ཤར་གྱི་ཉི་གཞོན་ལྷོ་ཡི་སྤྲིན་ལམ་འགྲིམས།
ཉི་རྡུལ་དམར་པོས་བདག་གི་མགོ་བོར་རྡེག།།
སེམས་པ་རྨི་ལམ་ཞིང་ནས་མ་བཏང་བར།།
ལྷོ་སྤྲིན་དཀར་པོས་བདག་ཉིད་སྲུང་བར་མཛོད།།

ལུས་འདི་བྱེ་ཐང་ཁྲོད་དུ་ངལ་བས་མནར།།
སེམས་པ་རྩྭ་ཐང་སྟེང་གི་མེ་ཏོག་སྟེ།།
ཁྲ་ཚོམ་ཕྱེ་མ་ལེབ་ཀྱི་གར་སྟབས་དང་།།
བུང་བའི་གླུ་དབྱངས་སྙན་པོས་རབ་ཏུ་མྱོས།།

སེམས་འདི་ད་དུང་ངལ་མེད་འགྲོ་བར་འདོད།།
རླུང་གི་བཞོན་པ་ཅང་ཤེས་དཀར་པོར་སྤྲུལ།།
མུ་མེད་རྩྭ་ཐང་ནམ་མཁའི་ཀློང་རོལ་ནས།།
རྒྱུག་ཅིང་རྨིག་རྗེས་ས་གཞིར་བཀོད་ན་སྙམ།།

ས་ཆེན་ཡོམ་ཡོམ་འདར་བའི་བང་རྩལ་དེས།།
མེ་ཏོག་ཁྲི་འབུམ་མང་པོ་བརྗེད་གྱུར་ཀྱང།།
བྱེ་ཐང་ཁྲོད་ཀྱི་རང་ལུས་གཡར་པོ་དེ།།
སེམས་པ་ཁྲེལ་མེད་ཁྱོད་ཀྱིས་བརྗེད་ཕོད་དམ།།

སེམས་འདི་བྱ་སྒྲོ་རླུང་བུས་འཁྱེར་བ་བཞིན།།
སྟོང་པའི་མཁའ་ལ་རླུང་གི་གཤོག་པ་ཅན།།
ཡུན་ཙམ་མི་སྡོད་རྒྱང་དུ་བཞུད་གྱུར་ཀྱང།།
ཕུགས་བསམ་འདུན་མའི་གནས་ས་ཨེ་ཡོད་སྙམ།།

སེམས་པ་བྱིས་པའི་ལག་གི་ཤོག་བྱ་ཡིན།།
ལུས་པོ་འདི་ནི་བྱིས་པའི་ལག་དང་མཚུངས།།
སྟོན་རླུང་བསིལ་བུས་དགུང་དུ་བཏེགས་ན་ཡང།།
སྐུད་སྣེ་བྱིས་པའི་ལག་ཏུ་དམ་པོར་བཟུང་།།

སེམས་ཀྱིས་འདོད་པ་རི་རྒྱལ་ལྷུན་པོ་ཉིད།།
ལུས་པོས་ཐེག་པ་དེའུ་འབུར་ཆུང་ཆུང་ཞིག།།
ལུས་སེམས་བར་ལ་དབུ་མའི་ལམ་ཐིག་ཅིག།།
བསྐྲུན་པའི་བྱེད་པོ་ཡོད་པར་མ་གྱུར་ཏམ།།

ལུས་པོ་འདི་ནི་སེམས་ཀྱི་སྐྱོ་རོགས་ཡིན།།
ལུས་སེམས་འབྲེལ་བའི་དགའ་སྐྱོའི་འཇིག་རྟེན་འདི།།
ཁྱོད་དང་ང་ཞེས་རྩོད་པའི་དམག་ས་ཡིན།།
ས་ཆེན་སེམས་ཉིད་གླིང་འདི་ཀྱེ་མ་ཧོ།།
      ༢༠༡༣ ། ༡༡ ། ༡༦ དགོང་དྲོ་བྲིས་སོ།

 (མཆོད་མེ་དྲ་བའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།