གདངས་སྙན་རྒྱུད་མངས་ཀྱི་སྐད་དང་འགྲོགས་ཤིང༌།།
ལྡོང་བྱེད་ཤེས་མུན་གྱི་མདངས་དང་བྲལ་བའི།།
སྙན་ཚིག་དགུན་ཆང་གི་མངར་ཁ་བཙན་པོས།།
འཁོར་བའི་འགྲོན་པོ་ལ་གུ་ཡངས་མ་བྱིན།།
དབྱང་གཞུང་མེ་ཏོག་གི་འཛུམ་མདངས་ཡལ་དུས།།
སྐྱོ་གླི་ཐར་ཐོར་གྱི་གསང་བ་སྦྲུམ་པའི།།
ལྷོ་བཞུད་ཁྲུང་ཁྲུང་གི་ཕྱིར་མིག་རྣོན་པོས།།
བརྩེ་བ་དུངས་དུངས་ཀྱི་བཟི་ཁ་མ་ཐུབ།།
སྐར་ཚོགས་ལྟེམས་ལྟེམས་ཀྱི་ཕྲེང་བའི་ཀློང་ནས།།
དཀར་གསལ་བག་ཕེབས་ཀྱི་ཟླ་བ་མཐོང་དུས།།
མར་མེ་ལྷབ་ལྷབ་ཀྱི་འོད་མདངས་ཁྲོད་ནས།།
དྲན་གདུང་སྨྲེ་ངག་གི་ཁེར་ལབ་མ་ཆད།།
མཚམས་སྤྲིན་མེ་ཏོག་གི་མགུལ་རྒྱན་ཁུར་བའི།།
ཁྱུང་གི་སྔོན་སྐྱེས་མའི་འཛུམས་མདངས་མཐོང་བས།།
ཟླ་བ་དྲན་གདུང་གི་ཚོར་བ་ལྕི་དུས།།
ཁུ་བྱུག་གྲེ་འགྱུར་གྱི་དབྱངས་སྙན་མི་ཐེག།
རྔམ་བརྗིད་གྲོང་ཁྱེར་གྱི་ཟིལ་ཤུགས་འདི་དང༌།།
སྒེག་མོའི་མཆོར་ཉམས་ལ་ཡིད་སེམས་མ་ཆགས།།
འཇོལ་མོའི་གསང་འཕྲིན་དེ་སྒོ་རྩར་འབྱོར་དུས།།
ཁོ་བོའི་སྙན་ངག་གི་བསླུ་བྲིད་མ་བཟོད།།
གདོང་མའི་རི་སུལ་ན་འདིར་རྒྱུག་རྒོད་པའི།།
རི་སྤྱང་ངུ་ཟུག་གི་སྐྱོ་ཉམས་མངོན་དུས།།
དབེན་པའི་རི་གྲོང་གི་ཏིང་འཛིན་བརྟན་པོར།།
གནས་ལུགས་བདེན་སྟོང་གི་རི་མོ་མ་ཤར།།
དགུན་ཁའི་ལྷགས་རླུང་གི་ང་རོ་རྒོད་པོས།།
འཇག་སྐྱའི་ཕུང་བོ་ཡི་ཤུགས་གླུ་གྱེར་དུས།།
ཚར་བུའི་མེ་ཏོག་གི་དྲོད་འཇམ་ཀློང་ནས།།
རི་སིལ་དམར་ཆུང་ལ་བརྩེ་བ་མ་འགྱུར།།
རུས་མཐུན་ངུར་སྨྲིག་གི་རྒྱལ་མཚན་ཁྲོད་ན།།
མི་མཐུན་གསང་ལམ་གྱི་དམུ་ཐག་རྒོད་ཀྱང༌།།
དགོས་འདོད་ཀུན་འབྱུང་གི་དམ་ཚིག་འདི་ཡིས།།
འདོད་ཆུང་ཆོག་ཤེས་ཀྱི་གཏན་ཚིགས་མ་བོར།།
དུས་ཀྱི་འགྱུར་བག་གི་རྟ་ཕོའི་བང་ཁ།།
ཉི་ཟླའི་བགྲོད་ལམ་ན་གར་དུ་རྩེན་ཀྱང༌།།
ཕྱི་གཙང་ནང་གཙང་གི་ལུས་པོ་འདི་ཡི།།
ལྟོ་སྐྱ་གོས་ཧྲུལ་གྱི་རང་མདངས་མ་ཡལ།།

རྩོམ་ཁུངས། ༢༠༠༩ལོའི་སྦྲང་ཆར་དེབ་དང་པོ།