བཤེར་འཚོལ།
མགོན་གཡག་ལ་བསྔགས་པ་དང་ཆང་ལ་བསྔགས་པ་བཞུགས་སོ།།
མགོན་གཡག་ལ་བསྔགས་པ་བཞུགས།
༄༅།།གང་ལུས་ཆར་སྤྲིན་ཕུང་པོ་ནི།།
མཁའ་ལ་དྲག་ཏུ་གཡོ་ལྟར་སྣང་།།
དེ་ཡི་སྣ་དང་ཁ་སྒོ་ནས།།
རླངས་པ་སྤྲིན་ནག་མཆེད་ལྟར་འཕྱུར།།
ལྕེ་ནི་གློག་ལྟར་འགྱུ་བ་སྟེ།།
ངུར་སྒྲ་འབྲུག་གི་སྒྲ་ལྟར་སྒྲོགས།།
ཨིནྡྲ་ནཱི་ལའི་བྲག་ལྟ་བུའི།།
རྨིག་པ་བརྡབས་པས་ས་གཞི་གཡོ།།
ཤིན་ཏུ་བསྐྱོད་པའི་རྭ་རྩེ་ཡིས།།
རི་བོའི་ལྷུན་ཡང་བསྙིལ་བར་ནུས།།
མིག་གཉིས་ཉི་མ་ཟླ་བ་ནི།།
སྤྲིན་མཐོང་མཁའ་ལ་གཡོ་བ་བཞིན།།
རྔ་མ་ལྗོན་པ་རྒྱས་པ་འདྲ།།
དེ་བསྐྱོད་པ་ཡིས་ནམ་མཁའི་སྤྲིན།།
རྣམ་པར་འཐོར་བ་བཞིན་དུ་སྣང་།།
དེ་ཡི་སྒྲ་ཡིས་གླུ་སྒྲ་ཡང་།།
ཀུན་ནས་རབ་ཏུ་ཟིལ་གྱིས་གནོན།།
འདི་འདྲ་གངས་ཅན་གནས་པ་ཡི།།
རྐང་བཞི་པ་ཡི་ངོ་མཚར་ཏོ།།
འདི་ཡིད་བསྒྲིན་པར་གནས་པ་ཡི།།
རྐང་གཉིས་པ་ལའང་རབ་ཏུ་དཀོན།།
དེ་འདྲ་བརྩེ་མེད་སྐྱེས་བུ་ཡི།།
མཚོན་ལས་རབ་ཏུ་རྒྱལ་གྱུར་ཅིག།
ཆང་ལ་བསྔགས་པ་བདུད་རྩིའི་བུམ་པ་བཞུགས།
༄༅།།ཨོཾ་སྭ་སྟི་སིདྡྷཾ།
ཁྲོ་བོའི་རྒྱལ་པོ་བདུད་རྩི་འཁྱིལ་བ་ལ་ཕྱག་འཚལ་ལོ།།
ས་ཡི་སྙིང་པོ་འགྲོ་བའི་ཉེར་འཚོ་དང་།།
དེ་བཞིན་མེ་ཏོག་འབྲས་བུའི་ཚོགས་རྣམས་དང་།།
རྩི་སྨན་སྣ་ཚོགས་སྦྱར་བའི་ཕབས་དང་ནི།།
འགྲོ་བའི་དག་བྱེད་གྱུར་པའི་ཆུ་གཙང་རྣམས།།
སྣོད་དང་རྐྱེན་དང་སྣ་ཚོགས་སྦྱོར་བ་དང་།།
དུས་ཀྱི་འགྱུར་བ་བཟང་པོས་ཡོངས་སྨིན་པར།།
བྱས་ཤིང་དྭངས་མའི་དྭངས་མ་ལེགས་བྱུང་བས།།
འདི་ཡི་རྒྱུ་རྐྱེན་ཕུན་སུམ་ཚོགས་པ་ཡིན།།
ཆེར་དྭངས་ཤེལ་ལྟར་སྣང་བའི་ཝུ་བ་ཡི།།
ཕྲེང་བ་མུ་ཏིག་ཕྲེང་བས་སྤྲས་འདྲ་བ།།
མཐོང་བས་མིག་གི་དཔལ་ཏེ་ཆིལ་ཆིལ་སྒྲ།།
ཐོས་པས་རྣ་བའི་དཔལ་ལ་བསུང་ངད་ཀྱིས།།
དྲི་འཛིན་དབང་པོ་ཚིམ་པར་བྱེད་པ་ཡིན།།
ཀུན་ནས་མྱངས་པས་ལྕེ་ཡི་དཔལ་ཡང་བདེ།།
གྲང་དང་ཚ་བའི་ཚེ་ན་དྲོད་དང་ནི།།
བསིལ་བྱེད་ལུས་ཀྱི་དབང་པོ་བདེ་བའི་རྒྱུ།།
མྱ་ངན་ཐིབས་པ་སེལ་བའི་ཉི་མ་སྟེ།།
དགའ་བདེའི་བསིལ་བ་བསྐྱོད་པའི་ཟླ་བ་ཡིན།།
ཤེས་རབ་མེ་ལྕེ་འབར་བྱེད་རླུང་ཡིན་ལ།།
སྨྲ་འདོད་རྣམས་ཀྱི་སྤོབས་པའི་དཔལ་ཡང་ཡིན།།
གཡུལ་ངོར་ཞུགས་པའི་བརྟུལ་ཞུགས་སྐྱེད་བྱེད་ཅིང་།།
འདོད་ལྡན་རྣམས་ཀྱི་བདེ་བའང་རྒྱས་བྱེད་ཡིན།།
ཞིར་འདོད་རྣམས་ཀྱི་རྒྱུད་ལ་འདི་ཡིས་ནི།།
ཏིང་འཛིན་དམ་ལ་ལྷུག་པར་བསྐྱེད་པ་ཡིན།།
དེ་ཕྱིར་འདི་ནི་བཏུང་བའི་ཕུལ་ཡང་ཡིན།།
ལོངས་སྤྱོད་རྣམས་ཀྱི་སྙིང་པོར་གྱུར་པ་ཡིན།།
དེ་སླད་འདི་ནི་མཆོད་འོས་མཆོད་པ་དང་།།
སྦྱིན་འོས་རྣམས་ལ་སྦྱིན་པར་བྱ་བ་ཡིན།།
རྩོམ་སྒྲིག་པ། དབང་མོ།
རྩོམ་ཁུངས། ས་སྐྱ་བཀའ་འབུམ།