ནམ་གུང་ཞིག་ལས་གཉིད་ལས་སད་པ་སོགས་སྙན་ངག་ཚན་པ་བརྒྱད།
ནམ་གུང་ཞིག་ལ་གཉིད་ལས་སད་པ།
མི་ཕོ་འགའ་ཞིག་སེམས་ཆུང་ངང་། །
ཁྱོད་ཀྱི་སེམས་པའི་ཉེ་སར་བཅར། །
སྒོ་དང་སྒེའུ་འགྲམ་དེ་ག་ནས། །
ནང་དུ་ཅི་ཡོད་ཨེ་མཐོང་བལྟ། །
ཕྱུག་པོ་དག་ནི་ནམ་མཁའ་ནས། །
རྫིག་རྫིག་བྱེད་ཅིང་ཡར་མར་འགྲོ །
ལོངས་སྤྱོད་འཛོམས་པ་གཞན་དག་ཀྱང་། །
མིག་གི་ཐད་ནས་ཉམས་སངས་འཇོག །
ལ་ལ་ཧ་ཅང་སྡུག་པ་སྟེ། །
ག་ཤེད་ཡིན་ཀྱང་ཆུ་ཉོག་བྱོ། །
འགའ་ཞིག་ཅུང་ཟད་གྲུང་བ་སྟེ། །
སྟབས་ཀ་འགྲིག་པའི་སེན་འཐོགས་བྱེད། །
གཡོ་ལ་གོམས་པ་མང་པོས་ནི། །
ཁམས་དང་མཐུན་པའི་གླེང་གཞི་རྩོམ། །
རྫུན་ལ་བྱང་བ་དེ་དག་ཀྱང་། །
མནའ་ལ་འཇུས་ནས་དལ་མོ་ཡོང་། །
གཞན་དང་གཞན་ཀྱང་རང་ས་ནས། །
ཐབས་དང་བཀོད་པ་སྣ་ཚོགས་འཐེན། །
ལ་ལ་ཁ་པར་ནང་དུ་སྦེད། །
འགའ་ཞིག་སྐད་འཕྲིན་ནང་དུ་སྐུང་། །
སྤྱོད་ཁང་ལྟ་བུའི་འཇིག་རྟེན་ན། །
ཤོག་བུའི་མེ་ཏོག་ག་ཚོད་ཡོད། །
ང་ཡང་སྙིགས་རོ་དེ་དག་ལས། །
གཞན་ཞིག་ཡིན་རབས་བཤད་རྒྱུ་མེད། །
མཚན་མོ་འདི་ལ་མི་ཚེ་ཞེས། །
གལ་ཏེ་འབོད་པར་གྱུར་བ་ན། །
ཁྱོད་ནི་ངོས་ཀྱི་རྨི་ལམ་དུ། །
དར་ཅིག་འཁྱུག་པ་ང་རེས་ཚོར། །
ད་ལྟའི་ང་ཡི་ནམ་མཁའ་ན། །
གཟུགས་སྒྲ་དྲི་རོ་གང་ཡང་མེད། །
དོ་ནུབ་སྙིང་གི་ཐིག་ལེ་ཁྱོད། །
ཤིན་ཏུ་རབ་ཏུ་དྲན་པ་བདེན། །
རོལ་དབྱངས་ཤིག་གིས་ཁ་རོག་གེར། །
ང་ནི་འཇིག་རྟེན་གཞན་ཞིག་ཁྲིད། །
ཁྱོད་ཀྱང་གར་ཡོང་མི་གསལ་སྟེ། །
ང་ཡི་སྔུན་དུ་འགྲོ་བ་མཐོང་། །
མཚམས་ཤིག་མིག་མདུན་བཞུར་བ་དག །
གློ་རྡེག་བོར་བའི་སྣང་བ་བྱུང་། །
ངོས་ཀྱིས་རང་གི་དབུགས་དབྱུང་དང་། །
སྙིང་ཆུང་ལྡིང་བའི་སྒྲ་དག་ཐོས། །
2013/17/1མཚན་གུང་ལ།
དོན་མི་འགྲུབ་པའི་ཡི་གེ་འདི་དག
ནམ་མཁའི་དབྱིངས་སུ་བརྩིགས་པའི་ཁང་ཁྱིམ་ཡོད།
མཚམས་སྤྲིན་གོས་སུ་གྱོན་པའི་ལྷ་མོ་ཡོད། །
ང་ཡི་སྙན་ངག་ང་ཡི་བརྩེ་དུང་ཡིན། །
འདོད་པའི་ཁམས་ཀྱི་དྲོད་དང་བསིལ་བ་ཡིན། །
དར་སོབ་བསྔས་སུ་བྱས་པའི་ཆུ་མོ་ཡོད། །
རི་མོ་གློ་རྡེག་འགྱུར་བའི་རླབས་གཉེར་ཡོད། །
ང་ཡི་སྙན་ངག་ང་ཡི་བདེན་པ་ཡིན། །
ཆུ་བྲག་བརྡབས་པའི་དབྱིབས་དང་ཁ་དོག་ཡིན། །
སེམས་པ་ཚལ་བར་གཤགས་པའི་སྨག་རིམ་ཡོད། །
རུས་རྐང་དུམ་བུར་གཏོང་བའི་གྲང་རེག་ཡོད། །
ང་ཡི་སྙན་ངག་ང་ཡི་སྐྱོ་གདུང་ཡིན། །
སྲོག་ལ་ཁེལ་བའི་སྡུག་དང་ན་གཟེར་ཡིན། །
རྨི་ལམ་ཚིག་པའི་རྗེས་ཀྱི་ཐལ་བ་ཡོད། །
དེ་ཡི་ཤུལ་དུ་ལྡང་བའི་རླུང་ཡང་ཡོད། །
ང་ཡི་སྙན་ངག་ང་ཡི་མཚན་མོ་ཡིན། །
མུན་ནག་ནང་གི་གཟུགས་དང་སྣང་བ་ཡིན། །
ཕ་མཐའ་བརྒལ་བར་དཀའ་བའི་བྱེ་ཐང་ཡོད། །
སྨྲེང་བ་མཚོ་རུ་བསྐྱིལ་བའི་སྨུག་པ་ཡོད། །
ང་ཡི་སྙན་ངག་ང་ཡི་ཁེར་རྐྱང་ཡིན། །
རང་ལ་བླངས་བའི་གླུ་དང་ལ་གཞས་ཡིན། །
ཀླད་ཞོ་ལྡེམ་ལྡེམ་ཆགས་པའི་སྤྲིས་མར་ཡོད། །
བ་སྤུ་ཤུམ་ཤུམ་ངུ་བའི་སྐད་སྒྲ་ཡོད། །
ང་ཡི་སྙན་ངག་ང་ཡི་དུར་ཁྲོད་ཡིན། །
རྡོ་བའི་ངོས་ཀྱི་ཁྲག་དང་རུས་ཐལ་ཡིན། །
2013/31/12ཉིན།
སྦྲིད་སྨན་འཐུང་བའི་སྙན་ངག
མིག་གི་མཐའ་རུ་ཁངས་སྐྱ་འབབ་པ་འདི། །
རུས་པའི་གཏིང་ལ་གྲང་ལྷགས་ལྡང་བ་འདི། །
ན་ནིང་མ་རེད་དེའི་ཡང་ཡར་སྔོན་རེད། །
ད་ལོ་ཡང་ན་དེ་རིང་ཁ་སང་རེད། །
སྐྱོ་བའི་བྲག་རི་ཁོག་ནང་ཉིལ་བ་འདི། །
དེ་ཡི་མཐའ་འཁོར་མུན་པས་བཟུང་བ་འདི། །
ལོ་དང་ཟླ་བའི་དབུགས་རྔ་ཆད་པ་རེད། །
ལྷག་མའི་དེ་དག་སེམས་ནང་ལུས་པ་རེད། །
དེང་མའི་ཁག་ཅིག་ཡལ་རྒྱུ་མེད་པ་འདི། །
གཟུགས་དང་དབྱིབས་ལ་རེག་རྒྱུ་ཡོད་པ་འདི། །
མེ་ལོང་ནང་གི་དུས་ཚོད་ཆག་པ་རེད། །
སྡིག་པའི་མེ་ཏོག་ཡིད་ནས་སྐྱེས་བ་རེད། །
ཞེ་དང་སྣང་བ་རླུང་གིས་གཡོ་བ་འདི། །
དྲན་པའི་རྨ་ཁ་རྣག་གིས་ཟོས་བ་འདི། །
གློ་བའི་ནང་དུ་མར་མར་སིམ་པ་རེད། །
སྙིང་གི་ཞབས་ནས་ཡར་ཡར་འཕགས་པ་རེད། །
མ་བསྒུལ་བཞག་ན་ཧ་ཅང་ཚ་བ་འདི། །
ཐོག་ལ་ཁེལ་ན་ཤིན་ཏུ་གཟེར་བ་འདི། །
ཤིང་སྐམ་མེ་རུ་འཚིག་པའི་དུ་བ་རེད། །
ལས་འཕྲོ་དཔུང་ཐུག་བརྒྱབ་པའི་ཆོམ་སྒྲ་རེད། །
ཟླ་བ་སྐྱོ་ཞིང་ཤུམ་ཤུམ་ངུ་བ་འདི། །
སྐར་འོད་བཟི་ཞིང་ར་རོ་ཆགས་པ་འདི། །
ཉལ་ཐ་སྤྲིན་ལ་འཁྲུལ་ནས་འཐེན་པ་རེད། །
བརྩེ་དུང་ཆང་ལ་ནོར་ནས་འཐུང་བ་རེད། །
སྔུན་ལ་ནུར་བའི་བར་སྟོང་ཆེ་བ་འདི། །
ཕྱིར་ལ་ལྡོག་པའི་ཁམས་ཀྱང་ཡངས་བ་འདི། །
ཆག་པའི་དཀར་ཡོལ་ཐབས་ཀྱིས་བཙེམས་པ་རེད།
ཤི་བའི་རོ་ལ་སྙིང་ཤ་གླན་པ་རེད། །
ངོམས་མེད་ཚོར་བའི་ལས་སུ་བྱ་བ་འདི། །
ཡུལ་དང་དུས་ཀྱི་བར་མཚམས་མེད་པ་འདི། །
འདི་དག་བྲིས་ནས་གཞན་དག་བསྟན་པ་རེད། །
གཞན་དག་བསྟན་ནས་འདི་དག་བཤད་པ་རེད། །
2014/29/3ཉིན་ལ།
མཚན་མོའི་ཡིག་འབྲུ་ནག་པོ། ༼ཚན་པ་གསུམ༽
༡ ཁང་བའི་ནང་ནས་སྡོད་ཐབས་བྲལ།
ཁང་མིག་འདི་ནི་ལྕགས་ཀྱིས་བྱས། །
འཕལ་ཀ་འདི་ཡང་ལྕགས་ཀྱིས་སྦྱར། །
ལྕགས་ཀྱི་སྒམ་ཆུང་ནག་རྡིབ་མ། །
སྤྱིར་ན་ང་ཡི་གཟིམས་ཤག་ཡིན། །
གྱང་ངོས་ཐུར་ལ་ཁངས་རྡང་ཆགས། །
ཉལ་ཁྲིའི་སྒང་དུ་རླུང་དམར་འཚུབ། །
ཤིན་ཏུ་གྲང་བའི་དུས་ཚོད་ལ། །
མགོ་རྔ་མཐུད་མཚམས་བཀར་རྒྱུ་མེད། །
སྤྱོད་ཁང་ལྟ་བུའི་དཔེ་སྒྲོམ་དུ། །
ཞེ་རྩ་མེར་བའི་དྲི་ངན་འཐུལ། །
རྐང་ལག་རྐྱོང་སའི་གནས་དག་ཏུ། །
གད་སྙིགས་མང་པོ་ལྡབ་གྱིས་འཕེལ། །
གཅུ་ལོག་རྒྱག་པའི་སྟོང་བསམ་ལ། །
དབུགས་ཀྱང་ཁེགས་པའི་སྣང་བ་བྱུང་། །
དེ་ནི་རང་སྲོག་གཅོད་པ་བཞིན། །
རྔུལ་ཆུའི་ཐིགས་པ་ས་རུ་འབབ །
ཁང་བའི་ནམ་མཁའ་ས་ལ་བརྡབ། །
ག་ལེར་ཆག་ནས་ཡལ་བར་གྱུར། །
ཤུལ་ཏུ་ང་ཡི་བརྩེ་དུང་དང་། །
རྨི་ལམ་མང་པོས་འཚང་ཁ་རྒྱག །
ཁ་བྱང་མེད་པའི་ཚོར་བ་ལ། །
ལྕགས་སྒྲོག་སིལ་སྒྲ་སང་སང་གྲགས། །
མཚན་མོའི་ཡིག་འབྲུ་འདི་དག་ལ། །
འོད་ཀྱི་གཤོག་པ་བཟོ་རུ་འགྲོ །
༢ མཚན་གུང་ཕྱི་ནས་ཆང་འཐུང་བ།
མཚན་གུང་འདི་ལ་སྒྲོལ་མ་ཟེར། །
དེ་ཡི་ཁོག་ཏུ་ཉི་འོད་ཡོད། །
ང་ལ་རེ་བ་གཞན་ཞིག་མེད། །
ལྷིང་འཇགས་འདི་ལ་གསོལ་བ་འདེབས། །
སྤང་ཐོག་འདི་ན་ང་ལས་མེད། །
ང་ལ་ལྦུ་ཆང་སྒམ་གང་ཡོད། །
ཁོག་པའི་ནང་ན་སྒམ་དོ་ཡོད། །
དོ་ནུབ་ང་རང་སངས་རྒྱས་ཡོད། །
ཨེ་མ་ངོས་ཀྱིས་རོལ་དབྱངས་གཏོང་། །
ཞབས་བྲོ་འཁྲབ་ནས་སྙན་ངག་གྱེར། །
ལྷོད་ཤ་ཆགས་པའི་འཇིག་རྟེན་འདི། །
འཐོགས་རེག་མེད་པའི་བར་སྣང་རེད། །
མུན་ནག་ནང་གི་མི་རྣམས་ལ། །
བདུད་རྩི་ཆང་གི་མཆོད་པ་འབུལ། །
ང་ཡི་ཚབ་ཏུ་ཁྱོད་ཚོས་བཞེས། །
ཁྱོད་ཚོའི་དོད་དུ་ངས་ཀྱང་འཐུང་། །
དབུལ་ཞིང་ཕོངས་བའི་མི་རྣམས་ལ། །
དོ་དགུང་ངས་ཡིས་འདུག་རོགས་བྱེད། །
ཁོ་རེ་སྲང་མདོའི་སྤྲང་པོ་ཚོ། །
འདི་ལ་ཤོག་དང་ཆང་གཏུག་རྒྱག །
སྨད་འཚོང་བུ་མོ་སེམས་བཟང་མ། །
དོ་ནུབ་ང་ལ་གནས་ཚང་གཡོར། །
འདོད་པའི་སྙིང་རྗེ་ཆེན་པོ་འདིས། །
སྡུག་བསྔལ་སེལ་བའི་ཡིད་ཆེས་མཛོད། །
ང་ཡིས་རང་གི་གྲིབ་མ་ལ། །
བྱིལ་བྱིལ་གཏོང་བཞིན་འོ་ཞིག་བྱས། །
དོ་ནུབ་ང་ཡི་སེམས་ནང་ན། །
མེ་ལྕེ་དམར་པོ་དགུང་དུ་འཕྱོ། །
༣ ནམ་ལངས་ཁའི་འཕྲུལ་སྣང་།
ཟླ་འོད་མེད་པའི་མཚན་མོ་ལ། །
སྐར་མ་མང་པོས་རང་སྲོག་གཅོད། །
ང་རང་དེ་ལ་བལྟས་ནས་ངུས། །
སེམས་ལ་བྱམས་པ་ཙམ་ཞིག་དྲན། །
ང་ཡི་མཆི་མ་ཁོག་ཏུ་བཞུར། །
ཆུ་བོ་ཆེན་པོ་གསུམ་ཙམ་ཆགས། །
དེ་དག་སླར་ཡང་ཉི་མས་སྐམ། །
ཤུལ་ནས་རྡོ་དང་བྱེ་མ་ཟགས། །
སྐྱ་རེངས་མ་བཀྱགས་ཡར་སྔོན་ལ། །
སྤྲིན་པའི་རི་བོ་ཡོམ་ཡོམ་འགུལ། །
ང་རང་དེ་ལ་སྐྲག་ནས་བྲོས། །
ངག་ནས་ཨ་མ་ཞེས་ཀྱང་ཐལ། །
ང་ཡི་རྐང་སྣམ་ཁ་ཐིག་གིས། །
ང་རང་དུམ་བུ་གཉིས་སུ་བཏང་། །
ཁོག་སྨད་ཁྱི་རོ་ཞིག་ཏུ་གྱུར། །
སྟེང་དུ་འབུ་ཚོགས་འཁོར་བ་མཐོང་། །
ནམ་མཁའ་འདི་ནི་ཤེལ་གྱིས་བྱས། །
མེ་ལོང་དེ་ཡང་ཤེལ་གྱིས་བྱས། །
ཤེལ་དམ་སྟོང་བ་རེ་རེ་ལས། །
ཆུ་ཡི་ཐིགས་པ་ཆར་དུ་ཉིལ། །
2014/2/4མཚན་མོར།
མཐའ་མཇུག་གི་དྲན་པ།
དེ་རིང་ལན་གྲུའི་ནམ་མཁའ་ནི། །
མི་རྐྱང་ཞིག་གི་སེམས་པ་བཞིན། །
ས་རྡུལ་གསེང་ན་ལྷབ་ལྷུབ་འདར། །
དུད་སྨུག་ཀློང་ན་ཤུམ་ཤུམ་ངུ་། །
ང་རང་ཁང་མིག་ཅིག་ཏུ་སྡོད། །
སྒེའུ་ཁང་ནང་ནས་ཕྱི་རུ་བལྟ། །
ཡིད་ལ་ནམ་མཁའ་ཙམ་ཞིག་དྲན། །
བར་སྣང་ཁམས་སུ་ལག་རྙོབ་བྱེད། །
ཁང་བརྩེགས་རེ་རེའི་ཕྲག་ཁ་ན། །
ཤོག་རལ་དག་ནི་འཚང་ཁ་རྒྱག །
སྤྲིན་པ་རེ་རེའི་བྲང་ངོས་སུ། །
མིག་ཆུ་འགའ་ཞིག་འགྲིལ་བ་མཐོང་། །
ངལ་ཞིང་དུབ་པའི་ཉི་མ་ཞིག །
ས་གནམ་འདྲེས་པའི་མཚམས་སུ་ནུར། །
སྐྱོ་ཐག་ཆོད་པའི་འོད་སྣང་དེ། །
ན་བུན་འཁྲིགས་པའི་ཁུད་དུ་ལྷུང་། །
ནམ་མཁའ་བོར་བའི་སྐྱེ་བོ་དག །
ཐད་ཀའི་སྲང་མདོ་དག་ཏུ་བཞུར། །
ང་ཡི་དྲན་པ་སྨྲེང་བས་བསྒུལ། །
རླུང་གིས་ཁུར་ཏེ་རྒྱང་དུ་འགྲོ །
ཐལ་གྱིས་ཟིན་པའི་དངོས་པོ་རྣམས། །
སྣང་བའི་ཡུལ་ནས་ཡལ་བར་རྩོམ། །
ངོས་ཀྱིས་དེ་ཡི་རྗེས་ཤུལ་དུ། །
མཇུག་མཐའི་ནམ་མཁའ་གཞན་ཞིག་བྲིས། །
ཚེ་སྲོག་རེ་རེའི་རྒྱབ་ལོགས་ནས། །
མཛེས་པའི་འཇིག་རྟེན་རེ་རེ་སྐྱེས། །
ང་ཡིས་རང་གི་ནམ་མཁའ་རུ། །
ཁྱོད་ཉིད་འཆར་བའི་སྨོན་ལམ་བཏབ། །
ཤིན་ཏུ་གྲང་བའི་གཙང་བོ་ཞིག །
འོད་ཀྱི་མུན་པའི་རྗེས་སུ་འབབ། །
ལས་འཕྲོ་ཟད་པའི་སྔ་རོལ་དུ། །
ངས་ནི་ཁྱོད་རང་དེ་ལྟར་དྲན། །
2013/21/12ཉིན།
ཁ་བྱང་མེད་པའི་རྨི་ལམ།
མི་ལོ་ཉི་ཤུའི་རྐང་རྗེས། །
ས་རྡུལ་ནང་དུ་གཏོར་བའི། །
མཐའ་ཁའི་འཇིག་རྟེན་འདྲ་བོ། །
བསྡད་ཀྱིན་ཆ་མེད་ཆགས་ཡོང་། །
རྨི་ལམ་ནང་གི་མི་དེར། །
མིང་ཞིག་འདོགས་ཐབས་མི་འདུག །
ནམ་ཟླ་དཔྱིད་ལ་བཞད་པའི། །
ཆུ་ཡི་མེ་ཏོག་ཆུང་ཆུང་། །
ལག་པའི་ནང་དུ་བླངས་ཀྱང་། །
རི་མོ་མཐོང་ཐབས་མི་འདུག །
ཁྱོད་རེད་ཁྱོད་རེད་བསམ་ཡོང་། །
མ་རེད་མ་རེད་སྙམ་ཡོང་། །
ན་བུན་སེམས་སུ་བསྐྱིལ་བའི། །
ང་ནི་བྱེའུ་ཆུང་ཞིག་སྟེ། །
འཚོ་བའི་བྱང་ཐང་བརྒལ་ནས། །
གཤོག་པ་རླུང་གིས་ཟད་ཀྱང་། །
ལས་དབང་ཁོག་ནག་འདི་ཡིས། །
ངལ་ཞིག་གསོ་རུ་མི་འཇུག །
ཡ་གིའི་གྲོང་རོང་ནང་ནས། །
ཅིག་གིས་ངུ་ཤུམ་འཐེན་བྱུང་། །
ངས་ནི་མལ་ཁྲིའི་སྒང་དུ། །
རང་ལ་གླུ་ཞིག་བླངས་ཡོད། །
བྱམས་པ་བོར་བའི་ཚབ་ལ། །
གཞན་ཞིག་འཇོག་ཐབས་མི་འདུག །
སྐར་འོད་རྒྱང་ཐག་རིང་བའི། །
སེམས་ལ་སྨྲེང་བ་སྐྱེས་བྱུང་། །
གྲང་རེག་བྲང་ལ་སྦྱར་ནས། །
ཁང་ཆུང་ནང་དུ་འཛུལ་ཡང་། །
ཞག་སྒྲོན་ཕྱེད་ཀ་ཞིག་གིས། །
མཚན་མོ་བསྲེག་ཐབས་མ་བྱུང་། །
ཁ་བ་བབས་པའི་རྗེས་ཀྱི། །
སྐྱ་མོའི་ལམ་ནས་རྙེད་པའི། །
རྒྱབ་གཟུགས་སྙིང་ལ་རྗེ་བོ། །
ཡིད་དུ་འོང་འོང་འདྲ་ཡང་། །
འབབ་ཚུགས་མཐའ་མའི་འགྲམ་ནས། །
དེ་འདི་མེད་པར་བོར་སོང་། །
དཀར་པོ་དེ་ཡང་མ་རེད།
དམར་པོ་དེ་ཡང་མ་རེད། །
ཚོས་ཀྱི་སྡེབ་ཁ་འཕྲོད་པའི། །
ལས་ཀྱི་མེ་ཏོག་མིན་ན། །
མིག་གི་ཐད་ཀའི་འདི་དག །
ཡོད་ན་མེད་ན་གཅིག་རེད། །
ནུབ་ཁའི་མེ་ལོང་ནང་ནས། །
ཉི་འོད་ས་ལ་ལྷུང་བྱུང་། །
གནམ་ལ་རི་མོ་མ་བྲིས། །
མཚམས་སྤྲིན་རླུང་གིས་ཁུར་སོང་། །
ལས་འཕྲོ་ཟད་པའི་ཕྱོགས་ལ། །
མཚན་མོ་མ་གཏོགས་མི་འདུག །
ལག་ཆུང་ཆུ་ལ་བཅུས་ནས། །
ལྷམ་ཆུང་བྱེ་མར་བཏབ་སོང་། །
གྲམ་པའི་ཕ་བོང་ངོས་ལ། །
རྨ་ཆུའི་འགྲམ་དར་བྲིས་ཡོད། །
དགུན་ཁ་སླེབས་པ་མ་རེད། །
སེམས་ལ་ཆབ་རོམ་ཆགས་བྱུང་། །
ནུབ་ཀྱི་དཀར་ཁུང་ནང་ལ། །
མུན་པའི་ཁུ་བ་ཟགས་སོང་། །
ལོ་འདི་དེང་མའི་ལོ་རེད། །
ང་ལ་རྨི་ལམ་མི་འདུག །
ནམ་མཁའ་སྟོང་བ་ཞིག་ཏུ། །
ལག་སྙོབ་བྱེད་དགོས་བྱུང་སོང་། །
ང་འདི་ཆུང་རབས་བཤད་ན། །
ས་རྡུལ་གསེང་ནས་བོར་འགྲོ །
འཇིག་རྟེན་ཆེ་རབས་མ་གླེང་། །
སེམས་པ་ཤོང་ཐབས་མི་འདུག །
ཁེར་རྐྱང་ཡིན་པའི་མི་ལ། །
སྐྱོ་རོགས་གནམ་གྱིས་གནང་འགྲོ །
མཁའ་ལ་འཇའ་ཚོན་ཤར་བ། །
སྐར་མ་གཅིག་དང་གཉིས་རེད། །
ཆུ་མོའི་ཁ་རུ་གཡེང་བའི། །
ལོ་དང་ཟླ་བ་སྙིང་རྗེ། །
མི་ཚེ་མི་ཚེ་ཟེར་བ། །
གླེན་པའི་གློའུ་བཤད་ཅིག་རེད། །
སེམས་ཀྱི་མྱ་ངན་ཐང་ལ། །
དུ་བའི་རྩྭ་ལྡུམ་སྐྱེས་བྱུང་། །
རླུང་བུ་ག་ལེར་ལྡང་ནས། །
ང་ཡི་སྐད་ཆ་བརྐུས་སོང་། །
དྲན་པའི་ཡུལ་ཕྱོགས་ས་ནས། །
སྐར་མའི་ཆར་ཞོད་བརྒྱབ་བྱུང་། །
འཆར་ཁའི་ཉི་འོད་བའི་ནང་ན། །
ཆུ་ཡི་ཟེགས་མ་འཐོར་ན། །
སྔོན་པོ་སྔོན་པོ་ཞིག་རེད། །
ལྗང་ཁུ་ལྗང་ཁུ་ཞིག་རེད། །
ང་ཡི་བྱམས་པའི་རྒྱབ་གཟུགས། །
ཆུ་ཡི་ནང་ལ་དོད་འདུག །
མུན་པའི་ཤོག་དཀར་ངོས་སུ། །
སྐྱོ་བའི་མེ་སྟག་ལྷུང་བ། །
གངས་རི་ནག་པོ་འདྲ་བྱུང་། །
ཚིས་རིས་མོག་པོ་འདྲ་བྱུང་། །
དབྱངས་ལ་སྐྱུར་ཤ་ཆགས་པའི། །
གླུ་ཞིག་བླངས་ན་བསམ་བྱུང་། །
༢༠༡༤/༥/༣ལ་སྨུག་པས་སྦྱར།
(མཆོད་མེའི་པར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།