གངས་དཀར་མ་མ་དུས་ཀྱི་རྗེས་སུ་ལུས།།
གངས་རིའི་བུ་རྒོད་རྣམ་གཡེང་ཀློང་ལ་ཚུད།།
གངས་ལྗོངས་སྙན་གྲགས་རྒུད་ནས་རྒུད་དུ་ཕྱིན།།
རེ་ལྟོས་མིག་ཟུང་གཉོམ་པོ་གང་དུ་འཕེན།།

མཛའ་གཅུགས་སྙིང་ག་གྲོགས་པོ་རྒྱང་དུ་བཞུད།།
སེམས་ཀྱི་ཁྲུང་ཁྲུང་དཀར་མོ་ལྷོ་རུ་འཕུར།།
ལྷིང་འཇགས་དབེན་པའི་རི་ལ་ལྷགས་རླུང་རྒོད།།
མི་རྐྱང་རྡོག་སྣེ་ཟད་པོ་གང་དུ་སྤོ།།

མི་ཡུལ་འགྲིམས་ནས་མི་ཡི་འགྲོ་སྟངས་བསླབ།།
མི་ཁའི་ཚེར་མ་རྩུབ་མོ་སྙིང་ལ་ཟུག།
མི་ལུས་བླངས་པའི་དོན་འགོ་མ་འཁྱོངས་པས།།
མི་རྐྱང་སེམས་པ་སྐྱོ་གདུང་གཡང་དུ་ལྷུང༌།།

ཚེ་གཅིག་གཏན་གྱི་འདུན་མ་ཆུ་ལ་བསྐྱུར།།
སྔོན་སྨོན་ལས་ཀྱི་རི་མོ་རྡོ་ལ་བརྐོས།།
འགྱོད་གདུང་ཆར་ཆུས་བརླན་པའི་སེམས་པ་ལ།།
བདེ་སྐྱིད་དྲོད་ཁོལ་འཁྱིལ་བའི་དུས་ཤིག་དབེན།།

མཁའ་དབྱིངས་དཀར་གསལ་ཟླ་བ་སྐྱོ་བས་འདར།།
རྔམ་ནག་མཚན་ལྗོངས་རིང་མོར་རླུང་འཚུབ་ལྡང༌།།
མཁོ་བའི་དུས་ཚིགས་སྣུམ་པོ་ཐན་པས་གཙེ།།
རྒྱང་བཞུད་ཉེར་བསྡོག་རྩོམ་ལ་སེམས་པ་བྲེལ།།

ཅང་མེད་སྤྲང་བོའི་བུ་ལ་རྒྱབ་རྟེན་དབེན།།
ཆོས་མེད་བཙུན་གཟུགས་སེམས་པ་སྨྲེང་བས་བཀང༌།།
ངེད་མེད་ཕྲག་དོག་ཚེར་མས་ས་གཞི་གཡོགས།།
འཆུག་མེད་འདུན་པའི་ལམ་བཟང་གང་དུ་འཚོལ།།

གཞན་ཕན་སེམས་ཀྱི་མཛེས་སྡུག་གཡོ་སྒྱུས་བསྣུབས།།
དྲང་བདེན་ཚངས་ཐིག་རི་མོ་སོར་མོས་བསུབས།།
མེས་པོའི་མག་སྦྲ་སྨུག་པོ་རླུང་གིས་འཐག།
འབྱུང་འགྱུར་འཚོ་བ་མངར་མོ་ཇི་ལྟར་རོལ།།

ཨ་གསར་མཐོང་སྣང་རྐྱེན་པས་མདུན་ལམ་འཚོལ།།
དངོས་གསར་རྡུལ་ཕྲན་མཚོན་ཆས་ལྷིང་འཇགས་དཀྲོགས།།
ལྟ་གསར་ལམ་རྡོལ་སྨྲ་བས་གནམ་འོག་དཀྲིགས།།
དྲང་བདེན་རིག་པའི་བུ་ཆུང་གང་དུ་གཤེགས།།

ཟུངས་ཟད་དུར་ཐང་སྐྱ་བོར་ཐལ་རྡུལ་འཕྱུར།།
སྤྱང་ཀིའུཧ་ངུ་སྐད་ཐོས་པས་བྲེད་ཤ་བསླངས།།
བརྣབ་སེམས་ལྷགས་རླུང་རྒོད་པོའི་སོ་ཁ་ནས།།
སུན་སྣང་ཉིན་མཚན་རིང་མོ་འཁྱོལ་ཐབས་དཀའ།།

ལས་དབང་འཚོ་བ་སྐྱུར་མོའི་གཏིང་རིམ་ནས།།
འདྲ་མིན་ཁ་དོག་སྣ་ལྔའི་བདེན་དོན་འཚོལ།།
འཚོལ་རྟོག་ཚོར་བ་ཟབ་མོའི་བརྡབ་གསིག་འདི།།
མ་བཟོད་ཤོག་དཀར་ལྷ་མོའི་ཞལ་ལ་བཏབ།།

རྩོམ་ཁུངས། ༢༠༠༥ལོའི་གངས་རྒྱན་མེ་ཏོག་དེབ་གསུམ་པ།