ཞུ་ཡིག
★གྲོང་ཁྱེར་དུ་སྤོ་བར་བྲེལ་བའི་རྨ་ཆུའི་འབྲོག་དམངས་ལ།
རྟ་ཕོ་བོར་ན་སྒ་ལ་བདག་དམ་མཛོད།།
གཡག་རྒོད་འཚོང་ན་སྣ་གཅུ་རྟེན་ལ་ཟུངས།།
འབྲི་མོ་ཤི་ན་བཞོ་ཟེའུ་གཡང་དུ་སོམས།།
མ་མོ་བཤའ་ན་རྭ་ཅོ་སྣོད་དུ་ཆུགས།།
མཚེར་ས་སྤོར་ན་མཚེར་ཤུལ་རྡོ་ཡིས་གནོན།།
ཁ་ཟས་བརྗེ་ན་ལྟོ་བའི་མ་ལ་དྲིས།།
སྦྲ་ནག་ལྟེབ་ན་ནང་ཐིག་ཉར་ཡག་བྱོས།།
སློག་པ་འཕུད་ན་ནམ་ཟླའི་དྲོད་ལ་དཔྱོད།།
རྒྱ་ལ་བསྲེ་ན་རྒྱ་རྒྱུས་ལེན་ཡག་བགྱིས།།
ཁ་ཆེར་འཐབ་ན་ཁ་ཁོག་གྲིམ་མོ་བྱོས།།
གྲོང་ནས་འདུག་ན་གཡོག་ལས་དང་དུ་ལོངས།།
ཁེ་ལས་གཉེར་ན་སྲང་དང་ཟུར་ལ་ལྟོས།།
སྐད་ཆ་འདོར་ན་རུས་པའི་རྐང་ལ་དྲིས།།
ལུགས་སྲོལ་བསྒྱུར་ན་མེས་པོའི་ཁམས་ལ་གཟིགས།།
གངས་དང་འབྲལ་ན་ཤམ་པོའི་ཐུགས་ལ་ཞོག།
ཟམ་པ་བརྒལ་ན་གཙང་ཆུའི་བདག་པོར་ཤོད།།
ཕ་ས་བསྐྱུར་མིན་ཕ་ལོའི་དགོངས་པར་དམིགས།།
རྨ་ཆུ་འཐུང་མིན་མ་ལོར་གྲོས་ཤིག་ཐོབས།།
རྩྭ་ཐང་སྲུང་མིན་ཚ་བོའི་མོས་པར་རྟོགས།།
སྒོ་ཁྱི་བཙོང་མིན་བུ་མོར་ནན་འདྲི་བྱོས།།
2010-3-3
རྩོམ་ཁུངས། མཚན་ལམ་རིང་མོ།