བཅོམ་ལྡན་འདས་ངག་གི་དབང་བོ་ལ་ཕྱག་འཚལ་ལོ།།

དཔལ་ལྡན་དགེ་ལེགས་བྱེ་བའི་ཡོན་ཏན་ཅན།།
སངས་རྒྱས་ཀུན་ལས་མངོན་པར་སངས་རྒྱས་ཤིང༌།།
རྒྱལ་བ་ལས་ལྷག་རྒྱལ་བའི་མཛད་རྗེས་ཅན།།
རྗེ་བཙུན་བླ་མའི་ཞབས་ལ་གསོལ་བ་འདེབས།།

ཁྱོད་ཀྱི་རྒྱ་ཆེན་རྣམ་དཔྱོད་གྲྭ་གཅིག་ན།།
མ་ལུས་རྒྱལ་བའི་མཁྱེན་པ་མཐའ་དག་ནི།།
དོག་པ་མེད་པར་ངལ་སོས་དགྱེས་གྱུར་བ།།
རྗེ་བཙུན་མཁྱེན་པའི་གཏེར་ལ་གསོལ་བ་འདེབས།།

ཉེས་བརྒྱའི་རླབས་འཁྲུགས་སྲིད་པའི་ཆུ་གཏེར་དུ།།
ཤུགས་དྲག་བརྩེ་བ་ཁོ་ནའི་དབང་གྱུར་པས།།
ཉིད་སྐུའི་བཀོད་པ་བརྒྱ་འགོད་འགྲོ་ཀུན་གྱི།།
རེ་བ་གཅིག་ཆར་སྐོང་ལ་གསོལ་བ་འདེབས།།

མཚན་མར་འཛིན་པའི་རི་དབང་སྟོང་ཉིད་ཀྱིས།།
ཡེ་ཤེས་མཆོག་གི་རྡོ་རྗེ་ངོས་བཅོམ་སྟེ།།
གཞན་དོན་མཛད་བཞིན་ཞི་བའི་དབྱིངས་ལ་ཡང༌།།
སྲིད་མཐར་མཉམ་པར་འཇོག་ལ་གསོལ་བ་འདེབས།།

ཁྱོད་ཀྱི་ལྗགས་རྡུལ་ཀུན་མཁྱེན་ཉི་མ་ཡི།།
བླ་གོས་ཅན་འདིའི་དབྱངས་ཅན་ཀུ་མུཏ་ཚལ།།
ཟུམ་པའི་གེ་སར་རྡུལ་ལ་ངག་རིག་གི།
བུང་བ་ཆགས་བྲལ་མཛད་ལ་གསོལ་བ་འདེབས།།

མགོན་ཁྱོད་དགག་སྒྲུབ་རིན་ཆེན་ཁྲི་ལ་ཡང༌།།
བཞུགས་ཚེ་ཕས་རྒོལ་དྲག་པའི་ཚོགས་འདི་དག།
འདར་ལྡན་ལུས་སྐྱེས་རྗེས་སུ་རྔུལ་གྱི་ཆུས།།
གང་བའི་མཆོད་ཡོན་བསྟེན་ལ་གསོལ་བ་འདེབས།།

ཇི་སྲིད་སོར་བུ་རྣམ་ལྡང་ཉི་ཟླའི་ཟེར།།
འཕྲོ་བ་དེ་སྲིད་སྙན་གྲགས་ཕོ་ཉ་བགྲོད།།
ཕྱོགས་ཀྱི་བུ་མོའི་རྣ་བའང་སྒྲ་གཞན་དག།
འཛིན་པའི་གོ་སྐབས་འཕྲོག་ལ་གསོལ་བ་འདེབས།།

རྒྱལ་བ་རྡོ་རྗེ་འཆང་གི་རྒྱུད་སྡེ་ཡི།།
རིན་ཆེན་བང་མཛོད་དུས་འདིར་ཁྱོད་གཅིག་བུས།།
ཡོངས་སུ་བཟུང་སྟེ་ཁྱོད་ཞབས་བསྟེན་རྣམས་ལ།།
ཚེ་གཅིག་སངས་རྒྱས་སྦྱིན་ལ་གསོལ་བ་འདེབས།།

འཕགས་པ་ཀུན་དགའ་བོ་དང་གསང་བདག་གིས།།
འཛིན་པར་མ་ནུས་མདོ་རྒྱུད་གཞུང་མང་ཞིག།
བློ་ཆེན་ཁྱོད་ཀྱིས་ངེས་པར་བཟུང་ངོ་ཞེས།།
རྒྱལ་རྣམས་དོག་པར་མཛད་ལ་གསོལ་བ་འདེབས།།

སྐད་ཅིག་གཅིག་ལ་དཀྱིལ་འཁོར་འཁོར་ལོ་བརྒྱ།།
སྤྲོ་ཞིང་སྡུད་ལ་ཐ་མལ་སྣང་ཞེན་སྤངས།།
ཁྱོད་ཐུགས་འོད་གསལ་མཁའ་དབྱིངས་ཟུང་འཇུག་གིས།།
དབང་བོའི་གཞུ་ཡི་མཛེས་ལ་གསོལ་བ་འདེབས།།

སྐྱེ་བ་ཀུན་ཏུ་དགེ་བའི་བཤེས་ཁྱོད་ཀྱིས།།
རྗེས་སུ་བཟུང་སྟེ་སྲིད་པའི་ཕུན་ཚོགས་ཀུན།།
སྙིང་བོ་མེད་པར་མཐོང་ཞིང་ཐར་བ་ཡིས།།
བདེ་བ་དོན་གཉེར་སྐྱེ་བར་བྱིན་གྱིས་རློབས།།

རང་ཉིད་གཅིག་བུས་འགྲོ་ཀུན་སངས་རྒྱས་སུ།།
བསྒྲུབ་འདོད་ལྷག་བསམ་ཀྱིས་བསྐྲུན་ཕྲ་རགས་ཀྱི།།
ལྷ་ཡི་རྣལ་འབྱོར་མཐར་ཕྱིན་རྡོ་རྗེའི་སྐུ།།
ཚེ་འདི་ཉིད་ལ་འགྲུབ་པར་བྱིན་གྱིས་རློབས།།

དེ་ལྟར་བླ་མའི་ཡོན་ཏན་རྒྱ་མཚོ་ལས།།
ཆུ་ཐིགས་ཙམ་ཞིག་དད་པའི་རྔ་ཡབ་རྩེས།།
བླངས་ཏེ་བསྟོད་ཚིག་སྤེལ་བའི་དགེ་བ་འདིས།།
འགྲོ་ཀུན་དམ་པའི་མགོན་དུ་འཛིན་གྱུར་ཅིག།

སྐྱེ་བ་ཀུན་ཏུ་ཡང་དག་བླ་མ་དང༌།།
འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང༌།།
ས་དང་ལམ་གྱི་ཡོན་ཏན་རབ་རྫོགས་ནས།།
རྡོ་རྗེ་འཆང་གི་གོ་འཕང་མྱུར་ཐོབ་ཤོག།
            ཅེས་བྱ་བ་ནི་སྡོམ་བརྩོན་སྡེ་སྣོད་འཛིན་པ་མང་བོས་བསྐུལ་བའི་དོན་དུ། ཤེས་བྱའི་གནས་ཕལ་མོ་ཆེ་ཁོང་དུ་ཆུད་པའི་དགེ་སློང་
ཞང་ཞུང་ཆོས་དབང་གྲགས་པའི་དཔལ་གྱིས་ནགས་ཤོད་རྣམ་རྒྱལ་དཔལ་འབར་ཞེས་བྱ་བར་སྦྱར་པའོ།།
 

རྩོམ་ཁུངས།