ལ་གཞས་མཐུན་པ་དྲུག་སྐོར་ལས། འབྲལ་བའི་སྐོར།༡
༡བྱ་ཁུ་ལོ་སྙིང་ལ་རྗེ་བོ།།
ང་རྒྱ་གར་ཡུལ་ལ་འཕུར་དུས།།
ཕྱི་འཁོར་ནས་རྫ་ལ་ལྟ་དུས།།
ནགས་ཙན་དན་ཡིད་ལ་དྲན་གི།
འབྲི་ཐུལ་མ་སྙིང་ལ་རྗེ་བོ།།
ང་རྫ་ལུང་གཡས་གཡོན་བརྒྱུད་དུས།།
ཕྱི་འཁོར་ནས་རྫ་ལ་ལྟ་དུས།།
རྩྭ་རམ་དཀར་ཡིད་ལ་དྲན་གི།
རོགས་མ་ལོ་སྙིང་ལ་རྗེ་བོ།།
ང་སྡེ་ཆེན་བརྒྱུད་དེ་རྩེ་དུས།།
ཕྱི་འཁོར་ནས་སྡེ་ལ་ལྟ་དུས།།
ཁ་ཚིག་གསུམ་ཡིད་ལ་དྲན་གི།
༢དགུང་ཨ་སྔོན་མི་འགྲོ་འདུག་ནོ་རེད།།
འབྲུག་ཕོ་ཆུང་མི་འདུག་འགྲོ་ནོ་རེད།།
བུད་སོང་བའི་བསམ་པ་མ་འཛིན་དང་།།
སྨུག་ལང་ལོང་འཐིབས་ན་ཐུག་རྒྱུ་རེད།།
ནགས་ཙན་དན་མི་འགྲོ་འདུག་ནོ་རེད།།
བྱ་ཁུ་བྱུག་མི་འདུག་འགྲོ་ནོ་རེད།།
བུད་སོང་བའི་བསམ་པ་མ་འཛིན་དང།།
ཟླ་བཞི་བ་ཚེས་ན་ཐུག་རྒྱུ་རེད།།
ང་དགའ་ལོ་མི་འདུག་འགྲོ་ནོ་རེད།།
ཁྱོད་མ་ལོ་མི་འགྲོ་འདུག་ནོ་རེད།།
བུད་སོང་བའི་བསམ་པ་མ་འཛིན་དང་།།
ས་ལ་འོག་བརྒྱུད་ན་ཐུག་རྒྱུ་རེད།།
༣བྱ་ཁུ་བྱུག་སྙིང་ལ་རྗེ་བོ།།
སྟོད་རྒྱ་གར་ཡུལ་ནས་འཕུར་དུས།།
ཕྱིར་འཁོར་ནས་གཞུག་ལ་ལྟ་དུས།།
ནགས་ཙན་དན་ཡིད་ལ་དྲན་གི།
འདི་དྲན་ན་ཞེ་རེ་སྨྲེང་གི།
འབྲི་ཐུལ་མ་སྙིང་ལ་རྗེ་བོ།།
སྨད་རྫ་འདབས་མྱུལ་ནས་འགྲོ་དུས།།
ཕྱིར་འཁོར་ནས་རྫ་ལ་ལྟ་དུས།།
རྩྭ་བྱི་རུག་ཡིད་ལ་དྲན་གི།
འདི་དྲན་ན་ཞེ་རེ་སྨྲེང་གི།
རོགས་ཆུང་ལོ་སྙིང་ལ་རྗེ་བོ།།
སྟོད་ཚོ་དྲུག་གྲོང་ལ་འགྲོ་དུས།།
ཕྱིར་འཁོར་ནས་སྡེ་ལ་ལྟ་དུས།།
ནང་ན་ཟླ་ཡིད་ལ་དྲན་གི།
འདི་དྲན་ན་ཞེ་རེ་སྨྲེང་གི།
༤མཚོ་སྔོན་མོ་མར་ཁུ་འཁྱིལ་འདྲ་རེད།།
ཉ་གསེར་མིག་བྱི་རུའི་པ་ཏྲ་རེད།།
མཚོ་རྒས་ནས་ཐིག་ལེ་གཏོང་རག་ལ།།
ཉ་གསེར་མིག་མ་བརྗེད་ཡིད་ལ་ཟུངས།།
ས་བྱང་ལམ་མཚོ་མོ་རང་འཁྱིལ་རེད།།
རྟ་འདོ་བ་གློག་དམར་འཁྱུག་འདྲ་རེད།།
རྟ་རྒས་ནས་ཐིག་ལེ་གཏོང་རག་ལ།།
སྒ་བེ་སང་མ་བརྗེད་ཡིད་ལ་ཟུངས།།
བོད་ཚོ་ཆེན་མཚོ་མོ་རང་འཁྱིལ་རེད།།
རོགས་ན་ཟླ་མཚོ་ཁའི་མེ་ཏོག་རེད།།
རོགས་རྩེ་ནས་མི་ཁས་འགལ་རག་ལ།།
ང་དགའ་ལོ་མ་བརྗེད་ཡིད་ལ་ཟུངས།།
༥མཛོ་ཆུང་མཛོ་མོ་མཉམ་སྐྱེས་རེད།།
ཁྱོད་མཛོ་མོ་རང་ས་རང་ཡུལ་རེད།།
ང་མཛོ་ཆུང་གོང་མའི་ཁལ་མཛོ་རེད།།
ཁལ་ལྗིད་མོ་རྒྱབ་ལ་བཀལ་བཏང་ན།།
ས་མཐོན་པོའི་ས་མཐར་བུད་བཏང་ན།
ང་མཛོ་ཆུང་སྐོར་རེ་རྒྱག་ཏུ་ཤོག།
ཐོ་རུ་ཐོར་མོ་མཉམ་སྐྱེས་རེད།།
ཁྱོད་ཐོར་མོ་རང་ས་རང་ཡུལ་རེད།།
ང་ཐོ་རུ་གོང་མའི་དམག་རྟ་རེད།།
སྒ་ཁྱུང་ཆེན་རྒྱབ་ལ་བསྟད་བཏང་ན།།
ས་མཐོན་པོའི་ས་མཐར་བུད་བཏང་ན།།
ང་ཐོ་རུར་སྐོར་རེ་རྒྱག་ཏུ་ཤོག།
དགའ་ལོ་མ་ལོ་མཉམ་སྐྱེས་རེད།།
ཁྱོད་མ་ལོ་རང་ས་རང་ཡུལ་རེད།།
ང་དགའ་ལོ་གོང་མའི་དམག་མི་རེད།།
བོའུ་རྭ་རིང་ཕྲག་ལ་འཁུར་བཏང་ན།།
ང་དགའ་ལོར་སྐོར་རེ་རྒྱག་ཏུ་ཤོག།
༦བྱ་ཁུ་བྱུག་སྙིང་ལ་རྗེ་བོ།།
དབྱར་དྲུག་པར་གྲགས་ནས་འགྲོ་ནོ་རེད།།
ལྷོ་མོན་ཡུལ་བརྒྱུད་དེ་ཡོང་རག་ལ།།
གསུང་སྙན་མོ་ཡིད་ཀྱིས་བརྗེད་མེད་རེད།།
རྟ་འདོ་བ་སྙིང་ལ་རྗེ་བོ།།
འདོ་གོམ་གསུམ་སྤོས་ནས་འགྲོ་ནོ་རེད།།
དུས་གཞུག་ཐེངས་སྐོར་ནས་ཡོང་རག་ལ།།
གོམ་བདེ་མོ་ཡིད་ཀྱིས་བརྗེད་མེད་རེད།།
རོགས་ཆུང་ལོ་སྙིང་ལ་རྗེ་བོ།།
ཁ་ཚིག་གསུམ་བཤད་ནས་འགྲོ་ནོ་རེད།།
དུས་གཞུག་ཐེངས་ཐུག་ན་ཡོང་རག་ལ།།
ཞེ་མཐུན་ནོ་ཡིད་ཀྱིས་བརྗེད་མེད་རེད།།
༧སྟོད་གངས་རི་དུང་དཀར་གཡས་འཁྱིལ་རེད།།
སྐེད་རྫ་ཆུ་བདུད་རྩི་བསིལ་མ་རེད།།
བཅུ་མ་ཐུབ་ཡིད་ཀྱིས་བརྗེད་མེད་རེད།།
ནགས་ཙན་དན་ལོ་མ་གོས་སྔོན་རེད།།
མགོ་སིལ་ཏོག་བྱིར་དཀར་བྱིར་དམར་རེད།།
འཐུ་མ་ཐུབ་ཡིད་ཀྱིས་བརྗེད་མེད་རེད།།
བོད་ཚོ་ཆེན་ལྷ་ཡུལ་དཀར་བོ་རེད།།
རོགས་མ་ལོ་ལྷ་སྐུ་བཞེངས་འདྲ་རེད།།
རྩེ་མ་ཐུབ་ཡིད་ཀྱིས་བརྗེད་མེད་རེད།།
༨ཆུ་ཡག་པ་ལྷ་ལུང་ཕུ་ན་ཡོདལ།།
ཆུ་རྔ་ལྷ་མོ་འགག་ན་ཡོད།།
ཆུ་བྲུག་ནས་དྭངས་རག་ཅིག་ལ།།
ཆུ་དེ་ཚོ་མ་བརྗེད་ཡིད་ལ་ཟུངས།།
ཤིང་ཡག་པ་ཙན་དན་ནགས་ན་ཡོད།།
འབྲུ་ཤུག་བྲག་དཀར་གཡས་ན་ཡོད།།
ཤིང་སྐྱེས་ཏེ་སྐམ་རག་བར་ལ།།
ཤིང་དེ་ཚོ་མ་བརྗེད་ཡིད་ལ་ཟུངས།།
རོགས་ཡག་པ་སྲིད་སྡེ་གྲོང་ན་ཡོད།།
ཚིག་སྙན་མོ་རང་གི་ཡིད་ན་ཡོད།།
རོགས་རྩེ་ནས་རྒས་རག་བར་ལ།།
ཕོ་ངེད་ཚོ་མ་བརྗེད་ཡིད་ལ་ཟུངས།།
༩བྲག་དམར་ཐེམ་གྱི་ཤུག་སྡོང་།།
བྲག་དམར་ཐེམ་ཁ་གཟར་བས།།
གཅོད་མ་ཐུབ་ཤུག་སྡོང་ལུས་ཡོད།།
ལུས་ཡོད་རུང་ཞེ་རེ་ཆགས་ཡོད།།
བྱང་ལམ་གཡས་ཀྱི་རྟ་བོ།།
རྡོ་གོར་མོ་ཕ་བོང་ཆེ་བས།།
བརྒྱུག་མ་ཐུབ་རྟ་བོ་ལུས་ཡོད།།
ལུས་ཡོད་རུང་ཞེ་རེ་ཆགས་ཡོད།།
ཚོ་ཆུང་སྡེ་ཡི་རོགས་ལོ།།
ཕྱི་སྡེ་བའི་མི་ཁ་བཙན་པས།།
རྩེ་མ་ཐུབ་རོགས་ལོ་ལུས་ཡོད།།
ལུས་ཡོད་རུང་ཞེ་རེ་ཆགས་ཡོད།།
༡༠ནགས་ཙན་དན་མ་གཡོ་མ་ལྡེམ་དང་།།
བྱ་ཁུ་བྱུག་ཕར་འགྲོ་ཚུར་འོང་ཡིན།།
བུད་སོང་བའི་བསམ་པ་མ་འཛིན་དང་།།
ཕྱིར་འོངས་ན་ནགས་ལ་ལོས་འབབ།།
ཆུ་རྒྱ་མཚོ་མ་གཡོ་མ་ལྡེམ་དང་།།
བྱ་རྨ་བྱ་ཕར་འགྲོ་ཚུར་འོང་ཡིན།།
བུད་སོང་བའི་བསམ་པ་མ་འཛིན་དང་།།
ཚུར་འོངས་ན་མཚོ་ཁར་ལོས་འབབ།།
རོགས་ཆུང་ལོ་མ་གཡོ་མ་ལྡེམ་དང་།།
ང་དགའ་ལོ་ཕར་འགྲོ་ཚུར་འོང་ཡིན།།
བུད་སོང་བའི་བསམ་པ་མ་འཛིན་དང་།།
ཚུར་འོངས་ན་རོགས་ལ་ལོས་རྩེ།།
༡༡སྟོད་མཛོ་བརྒྱ་མཛོ་མང་ཁྱུ་ནས།།
མཛོ་གཅིག་ལ་རྭ་ཐམ་བརྒྱབ་ཡོད།།
ཁྱོས་རྭ་ཐམ་སྣོག་ཏུ་མ་འཇུག།
ང་མཛོ་བདག་ཡིད་ནས་མི་བརྗེད།།
བྱང་རྟ་བརྒྱ་རྟ་མང་ཁྱུ་ནས།།
རྟ་གཅིག་ལ་རྟ་ཐམ་བརྒྱབ་ཡོད།།
ཁྱོས་རྟ་ཐམ་སྣོག་ཏུ་མ་འཇུག།
ང་རྟ་བདག་ཡིད་ནས་མི་བརྗེད།།
སྡེ་རོགས་བརྒྱ་རོགས་མང་ཁྱུ་ནས།།
རོགས་གཅིག་ལ་ཚིག་གསུམ་བཤད་ཡོད།།
ཁྱོས་ཚིག་གསུམ་ཡིད་ནས་མ་བརྗེད།།
ངས་ཚེ་གང་ཡིད་ནས་མི་བརྗེད།།
༡༢གནས་འཁོར་ལོ་རྩིབས་བརྒྱད་མན་ཆད་ནས།།
ས་པད་མ་འདབས་བརྒྱད་ཡན་ཆད་ནས།།
བློས་མི་ཐོངས་འཛམ་གླིང་ཉི་མ་རེད།།
བློས་ཐོངས་རུང་དྲོད་གསལ་མི་བརྗེད།།
སྟོད་རི་རྒྱལ་ལྷུན་པོའི་མན་ཆད་ནས།།
སྨད་རྒྱ་ནག་དར་རྩེའི་ཡན་ཆད་ནས།།
བློས་མི་ཐོངས་གོས་ཆེན་གསེར་མ་རེད།།
བློས་ཐོངས་རུང་རི་མོ་མི་བརྗེད།།
ནང་དྲིན་ཆེན་ཕ་མའི་མན་ཆད་ནས།།
ནང་ལས་མཐུན་བཟའ་བའི་ཡན་ཆད་ནས།།
བློས་མི་ཐོངས་རོགས་ལོ་ཁྱོད་རེད།།
བློས་ཐོངས་རུང་ཡིད་ཀྱིས་མི་བརྗེད།།
༡༣མཚོ་སྔོན་མོར་འགྲམ་དར་ཆགས་ན།།
བྱ་ངང་བས་ངང་ཕྲུག་མི་བསྐྱུར་མོ།།
བྱ་ངང་བས་ངང་ཕྲུག་བསྐྱུར་བཏང་ན།།
བྱ་ངང་བར་ཞེ་སེམས་མེད་ནི་རེད།།
ནགས་ཙན་ཆུང་སེར་བོར་འགྲོ་དུས།།
ཤ་ཡུ་མོས་ཤེའུ་མི་བསྐྱུར་མོ།།
ཤ་ཡུ་མོས་ཤེའུ་བསྐྱུར་བཏང་ན།།
ཤ་ཡུ་མོར་ཞེ་བསམ་མེད་ནི་རེད།།
རོགས་མ་ལོ་ཡུལ་ལ་འགྲོ་དུས་ན།།
རོགས་མ་ལོས་དགའ་ལོ་མི་བསྐྱུར་མོ།།
རོགས་མ་ལོས་དགའ་ལོ་བསྐྱུར་བཏང་ན།།
རོགས་མ་ལོར་ཞེ་བསམ་མེད་ནི་རེད།།
༡༤འབྲི་ཐུལ་མའི་ལྗང་སྨུག་རྭ་ལ།།
ངས་མི་སྣོག་རྭ་ཐེལ་བརྒྱབ་ཡོད།།
འབྲི་བསམ་པ་ཅན་ཞིག་ཁྱོད་ཡིན་ན།།
ཐེལ་དེ་ཚོ་སྣོག་ཏུ་མ་འཇུག་དང་།།
ཚེ་གཅིག་གི་བཞོ་འབྲི་ཁྱོད་བྱེད།།
རྟ་འདོ་བའི་ཕུམ་དཀར་གསེང་ལ།།
ངས་མི་འབོར་སྲུང་ཐག་བཏགས་ཡོད།།
རྟ་བསམ་པ་ཅན་ཞིག་ཡིན་ན།།
སྲུང་དེ་ཚོ་འབོར་ཏུ་མ་འཇུག་དང་།།
ཚེ་གཅིག་གི་བློ་རྟ་ཁྱོད་བྱེད།།
རོགས་ཁྱོད་ཚོའི་གངས་དཀར་ཡིད་ལ།།
ངས་མི་བརྗེད་ཚིག་གསུམ་བཤད་ཡོད།།
རོགས་བསམ་པ་ཅན་ཞིག་ཡིན་ན།།
ཚིག་དེ་ཚོ་བརྗེད་དུ་མ་འཇུག་དང་།།
ཚེ་གཅིག་གི་རྩེ་རོགས་ཁྱོད་བྱེད།།
༡༥ཡར་སྟོད་ན་རྫ་ཞིག་རིག་ལེ་བོ།།
སྟོད་ཨ་ཕྱུག་ཚེ་སྔོན་རྫ་རྒྱུད་རེད།།
འབྲི་ཐུལ་མའི་ཕ་ས་ཕ་ཡུལ་རེད།།
རྭ་ལྗང་སྨུག་མཁར་ཆུང་རྡུང་ས་རེད།།
ཞོ་འོ་མའི་འབྲེལ་རེ་འཇོག་ས་རེད།།
ཕར་བར་ན་ཐང་གཅིག་རིག་ལེ་བོ།།
ས་རྒན་རྒྱའི་ཐང་རྒྱ་བར་མ་རེད།།
རྟ་འདོ་བའི་ཕ་ས་ཕ་ཡུལ་རེད།།
ལྕགས་རྨིག་པས་མཁར་ཆུང་རྡུང་ས་རེད།།
རྒྱུག་གོམ་པས་འབྲེལ་རེ་འཇོག་ས་རེད།།
མར་སྨད་ན་སྡེ་རེ་རིག་ལེ་བོ།།
བོད་ཚོ་ཆེན་སྲིད་སྡེ་ཞོལ་མ་རེད།།
རོགས་ན་ཟླའི་ཕ་ས་ཕ་ཡུལ་རེད།།
ངག་ཕྲ་མོའི་མཁར་ཆུང་རྡུང་ས་རེད།།
ཚིག་དོན་པའི་འབྲེལ་རེ་འཇོག་ས་རེད།།
རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི