གྱུར་ནས
དེ་རུ་མེས་པོ་ཞེས་པའི་རྒད་པོ་རྒད་མོ་དག་གཉིད་ལ་ཞུགས
མུན་པའི་ནང་ལ་ཡུལ་གྱར་དུ་སོང་བའི་སྙན་ངག་པ་འགའ
རྨི་ལམ་གྱི་མི་སེར་ལ་གྱུར
༢༠༢༤/༣/༢༥
ཁྱེད་དང་ང་།
ཁ་སང་ང་རང་མལ་ལས་སད་དུས་སུ
ཁྱེད་རང་མུན་ནག་ཁྲོད་ན་མེ་མདའ་ཐོགས
ང་ཡིས་ནངས་ཇ་ཁོ་ཧྥེ་འཐུང་བ་ན
ཁྱེད་ཀྱི་གདོང་ལ་ཁྲག་དམར་འཛར་འཛར་བྱེད
ང་རང་མོ་ཊ་བཏང་ནས་ལས་ཀར་ཞུགས་པ་ན
ཁྱེད་རང་ཐང་ལ་འགྱེལ་ནས་དབུགས་གྱི་རྒྱུ་བ་ཡོངས་སུ་འགག
ང་ནི་བཟའ་ཚང་ལྷན་དུ་ཉི་འོད་འོག་ནས་དྲོས་ཇར་རོལ་བ་ན
ཁྱེད་ཕྱོགས་ད་དུང་མེ་མདའ་མཆེད་དང་འགད་རྫས་འཕུར
ང་རང་དགོང་མོར་དཔེ་ཆ་ཉུང་ཙམ་བཀླགས་རྗེས་གཉིད
ཁྱེད་ཕྱོགས་ལྷིང་འཇགས་ཉི་འོད་ཤར་དང་དུ་བ་ནག་ནོག་འཕྱོ
ནམ་གུང་གསར་འགྱུར་གཅིག་ནི་གོ་དུས་ང་རང་གསང་སྤྱོད་ནང་ན་ཡོད
ཁྱེད་ཀྱི་མིང་ནི་ཐོ་ཡིག་ཞིག་ལས་དོར་རྗེས་དུར་ཁྲོད་རྡོ་ལེབ་ངོས་སུ་བརྐོ
དེ་ནས་དོར་མ་ཡར་ལ་འཐེན་ནས་ཆུ་ཡིས་མི་གཙང་རྣམས་ནི་བཤལ་བ་ན
ཁྱེད་ཀྱི་གསར་འགྱུར་དེ་ཉིད་དྲན་པའི་ནང་ནས་གད་སྙིགས་བཞིན་དུ་བསུབ་པ་འདྲ
༢༠༢༢/༢/༢༢
ནད།
བོད་ཀྱི་ནད་པ་སྒྱུ་འཕྲུལ་གྱི་རྟ་ཕོར་ཆིབས་པའི་སྐད་ཅིག་མ་དེར
ཁྲོ་ཁོ་བདུད་འདུལ་རྡོ་རྗེའི་སྤྲུལ་བ་ནི
བྱིས་པ་ལྐུགས་པ་ཞིག་གིས་གསོས་བའི་དུག་སྦྲུལ་ཉིད
དུག་སྦྲུལ་དེ་ངའི་འཕྲུལ་ཆས་ཀྱི་སྙིང་ངོས་ལ་འཁྱིལ
ངའི་འཕྲུལ་ཆས་ཀྱི་སྙིང་དེ་ནི་ཁྱོའི་སང་ཉིད་ཀྱི་རྩེད་ཆས་རེད
༼ ༽
གནས་སྐབས་འདིར་ང་རང་རྟགས་མཚན་གྱི་རྒྱ་རུ་ཚུད་ནས རང་ཉིད་ཀྱི་ཉེན་རྟོག་པར་ཡོངས་སུ་གྱུར། །
༢༠༢༥/༣/༣༢
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།