༄༅། །ཆོས་དབྱིངས་ཟག་མེད་ལང་ཚོས་རབ་དྲེགས་པས། །དུས་དང་མི་འཚམ་གསང་གསུམ་འཁོར་ལོའི་ཕུལ། །རྒྱན་གྱི་རྣམ་པར་འཆར་བའི་
དཔལ་མངའ་བ། ། དུས་ཀྱི་འཇམ་མགོན་གཉིས་པ་རྒྱལ་གྱུར་ཅིག། །ཞབས་སྐྱེས་སྲིད་ཞིའི་ཟུར་ཕུད་མངོན་མཐོ་བས། །མཆོད་འོས་བླ་ན་འདོད་འཇོའི་
དཔག་བསམ་ཤིང༌། །དགེ་ལེགས་འོད་རིས་མཁའ་ལས་རྣམ་འགོངས་པ། །རབ་གསལ་གདེངས་ཀ་བསྒྲིགས་པའི་འབབ་སྟེགས་སུ། །རིང་ནས་རིང་བར་
སྤྱན་རས་བཙའ་བའི་འདབ། །ལྷུང་བས་སྙིང་ལ་དད་པའི་ཁོལ་བཟུང་སྟེ། །བགྱི་འོས་གཅིག་ཏུ་གང་ལ་མཆོད་སྤྲིན་དུ། །དཀྲིགས་ པ་དེ་ཡིས་འདིར་ཡང་
ཡོན་དུ་སྦྲེང༌། །མཐོ་རིས་ཡུལ་གྱི་ཡོན་ཏན་ཀུན་བླངས་ནས། །དག་པའི་ཞིང་ལ་འཕྱ་བའི་ངལ་བ་ཅན། །གདོང་དམར་ཡུལ་ཞེས་འབྱུང་བོ་འཛིན་མའི་
གཞི། །བསོད་ནམས་དོ་ཤལ་བསྐྱོད་པའི་ཕང་བ་ལ། །ཐུགས་རྗེ་མགྲིན་སྔོན་རལ་བའི་ཐེམ་སྐས་ལས། །ཟུར་ཕུད་ལྔ་བ་དུས་ཀྱི་སྟོན་པ་པོར། །མངོན་སུམ་
གཤེགས་པའི་གྲགས་དཀར་གེ་སར་གྱི། །ཐིག་ལེ་འཐུལ་བའི་སྐལབཟང་འདི་རེ་རྨད། །གང་ཞིག་མེས་པོས་གྲོང་གི་ཡེ་ཤེས་སོགས། །སྦྱང་འདོད་ཕོ་ཉ་དཀར་
པོའི་ཞགས་པ་ཡིས། །ཐུགས་ལ་ལྕགས་ཀྱུ་གཉིས་པའི་ལས་བྱས་པ། །ཆོས་འཚོལ་མཁས་པའི་ལམ་དེར་ ངང་གིས་ཞུགས། །རྒྱ་བོད་སྲོལ་གར་དར་བའི་མེ་
ཏོག་གི། །ཕྲེང་བ་རྒྱུ་སྐར་འོད་ཟེར་རྩེ་མོའི་ཚོགས། །དད་པའི་རྔ་ཡབ་གཡོ་ལྡན་རྣམ་དཔྱོད་ཀྱི། །ཟླ་བའི་ངོས་ལ་རི་མོའི་སྤུན་དུ་གྱུར། །འདབ་གཤོག་མ་
རྫོགས་མཁའ་ལྡིང་སྲས་པོ་ཞིག །མཐོངས་ཡངས་དཔུང་བར་བགྲོད་པའི་སྟོབས་བརྙེས་པས། །ཤེས་བྱའི་ཁུང་བུ་སྐྲག་པས་ལུས་སྐྱེས་ཀྱི། །རྩི་ཤིང་འདར་
ལྡན་སོ་གའི་རྣམ་འཕྲུལ་བཞིན། །ཁྱོད་ཀྱི་མཁྱེན་དཔྱོད་སྒྲོ་ལྡན་སྟོང་ཕྲག་གིས། །ཕྲ་ཞིབ་ཤེས་བྱའི་འབེན་དག་ཕིགས་པ་ན། །སྨྲ་བའི་སེང་གེ་ཤིང་རྟ་མཆེད་
གཉིས་ཀྱང༌། །ཉི་མའི་དྲུང་ན་སྲིན་མེའི་གོ་འཕང་འཛིན། །ལྗགས་རྩེ་པདྨ་རྒྱས་པའི་ཆ་རེར་ཡང༌། །མཐའ་དག་རིག་བྱེད་འགྱུ་བའི་རོལ་རྩེད་ལ། །མ་འགྲན་
ཚངས་སྲས་སྐྱེངས་པས་རྒྱུད་མངས་མར། །ཕྱག་སོར་ལན་བརྒྱར་བསྣུན་ཀྱང་ངལ་བའི་རྟེན། །གུར་ཀུམ་དོག་པ་རྒྱུ་བའི་དགའ་བྱེད་ཀྱིས། །མང་ཐོས་ས་
གསུམ་བརྙེས་པའི་ཁེངས་པ་ཡང༌། །ཐུང་ངུར་བཏང་བའི་སྙན་པ་བླ་ན་མེད། །གང་གི་གསང་གསུམ་ཡོན་ཏན་གཟུགས་ཅན་དུ། །རྣམ་པར་འཕོས་པ་ས་
འཛིན་ལྷུན་པོ་སྟེ། །གསེར་ལྡན་རལ་བས་འདེགས་པའི་སྐལ་བཟང་ལ། །རྒྱལ་བ་རྣམས་ཀྱང་སྲེད་པས་གདུང་བ་འཛིན། །དེ་ཡི་གྲོགས་མོ་ནམ་མཁའི་ནུ་ལྡན་
མ། །ཕྲག་དོག་རོ་བརྒྱ་འབར་བ་ལ་ཟོས་པས། །རྒྱ་ཆེན་འཁྲུགས་པའི་མིག་ཆུ་ཟེགས་པའི་མཚོར། །ས་འདིར་རྒྱ་མཚོའི་ཐ་སྙད་སྒྲ་ཡིས་འབོད། །མདོ་ཁམས་
འཛིན་མ་དར་བའི་གདེངས་ཀ་ན། །མཚན་དཔེའི་གབ་པའི་གཞོན་ནུ་སངས་རྒྱས་ཞེས། །མཐོན་མཐིང་མཁའ་ཡིས་ཆུ་འཛིན་དྲ་བ་ལ། །ལྟད་མོར་ལྷགས་
འདིས་དགུང་ཡང་རལ་བས་དོགས། །བློ་བཟང་རིང་ལུགས་ནོར་བུའི་ལྷུན་པོ་གང༌། །ཉུངས་དཀར་ཚད་དུ་འཕོ་བ་ལ་བརྩོན་ཚེ། །རྩོད་པའི་དུས་ཀྱི་དགེ་
ལེགས་དཔལ་བ་ཁྱོད། །རྒྱལ་རྣམས་ཐུགས་ཀྱི་ཐིག་ལེ་བོ་བར་ངེས། །ཁྱོད་ཞལ་དབུགས་ཀྱི་རྩེ་མོ་གཡོ་བ་ཡང༌། །གསེར་ཞུན་བསྟན་པའི་སྲོག་གི་ཀ་བ་ལ། །
འགྱུར་བ་ཉིད་ཕྱིར་མཐར་བྱེད་གཏུམ་པོ་ཡང༌། །འགྱིང་བ་བཏང་ནས་བྲན་གྱི་ལས་ལ་ཆས། །ཕྱུགས་ཀྱི་ར་བར་རྒྱལ་བའི་འཁྲི་ཤིང་མཆོག །མི་སྐྱེའི་གཏམ་
གྱི་ཁུག་པ་རྫུན་རིས་ཙམ། །མད་ན་གཙུག་ཏོར་བྱི་བའི་བདེ་བར་གཤེགས། །ས་འདིར་རྒྱུ་བའི་དགེ་མཚན་འདི་ཅི་ཞིག །དེ་ཕྱིར་འདི་ཡི་ཞབས་སྐྱེས་རེག་པ་
ཡི། །རྡུལ་ཡང་ཐུབ་པས་མཆོད་ འོས་མཆོད་རྟེན་བས། །རང་རང་ཐོད་དུ་བཀུར་བའི་རིན་ཆེན་དུ། །ལེན་རྣམས་སྐལ་བཟང་བསྐལ་པའི་ཡུན་ལ་བསྒྲུབས། །
ཐུན་མོང་ཐུན་མོང་མིན་པའི་གཙུག་ཏོར་གྱི། །མཁའ་ལ་དེང་ཡང་སྐྱིལ་མོ་ཀྲུང་བཅས་ནས། །བློ་བཟང་ལེགས་གསུང་གྲགས་པའི་ སྙན་སྒྲ་ཅན། །ཁོར་ཡུག་
འཁྲོལ་བའི་ལེགས་མཛད་ཡི་གར་འོང༌། །ཚུལ་དེས་རང་བསྟན་ཁ་ཡི་དབུགས་བྲལ་བ། །སོས་ལས་ཕན་བདེ་གསེར་གྱི་མྱུ་གུ་མང༌། །འཛུམ་པའི་གནའ་བོའི་
སྲོལ་བཟང་དར་བས། །འཇམ་མགོན་མཉེས་པའི་ཕ་མཐའ་སུ་ཡིས་དཔོག །ལེགས་བྱས་བསོད་ནམས་བཀྲ་ཤིས་རྫས་མངས་ཀྱི། །སྤྲིན་ཕུང་རྒྱུ་མཚོའི་བཀོད་
པ་འབུམ་དཀྲིགས་པས། །རབ་འབྱམས་ཞིང་ན་རྒྱལ་བ་སྲས་བོར་བཅས། །ཅི་ཡང་མྱོས་པའི་རྩེ་དགའ་གཞལ་ཡོད་མིན། །འདོད་པའི་ཡོན་ཏན་གློག་གི་ཕྲེང་
བ་ཡིས། །དབང་མེད་བཟུང་ནས་ཉེས་བཤད་སྤྲིན་གྱི་སྒྲས། །ཐོས་འཛིན་ཁང་བ་འགེངས་པས་ནོར་ལྡན་མར། །ལེགས་བཤད་རྒྱུ་བའི་གོ་སྐབས་ག་ལས་
རྙེད། །འོན་ཀྱང་ཁྱོད་ཀྱི་ཐུགས་བསྐྱེད་རླུའ་པོའི་དཔུང༌། །བཙན་པོས་ཆེར་སྙིགས་འཇིག་རྟེན་རྣམ་གཞིག་ནས། །རྫོགས་ལྡན་མགྲོན་དུ་བསུས་པར་ཆོས་
ཀྱི་དབྱངས། །མ་ལུས་རང་སྒྲར་དགོད་པའི་ཡ་མཚན་འབར། །ད་ནི་ཆོས་ཀྱི་རྔ་ཆེན་རྒྱ་མཚོ་བཞིའི། །མཐའ་ལ་ཐུག་པར་བརྡུངས་པས་ས་ཆེན་འདིར། །རྨད་
བྱུང་བཀོད་པའི་ཞིང་ཁམས་ཡོངས་འཕོས་པའི། །ཡ་མཚན་རི་མོ་གཞར་ཡང་འདོར་མི་འཚལ། །རིན་ཆེན་རྡུལ་བརྩེགས་ལྷ་ཡི་རྐང་སྟེགས་དེ། །ནམ་ཞིག་
བི་ཤྭ་ན་རའི་སྲས་པོ་ལ། །མ་འཁྱུད་དེ་སྲིད་བཤད་སྒྲུབ་རོལ་རྩེད་ཀྱིས། །མཚན་ཡང་ཉིན་བཞིན་བགྱིད་པ་ཁྱོད་ལ་འོས། །འདི་ན་ཨཽ་ཌི་ཡ་ན་ཡི། །བྲག་དཀར་
དུས་ཀྱིས་སོན་པ་ལ། །ཁོར་ཡུག་བསྐོར་བའི་ས་འཛིན་ཚོགས། །འདུད་པའི་རྣམ་འགྱུར་རི་མོ་བཞིན། །རྐང་འཐུང་དགོད་པའི་སྤུ་ལོང་གིས། །དྲེགས་པ་རབ་
ལྡན་ནོར་འཛིན་གྱིས། །འཆི་མེད་གྲོང་གི་ཁྱད་པར་ལ།། འཕྱ་བ་ཟླ་བའི་འཛུམ་དུ་གསལ།།དྲི་ཟ་དགའ་བའི་རོལ་མོ་ལས། །འདབ་ཆགས་གྱ་གྱུའི་རྒྱུད་མངས་
དབྱངས། །ཕྱོགས་ཀྱི་བུ་མོའི་རྣ་བ་ལ། །སྔོན་མེད་རྒྱན་གྱི་དོ་ཤལ་རྒོད། །མཐིང་སྔོན་བཻཌཱུར་ལང་ཚོ་ཡིས། །སྒེག་པ་འགྲོ་ལྡན་དཔལ་མོའི་འཕྲུལ། །ཆོས་བཟང་
ཅ་ཅོའི་མཆེད་པོ་སྟེ། །བདེ་ཆེན་དགའ་བ་དར་ལ་བརྩོན། །མཁའ་ལ་མངོན་སྤྱོད་དཔལ་མོའི་ཁྱུ། །བདེ་སྟོང་དགའ་མགུ་ལ་རོལ་ནས། །སར་བ་སར་བའི་
བཀྲ་ཤིས་ཀྱི། །རྒྱལ་མཚན་འཛུགས་པའི་མཐའ་མ་རྙེད། །དེ་ལྟའི་ལྟེ་བས་འོད་མིན་གྱི། །བ་གམ་ནོར་བུའི་འོད་ཚོགས་ཅན། །བྱེད་པོས་བཀོད་ལ་དཔག་ཡས་
པའི། །བྱིན་རྟེན་ཟླ་ཤེལ་ཅི་ཡང་བསྟར། །ཐུགས་རྗེ་སྤྱན་རས་ཟུམ་མ་གྱུར། །གསང་གསུམ་ཆུ་སྐྱེས་མངོན་གཡོ་བ། །དེ་ཕྱིར་ས་ཡི་འཇིག་རྟེན་དབང༌། །གྲགས་
པ་དོན་དང་ལྡན་པ་བྱུང༌། །གང་དེར་ལེགས་བཤད་རྩེ་དགའི་འོད་ཚོགས་ཀྱིས། །ཀུན་ཏུ་བཟང་པོའི་དཔལ་ཡང་འཕྲོག་པ་ལ། །ཞུགས་པས་འཚོ་བ་དོན་
དང་ལྡན་པ་སྟེ། །འཚེ་བ་ཐན་སྤྲིན་གཞོན་ནུའི་སྲོག་ལ་ལྟ། །ལས་ཀྱི་རི་དྭགས་བས་མཐའི་དགའ་ཚལ་ན། །ལས་ཀྱིས་རྩེན་པའི་ཆོ་ག་མ་རྫོགས་ཀྱང༌། །ཡིད་
ཀྱི་ཆུ་བོ་དད་པའི་ཡུར་བ་ན། །ཉིན་བཞིན་ཁྱོད་དྲུང་རྒྱུ་ལ་རྒྱུན་ཆད་གང༌། །དགོངས་ཤིག་བྱེས་སུ་འཕྱན་པ་མ་མའི་ངག །ཕྱིར་མིག་ཨོམ་ཚུགས་བརྟན་
པའི་སྟངས་ཀ་ན། །གདུང་བ་སེམས་ལ་བརྣགས་ཏེ་དབུགས་དང་བཅས། །གྲེ་བ་འགེངས་ལ་བརྩོན་པའི་ཚུལ་དེ་འོ། །བློ་བཟང་རིང་ལུགས་དྲི་མེད་མཁའ་
ལ་ལེགས་བཤད་འོད་བརྒྱའི་དྲ་བ་ནི། །ཉིན་རེ་ཞིང་ཡང་རྣམ་པར་འགོད་པའི་དཔལ་སྟུག་ལང་ཚོ་ལ་སྲེད་ནས། །མི་ཕྱེད་དད་པའི་འདབ་བརྒྱ་བ་དེ་ལྷག་
ལྷག་རྒོད་པའི་གེ་སར་ལས། །ངོ་མཚར་སྤྲིང་བའི་ཡི་གེའི་ཟོལ་གྱིས་མཁའ་ལ་གར་གྱི་རི་མོ་འབྲི། །ཟླ་བ་ནོར་བུ་དཀར་པོའི་དཔལ་ལ་རྒོད་ཅིང་འཕྱ་བ་ལྷུར་
བྱས་ནས། །དྲི་མས་དྲི་མ་ཡོངས་སུ་བཏང་ལས་མཛེས་སྡུག་འབར་བའི་དྲེགས་པ་འཛིན། །མི་འགྱུར་རེ་ཁཱ་གསལ་བ་གསལ་བས་སྲིད་ཞིའི་བཀྲ་ཤིས་ཀུན་
གཡབ་སྟེ། །སྣེ་ཚར་ལན་བུའི་འདབ་མ་རིང་བསྐྱོད་སྒྲིབ་མེད་གཟིགས་པའི་རྟེན་དུ་ཆས། །པཱུ་ཛ་མསྟུཿ །། །།

རྩོམ་ཁུངས།