“ཁྱོད་གང་ན་ཡོད།”ངས་དྲིས་ལན་མེད་པ་ཤེས་བཞིན་དུ་ལོ་ངོ་མང་པོར་དྲི་བ་འདི་ཡང་ཡང་དྲིས་མྱོང་། རྗེས་སུ་རིམ་བཞིན“ཁྱོད་ད་ལྟ་འཇིག་རྟེན་འདི་ན་ཨེ་ཡོད།”ཅེས་ཀྱང་འདྲི་བཞིན་ཡོད།

　　ངས་ཁྱོད་ཐེངས་དང་པོར་རིག་དུས་རྩྭ་ཐང་ན་ལྕགས་ར་མེད་པས་ཕྱུགས་ཟོག་ཕན་ཚུན་གྱི་ས་ཐོག་ལ་འཆོར་གྱིན་འདུག ང་རི་སྒང་ན་ཡོད་པ་དང་། ཁྱོད་རི་དེའི་ཉིན་ངོས་ཀྱི་ལུང་མདོ་ན་བཞོན་པ་ལས་བབས་འདུག་པ་ངས་རིག་ཡོད། ཁྱོད་གཉིད་ལ་ཤོར་བ་ཡིན་ནམ་གང་ལྟར་ཁྱོད་ཀྱི་ནོར་ཁྱུ་ཉིན་ངོས་སུ་གྲམ་འདུག་པ་དེ་རིམ་བཞིན་འུ་ཚོའི་ས་མཚམས་ཀྱི་གདོང་ཁ་དེ་ནས་ཚུར་བཤར་ཡོང་སྟེ་ངའི་ནོར་ཁྱུ་དང་འདྲེས། ངས་ཟོག་རྫི་བུ་མོ་ཞིག་ཡིན་པ་ཤེས་པས་བསམ་གཟས་ནས་ནོར་ཁྱུ་མ་དེ་བཀག་པར་ཚུར་ཡོང་དུ་བཅུག་པ་ཡིན། དེ་ནས་ཁྱོད་ཀྱི་ནོར་ཁྱུས་ངེད་ཚོའི་རྩྭ་ཟོས། ཆུ་འཐུང་། ཕལ་ཆེར་ཆུ་ཚོད་གཅིག་ཡས་མས་ཀྱི་རྗེས་སུ་ཁྱོད་གློ་བུར་དུ་ཡར་དགྱེས་ནས་ཕར་བལྟ་ཚུར་བལྟ་ཞིག་བྱས་རྗེས་མྱུར་དུ་གཡོན་ལག་གིས་བཞོན་པའི་སྣ་དཀྱུ་བཟུང་། གཡས་ལག་གིས་སློག་པའི་ཐུ་བ་གཉིས་ཕར་ཚུར་དུ་བཤིག་ཙམ་བྱས་རྗེས་ལྡིང་ཐེངས་གཅིག་གིས་ལྡེམ་མྱུར་ངང་ཕར་བལྟས་ན་དགོད་བྲོ་བའི་གཡག་རྟོལ་རྔ་ལོ་དེའི་རྒྱབ་ལ་བཞོན། ཁྱོད་ཀྱི་རྟོལ་བུ་དེ་ཚུགས་ཀ་བཙོག་ནའང་མགོ་སྐྱོར(1)ཅན་ཞིག་ཡིན་པ་འདྲ། ཁྱོད་ཀྱིས་རྟོལ་བུ་དེར་ཡོབ་རྡུང་བྱེད་བཞིན་ངའི་ཕྱོགས་སུ་བརྒྱུགས་ཡོང་། དེ་དུས་ང་ཏག་ཏག་འུ་ཚོའི་ས་མཚམས་ཀྱི་གདོང་སྣ་དེ་ན་སྨི་གྲུ་བཞི་མ་གཅིག་ཙམ་ཡོད་པའི་ཕྱིང་སྟན་ས་ལ་ཐར་བཅད་དེ་སྟེང་དུ་བསྣར་ནས་དཔེ་ཆར་ལྟ་བཞིན་ཡོད། མ་རེད། གསལ་པོར་བཤད་ན་ངས་དཔེ་ཆ་ལག་ཏུ་བཟུང་ཡོད་ནའང་སྐབས་དེར་ཏག་ཏག་ཁྱོད་ལ་བལྟས་ནས་བསྡད་ཡོད། ཁྱོད་ངའི་མདུན་ཐད་ནས་འགྲོ་ཞོར་ང་ལ་འཁྱག་ཤུར་ཤུར་གྱི་མིག་ཞགས་ཤིག་འཕངས་པ་ནི་ངས་ཁྱོད་ཀྱི་ནོར་ཁྱུ་མ་བཀག་པར་འཁང་ར་བྱེད་པ་རེད།

　　སྲིབ་ངོས་ཀྱི་ངེད་ཚོའི་རྩྭ་སའི་སྤེན་མའི་གསེབ་ན་ད་དུང་རྩྭ་གང་འདོད་ཡོད་ལ། ཉིན་ངོས་ཀྱི་ཁྱོད་ཚོའི་ས་རུ་རྩྭ་ཟོས་ཚར་ཏེ་ཆེ་བཤད་བྱས་ན་ས་ལྡག་དགོས་པའི་ཚད་ལ་སླེབས་ཡོད་པས་ལོས་ཡིན། ཁྱོད་ཀྱིས་རྟོལ་བུའི་སྣ་ཕར་དཀྱོག་ཚུར་དཀྱོག་བྱས་ནས་ཕར་རྒྱུག་ཚུར་རྒྱུག་བྱས་ནའང་ཁྱོད་ཀྱི་ནོར་ཁྱུ་ཕྱིར་འགྲོ་འདོད་མེད་པར་གཡས་ནས་མདུན་དུ་དེད་ན་གཡོན་ནས་ཕྱིར་བུད་འགྲོ། དེ་ལྟར་ཁྱོད་ཀྱིས་དཀའ་ལས་གང་མང་མྱངས་སོང་། དེའི་ཕྱིར་ངས་དང་ཐོག་ཁྱོད་ཀྱི་ནོར་ཁྱུ་མ་བཀག་པར་ཅུང་ངོ་གནོང་ཞིང་འགྱོད་པ་སྐྱེས་ཏེ་ཉེ་སར་བརྟད་ཡོད་པའི་གཡིའུ་རོག་རོག་དེར་བཞོན་ནས་ཁྱོད་ལ་ནོར་ཁྱུ་ཕྱིར་འདེད་རོགས་བྱས། དྲང་མོར་བཤད་ན་ངས་འདི་ལྟར་བྱེད་པ་ནི་འགྱོད་བཤགས་ཁོ་ན་ཙམ་མ་ཡིན་པར་ཁྱོད་ལ་བཅར་འདོད་པའང་ཡིན། ཡིན་ནའང་ཁྱོད་ཀྱིས་ང་ལ་ཁ་ཡ་མི་བྱེད་ལ། དེ་བས་ཀྱང་ནོར་ཁྱུ་ཕྱིར་དེད་རོགས་བྱས་པར་བཀའ་དྲིན་ཙམ་ཡང་མ་ཞུས་པར་བུད་སོང་། ཡིན་ཡང་ང་ལ་མཚོན་ན་དགའ་འོས་པ་ཞིག་ནི་དེ་ནས་བཟུང་ཁྱོད་ཀྱི་ནོར་ཁྱུ་ལ་དབྱིངས་ཞུགས་པ་ལྟར་བཀག་བཀག་ལ་མ་བསྡད་ན་ངེད་ཚོའི་སར་ཤོར་ཡོང་ལ། སྔ་མོ་རྡང་ལས་ཕུད་མ་ཐག་ཐད་ཀར་དུ་ངེད་ཚོའི་སར་བསྙེགས་ཡོང་། དེ་ལྟར་ཁྱོད་ཀྱི་ནོར་ཁྱུ་ངེད་ཚོའི་ས་ལ་ཐེངས་མང་ཤོར་བ་དང་། ངས་ཀྱང་ཐེངས་དུ་མར་ཁྱོད་ལ་ནོར་ཁྱུ་ཕྱིར་འདེད་རོགས་བྱས་ནའང་ཁྱོད་ཀྱིས་སྔར་བཞིན་ང་ལ་ཁ་ཡ་མི་བྱེད། ཐེངས་ཤིག་ངས་ཁྱོད་ལ་ནོར་ཁྱུ་ཕྱིར་འདེད་རོགས་བྱེད་བཞིན་ཁྱོད་ཀྱི་མིང་ལ་ཅི་ཟེར་དྲིས་པར་ཁྱོད་ཀྱིས་སྔར་བཞིན་ངོ་གནག་ནས་ཁ་མི་གྲགས་པས་ངས་ཀྱང“ཁྱོས་ཁ་མི་གྲགས་ན་རྩྭ་ཁྱིགས(2)ལ་གཡག་གཅིག་བྱིན་ཨ།”ཞེས་བཤད་པར་ཁྱོད་ཀྱིས་ཀྱང་ཀུ་རེ་ཡིན་པ་ཤེས་ཏེ“ཁྱོད་རང་གིས་བསལ་ནས་བཟུང་ཆོག”ཟེར།

　　“ད་ཁྱོས་ཁ་གྲགས་སོང་བས་ངས་རྩྭ་ཁྱིགས་མི་འཛིན།”

　　“ཧ་ཧ།”

　　“ད་ཁྱོད་བགད་སོང་བས་ཕྱིན་ཆད་ངེད་ཚོའི་ས་ཐོག་ཏུ་ནོར་འཚོས་ཆོག”

　　“ཧེ་ཧེ། ཁྱོད་འདི་ངོ་མ་མི་སྐྱིད་པོ་ཞིག་རེད།”

　　“ཡིན་ཡ། དེའི་ཕྱིར་ཁྱོས་སྔ་མོ་ནས་ང་ལ་ཁ་གྲགས་ན་འགྲིག”

　　“……”

　　འུ་གཉིས་དེ་ལྟར་ངོ་ཤེས་སུ་གྱུར། དེ་ནས་བཟུང་འུ་གཉིས་ཉི་མ་རེ་རེར་གདོང་སྣ་དེ་ནས་མཉམ་དུ་བསྡད། ཁྱོད་ལ་འོ་དྲི་དང་ལྕི་དྲི་འདྲེས་མའི་དྲི་མ་ཞིག་ཡོད། ང་དྲི་མ་དེ་ལ་ཤིན་ཏུ་དགའ། འུ་གཉིས་ཀས་ཧ་ཧ་ཧོ་ཧོའི་ངང་ཉི་མ་བཏང་། དཔེར་ན་ངས་ཁྱོད་ལ“གལ་ཏེ་ཕོ་མོ་གཉིས་ཉིན་དཀར་གསང་སྟབས་ཀྱིས་ཐུག་དགོས་ན་དམའ་སའི་གཞོང་ཁུག་བཟང་ངམ་མཐོ་སའི་རི་སྒང་བཟང་།”ཞེས་དྲིས།

　　ཁྱོད་ཀྱིས“ང་ཞི་ལུ་ཞིག་ལ་ཉིན་དཀར་གསང་སྟབས་ཀྱིས་ཐུག་མ་མྱོང་བས་གང་བཟང་མི་ཤེས། ཧེ་ཧེ། ཡི་གེ་ཤེས་མཁན་འདི་ཚོས་ཡ་མཚན་ཏག་ཏག་བཤད་ཀི”ཟེར།

　　“འུ་གཉིས་འདི་རུ་གསང་སྟབས་ཀྱིས་ཐུག་ཡོད་པ་མིན་ནམ།”

　　“འདི་གསང་སྟབས་མ་རེད།”

　　“དེས་ན་འུ་གཉིས་ཉི་མ་རེ་རེར་མཉམ་དུ་བསྡད་ཡོད་པ་འདི་གཞན་གྱིས་རིག་ན་ཨེ་འགྲིག”

　　“དེ་མི་འགྲིག མི་རྣམས་ལ་བཤད་རྒྱུ་མང་། ད་རུང་ཇེ་ཆེར་བཏང་ནས་བཤད་རྒྱུར་དགའ།”

　　“གཞན་ལ་ཤེས་སུ་འཇུག་འདོད་མེད་པར་ཐུག་ན་དེ་གསང་སྟབས་མིན་ནམ།”

　　“ཧེ་ཧེ། དེ་ལྟར་བཤད་ན་དེ་ཡང་བདེན་པ་འདྲ། དེས་ན་ཁྱོས་བལྟས་ན་མཐོ་སའི་རི་སྒང་བཟང་ངམ་དམའ་སའི་གཞོང་ཁུག་བཟང་།”

　　“འུ་གཉིས་ངོ་མ་ཤེས་གོང་ཁྱོད་རྒྱུན་པར་གཞོང་ཁུག་ཏུ་ཡོད་པ་ངས་རིག་འདུག ང་རི་སྒང་དུ་ཡོད་པ་ཁྱོས་རིག་ཨེ་མྱོང་།”

　　“རིག་མ་མྱོང་།”

　　“དེས་ན་དེ་རེད།”

　　“ཧེ་ཧེ……”ཁྱོད་ཀྱིས་འདང་བརྒྱབ་ཀྱིན་བརྒྱབ་ཀྱིན་བགད་ནས་མཚམས་མི་འཇོག

　　ངས་ཁྱོད་ལ“དེ་འདྲ་དགོད་རྒྱུ་ཅི་ཡོད།”ཅེས་དྲིས་པར་ཁྱོད་ཀྱིས“ཁྱོད་འདི་ཡིད་ལ་མི་དྲན་དགུ་དྲན་བྱེད་མཁན་མི་ཡ་མཚན་ཞིག་རེད།”ཟེར་ནས་མུ་མཐུད་དུ་བགད།

　　ཉིན་ཞིག་ཁྱོད་ཀྱི་ནོར་ཁྱུའི་རྗེས་ན་ཞི་ལུ་ཆུང་ཆུང་རྣ་ཅོག་གཉིས་ཀ་སྒྲེང་འདུག་པ་ཞིག་ཡོད། དེས་ནོར་ཁྱུ་མ་ཁོགས་པར་ངེད་ཚོའི་ས་ཐོག་ལ་ཤོར། ཕྱིར་དེད་ཀྱང་འདེད་མ་ཐུབ། ངས་དེ་ལ་ནོར་ཁྱུ་ཕྱིར་མ་དེད་ན་ཆོག འདིར་ཤོག་དང་ཁ་བརྡ་བྱེད་ཅེས་བཤད་དེ་ཁ་བརྡ་འདྲ་མིན་གྱི་ཞོར་དུ་ཞི་ལུ་དེ་ཁྱོད་ཀྱི་ཅི་ཞིག་ཡིན་པ་དང་། དེ་རིང་ཁྱོད་མ་ཡོང་བའི་རྒྱུ་མཚན་དྲིས། ཁོས་བཤད་ན་ཁོ་ཁྱོད་ཚང་གི་ཁྱིམ་མཚེས་ཚང་གི་ཡིན་ལ། ཁྱོད་དེ་རིང་རྫོང་ཐོག་ལ་བུད་སོང་ཟེར། ངས་རྒྱུ་མེད་རྐྱེན་མེད་དུ་ཞི་ལུ་རྣ་སྒྲེང་དེ་ལ་ཚིག་པ་ཟོས་ཏེ་ནོར་ཁྱུ་ཕྱིར་འདེད་རོགས་བྱས་ནས་གཅིག་པུར་བསྡད། ཉིན་གང་བོར་ཁྱོད་ཀྱི་ངོ་གདོང་མིག་ལམ་དུ་ཤར། ཁྱོད་ཀྱི་དགོད་སྒྲ་རྣ་ལམ་དུ་གྲགས། ངས་བསམས་ན་ཉིན་དེར་ཁྱོད་ཀྱིས་ཀྱང་ང་ཡང་ཡང་ཡིད་ལ་ཤར་ཡོད་སྲིད།

　　དེ་དུས་སྡེ་བ་སོ་སོའི་བར་ན་ས་མཚམས་ཡོད་ཀྱང་སྡེ་བའི་ནང་ཁུལ་དུ་རྩྭ་ས་ཐུན་མོང་གིས་བེད་སྤྱོད་བཞིན་ཡོད་པས་རྩྭ་ཆུ་ལ་དེ་འདྲའི་སེར་སྣ་མེད། དེའི་ཕྱིར་ཁྱོད་ཀྱི་ནོར་ཁྱུ་ལ་ངེད་ཚོའི་རྩྭ་བཟའ་རུ་བཅུག ཆུ་འཐུང་དུ་བཅུག འུ་གཉིས་ཉི་མ་རེ་རེར་གདོང་སྣ་དེ་རུ་མཉམ་དུ་བསྡད། ངས་བཅིངས་འགྲོལ་དམག་གི་ཞྭ་མོ་ལྗང་ཁུ་ཞིག་དང་རྒྱ་ལྭ་སྔོན་པོ་ཆ་ཚང་ཞིག་གོན་ཡོད་ལ། ང་མཚམས་རེར་སྐྱིལ་ཀྲུང་དུ་བསྡད་པ་དང་མཚམས་རེར་རྐང་པ་མདུན་ལ་བསྲིངས་ནས་བསྡད། མཚམས་རེར་གློ་ཉལ་བྱས་ནས་བསྡད། ཁྱོད་ཀྱིས་ཙད་དང་ཆར་ཆུས་ཡུན་རིང་གཙེས་ཏེ་མདོག་ཤོར་འདུག་པའི་ཐེན་ཅིན་ཧྲིན་ཞི་ཧྥུ(盛锡福)ཞྭ་མོ་བཟོ་གྲྭ་ནས་ཐོན་པའི་བོད་ཆས་ལི་མོ(礼帽)སྐྱ་སྐྱ་ཞིག་དང་། འབྲོག་པ་ཚོས“སྐྱི་ཤུན”ཟེར་བའི་མཚམས་མཚམས་ན་སྤུ་སད་ནས་སྐྱི་མོར་ཐུག་འདུག་པའི་དབྱར་སློག་རྙིང་བ་ཞིག ལྕི་འདམ་གྱིས་མདོག་བསྒྱུར་འདུག་ཅིང་། ཡུལ་འདིའི་འབྲོག་པ་ཚོས“ཧེ་ཁ་དཀར”དུ་འབོད་པའི་ལྷམ་མགོ་སྔོན་པོ་འགྱིག་མཐིལ་ཅན་ཞིག་གོན་ཡོད། ཁྱོད་ཀྱིས་རྐང་བ་གཉིས་ཀ་ཐོག་མཐའ་བར་གསུམ་དུ་ཨོང་ཤའི་ཞབས་ལ་མནན་ནས་ཙོག་འདུག འུ་གཉིས་མཉམ་དུ་བསྡད་ནས་ཅི་ཞིག་གླེང་བཞིན་པ་མི་ཤེས་མོད། ངས་ཁྱོད་ཀྱི་འོ་དྲི་དང་ལྕི་དྲི་འདྲེས་མའི་དྲི་མ་དེ་ཚིམས་པ་མེད་པར་མྱངས་ན་སྣང་བ་ཧ་ཅང་སྐྱིད་པ་དང་། ཉི་མ་ནི་ཧ་ཅང་ཐུང་དྲགས་པའི་ཚོར་སྣང་ཞིག་ཡོད། ངས་བསམས་ན་ཁྱོད་ཀྱང་དེ་འདྲ་ཡིན་སྲིད།

　　ང་ཁྱོད་ལ་བཅར་དོན་ཁྱོད་ཀྱིས་ཀྱང་གསལ་པོར་ཤེས་སྲིད། དེའི་ཕྱིར་ཉིན་ཞིག་ངས་ཀྱང་གཞི་ནས་སྦ་གསང་མེད་པར“ང་དོ་དགོང་ཁྱོད་སར་ཡོང་ན་ཨེ་ཆོག”ཅེས་དམར་རྗེན་དུ་བཤད། ཁྱོད་ཀྱི་མཁུར་ཚོས་དམར་མདངས་ཅན་གྱི་ངོ་གདོང་དེ་ལ་སྔར་ལས་དམར་མདངས་ཤིག་རྒྱས་ནས“མི་ཆོག”ཟེར་བཞིན་མགོ་མར་བསྒུར་པ་དང་། དེ་ནས་རིམ་བཞིན་ཡར་དགྱེས་ཏེ་དངན་པ་རིང་པོ་ཞིག་འཐེན། རྒྱང་རིང་དུ་ལྟ་བཞིན“མི་ཆོག”པའི་རྒྱུ་མཚན་ལྟ་བུའི་ཁྱོད་ཚང་གི་གཏམ་རྒྱུད་འདི་བཤད།

　　ཉིན་ཞིག་གི་དགོང་མོར་ནམ་རྒྱུན་ང་རྒྱལ་ཅན་གྱི་སྡེ་དཔོན་ཚང་གི་ཞི་ལུ་ཁྱི་ཁ་གཙེ་རུ་འགྲོ་བའི་ལམ་ནས་ཁྱོད་ཚང་གི་སྒོ་ཁྱི་ལ་གཉོགས། ཁྱོད་ཀྱི་ཨ་ཕ་སྒོར་བུད་ནས་ཞི་ལུ་དེ་དང་ཁ་འཛིང་བྱས་ཤིང་། མཚམས་ཤིག་ལག་འདྲེས་སོང་། མ་བསམས་ས་ནས་ཞི་ལུ་དེ་ཁྱོད་ཀྱི་ཨ་ཕའི་ལག་ལ་ཞ(3)སོང་། དེ་ནས་ཁྱོད་ཚང་གཉེན་ཉེ་གཙོ་བོ་ཁྱིམ་ཚང་འགའ་དང་བཅས་རུ་བྲོས་བརྒྱབ་ནས་རྨ་ཆུའི་ཕར་ཁའི་སྡེ་བ་དེར་ཡོང་། དེ་ཡང་རུ་བྲོས་ཟེར་ཡང་དོན་དངོས་སུ་སྡེ་མི་བསམ་ཤེས་རྣམས་ཀྱིས་གྱོད་ཇེ་ཆེར་མི་འགྲོ་བའི་ཆེད་དུ་གཟུ་བཤད་ནས་གྱོད་འགྲིག་རེག་བར་དུ་ཁྱོད་ཚང་ཉེ་འབྲེལ་གཙོ་བོ་དང་བཅས་པ་ཕྱི་ལ་འགྲོ་རུ་བཅུག་པ་རེད། དེ་ནས་གཟུ་བཤད་དེ་གྱོད་འགྲིག་ལ་ཡོད་དུས་དུས་འགྱུར་བྱུང་། དེ་ནས་ཆབ་སྲིད་ལས་འགུལ་རབས་དང་རིམ་པའི་ཁྲོད་དུ་ཁྱོད་ཚང་གི་གྱོད་ཡ་སྡེ་དཔོན་ཚང་ཕལ་ཆེར་ཤུལ་མེད་དུ་བཏང་། འབྲོག་སྡེ་མང་པོའང་ཡར་གཅོལ་མར་གཅོལ་བྱས་ནས་མཇུག་མཐར་ཁྱོད་ཚང་ས་འདིར་ལྷུང་། ལོ་འདི་གར་ཅུང་ཙམ་ལྷོད་ལ་བབས་པས་ཁྱོད་ཚང་གིས་སྔོན་གྱི་རང་སྡེ་ཤ་ཉེ་དང་བཅས་པ་རྩད་ཆོད། ཁྱོད་ཚང་གི་གྱོད་ཡ་སྟེ་སྔར་གྱི་སྡེ་དཔོན་ཚང་ལ་ད་ལྟ་ཤུལ་མེད་ནའང་ཁྱོད་ཚང་གིས་དགོན་པ་ལ་འགྱེད་བཏང་ནས་བཤགས་པ་བྱས། སྡེ་མི་ཚོས་ཀྱང་དེ་མ་གཏོགས་ཅི་བྱེད། ཕྱིར་ཡོང་བར་དགའ་བསུ་བྱེད་ཟེར། ད་རེམ་པར་ཕྱིར་མ་སོང་ན་ཕྱུགས་ཟོག་དང་རྩྭ་ས་སྒེར་ལ་བགོས་རྗེས་འགྲོ་ས་མེད། ཡང་བྱིས་པ་ཚོས་གཉེན་སྒྲིག་བྱས་ན་འགྲོ་ཐབས་མེད། དེའི་ཕྱིར་ཕྱོགས་གཉིས་ཀའི་གོང་རིམ་ལ་རེ་ཞུའི་ཡི་གེ་གྲངས་མེད་བྲིས་མཐར་ཉེ་ལམ་ཆོག་མཆན་ཐོབ་སོང་ལ། ཁྱོད་ཚང་གི་རྒ་རྒས་ཚོ་ལྷ་སར་སོང་བ་དེ་ཕྱིར་ཐོན་མ་ཐག་འགྲོ་རྒྱུ་རེད་ཟེར།

　　ཁྱོད་ཀྱིས་ཅུང་སྐྱོ་ཉམས་ངང“དེའི་ཕྱིར་འུ་གཉིས་ལ་མཐའ་མེད་པ་གསལ་པོ་ཡིན། མཐའ་མེད་པའི་རྩེད་མོ་ཞིག་གིས་ཅི་བྱེད།”ཟེར།

　　བལྟས་ཀྱིན་བལྟས་ཀྱིན་ཁྱོད་ལ་ཡག་མོ་སྒོ་འདི་དང་གན་ཡོད་ཅེས་བཤད་མི་ཤེས་ལ། གཞན་གྱི་མིག་ལམ་དུ་ཁྱོད་ནི་སྤྱིར་བཏང་གི་བུ་མོ་སྐྱ་ལོག་སྔོ་ལོག་དེ་འདྲ་ཡིན་ཡང་སྲིད། འོན་ཀྱང་ངས་བལྟས་ན་ཁྱོད་ནི་ཁ་ཆེ་གདོང་ཉག་ཐོད་འབུར་སོགས་ཀྱི་སྐྱོན་ཅི་ཡང་བཙལ་རྒྱུ་མེད་པར་ཡོད་ཚད་ཧ་ཅང་ཡིད་དུ་འོང་བ་ཞིག་ཡིན་པ་དང་། ང་ད་རུང་ཁྱོད་ཀྱི་འོ་དྲི་དང་ལྕི་དྲི་འདྲེས་མའི་དྲི་མ་དེ་ལ་ཤིན་ཏུ་དགའ།

　　ངས་ཀྱང་དངན་པ་ཞིག་འཐེན་ནས“ཁྱོད་ཚང་ཡིན་གཅིག་མིན་གཅིག་གིས་ཕྱིར་འགྲོ་དགོས་དོན་ཅི་ཡིན།”ཞེས་བཤད།

　　“རེད་ཡ། ངེད་མིང་སྲིང་ཚང་མ་ས་འདིར་སྐྱེས་པ་ཡིན་པས་འགྲོ་འདོད་མེད་ནའང་ལོ་ལོན་རྒན་རྒོན་ཚོས་སྐྱེ་ས་སྐྱེ་ཡུལ་དྲན་ནས་མི་བཟོད་ཀི། རུས་པ་སྤར་བ་གང་བོ་ས་མཐའ་འདི་རུ་མི་འཇོག་ཁོ་ཐག་ཡིན་ཟེར་ནས་ཨུ་ཚུགས་བྱས་པས་ང་ཚོར་ཡང་ཐབས་བཀོད་མེད།”

　　“ཁྱོད་ཚང་འགྲོ་ས་དེའི་མིང་ལ་ཅི་ཟེར།”

　　“ངས་མི་ཤེས། གང་ལྟར་ཐག་རིང་ཞིག་ཡིན་རབས་ཟེར། ཨ་ཕ་ཨ་ཁུ་དང་ཕུ་བོ་སོགས་ས་དེར་ཐེངས་འགར་སོང་། དབྱར་གཞུང་ཉི་མ་རིང་དུས་སྐྱ་རྐྱང(4)གིས་སོང་ན་ཉིན་གང་གིས་འགྲོ་དགོས། རུ་བཀལ་ནས་སོང་ན་བར་ཞག(5)གཉིས་བྱེད་དགོས། ཉིན་ལམ་གསུམ་རེད་ཟེར།”

　　“དེས་ན་ངོ་མ་ཐག་རིང་རེད། ཁྱོས་ས་དེ་ཁུལ་དང་རྫོང་གང་གི་མངའ་ཁོངས་ཡིན་པ་དང་། སྡེ་མིང་ལ་ཅི་ཟེར་དྲིས་ཤོག་དང་།”

　　“ཧེ་ཧེ། དེ་དྲིས་ནས་ཅི་བྱེད། ཁྱོད་ང་ལ་ལྟ་རུ་ཡོང་བསམ་པ་ཨེ་ཡིན།”

　　“གལ་ཏེ་ཁྱོད་འཐད་པ་ཡིན་ན་ཡོང་མི་ཐུབ་པ་ཅི་ཡོད།”

　　“ཀུ་རེ་ཡིན།”

　　“ཁྱོས་ས་འདིར་དྲན་ཤིང་ཞིག་འཇོག་འདོད་མེད་དམ། ཡང་ན་ཁྱོད་ལ་སྔར་ནས་དྲན་ཤིང་ཞིག་ཡོད་ཀྱང་སྲིད།”

　　ཁྱོད་ཀྱིས་མགོ་མར་བསྒུར་ནས་རྩྭ་རྐང་གཅིག་ཡང་ཡང་མཛུབ་མགོར་དཀྲིས་ཤིང་། དེ་ནས་དུམ་བུ་དུམ་བུར་གཅོད་བཞིན“སྔོན་ཆད་མེད་ལ་ཕྱིན་ཆད་འཇོག་འདོད་ཀྱང་མེད།” ཟེར།

　　ང་ཁྱོད་ཀྱི་གམ་ལ་བཅར་ཙམ་བྱས་ཏེ“དེ་འདྲ་མ་བྱེད། ང་དོ་དགོང་ཡོང་ཁོ་ཐག་ཡིན།”ཞེས་བཤད།

　　“མི་ཆོག་ཨ།”

　　“ཡོང་ནི་ཞིག་ཡོད་དམ།”

　　“མེད། ངོ་མ་མེད།”

　　“དེས་ན་ང་ཡོང་ཁོ་ཐག་ཡིན། ཁྱོད་ཚང་རུ་སྐོར་གྱི་ཚུར་སྣེའི་གམ་ན་རས་གུར་རྟ་སྒ་མ་ཅན་གན་ཡིན་པ་ངས་ཤེས་ཡོད།”ངས་རི་འདབས་ཀྱི་ཡག་བཤད་བྱས་ན་མེ་ཏོག་འདབ་བརྒྱ་མ་ཞིག་དང་འདྲ་བར་སྒོར་རེ་འདུག་པའི་ཁྱོད་ཚོའི་རུ་སྐོར་ལ་མཛུབ་མོ་བཙུགས་ཏེ་དེ་ལྟར་བཤད།

　　ཁྱོད་ཀྱིས་ངས་མཛུབ་མོས་བསྟན་ཕྱོགས་མིག་གིས་དེད་དེ་ཁྱོད་ཚོའི་རུ་སྐོར་ལ་ལྟ་བཞིན“ཁྱོས་ཅི་ལྟར་ཤེས།”ཟེར།

　　“ངས་དབྱར་ཐོག་འདི་གང་བོར་ཁྱོད་མིག་གིས་འཚོས་ནས་བསྡད་པ་ཡིན།

　　“ཧོ་ཧོ་ཡ།”

　　“རས་གུར་གན་ཁྱོད་ཀྱི་ཉལ་ས་ཨེ་ཡིན།”

　　“ང་གན་གི་ནང་དུ་ཉལ་ན་ཁྱི་ཁ་གཙེ་མཁན་ཚོས་ནུབ་གང་བོར་གཉིད་དུ་འཇུག་སྲིད་དམ། ཧེ་ཧེ། གན་ངའི་ཕུ་བོའི་ཉལ་ས་རེད།”

　　“ཁྱི་ཁ་གཙེ་མཁན”ཞེས་པ་གོ་མ་ཐག་ན་ནིང་དགུན་གནང་སྐབས་སུ་རུ་སྐོར་ནང་གི་ཕོ་གསར་འགས་ང་ཁྲིད་ནས་རྩེ་ཆུའི་ཕར་ཁའི་རུ་སྐོར་དེར“ཁྱི་ཁ་གཙེ་བའམ”དམར་རྗེན་དུ་བཤད་ན་ངོ་ཤེས་མི་ཤེས་དང་། འབྲེལ་བ་ཡོད་མེད་གཉིས་ཀའི་བུད་མེད་བཙལ་དུ་སོང་བའི་ངང་ཚུལ་དེ་ཡིད་ལ་དྲན། ངེད་ཚོའི་ནང་གི་གཅིག་ལ་དེ་ན་དགའ་རོགས་ཤིག་ཡོད་པས་ཐད་ཀར་དེའི་སར་བུད་སོང་། གཞན་པ་ཚོར་དམིགས་ཡུལ་ཅི་ཡང་མེད་པས་ཁྱིམ་ཚང་རེ་རེའི་སྒོ་བར་ནས་ཁྱིམ་ལ་ཕུ་རུང་ནང་ནས་ལག་སྒྲོན་བཀར་ཏེ་བུ་མོ་ཁེར་ཉལ་རེ་དང་། ཡང་ན་གམ་ལ་སོང་ན་ཅུང་སྟབས་བདེ་རེ་ཨེ་ཡོད་བལྟས། སྦྲ་ངན་ཆུང་ཆུང་ལྔ་སྲུང་ཁྱིམ་ཚང་ལོས་ཡིན་བསམ་པ་ཞིག་གི་ཁྱིམ་གཡས་ན་ཨ་མ་ལོས་ཡིན་བསམ་པའི་བུད་མེད་དར་མ་ཞིག་ཉལ་ཡོད་པ་དང་། གཡོན་ཕྱོགས་ན་བུ་མོ་ལོས་ཡིན་བསམ་པའི་ཞི་མོ་ལོ་ཉི་ཤུ་ཡས་མས་ཤིག་ཉལ་ཡོད། རོགས་པ་ཚོས་ང་ལ་ཧ་ཅང་ཤ་ཚ་བ་ལྟར་ཁྱོད་སོང་ཟེར། ང་རྐང་འཇབ་ལག་འཇབ་ཀྱིས་ཁྱིམ་ལ་འཛུལ་ནས་ཞི་མོ་དེའི་གམ་ལ་སོང་། སར་ལོག་སྟེ་མོའི་གོང་བའི་ཁ་ནས་འཐེན་ཙམ་བྱས་མ་ཐག་མོ་གློ་བུར་དུ་ཡར་དགྱེས་ནས་སྐད་གསང་མཐོན་པོས“ཨ་མ། གདོན་རྫས་འདིས་ང་ཉལ་དུ་མི་འཇུག་གི”ཟེར།

　　ཨ་མས་ཀྱང“ཡུགས་ས་འདི་ཚོ། ཁྱི་སྐྱག་འདི་ཚོ……”ཟེར་ནས་འུར་རྒྱག་བཞིན་ཡར་དགྱེས་པ་དང་། ངའི་སྟེང་ལ་ལག་སྒྲོན་བཀར་ཏེ་ལྷམ་ཀྲད་ཡ་གཅིག་གཡུགས་པ་ཏག་ཏག་ངའི་རོ་སྟོད་དུ་ཁེལ། ན་ཟུག་མ་བཟོས་ཀྱང་བརྙས་བཅོས་དཔེ་མེད་རེད། དེ་བས་ཀྱང་རྣམ་རྟོག་ཟ་བ་ཞིག་རེད། འདྲེ་མོ་དེས་ད་དུང་ལྷམ་ཀྲད་ཡ་གཅིག་བཙལ་ནས་རྒྱག་རྩིས་བྱས། ང་བྲོས་ནས་སྒོར་བུད་མ་ཐག་རོགས་པ་ཚོ་ཧབ་ཆ་དིར་རེར་སོང་། མ་གཞི་ཁོ་ཚོ་སྨྱོན་པ་ལྟ་བུའི་མ་སྨད་འདི་གཉིས་ལ་སྔར་ནས་ཆ་རྒྱུས་ཡོད་པ་དང་། དེ་རིང་བསམ་གཟས་ནས་ང་ལ་ངོ་ཚ་ཉོ་རུ་བཅུག་པ་ཡིན་འདུག

　　ཡང་རོགས་པ་གཅིག་རས་གུར་ཞིག་གི་ནང་ན་བྱིས་པ་རུམ་པའི་ཞི་མོ་ཞིག་ཡོད་པ་དེའི་གམ་ལ་སོང་། ང་ཚོས་ཕྱི་རོལ་ནས་ཉན་བསྡད། དང་པོ་ཁོང་གཉིས་ཀས་ཤབ་ཤུབ་མང་པོ་བཤད་དེ་ཕར་བལྟས་ན་རེ་བ་ཡོད་པ་འདྲ་མོད། མཚམས་ཤིག་ཞི་མོ་དེའི་རུམ་གྱི་བྱིས་པ་དེ་ངུ་ཙམ་བྱས་པ་དང་མོས་གློ་བུར་དུ“ཁྱོད་དེ་འདྲ་ཚུར་ལ་ནུར་ནས་ཅི་བྱེད། ཨེན་ཙམ་མིན་ན་བྱ་བྱིས(6)འདི་གཅིར་སོང་། ད་སོང་སོང་། ང་སང་ཉིན་སྔ་མོ་སྔ་མོར་ལང་དགོས། གཉིད་དུ་ཆུགས།”ཟེར།

　　ཞི་ལི་དེས“དེ་འདྲ་མ་བྱེད། གླིང་གེ་སར་འདྲ་འདྲ་ང་མ་རེད། སྨན་འབྲུག་མོ་འདྲ་འདྲ་ཁྱོད་མ་རེད……”ཟེར་ནས་གཏམ་ཁ་ལྕེ་ངོམ་རྩིས་བྱས།

　　ཞི་མོ་ཚིག་པ་ཟོས་ཏེ“ཨ་ཙི། འདི་ཅི་འདྲའི་མི་ཡ་མཚན་ཞིག་རེད། དེ་འདྲ་སུས་རེད་ཟེར་གྱིན་འདུག”ཟེར་བ་ན་ཞི་ལུ་དེར་ཁ་གྲགས་རྒྱུ་མེད་པར་གྱུར་པ་དང་། ང་ཚོས་བསྲན་མ་ཐུབ་པར་ཧབ་ཆ་དིར་རེར་སོང་།

　　མཇུག་མཐར་ང་ཚོ་སུ་ལའང“ལག་ཡོང”མ་ཡོད་པས་ངེས་པ་དོན་གྱིས་རུ་སྐོར་དེའི་སྒོ་ཁྱི་རྣམས་ཀྱི་ཁ་གཙེས། མཚམས་ཤིག་ཁྱི་དེ་དག་ཀྱང་ཐང་ཆད་པ་ལྟར་ང་ཚོས་ཅི་ལྟར་ཁ་ཤུ་བཏབ་པ་དང་། ལྕགས་སྐོར་གཡུགས་ནའང་ཁ་ཡ་མི་བྱེད་པར་རང་རང་གི་སྒོ་འགྲམ་དུ་སོང་སྟེ་མཆུ་ས་ལ་བཞག་ནས་ཉལ་འདུག ང་ཚོའང་དེ་ལ་སྤྲོ་བ་ཡལ་ཏེ་ཕྱིར་ཡོང་བའི་ལམ་དུ་ང་ཚོ་དང་འདྲ་བར་ཁྱི་ཁ་གཙེ་རུ་འགྲོ་མཁན་གཡག་བཞོན་འགའ་དང་ཕྲད། དགོང་མོ་དེར་ཟླ་འོད་ཤིན་ཏུ་གསལ། ངེད་ཚོ་ཕན་ཚུན་ངོ་ཤེས་པས་ས་ལ་བབས་ནས་ཁ་བརྡ་བྱས་པ་དང་། དུ་འཐེན་ཚོས་དུ་བ་འཐེན། མཚམས་ཤིག་ཚང་མ་གྲང་ནས་ཁོག་འདར་བརྒྱབ་པས་ན་སུ་ཞིག་གིས་འཇུ་རེས་བྱེད་པའི་གྲོས་མགོ་བཏོན། དེ་ལྟར་ཤིན་ཏུ་རིང་ཞིང་ཧ་ཅང་འཁྱག་པའི་དགུན་ཁའི་མཚན་མོ་རེ་རེ་ཕར་ལ་སྐྱེལ་ཐབས་བྱས།

　　ངའི་ཡིད་ལ་གེ་སར་འབྲུག་མོ་གླེང་སྟེ་ཁ་ལྕེ་ངོམས་ནའང་ཁ་གྲགས་རྒྱུ་མེད་པར་བཏང་བའི་ཞི་ལུ་དེ་དྲན་ནས་ཁེར་དགོད་ཅིག་ཤོར་བ་དང་། དེ་ནས“ངས་བསམས་ན་ཁྱོད་ཀྱི་ཕུ་བོ་ཁྱི་ཁ་གཙེ་རུ་སོང་རྗེས་རས་གུར་གན་སྟོང་བ་ཡིན་སྲིད། དོ་དགོང་འུ་གཉིས་གན་གི་ནང་དུ་ཐུག”ཅེས་བཤད།

　　ཁྱོད་ཀྱིས“ངའི་ཕུ་བོས་ལོ་ལོན་ཚོ་ཁྲིད་ནས་ལྷ་སར་བུད་སོང་།”ཟེར།

　　“དེས་ན་ལྷག་ཏུ་འགྲིག དོ་དགོང་ང་ཡོང་ཁོ་ཐག་ཡིན་ཨ།”

　　“ཧེ་ཧེ། ཁྱོད་སློབ་མ་ཞིག་ཁྱི་ཁ་གཙེ་རུ་སོང་ན་ཆོག་གམ།”

　　“ཁྱོས་ང་སློབ་མ་ཡིན་པ་ཅི་ལྟར་ཤེས།”

　　“ཁྱོད་ཀྱི་ལག་གི་དཔེ་ཆ་དེ་སློབ་མའི་བསླབ་དེབ་མིན་ནམ།”

　　“འོ། ཁྱོས་ཡི་གེ་ཤེས་སམ།”

　　“ཨ་ལ་པ་ལ་ཤེས། མང་པོ་མི་ཤེས། ལོ་གཉིས་ཙམ་ལ་རུ་ནང་གི་སློབ་གྲྭར་འགྲོ་ཁུལ་བྱས། དེ་ནས་ང་ཚོའི་དགེ་རྒན་དེ་སྔོན་ཆད་གྲྭ་པ་ཡིན་པའི་སྟེང་ལ་ད་ལྟ་ཁ་འཁྲུག་བཤད་སོང་ཟེར་ནས་ཞྭ་བསྐོན་ཏེ་འཐབ་རྩོད་བྱས། དེ་ནས་སློབ་གྲྭའང་འཚོགས་མ་ཐུབ། དེ་ནས་ང་ཞང་གི་སློབ་གྲྭར་འགྲོ་འདོད་ནའང་ཁྱིམ་མིས་མ་མངགས། ཁོ་ཚོས་བཤད་ན་སློབ་གྲྭར་གཏན་ནས་འགྲོ་མི་ཉན། སློབ་མ་དེ་ཚོ་ཐེའུ་ཕྲུག་ཏག་ཏག་ཡིན། དེ་ཚོས་བསླབ་དགོས་པའི་ཡི་གེ་མི་སློབ་པར་ཉིན་གང་བོར་མ་རབས་བྲ་ཚགས་བྱེད། ལྷག་པར་དུ་ཞྭ་གོན་ཚོར་ཁ་མིག་མེད་པར་གཉོགས། ད་རུང་ཉེས་མེད་ཀྱི་བྱ་བྱེའུ་འབ་འབུ་ཡང་ཁ་བཏགས་འགྲོ། དེ་ཚོར་ངོ་མ་སྙིང་རྗེ་ཟེར་བ་ཞིག་མེད། འཇིགས་བྷེ་ཕ་རྡུང་ཡང་སློབ་གྲྭར་མ་སོང་སྔོན་ལ་ཞི་ལུ་ཡ་རབས་ཤིག་ཡིན། སློབ་གྲྭ་ནས་ཕྱིར་ཐོན་དུས་ལད་འདུག ཨ་ཕས་བསང་མཆོད་བྱས་སོང་དང་ཨ་མས་མ་ཎི་བཏོན་སོང་ཟེར་ནས་ཡར་གཏུག་མར་གཏུག་བྱས། ཨ་ཕར་འཐད་རྩོད་བྱས་ཚེ་ཁོས་སྔ་བ་གསུམ་གྱི་སྔོན་མ་བྱས་ཏེ་གཉོགས་ནས་ཉལ་སར་འཕངས་པ་རེད་ཟེར། ངས་བསམ་ན་སློབ་གྲྭར་སོང་སོང་ཚང་མ་དེ་འདྲ་ཡིན་མི་དཔེ་ནའང་གང་ལྟར་ང་སློབ་གྲྭར་འགྲོ་རུ་མ་བཅུག ཐེངས་ཤིག་ཨ་མ་ངེད་གཉིས་རྫོང་མཁར་དུ་སོང་། བཞི་སྲང་དེ་ན་མི་དར་མ་འགའ་དང་སློབ་མ་ཕོ་མོ་གཉིས་ཀས་རྒད་པོ་ལོ་ལོན་སྐྲ་དང་ཁ་སྤུ་དཀར་པོ་ཅན་ཞིག་རྒྱབ་ལག་བྱས་ནས་བཀྱིག སྐེ་ལ‘ལྷ་འདྲེ་གདོན་བགེགས’ཤེས་པའི་ཡི་གེ་བྲིས་ཡོད་པའི་ཤོག་ལེབ་ཅིག་བཏགས། རས་ཀྱི་སྟེང་ལ་ཚོན་ལྗང་ཁུས་བུ་མོ་ཡག་མ་ཞིག་བྲིས་ཡོད་པའི་རི་མོ་ཞིག་ཐང་ལ་བཏིངས། རྗེས་སུ་ཨ་མས་བཤད་ན་དེ་སྒྲོན་ལྗང་གི་ཐང་ག་ཞིག་རེད། རྒད་པོ་དེའི་སྟེང་ལ་དེད་ནས་ལང་དུ་བཅུག ཡིན་ནའང་རྒད་པོ་མེ་ཐོག་ལ་བཞག་པ་ལྟར་དེའི་སྟེང་ནས་སྐད་ཅིག་ཙམ་ལའང་འདུག་མི་བཟོད་པར་ཕར་ལྡིང་སོང་། མི་དེ་ཚོས་ཁོ་ཡང་བསྐྱར་དེའི་སྟེང་ལ་དེད། རྒད་པོ་ཡང་བསྐྱར་ལྡེམ་མྱུར་ངང་ཕར་ལྡིང་སོང་། དེ་ལྟར་ཐེངས་བྱས་རྗེས་མཚམས་ཤིག་ཚང་མས་རུབ་ནས་རི་མོ་དེའི་སྟེང་ལ་མནན་ཏེ་གཅར་རྡུང་བྱས། མཇུག་མཐར་རྒད་པོའི་ཁ་ནང་སྣ་ནང་དང་། ཐ་ན་མིག་གི་ནང་ནས་ཀྱང་ཁྲག་བཞུར་གྱིན་འདུག་པས་ང་སྐྲག་ཐག་ཆོད་སོང་། དེ་ནས་བཟུང་ངའང་སློབ་གྲྭར་འགྲོ་འདོད་མེད་ལ། ཐ་ན་སློབ་མ་དེ་ཚོ་རིག་ནའང་སྐྲག་གིན་འདུག”

　　“འོ་རེད། དང་ཐོག་ཁྱོས་ང་ལ་ཁ་མི་བསྲེ་བའི་རྒྱུ་མཚན་ང་སློབ་མ་ཡིན་པས་ཨེ་ཡིན།”

　　“ཧེ་ཧེ། དེ་ཡང་མིན།”

　　“དྲང་མོར་བཤད་ན་ང་ད་ལོར་མཐར་ཕྱིན་སོང་བས་ད་ནི་སློབ་མ་མིན།”

　　“སློབ་མ་ཡིན་ཡང་ད་ལྟ་དེ་འདྲ་མིན་རབས་ཟེར། དེས་ན་ཁྱོད་ལས་བྱེད་པ་ཨེ་ཡིན།”

　　“ལས་བྱེད་པའང་མིན། ང་མུ་མཐུད་དུ་སློབ་གྲྭར་འགྲོའམ་ཡང་ན་བྱ་བར་ཞུགས་རྒྱུ། ཡང་ན་ཕྱིར་ཡོང་ནས་འབྲོག་པ་བྱེད་རྒྱུ་ད་རུང་ཐག་མ་ཆོད་པར་བསྡད་ཡོད།”

　　“འབྲོག་པ་བྱེད་ན་དང་པོ་ནས་སློབ་གྲྭར་སོང་ནས་ཅི་བྱེད།”

　　“དང་པོ་ངས་བསམ་མི་ཤེས་དུས་ཁྱིམ་མིས་ང་སློབ་གྲྭར་མངགས་པ་རེད།”

　　“……”

　　“ང་དོ་དགོང་ཡོང་རྒྱུ་ཡིན་ཨ།”

　　ཁྱོད་ཀྱིས་གཞི་ནས་ཁ་མི་གྲགས་པར་མགོ་བསྒུར་འདུག

　　“ཚང་མ་གཉིད་རྗེས་ང་ཐད་ཀར་ཁྱོད་ཀྱི་ཕུ་བོའི་རས་གུར་ནང་ལ་ཡོང་། ཁྱོད་ཀྱང་དེར་ཤོག ཡང་ན་ཁྱོད་སྔར་ནས་རས་གུར་ནང་ཉལ་བསྡད་ན་འགྲིག”

　　ཁྱོད་ཀྱིས་སྔར་བཞིན་ཁ་མི་གྲགས་པར་མགོ་བསྒུར་ནས་འདུག དེ་ནི་ང་དོ་དགོང་ཁྱོད་སར་ཡོང་བར་ཆོག་མཆན་བྱིན་པ་རེད།

　　སྐབས་འདིར་ནོར་ལྷས་ལ་འདེད་རེག་བར་དུ་ད་དུང་ཅུང་ཙམ་ཡོད་ནའང་ང་ནི་བྲེལ་བ་ལངས་ཏེ་བཞོན་པར་བཞོན་ནས་ནོར་ཁྱུ་གཉིས་ཀ་སོ་སོར་བཀར། འུ་གཉིས་ཀས་སོ་སོའི་ནོར་ཁྱུ་དེད་དེ་ཕན་ཚུན་ལ་ཕྱི་མིག་ལྟ་བཞིན་སོ་སོའི་སར་སོང་། ངས་ཉི་མ་འདི་སྔ་ཙམ་ནུབ་ནས་གང་མྱུར་གྱིས་ཁྱོད་ལ་ཐུག་པར་རེ་སྒུག་བྱས། ཡིན་ནའང་། ཨ་ཧོ། འདི་ནི་གཏན་བྲལ་ཡིན་པ་སུ་ཡིས་ཤེས། བགེགས་བར་ཆད་ཟེར་བ་འདི་ག་དུས་ཡོང་དང་ཇི་ལྟར་ཡོང་མི་ཤེས་ཏེ། ཏག་ཏག་ནོར་འདོགས་བཞིན་པའི་སྐབས་སུ་ངེད་ཚང་གི་ཁྱིམ་མཚེས་ཏེ་ངའི་ཨ་ཁུ་ཚང་གི་ནོར་ལྷས་ནས་བུད་མེད་གཉིས་ཀྱིས་འཕྲོ་རིམ་འཕྲོར་སྙིང་རྩ་འདར་བའི་ཨག་རིང་རེ་བཏབ་བྱུང་། ཁྱིམ་མཚེས་གཡས་གཡོན་གྱི་མི་ཆེ་ཆུང་གཉིས་ཀས་ལག་གི་ལས་ཀ་བསྐྱུར་ནས་དེར་བརྒྱུགས། ཨ་ཁ། ང་དེར་ཐོན་དུས་ཨ་ཁུ་ཚང་ལ་ལོ་དྲུག་བདུན་ཅན་གྱི་ཞི་མོ་ཞིག་ཡོད་པ་དེ་མཛོ་མོ་རོག་རོག་ཅིག་ཡོད་པ་དེའི་རྭ་གཡོན་པའི་རྩེ་ན་འཕྱངས་འདུག མོའི་མགོ་རྐང་ལག་ལྔ་བོ་མར་དྲུད་འདུག་པར་བལྟས་ན་སྔར་ནས་ཚེ་ཕྱི་མར་བུད་སོང་བ་འདྲ་མོད། འོན་ཀྱང་མི་རྣམས་ཀྱིས་ཐད་ཀར་མིག་གིས་ལྟར་མི་བཟོད་པར་མིག་བཙུམ་མ་འབྱེད་ཀྱི་ངང་རྭ་མགོ་ནས་བླངས་དུས་དབང་བོ་ཤོར་འདུག་ནའང་ད་དུང་དབུགས་གཉོམ་པོ་ཞིག་ཡོད་པས་དེ་མ་ཐག་རྨ་ཁར་སྐེ་རགས་ཤིག་གིས་དཀྲིས། རྟ་གསུམ་བཞི་ཙམ་བཟུང་ནས་རྫོང་ཐོག་ཏུ་འགྲོ་རྩིས་བྱེད་སྐབས་ཨ་ཁུས་དབུགས་ཧལ་ཧལ་གྱིས་ང་ལ་མཛུབ་མོ་བཙུགས་ཏེ“གལ་ཏེ་རྫོང་སྨན་ཁང་གིས་ཟི་ལིང་ལ་འཁྱེར་དགོས་ཟེར་ན་རྒྱ་སྐད་ཤེས་ནི་ཞིག་དགོས་པས་ཁྱོད་འགྲོ”ཟེར་བ་དང་། ད་དུང་སྤྱི་གཞུང་ལ“སུ་ཚང་ལ་སྒོར་མོ་རེ་ཡོད་ན་ཚང་མ་ཁྱེར་ཤོག”ཅེས་བཤད།

　　དེ་ལྟར་བསམ་དབང་དྲན་དབང་མེད་པར་རྫོང་སྨན་ཁང་དུ་ཐོན་པ་དང་། དེ་ནས་མྱུར་སྐྱོབ་བྱས་རྗེས་བུ་མོའི་དྲན་པ་སོས་ནའང་ཨ་ཁུས་བཤད་པ་ནང་བཞིན་ཁོང་རྨས་ཚབས་ཆེ་བས་གང་མྱུར་གྱིས་ཟི་ལིང་ལ་འགྲོ་དགོས་ཟེར། སྟབས་ལེགས་པ་ཞིག་ལ་དེ་དུས་རྫོང་སྨན་ཁང་ལ་མྱུར་སྐྱོབ་རླངས་འཁོར་གསར་པ་ཞིག་ཡོད་པ་དེ་མངགས་རྒྱུ་ཐག་བཅད། ད་དུང་རྨས་མ་དང་ངེད་ཚོ་རེ་རེའི་ཁྲག་ལ་བཤེར་ཞིབ་བྱས་ནས་མི་གཉིས་ཀྱི་ཁྲག་བླངས་ནས་བུ་མོར་རྒྱག་བཞིན་དགོང་མོ་དེར་ཟི་ལིང་དུ་སོང་།

　　དྲང་མོར་བཤད་ན་དེ་དུས་ངས་བུ་མོ་དེ་ལ་སེམས་གཏིང་ནས་སྙིང་རྗེ་བ་ལས་ཁྱོད་ཡིད་ལ་མ་དྲན། ཟི་ལིང་དུ་སླེབས་མ་ཐག་བུ་མོར་གཤག་བཅོས་བྱས་ཤིང་། སྨན་པས་ད་ནི་སྲོག་ཉེན་ལས་ཐར་སོང་ཞེས་བཤད་དུས་ཉིན་གསུམ་པའི་ཕྱི་དྲོ་ཡིན། ང་ཚོ་ཚང་མ་དགའ་ནས་མིག་ཆུ་ཤོར་བ་དང་མཉམ་དུ་ལྟོགས་སྐོམ་གཉིས་ཀྱིས་དྲག་ཏུ་མནར་བཞིན་ཡོད་པ་གཞི་ནས་ཚོར། ད་དུང་ཚ་བ་ཧ་ཅང་ཆེ་བས་ཚང་མའི་ལུས་ནས་རྔུལ་ཆུ་མང་པོ་བཞུར་བཞིན་ཡོད་པ་དང་། མི་རྣམས་ཀྱིས་ཁ་སྣ་ལག་པས་བཀབ་སྟེ་ང་ཚོ་དང་རྒྱང་བཀྱེད་ནས་འགྲོ་བཞིན་པ་ཡང་ཚོར། དེ་དུས་ངས་ད་རུང་ཁྱོད་ཡིད་ལ་མ་དྲན་ལ། བྲོ་བ་ཅི་ཡིན་མ་ཚོར་བར་ཐུག་པ་དཀར་ཡོལ་ཆེན་པོ་དོ་འཐུང་རྗེས་ད་གཟོད་ཁྱོད་ཡིད་ལ་དྲན། དུས་མཚུངས་སུ་འགོག་ཐབས་མེད་པའི་གཉིད་སྟུག་པོ་ཞིག་གིས་མནན་ཏེ་མགོ་བོ་ཟས་ཅོག་སྟེང་ལ་ལྷུང་། རྨི་ལམ་དུ་ཁྱོད་ཀྱིས་རྟོལ་བུ་རྔ་ལོ་དེ་བཞོན་ནས་འུ་གཉིས་རྒྱུན་དུ་ཐུག་སའི་རི་སྒང་དེ་ན་འགྲོ་བཞིན་ཡོད་ལ། ངས་ནུས་ཤུགས་ཅི་ཡོད་བཏོན་ནས་བརྒྱུགས་ནའང་ཁྱོད་ཀྱི་རྗེས་མི་ཆོད། ང་ཐང་ཆད་ཅིང་ཁ་སྐོམ་ནས་ཁྱོད་ལ་འབོད་བསམ་ཚེ་ད་གཟོད་ཁྱོད་ཀྱི་མིང་མི་ཤེས་པ་གཞི་ནས་ཚོར།

　　“ཨ་ཙི། དེ་འདྲའི་ཡུན་རིང་མཉམ་དུ་བསྡད་ནས་མོའི་མིང་ལ་ཅི་ཟེར་ཡང་མི་འདྲི་དོན་ཅི་ཡིན། ང་འདི་ངོ་མ་ལན་ཆགས་རེད།”ངས་རང་གིས་རང་ལ་འཁང་ར་བྱེད་བཞིན་མུ་མཐུད་དུ་ཁྱོད་ཀྱི་རྗེས་བསྙེགས། ང་ཁྱོད་ཀྱི་རྗེས་ཆོད་ལ་ཉེ་བ་དང་། ཐ་ན་ང་ཆེས་དགའ་བའི་ཁྱོད་ཀྱི་འོ་དྲི་དང་ལྕི་དྲི་འདྲེས་མའི་དྲི་མ་དེའང་སྣ་ལམ་དུ་འཐུལ་ཡོང་། ཡིན་ནའང་ཏག་ཏག་སྐབས་འདིར་ཁྱོད་ཀྱི་རྟོལ་བུ་རྔ་ལོ་དེས་རྔ་མ་དྲུག་མགོར་བསླངས་པ་དང་མཉམ་དུ་བར་སྣང་ལ་འཕུར་སོང་། ངས་ཅི་བྱེད་འདི་བྱེད་མ་ཤེས་པར་གནམ་ལ་ལྡིང་བ་ཙམ་གྱིས་ང་ཡང་མཁའ་ལ་འཕགས་ཤིང་ཁྱོད་ཀྱི་རྗེས་སུ་འཕུར་ཡོང་།

　　“ཨ་ཙི། ད་བར་དུ་རང་ཉིད་འཕུར་ཐུབ་པ་མ་ཤེས་པ་འདི་ཡ་མཚར།”ངས་ཁེར་བཤད་ཅིག་བྱས་ཤིང་། ཡང་སྔོན་ཆད་རང་ཉིད་འཕུར་འགྲོ་བཞིན་པའི་རྨི་ལམ་ཡང་ཡང་རྨིས་མྱོང་བས་ད་ཐེངས་ཡང་རྨི་ལམ་མིན་ནམ་བསམས་ཏེ་རང་གིས་རང་གི་ལག་ངར་ལ་སེན་བཏོག་བྱས་ཤིང་ཤ་གཅིར་བརྒྱབ་པ་ན་ཚ་ལམ་ལམ་དུ་གྱུར་པས་རྨི་ལམ་མ་རེད་བསམས་ནས་མུ་མཐུད་དུ་ཁྱོད་ཀྱི་རྗེས་སྙེག མཁའ་དབུགས་ཇི་བཞིན་ནམ་མཁར་འགྲོ་ཐུབ་པ་འདི་ཅི་འདྲའི་སྐྱིད་པོ་ཞིག་རེད་ཨང་། འུ་གཉིས་མུ་མཐུད་དུ་གྱེན་ལ་འཕགས་པ་དང་། མཚམས་ཤིག་མར་ས་ལ་བལྟས་ན་ནོར་རྣམས་ནི་གྲོག་མ་ཙམ་ལས་མེད། ཕངས་པ་ཞིག་ལ་ང་ཅི་ལྟར་འཕུར་ནའང་ཁྱོད་ཀྱི་རྗེས་མ་ཆོད། དེ་ལས་ཀྱང་ཕངས་པ་ནི་མཚམས་ཤིག་ཁྱོད་གློ་བུར་དུ་ངའི་མིག་ལམ་ནས་ཡལ་སོང་། ང་ནམ་མཁའ་རུ་ཅི་ལྟར་ཕར་འཕུར་ཚུར་འཕུར་བྱས་ཤིང་། མཐོ་ནས་མཐོ་རུ་འཕགས་ནའང་ཁྱོད་གཏན་ནས་རིག་རྒྱུ་མི་འདུག ང་ལ་ཁེར་རྐྱང་གི་གདུང་བ་བཟོད་དཀའ་བ་ཞིག་གིས་མནར། ང་ཉི་མ་དང་ཇེ་ཉེ་ཡིན་ལ། ལུས་ལ་ཚ་བ་རྒྱས་ཤིང་ཁ་སྐོམ་ནས་བཟོད་ཐབས་མི་འདུག ཏག་ཏག་སྐབས་འདིར་བར་སྣང་ན་དྭངས་བསིལ་གྱི་ཆུ་ཕྲན་མང་པོ་གྱ་མ་གྱུ་རུ་བཞུར་གྱིན་འདུག ངས་སྐད་མཐོན་པོས“ཆུ། ཆུ……”ཞེས་འུར་བརྒྱབ་པ་དང་མཉམ་དུ་གཉིད་ལས་སད།

　　རོགས་པ་ཚོས་ང་ལ་བལྟས་ནས་དགོད་བཞིན་འདུག་ལ། སུ་ཞིག་གིས་ང་ལ་ཝུ་བ་སོབ་སོབ་འཕྱུར་བཞིན་པའི་རླངས་ཆུ(汽水)འཁྱག་པོ་དམ་བེ་གང་བྱིན། ངས་དབུགས་ཐེངས་གཅིག་གིས་རླངས་ཆུ་དམ་བེ་གང་བོ་འཐུང་རྗེས་ད་གཟོད་རྨི་ལམ་ཁྲོད་ནས་རང་གི་ལག་རང་སྟེང་ལ་སེན་བཏོག་བྱས་ཤུལ་དམར་གོར་རེ་འདུག་པ་མཐོང་ནས་དགོད་ཁ་ཤོར།

　　བུ་མོ་སྲོག་ཉེན་ལས་ཐར་བ་དང་། དེ་ནས་རང་གི་ལྟོག་སྐོམ་སེལ་རྗེས་ཟི་ལིང་གྲོང་ཁྱེར་གྱི་རྣམ་པ་རིམ་བཞིན་མིག་ལམ་དུ་མངོན། འདི་ནི་རྩྭ་ཐང་དང་བསྡུར་ན་འུར་འུར་ཟིང་ཟིང་དང་ཁྲ་ཁྲ་རིག་རིག་ཡིན་ནའང་སྐྱ་ཆད་སྔོ་སྡུག་ཟེར་བ་འདི་ལོས་ཡིན་བསམ་པ་ལས་གསོན་ཤུགས་ཅི་ཡང་མཐོང་རྒྱུ་མེད་ལ། ད་དུང་འདི་རུ་ཁྲམ་པ་རྐུན་མ་མང་རབས་ཟེར་བས་ང་ཚོ་སྨན་ཁང་གི་ཉེ་འཁོར་ལས་ཐག་རིང་དུ་འགྲོ་མ་ཕོད། ཨ་ཙི། འདི་དག་བཤད་ནས་ཅི་བྱེད། བུ་མོ་དེ་སྲོག་ཉེན་ལས་ཐར་བ་དང་ཁྱོད་ངའི་མིག་ལམ་ནས་སྐད་ཅིག་ཙམ་ལའང་ཡལ་ཐབས་མེད་པ་དང་། ཁྱོད་ཀྱི་འོ་དྲི་དང་ལྕི་དྲི་འདྲེས་མའི་དྲི་མ་དེ་སྣ་ལམ་ནས་ཡལ་ཐབས་མེད། དེ་ལྟར་ཉིན་བཅུ་བཞིའི་རྗེས་སུ་ང་ཕྱིར་རྩྭ་ཐང་དུ་ཐོན། ང་ཁྱིམ་ལའང་མ་འཛུལ་བར་འུ་གཉིས་ཐུག་སའི་གདོང་སྣ་དེར་སོང་། འུ་གཉིས་ཁ་བྲལ་ནས་ཟླ་ཕྱེད་ཙམ་ལས་འགོར་མེད་ནའང་རི་སྒང་ཐམས་ཅད་སྐྱ་བོར་གྱུར་འདུག འཁྱག་ཤུར་ཤུར་གྱི་སྟོན་རླུང་ཞིག་ངའི་གདོང་ལ་ཕོག་པ་དང་མཉམ་དུ་ཁྱོད་ཚོའི་རུ་སྐོར་མེ་ཏོག་འདབ་བརྒྱ་མ་ལྟ་བུ་དེའི་འདབ་མ་གཅིག་ལྷུང་སོང་བ་ཇི་བཞིན་ཁྱོད་ཚང་གི་མཚེར་ཤུལ་སྟོང་བ་དེ་ངའི་མིག་ལམ་དུ་མངོན་བྱུང་། དུས་མཚུངས་སུ་ངའི་སེམས་ཁོང་ཡང་མཚེར་ཤུལ་དེ་དང་འདྲ་བར་སྟོང་བར་གྱུར་སོང་།

　　“ཁྱོད་གང་ན་ཡོད།”
                                      2024.11

　　མཆན་འགྲེལ:

　　(1)མགོ་སྐྱོར: མཛོ་གཡག་སོགས་བཞོན་པ་མང་ཤོས་ཀྱིས་བདག་པོས་སྣ་གཅུ་བཟུང་ནས་བཞོན་སྐབས་སྐེ་ཕྱིར་དཀྱོག་སྟེ་རམ་འདེགས་བྱེད་པ་ལ་མགོ་སྐྱོར་དང་སྣ་སྐྱོར། སྐེ་བཀྱག་སོགས་ཟེར།
       (2)རྩྭ་ཁྱིགས: གཞན་གྱི་རྩྭ་སའི་སྟེང་དུ་ཕྱུགས་ཟོག་ཤོར་བ་དང་འཚོས་ན་རྩྭ་སའི་གྱོང་གུད་གསབ་ཕྱིར་ས་བདག་གིས་དབང་ཡོད་ཀྱིས་བཟུང་བའི་ཕྱུགས་ཟོག་ལ་གོ རྩྭ་ཁྱིགས་བཟུང་ནས་གནས་དེ་རུ་བཤའ་མཁན་ཡང་ཡོད་ལ། དེ་ནས་གྱོད་ཇེ་ཆེར་སོང་བའི་ལོ་རྒྱུས་ཀྱང་ཡོད།
       (3)ལག་ལ་ཞ: ཨ་མདོའི་ཡུལ་སྐད་དུ་མིའམ་དུད་འགྲོ་བསམ་གཟས་ནས་བསད་པ་མིན་པར་ལག་ཚོད་མ་ཟིན་པར་ལག་ཏུ་ཤི་བའི་དོན།
       (4)སྐྱ་རྐྱང: སྔ་འདེད་གཞུག་ཁྲིད་མེད་པའི་སྐྱ་མི་རྐྱང་བ།
       (5)བར་ཞག: འབྲོག་པས་རུ་བཀལ་ནས་འགྲོ་སྐབས་ཉིན་གཅིག་གིས་དམིགས་ཡུལ་དུ་མ་སླེབས་པར་དགོང་མོ་ཐང་སྟོང་དུ་བསྡད་པ་ལ་བར་ཞག་བྱས་ཟེར།
       (6)བྱ་བྱིས: ཨ་མདོའི་ཡུལ་སྐད་དེ་ཕྲུ་གུའམ་བྱིས་པའི་དོན།

　　                     ——2025ལོའི《ཟླ་ཟེར》དེབ་དང་པོ་ལས་བདམས།

རྩོམ་སྒྲིག་པ། གངས་དགའ།

རྩོམ་ཁུངས། ངེད་དྲ་བ།