དོ་ནུབ་ཟླ་བའི་ངོ་ལ་སྡེར་འབྲད་བྱས།།
སྡེར་མོ་ཁྲག་གིས་བརྫུས་ནས་སྙིང་ཁར་རེག།
སྙིང་གི་ཚི་ལུ་དཀར་བོའི་འཇམ་ཤ་ལས།།
སྲིད་པའི་ཁམས་ཀྱི་མི་ནག་སྐེ་ནག་མ།།
ང་ཡི་ནུབ་ཁ་ནག་པོའི་ཤོག་གྲངས་རེད།།

དོ་ནུབ་སྐར་མ་གྲངས་མེད་རུམ་ལ་བསོགས།།
རུམ་གྱི་ངུ་སྐད་ཞེ་ཡི་གཏིང་སར་ཟུག།
ཞེ་ཡི་རྣམ་སྨིན་ཚེ་ཡི་མཆུ་ཏོས་སྲེག།
རྨི་ལམ་ལྗོངས་ནས་འཇའ་ཡི་ཁུ་ཁྲག་བཞུར།།
ཞེ་རྩ་ཁྱོན་ནས་འབྲེག་པ་ལག་དམར་ཞིག།

དོ་ནུབ་ས་གཞིའི་གྲིབ་མ་རིང་དུ་བྱེར།།
རྐང་བ་གྱོལ་བོའི་སྐས་ཀྱི་རིམ་པ་བཤིག།
མི་ཚེ་ཟེར་ལ་ལམ་ཐིག་ཁྲ་ཁྲ་བོ།།
སྐད་ཅིག་དུས་མཐའི་སྨོན་འདུན་འཁུར་རོགས་དེ།།
མི་ཁ་མི་འཆའ་མི་ལུགས་འཁྱལ་བོ་ཡིན།།

མཚན་སྨག་ཧྲིག་ཧྲིག་ལྡད་པའི་མི་ནག་མ།།
མཚན་སྨག་ཡོར་ཡོར་སྒུལ་བའི་མི་ནག་མ།།
རྨི་ལམ་ནང་གི་ཚངས་ཐིག་ཡིན་ནམ་ཅི།།
བདག་གི་ཁྱེད་ལ་རེག་ནས་སྙིང་ཆུང་སྔངས།།
གཟུགས་ཀྱི་ཕུང་བོ་དེ་ལ་ཁྱེད་རང་བཞུགས།།
         ༢༠༡༤•༡༢•༧

            མིག་ནང་གི་དེ་དག

ཁ་པར་ནང་གི་ལག་པ་སྔོ་ནག་དེ།།
འདར་འདར་མི་ངོ་བྱིལ་བྱིལ་བྱེད་ལུགས་ཀྱིས།།
མི་ཡི་ངོ་གདོང་ཚ་ཞིང་དམར་བོར་གྱུར།།
ལག་པ་ཞུ་ཞིང་མིག་ཆུ་འཐོར་ནས་ཐལ།།
སེམས་ཀྱི་ལྕགས་རྡོ་གས་ཤིང་ཆག་པ་ལས།།
རྨི་ལམ་སྟོད་ནས་ཉི་ཟླ་གཟའ་སྐར་འཁྲུག།
རྨི་ལམ་ནང་གི་མཚོ་མོ་མེ་ཆུ་ཞིག།
འུར་འུར་འབར་ཞིང་དགུང་གི་འཇའ་ཡང་ཚིག།
གཏམ་རྒྱུད་རུམ་པའི་ཤོག་སྐྱ་གོག་ནུར་བྱ།།

སྐད་འཕྲིན་ཟེར་ཡ་ཚེ་བླ་སྲོག་གསུམ་གཡར།།
ཚེ་ཡི་བལ་སྐུད་འཁེལ་མ་ཆད་ལ་འདྲ།།
སྲོག་གི་རྡོ་བ་འཁྲེགས་པོ་གས་ལ་ཉེ།།
ཆུ་ཡིས་ཞུ་ཞིང་དྲོད་ཀྱིས་སྐེམ་བཞིན་པ།།
ལང་ཚོ་ཟེར་ཡ་གཞོན་པའི་རང་མདོག་དེ།།
ཚོན་དང་ཚོས་ཀྱིས་བྱུགས་ནས་ཁྲ་ཁྲར་འཆར།།
བདག་གི་ལྗོངས་རྣམ་ཡག་མོ་ཡལ་ལ་ཉེ།།
དྲན་འཛིན་བློ་ཡི་སྒོ་མོ་བཙའ་ཡིས་ཟིན།།
དུས་ལ་བསྙལ་བ་འདི་ལ་ཅི་ཞིག་འབོད།།

ཐག་རིང་མགྲོན་པོ་ལྐོག་ནས་ཚུར་ལ་འོང་།།
ཉེ་བའི་མི་ནི་བྱང་དང་ཕྱོགས་སུ་བཞུད།།
རྒྱང་ཐག་ཉེ་རིང་བར་གྱི་གྲིབ་མ་དག།
ནང་གི་ཆོ་འཕྲུལ་དམར་བོའི་ངོས་སུ་སྦྱར།།
གཟུགས་བརྙན་འདྲ་མིན་ཡར་ལྡིང་མར་ལྡིང་བྱ།།
ཆོས་ཉིད་དང་ནི་འཚོ་བའི་ཧྲག་བར་མྱུལ།།
བདག་གི་བྲིས་མ་ཆུ་ཡིས་བརླན་ནས་འཁངས།།
བདག་གི་ཉིན་ཞག་རླུང་གིས་འཁུར་ནས་བོར།།
ང་ནི་རྒྱང་དུ་བཀྱེད་ལུགས་དེ་ཡང་འདྲ།།
            2014-12-12 

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།