2021ལོའི་ཟླ10བའི་ཚེས7ཉིན་གྱི་པེ་ཅིང་དུས་ཚོད་ཀྱི་དགོང་དྲོའི་ཆུ་ཚོད་བཅུ་དགུ་པར། སི་ཝེས་དན་རྩོམ་རིག་སློབ་གླིང་གིས་སི་ཐོག་ཁོར་མོ་རུ་བསྒྲགས་པའི་གནས་ཚུལ་ལྟར་ན། 2021ལོའི་ནོ་བྷེལ་གྱི་རྩོམ་རིག་བྱ་དགའ་དེ་རྒྱལ་ཁོངས་ཐན་ཙན་ནི་ཡ་ཡིན་ཞིང་ལོ་ན70ཟིན་པའི་བརྩམས་སྒྲུང་རྩོམ་པ་པོ་ཨབ་དྷུལ་རཱ་ཟག•གྷུར་ནཱ (Abdulrazak Gurnah ) ལགས་ལ་སྤྲད་དེ་ཁོང་གི་བརྩམས་སྒྲུང་གསར་རྩོམ་ཐད་ཀྱི་གྲུབ་འབྲས་ལ་གཟེངས་བསྟོད་བྱ་རྒྱུ་ཡིན་པ་བསྒྲགས།

　　ཨབ་དྷུལ་རཱ་ཟག•གྷུར་ནཱ་ལགས་ནི1948ལོར་ཐན་ཙན་ནི་ཡ་རུ་སྐྱེས་པ་དང་། ཧིན་རྡུ་རྒྱ་མཚོའི་སང་ཕུའུ་པའར་གླིང་ཕྲན་དུ་འཚར་ལོངས་བྱུང་། དུས་རབས20པའི་ལོ་རབས60པའི་དུས་མཇུག་ཏུ་སྐྱབས་བཅོལ་པའི་མིང་ཐོག་ནས་དབྱིན་ཇིར་གནས་སྡོད་བྱས། ཁོང་གིས་སྒྲུང་རིང་བཅུ་ཕྲག་ཅིག་དང་བརྩམས་སྒྲུང་ཐུང་གྲས་ཁག་ཅིག་དཔེ་སྐྲུན་བྱས་པ་ཚང་མ་དབྱིན་སྐད་ཀྱི་ལམ་ནས་གསར་རྩོམ་མཛད་ཡོད། ད་ལྟ་ཁོ་པ་དབྱིན་ཇིར་རྒྱུན་སྡོད་བྱས་ཡོད།

　　སི་ཝེས་དན་རྩོམ་རིག་སློབ་གླིང་གིས་ཨབ་དྷུལ་རཱ་ཟག•གྷུར་ནཱ་ལགས་ལ“ཁོང་གིས་མི་སེར་སྤེལ་བའི་རིང་ལུགས་ཀྱི་ཤུགས་རྐྱེན་གྱི་གཏིང་དུ་བྱིངས་པ་ལ་མི་བསྟུན་པར་བྱས་ཤིང་བརྩེ་བ་ཆེན་པོ་བཅངས་པ་དང་། རིག་གནས་དང་ས་ཁོངས་དབར་གྱི་གཅོང་རོང་དུ་ཚུད་པའི་སྐྱབས་བཅོལ་པ་དག་གི་ལས་དབང་ལ་གདུང་སེམས་མཉམ་སྐྱེད་བྱས་ཡོད”ཅེས་པའི་མིང་ཐོག་ནས་ནོ་བྷེལ་གྱི་རྩོམ་རིག་གཟེངས་རྟགས་སྤྲད་འདུག

　　ཨབ་དྷུལ་རཱ་ཟག•གྷུར་ནཱ་ནི་ཐན་ཙན་ནི་ཡའི་བརྩམས་སྒྲུང་མཁས་ཅན་ཞིག་ཡིན་ཞིང་། ཁོང་གི་ཚབ་མཚོན་བརྩམས་ཆོས་ལ《དག་ཞིང》(1994ལོ)དང་།《ས་རྒོད》(2005ལོར)《མཚོ་འགྲམ》(2001ལོར)སོགས་ཡོད་པ་དང་། བྷོའུ་ཁེར་བྱ་དགའི་འདེམས་གྲས་སུ་ཐེངས་མང་ཚུད་མྱོང་།

　　ཁོ་པས་ད་ལྟ་དབྱིན་ཇིའི་གཙུག་ལག་སློབ་ཆེན་ག་གེ་མོ་རུ་ཞིབ་འཇུག་སློབ་མའི་འཛུབ་སྟོན་སློབ་དཔོན་གྱི་འགན་འཁུར་མུས་སུ་ཡོད་ཅིང་། ཁོང་གི་རིག་གཞུང་གི་ལྟ་བ་དང་གསར་རྩོམ་གྱི་ལངས་ཕྱོགས་གཙོ་བོ་ནི་མི་སེར་སྤེལ་བའི་རིང་ལུགས་དང་འབྲེལ་ཡོད་ཀྱི་བརྗོད་བྱ་དག་སྟེ། གཙོ་བོ་ཨ་ཧྥེ་རི་ཁ་གླིང་དང་ཅ་བྷི། རྒྱ་གར་སོགས་དང་འབྲེལ་བའི་ནང་དོན་ཡིན་པར་བརྗོད།

　　ཨབ་དྷུལ་རཱ་ཟག•གྷུར་ནཱ་ཡིས་ཨ་ཧྥེ་རི་ཁ་གླིང་གི་སྐོར་ལ་བྲིས་པའི་དཔྱད་རྩོམ་གླེགས་བམ་དེབ་གཉིས་རྩོམ་སྒྲིག་མཛད་ཡོད་པ་དང་། མི་སེར་སྤེལ་བའི་རིང་ལུགས་ཕྱི་མའི་རྩོམ་མཁན་མང་པོ་ཞིག་གི་རྩོམ་ཡིག་སྤེལ་ཡོད། 1987ལོ་ནས་བཟུང་ཁོང་གིས Wasafiri དུས་དེབ་ཀྱི་ཆེད་བསྐོས་རྩོམ་སྒྲིག་པའི་འགན་གཅིག་ལྕོགས་སུ་འཁུར་ཡོད།

　　གཞན་ཡང་ནོ་བྷེལ་ཐེབས་རྩ་ཚོགས་པས་ཁྱབ་བསྒྲགས་བྱས་དོན། ནད་ཡམས་ཀྱི་རྐྱེན་པས་ད་ལོར་སི་ཐོག་ཁོར་མོ་རུ་བྱ་དགའ་ཐོབ་མཁན་དག་ལ་མཛད་སྒོ་བསྡུ་རྒྱུ་མིན་པར། སང་ལོར་ད་གཟོད2022ལོའི་བྱ་དགའ་ཐོབ་མཁན་དང་ལྷན་དུ་རྒྱས་སྟོན་མཛད་སྒོ་བསྡུས་ཏེ་གཟེངས་རྟགས་དང་བྱ་དགའི་ལག་རྟགས་སྤྲད་རྒྱུ་ཡིན་ཟེར།

རྩོམ་སྒྲིག་པ། གངས་དགའ།

རྩོམ་ཁུངས། ངེད་དྲ་བ།