མདུན་གྱི་རི་བོ་དེ་སྨུག་པས་བསྒྲིབས་འདུག།
ཕྲ་རགས་གཟུགས་ཕུང་གི་དབྱེ་བ་མི་གསལ།།
གསུང་སྐད་སྙན་མོ་ཞིག་རྣ་བས་ཐོས་ཀྱང་།།

མིག་གིས་ཅི་བཞིན་ཞིག་མཐོང་ཐབས་མ་ལྡན།།


མོག་མོག་ནམ་ཟླ་འདི་ཇི་ལྟར་རུབ་ཀྱང་།།

འདུ་ཤེས་གསལ་བོ་ཡིས་མདུན་ལམ་འཚོལ་ཡོད།།

མུན་ཁྲོད་ཁ་དོག་དེ་རྟོགས་པར་དཀའ་ཡང་།།

གྲུ་བཞི་ཟླུམ་པོ་སོགས་ལག་པས་ཤེས་ཐུབ།།


རེ་བ་སྣུམ་པོ་ཞིག་སེམས་སུ་བཅུག་ནས།།

ཚོར་བ་རྣོན་པོ་ཡིས་མདུན་ལམ་འཚོལ་སྐབས།།
སྤོབས་པ་གསོན་པོ་ཡིས་སྔུན་ནས་ཁྲིད་དེ།།

གཅིག་སྤོས་གཉིས་སྤོས་ཀྱི་མདུན་ལ་ཆས་ཡོད།།


རང་སྔུན་ལྟ་བྱེད་ཀྱི་མིག་ཟུང་མེད་ན།།

གཞན་གྱིས་བཤད་ཚད་ནི་བདེན་པར་མ་ངེས།།

ཕྱོགས་ལྷུང་བསླུ་བྲིད་ཀྱི་སྐད་ཆ་མང་བས།།

མདུན་ལམ་འཕྱུག་མེད་ཅིག་འཚོལ་རྒྱུར་དཀའ་འོ།།


མིག་མཐོང་ལག་ཟིན་གྱི་བདེན་རྟགས་མེད་ཀྱང་།།

སྡོང་ལོ་ཆུར་ལྷུང་གི་ཅལ་སྒྲ་ཐོས་ཚེ།།

འདི་ན་མང་པོ་ཞིག་ཡར་འདྲོག་མར་འདྲོག།

དོན་མེད་རེ་དོགས་དེ་གཅིག་སྐྱེས་གཉིས་སྐྱེས།།


དྭངས་གསལ་མཁའ་དབྱིངས་ཀྱི་ཟླ་འོད་དཀར་པོ།།

དག་གཙང་མཚོ་མོ་ཡི་ངོས་སུ་འཆར་ཚེ།།
མཁའ་དབྱིངས་ཟླ་བ་ལས་རིན་ཐང་ཆེ་འདི།།
དཔྱད་པ་མ་རྫོགས་པའི་ལྟ་བ་རྐྱང་རྐྱང་།།


གསལ་ལ་མི་གསལ་བའི་གསང་བའི་སྐད་ངག།

བདེན་ལ་མི་བདེན་པའི་སྐད་ཆ་མང་པོ།།

འདི་ཡིན་འདི་མིན་གྱི་རེ་དོགས་སྣ་ཚོགས།།

ཡུན་ཐུང་རྨི་ལམ་གྱི་གསང་བ་མིན་འགྲོ།།


མ་དག་འབག་གཙོག་ཀྱི་མཆིལ་ལྷམ་གྱོན་ནས།།

གནས་ལུགས་ཤོག་དཀར་དེ་རྡོག་རྫིས་གཏོང་ན།།

ཐོབ་བྱའི་རེ་བ་དེ་ཇེ་ཆུང་ཇེ་ཆུང་།།
འགལ་འདུའི་ཕུང་པོ་དེ་ཇེ་ཆེ་ཇེ་ཆེ།།


འཆི་མེད་ལྷ་ལམ་ནས་ཅང་ཤེས་བཅིབས་ཏེ།།
མེ་ཏོག་དཀར་པོ་ཞིག་ལག་པས་འཐུས་ནས།།

དྲི་བསུང་མྱོང་བ་ཡི་ཉམས་ཤིག་འཆར་དེ།།
མདང་སུམ་རྨི་ལམ་གྱི་འཆར་ཆ་ཡིན་ནམ།།


རི་བོ་གཟར་ས་ནས་དབབ་རྡོ་འགྲིལ་ཚེ།།
གཞོལ་ནས་མཐུ་སྣེ་དེ་བཙན་གྱིས་བཟེད་ན།།

གླེན་པའི་དཔའ་རྟགས་ཀྱི་ལོ་རྒྱུས་མ་གཏོགས།།

ཐོབ་བྱ་ཕུན་ཚོགས་ཤིག་རྙེད་པར་མི་སྲིད།།


ལྷག་བསམ་བུམ་བཟང་ལ་བདུད་རྩི་བླུགས་ཏེ།།

ལྷད་མེད་བདེན་དོན་གྱི་བསང་ཆུ་བསྒྲུབས་ནས།།

མ་དག་འཐེན་འཁྱེར་ལ་ལན་གཅིག་བྲན་ན།།

དྭངས་གསལ་བཞིན་རིས་དེ་ཕལ་ཆེར་མཐོང་སྲིད།།

 

རྩོམ་ཁུངས། ངེད་དྲ་བ།