དང་པོ།
མི་ཚེ་ཀྱག་ཀྱོག་གི་རི་ལམ་འདེད་དུས།།
སྐྱིད་སྡུག་རེས་འབྱུང་གི་འཁོར་བའི་ཀློང་གི།
སྐྱེ་བ་ད་ཐེངས་ཀྱི་རིགས་གཅིག་སྤུན་ཟླར།།
བརྩེ་བ་དར་དཀར་གྱི་ཞགས་པས་ཐེབས་སོང་།།
སྟེང་ཕྱོགས་ལྷ་ཡུལ་གྱི་འཆི་མེད་རིལ་བུ།།
འོག་ཕྱོགས་ཀླུ་ཡུལ་གྱི་རྒྱུ་དང་ལོངས་སྤྱོད།།
ཤ་ཁྲག་རུས་འབྲེལ་གྱི་ཕུ་ནུའི་རྩེ་བ།།
མི་འགྱུར་རྟག་བརྟན་དུ་ང་ལ་ཡོད་ན།།
རྔམ་གནག་འཁོར་བ་ཡི་འཚོ་བའི་རེ་ཁྰ།།
བཤད་ན་རྫོགས་མེད་ཀྱི་སྡུག་བསྔལ་ཡིན་ཡང་།།
སྐྱེ་བ་མི་རྒྱུད་ཀྱི་ང་ཡི་འཁོར་ཚོགས།།
ཁྱེད་ཀྱི་ཅི་ཞིག་གི་རོལ་བར་ཆགས་ཡོད།།
ཟས་གོས་ལོངས་སྤྱོད་ཀྱི་འབྱོར་བ་བཏང་ནས།།
བྱ་བྲལ་རྣལ་འབྱོར་བའི་རྟུལ་ཞུགས་འཆང་མཁན།།
བཀའ་གདམས་གོང་མ་ཡི་རྗེ་བཙུན་མི་ལས།།
ལྡོག་མེད་སྙིང་རུས་ཀྱི་ལྟ་སྤྱོད་བསམ་ན།།
ཁ་བཤད་ཚིག་སྐམ་གྱི་ལབ་ལ་མཁས་ཤིང་།།
ལག་ལེན་གནས་ལུགས་ཀྱི་རྒྱ་མ་གཅོག་པའི།།
ང་ཡི་ཉེ་འཁོར་གྱི་ཆེན་པོའི་ཚོགས་ལ།།
གཤིན་རྗེ་ལྕགས་ཁྲབ་ཀྱིས་གཞུས་རན་འདུག་ཨང་།།
སྐྱིད་སྣང་འཚོ་ཐབས་ཀྱི་ལམ་བུ་ཞིག་ལ།།
རྔུལ་ཆུ་ཁྲོམ་ཁྲོམ་གྱིས་འདུར་བའི་ཉེ་མི།།
ང་ཡི་ནང་སེམས་ཀྱི་རྩེ་བས་མཐོང་ན།།
ནམ་ཡང་གཏོང་འདོད་ཀྱི་སེམས་པ་མི་ལྷོད།།
སྲིད་པའི་ཆགས་འཛིན་ཀྱི་དངོས་པོའི་གཤིས་ལ།།
ཏིང་འཛིན་སྒོམ་ཐག་གི་མདུད་པ་གྲོལ་དུས།།
འཁོར་དང་ལོངས་སྤྱོད་ལ་སྙིང་བོ་མེད་ན།།
དམིགས་པ་རྩེ་གཅིག་གིས་མདུན་དུ་སྐྱོད་དང་།།
རྣམ་དཔྱོད་རིག་སྟབས་ཀྱི་འཆར་སྒོ་ཡངས་པའི།།
སྐྱེས་ཆེན་དམ་པ་ཚོའི་གདམས་ངག་ཟབ་མོས།།
རང་རྒྱུད་འདུལ་ཟིན་གྱི་རྟགས་རེ་མེད་ན།།
མཐོན་པོའི་ངག་སྒོ་ཡི་བཀའ་ལུང་ཙམ་མོ།།
ཨ་མཚར་མིག་ལམ་གྱི་སྲིད་པའི་ཕུན་ཚོགས།།
ནང་གི་དེ་ཉིད་ཀྱི་འདོད་པས་རེག་ན།།
ངུར་སྨྲིག་སྒྲུབ་སྡེ་ཡི་ཁ་དོག་དམར་པོ།།
འཁོར་བའི་བདག་འཛིན་གྱིས་གཡོ་ཡང་སྲིད་དོ།།
མྱི་ཆེན་སྒམ་པོ་ཚོའི་ཚིག་ལ་ཉན་ན།།
བཅོས་མའི་མཚན་སྙན་ཞིག་ཡོད་ན་ཆོག་ཀྱང་།།
ཧ་ཅང་ལྷོད་ལྷོད་ཀྱིས་འདང་རེ་བརྒྱབ་ན།།
རང་མགོ་རང་ཉིད་ཀྱིས་གཡོགས་འདོད་མ་སྐྱེས།།
ཚུལ་འཆོས་རྫུ་བག་གིས་བགྲོད་པ་ཁ་ཤས།།
འདི་ཕྱིའི་བདག་པོ་ཡི་མགོན་ལ་བཀུར་བས།།
ལམ་ནོར་ཐེབས་པ་ཡི་མི་སེར་བསམ་ན།།
རང་གི་མགོན་སྐྱབས་ཏེ་རང་གིས་བྱ་འདོད།།
སེམས་པ་དེང་རབས་ཀྱི་རྗེས་ལ་ཕྱོགས་ཀྱང་།།
ལུས་ངག་ཁོར་ཡུག་གི་བཙོན་ལ་ཚུད་པའི།།
ན་མཉམ་སྤུན་གྲོགས་ཚོའི་སེམས་ཀྱི་གཞུང་ལ།།
སྤོབས་པ་ཆེར་བསྐྱེད་ཀྱི་ཚིག་རེ་བྲིས་ཡོད།།
     གཉིས་པ།
དུས་སྙིགས་ཀྱི་མཐའ་མ་འདི་ལ།།
གྲོགས་རྫུན་གྱི་འདུ་རྒོད་འཁྲུག་པའི།།
མཛའ་བརྩེ་དང་ཕྱི་ཐག་རིང་མོ།།
རྒྱ་གྲོང་གི་ཚོང་རྫས་ཡིན་སོང་།།
ཁེར་ཚུགས་ཀྱི་གཤིས་ཀ་གྱོང་བོ།།
བག་ཆགས་ཀྱིས་བསྐྲུན་ན་མི་ཉེས།།
མི་ངོ་ཡི་རྫུ་བག་མཐུག་པོ།།
བསམ་བཞིན་དུ་བཅོས་ན་དེ་ཉེས།།
ཕྱི་ཐག་ལ་བརྒྱུས་པའི་མཛའ་བརྩེ།།
མྱི་ཁ་ཡིས་བཅད་ན་མི་བློ།།
དུས་ཚིགས་ཀྱི་འགྱུར་བག་ཁྲོད་ནས།།
ཚེ་སྲོག་གིས་སྲུང་ན་དེ་བཟང་།།
མི་སེམས་ཀྱི་གདོན་འཕྲུལ་བཟི་ཁས།།
བརྩེ་དུང་གི་བརྡ་རྟགས་བཅད་ཀྱང་།།
སྔོན་བསགས་ཀྱི་ལས་ལ་བཅོལ་བས།།
ལས་དབང་གི་གཞུང་སྐུད་ཕྲ་བ།།
སྟོང་ཁམས་ཀྱི་སྣང་བའི་ལྗོངས་ལ།།
བྲོ་གར་གྱི་ལྟངས་སྟབས་བསྒྱུར་བའི།།
མི་སེམས་ཀྱི་གཡོ་སྒྱུའི་ཁ་དོག།
འཇའ་ཚོན་གྱི་མཛེས་པར་མ་འཁྲུལ།།
འགྲོ་དྲུག་ལ་བཅིངས་པའི་བརྩེ་བ།།
རྒྱལ་བ་ཡི་རེ་བའི་འདུན་མ།།
སྐྱེས་བུ་དེ་སྐྱབས་སུ་བཟུང་དང་།།
འདི་ཕྱི་ཡི་ལམ་ཁ་དྲང་བོའོ།།
མི་སེམས་ལ་བཏབ་པའི་བརྩེ་བ།།
ཀུ་རེ་ཡི་གཏམ་ལ་མ་འཁྲུལ།།
བསམ་གཞིགས་ཀྱི་སྟོབས་ལ་བརྒྱུས་དང་།།
ནང་སེམས་ཀྱི་མདུད་པ་དཀྲོལ་ཡོང་།།
              གསུམ་པ།
དྲི་མེད་འོད་དཀར་གྱི་རྣམ་ཤེས་ཆུང་ཆུང་།།
ཡང་བསྐྱར་མི་ལུས་ཀྱི་མངལ་ལ་ཞུགས་དུས།།
ཐོག་མའི་རྐང་རྗེས་ཀྱི་རི་མོ་འབྲི་ས།།
དགྲ་གྲོགས་གཉིས་འཛོམས་ཀྱི་འཁོར་བའི་ངམ་ཁ།།
སྣང་བ་རྒྱ་ཡན་གྱི་གར་ལ་གཡེང་ནས།།
མི་ཚེ་ལེ་ལོ་ཡི་སོ་ཁར་འཐག་པའི།།
ཅང་མེད་ལག་སྟོང་གི་རྣམ་ཤེས་འཁྱམ་པོར།།
འཆི་བའི་ཞགས་པ་དེ་ཐེབས་དུས་སྙིང་རྗེ།།
མཚན་དང་གྲགས་པ་ལ་སྙེགས་པའི་བུ་ཆུང་།།
ཚུལ་འཆོས་རྫུ་བག་གི་རྙི་ལ་ཐེབས་པའི།།
འདོད་ཆུང་ཆོག་ཤེས་ཀྱི་ཐ་སྙད་དཀར་པོ།།
ནང་བསྟན་ཚིག་མཛོད་ཀྱི་གསེབ་ནས་ངུས་སོང་།།
དབེན་པའི་སྒོམ་ཆེན་གྱི་མེ་ལོང་ངོས་ལ།།
འདོད་ཡོན་ལོངས་སྤྱོད་ཀྱི་གཟུགས་རིས་འཆར་ན།།
དཀའ་བ་བརྒྱ་ཕྲག་གི་སྒོམ་ཐག་དམ་པོ།།
དེ་རིང་བདག་འཛིན་གྱི་ཀློང་ནས་གྲོལ་ལོ།།
འཁོར་བ་སྡུག་བསྔལ་གྱི་རྒྱ་མཚོའི་ནང་ནས།།
འཁྲུལ་སྣང་སྟོང་བསམ་གྱིས་ཡང་ཡང་མནར་རྗེས།།
མཐའ་མའི་ངལ་དུབ་ཀྱི་མགོ་བོ་འཇོག་ས།།
དབེན་པའི་བྲག་རྫོང་གི་དུར་ཐང་སྐྱ་བོ།།
 
                                         ༢༠༡༠.༢

རྩོམ་ཁུངས། ངེད་དྲ་བ།