སྙན་ངག་ཅེས་པའི་མཆོད་ཆང་དེ།།
ཚོར་བའི་ཁམས་ལ་ཤུགས་ཀྱིས་འཐིམ།།
སྙན་ངག་ཅེས་པའི་བསིལ་བ་དེ།།
སྣང་བའི་ངོས་ལ་དལ་གྱིས་བབས།།

སྐར་མས་ལ་མོ་རྒྱག་སྐབས་སུ།།
ཁྱེད་ཀྱི་སྙན་ངག་གཉིད་དུ་ཡུར།།
ཆུ་མོས་འབེལ་གཏམ་སྨྲ་སྐབས་སུ།།
ཁྱེད་ཀྱི་སྙན་ངག་གཉིད་ལས་སད།།

འཚོ་བ་དེ་ཡང་སྙན་ངག་སྟེ།།
དེ་ལ་སྙན་པའི་ཆུ་གཏེར་བརྡོལ།།
འཁོར་བ་འདི་ཡང་སྙན་ངག་སྟེ།།
དེ་ལ་སྙན་པའི་ང་རོ་འཁོར།།

ཕོ་ཡི་ངག་སྒོ་གྲོལ་བ་ན།།
དེ་ལ་སྙན་པའི་ཝུ་བ་འཕྱུར།།
མོ་ཡི་ཚོར་ཤེས་སྦྲིད་བ་ན།།
དེ་ལ་སྙན་པའི་བ་མོ་ཆགས།།

མདོར་ན་ཐམས་ཅད་སྙན་ངག་སྟེ།།
དེ་ལ་མོས་ཤིང་དེ་ལ་འཐད།།
བསྡུས་ན་ཐམས་ཅད་ཚོར་བ་སྟེ།།
དེ་ཡིས་དྲུད་ཅིང་དེ་ཡིས་བཏགས།།

ང་དང་ང་འདྲའི་རིགས་ཤིག་ལ།།
སྙན་ངག་ཅེས་པ་བཏུང་བ་ཡིན།།
དེ་ཉིད་ཧེབ་ཀྱིས་བཏུང་བ་ན།།
སྐོམ་པའི་གདུང་ལ་ཡུན་གྱིས་ཡལ།།

ང་དང་ང་འདྲའི་སྐོར་ཞིག་ལ།།
སྙན་ངག་ཅེས་པ་བཟའ་བ་ཡིན།།
དེ་ཉིད་དལ་མོར་གསོལ་བ་ན།།
བཀྲེས་པའི་སྣང་བ་རིམ་གྱིས་འགག།

སྙན་ངག་བུ་མོའི་རུམ་ཁ་རུ།།
མགོ་བོ་ག་ལེར་ཐོངས་ཤོག་དང་།།
དགའ་བདེའི་ཐག་པ་དམ་པོ་ཡིས།།
ཁྱེད་རང་དམ་དུ་སྡོམ་ངེས་ལགས།།

༼དབུས་གཙང་ཕྱོགས་ནས་ཡིན་པའི་གྲོགས་པོ་རིག་ལྡན་འོད་ཟེར་རམ་སྤྲིན་ཕུང་ལགས་ཀྱི་སྒེར་དེབ་གཉིས་པ་༼སྙན་ངག༽ཅེས་པའི་མགོ་བརྗོད་ཙམ་དུ་ཞོགས་འོད་ནས་2013 11 10ལ་བྲིས་པའོ།།༽

རྩོམ་ཁུངས། ངེད་དྲ་བ།