མཁའ་མཐའི་སྤྲིན་པ་ལྷོ་ཕྱོགས་རི་ལ་འཁོར།།
སྨྲེང་བའི་སྐྱོ་གླུ་རྫ་རིའི་སྙིང་ལ་སིམ།།
སེམས་འགྱུ་ཕྲ་མོས་སྐུལ་བའི་གཞས་ཆུང་ཞིག།
ལྷིང་འཇགས་ཁོར་ཡུག་ངོགས་ནས་ཡང་ཡང་བླངས།།

ཁྲུང་ཁྲུང་དཀར་མོས་གཤོག་ཟུང་ལན་འགར་རྡེབ།།
ལན་ཆགས་ཕྱི་མིག་ཁྲོད་ནས་བྲག་ཐེམ་སྙེག།
ཆུ་འཛིན་འདུ་འཛི་རྒོད་པའི་མཁའ་དབྱིངས་ནས།།
ཟླ་བ་ལྷ་མོ་སྒྲ་གཅན་གཟའ་ཡིས་བཟུང༌།།

ལོ་ཟླའི་བྱང་ལམ་བཅད་པའི་མཚེའུ་འགྲམ་ནས།།
ཁེར་རྐྱང་བསམ་གཞིགས་རྒྱང་ནས་རྒྱང་དུ་བསྲིངས།།
གདུང་བའི་སེམས་པ་དགུན་གྱི་ཆུ་མོ་བཞིན།།
འཁྱག་པའི་མལ་ནས་སྐྱོ་བའི་གཞས་ཤིག་འབྱིན།།

ཉིན་མཚན་དུས་དྲུག་དབུགས་ཐེངས་གཅིག་གིས་ཤོར།།
གཞོན་པའི་ལང་ཚོ་དུས་ཀྱི་དབུང་དུ་བསྐྱལ།།
མཛེས་པའི་མེ་ཏོག་སྟོན་རླུང་བཙན་གྱིས་བདས།།
སྐྱོ་བའི་གཞས་ཤིག་མཚོ་ཡི་རླབས་ལ་བསྐུར།།

ཁྲ་ཚོམ་མེ་ཏོག་ལང་ཚོ་འཛུམ་གྱིས་དགོད།།
འདབ་ཆགས་ཕྱེ་ལེབ་སྒེག་མོ་ངང་གིས་རྩེན།།
ཞེན་ཆགས་ཕུང་བོ་བོར་བའི་ཕྱི་མིག་འདིས།།
མིག་ཆུའི་དོག་པ་ཕྲ་མོ་ས་རུ་ཟགས།།

ཟླ་བ་མཁའ་ན་འཛུམ་པའི་སྲོད་དུས་སུ།།
ལོ་མ་ཤག་ཤག་འཐོར་བའི་གྲུ་ཁ་ནས།།
ལྷུང་ལྷུང་འབབ་པའི་མཚོ་ཡི་འགྲམ་ངོགས་ནས།།
སེམས་འཕྲིན་ཤོག་བྱ་དཀར་མོ་མཁའ་རུ་བཏེགས།།

སྒྲོལ་མ་དཀར་མོ་དྲན་པས་སེམས་རྟེན་ལྕི།།
རྒུན་ཆང་མངར་མོ་བཏུང་ནས་རང་སེམས་གསོས།།
ཆང་གི་བཟི་ཁ་བཙན་པོའི་འདས་དོན་གྱིས།།
དྲན་པའི་སྙན་ངག་བྲིས་པ་རྫོགས་མཐའ་མེད།།

ཁོར་ཡུག་རྣམ་པ་སྐྱོ་གདུང་ཀློང་དུ་འཇགས།།
གྲོགས་མེད་གཅིག་པུས་ཤུགས་རིང་འབྱིན་ཞོར་དུ།།
རྒྱང་རིང་འདུན་པ་བཅོལ་སའི་ལྷ་བྱ་ལ།།
བརྩེ་དངུད་སྨྲེང་གླུ་གྱེར་འདི་སུ་ཡིས་རྟོགས།།

མི་ཡུལ་འཇིག་རྟེན་རྒས་པའི་སྐྱོ་སྡུག་བཙན།།
ཁ་བ་ཅན་ལ་བཅིངས་པའི་སེམས་རྟེན་ལྕི།།
སྐྱོ་སྡུག་ལྕི་བ་གཉིས་ཀྱི་སོ་མཚམས་ནས།།
ངེས་དོན་སྙན་ངག་ཡུལ་མི་སྤུན་ཟླར་འབྲི།།
                          ༢༠༠༢ལོའི་ཟླ༡༡ཆེས༩ཉིན་ཙོང་ཆུའི་ངོགས་སུ།

རྩོམ་ཁུངས། ༢༠༠༢ལོའི་གངས་རྒྱན་མེ་ཏོག་དེབ་བཞི་བ།