བཤེར་འཚོལ།
༄༅།།ཡོངས་ཀྱི་དགེ་བའི་བཤེས་གཉེན་ཆེན་པོ་༧རྗེ་བཙུན་འཇམ་དབྱངས་རྒྱ་མཚོ་དཔལ་བཟང་བོ་མཆོག་བསྟན་འགྲོའི་དོན་དུ་དགུང་གྲངས་དགུ་བཅུ་བདེ་བཞེས་ཀྱི་གོ་སྟོན་ལ་ཕུལ་བའི་རྟེན་འབྲེལ་ཤིས་ཚིག་རིང་མོ་ལེགས་ཚོགས་སྟོང་གི་ལྷ་དར་བསིལ་སྦྱིན་ཟླ་བའི་འོད་སྣང་ཞེས་བྱ་བ།
ཚོགས་གཉིས་ཆུ་གཏེར་རྒྱ་མཚོའི་ཀླུང་།།
སྐུ་གསུམ་ཡེ་ཤེས་འོད་གསལ་དབྱིངས།།
བདུད་བཞིའི་དགྲ་ལས་རྒྱལ་བ་ཡི།།
བཅོམ་ལྡན་ཐུབ་པའི་དབང་བོ་རྒྱལ།།
རབ་འབྱམས་རྒྱལ་བའི་དཀྱིལ་འཁོར་ཆེ།།
ཐུབ་བསྟན་མུ་ཁྱུད་ལྷུན་པོའི་སྤོར།།
མཁྱེན་ཀློང་རལ་བའི་ཟུར་ཕུད་ཀྱིས།།
རབ་དཀྲིས་ཤེས་རབ་ལྷ་ཡིས་སྐྱོངས།།
རབ་བྱེད་ཚིག་ཕྲེང་འདི་བསྟར་ལ།།
སྨྲ་བར་དབང་འབྱོར་དབྱངས་ཅན་ལྷས།།
སྨིན་བྱེད་བྱིན་རླབས་དབྱིག་གི་ཆར།།
འབེབ་ལ་དངོས་གྲུབ་གནང་བ་སྩོལ།།
ཀུན་བཟང་ཞིང་གི་ཉི་ཟླའི་འོད།།
མཁྱེན་རྟོགས་ཀློང་བརྡོལ་འཇམ་དབྱངས་དངོས།།
ཐུགས་བསྐྱེད་མཁའ་ལྟར་རབ་ཡངས་པའི།།
བཞད་པའི་རྡོ་རྗེའི་ཕྲེང་རབས་བརྗིད།།
འཇམ་མགོན་ལུགས་བཟང་ཁ་འབབ་བཞིའི།།
དབྱངས་ལྡན་འཕྲིན་ལས་གྱ་གྱའི་འགྲོས།།
རྒྱ་བོད་གཞུང་བརྒྱའི་ལྟོ་བ་རུ།།
མཚོ་མོའི་རླབས་བཞིན་མཁའ་རུ་འཕྱོ།།
ས་ཡི་དགེ་བཅུ་ཚང་བའི་ཡུལ།།
བཀྲ་ཤིས་མཚན་མས་རབ་བརྟས་པའི།།
ཁོ་ཚེ་ལྷ་སྡེ་ཕྱུག་མོ་ཡི།།
ཁུ་འདུས་གསེར་གཞོང་གྲགས་པ་དེར།།
རབ་བྱུང་བཅུ་དྲུག་ཆུ་བྱ་ལོའི།།
ཟླ་བརྒྱད་ཚེས་བརྒྱད་དུས་བཟང་ལ།།
སྐུ་མཆོག་མཚན་དཔེ་པདྨོའི་འདབ།།
ལྷ་ཡི་སྲས་པོ་བལྟམས་འདྲའི་བཞད།།
བལྟས་བཟང་ངོ་མཚར་རྟགས་ཀྱི་གཟི།།
ཕྱོགས་བཅུ་ནམ་མཁའི་མཐའ་རུ་འཕྲོས།།
བཀྲ་ཤིས་ཆོས་དུང་སྙན་པའི་བརྡས།།
དམ་པའི་ཆོས་ཀྱི་སྒོ་གླེགས་ཕྱེས།།
ལྕགས་འབྲུག་གྲགས་པའི་ངར་སྐད་དང་།།
བསྡོངས་ཏེ་འཇིགས་མེད་རྒྱ་མཚོའི་དྲུང་།།
རབ་བྱུང་ངུར་སྨྲིག་གོས་བཟང་བགོས།།
འཇམ་དབྱངས་མཚན་གྱི་ཅོད་པན་གསོལ།།
བཅོས་མིན་ངེས་འབྱུང་བློ་ཡི་ཞིང་།།
བསླབ་གསུམ་དཔག་བསམ་ལྗོན་བཟང་རྒྱས།།
ངུར་སྨྲིག་རྒྱལ་མཚན་འཛིན་པ་ལ།།
སྐུ་ཡོན་དབྱར་གྱི་དཔལ་མོར་འགྲན།།
སྔོན་གོམས་བག་ཆགས་མཐུ་བརྟས་པའི།།
གཞུང་ལུགས་རྒྱ་མཚོར་རིག་པའི་གྲུ།།
བཏང་བའི་ཤེས་རིག་ནོར་བུའི་ནོམ།།
ཐབས་ཤེས་ལེགས་པའི་བློ་ལ་བསྐྱིལ།།
མཁས་མང་ཚོགས་དབུས་ལུང་རིགས་གཏམ།།
བགྲོ་བ་ལྷུར་ལེན་རྨད་དུ་བྱུང་།།
ཐོས་བསམ་བློ་གྲོས་གོ་མཚོན་གྱིས།།
རྒྱ་བོད་གཞུང་ལུགས་ཐང་མར་བརྡལ།།
མདོ་ཕྱོགས་བཀའ་ཡི་པོད་ཆེན་གཞུང་།།
གསང་སྔགས་རྒྱུད་བཞིའི་སྤྱི་ཡི་དོན།།
ཐུན་མོང་སྒྲ་རྩིས་སྙན་ངག་མངོན།།
ཐུགས་གཉེར་མཛད་དེ་མཁས་སྙན་འབར།།
བློ་རྟགས་བསྡུས་གྲྭ་གྲུབ་མཐའ་རྩ།།
གྲུབ་དོན་ས་གསུམ་ཕར་ཕྱིན་གཞུང་།།
རྒྱན་འཇུག་སྤྱོད་འཇུག་རྣམ་འགྲེལ་རྩ།།
ཐུགས་འཛིན་སྐྱོར་ཀློག་ཁྲི་སྟོང་མཛད།།
ཤིང་ལུག་བཀྲ་ཤིས་སྒོ་མང་གི།།
མཁས་གྲུབ་སྟག་སེང་འཐབ་པའི་དབུས།།
བསྟན་པའི་ལྕགས་རི་ཕར་ཕྱིན་གྱི།།
སྟོན་མོའི་དམ་བཅས་གྲགས་པ་འབར།།
ཆུ་ཡོས་དཔལ་ལྡན་བཀྲ་ཤིས་འཁྱིལ།།
རྨད་བྱུང་ཐོས་བསམ་གླིང་གི་གྲྭར།།
སྨོན་ལམ་རབ་འབྱམས་མཚན་བཏགས་ཀྱིས།།
དོན་ལྡན་གཏམ་གྱི་རོལ་མོ་འཁྲོལ།།
མཁས་གྲུབ་གངས་ཀྱི་རི་དབང་རྒྱལ།།
གདན་ཐོག་སྐྱིལ་ཀྲུང་གཅིག་འཛོམས་པ།།
དོན་ཟབ་དབུ་མའི་བགྲོ་བ་ཡིས།།
མཁའ་ཡི་ཉི་ཟླའི་འཆར་ནུབ་འགོག།
དུས་རླུང་འཚུབ་མའི་ས་རྡུལ་གྱིས།།
གངས་ཅན་ཆོས་རིག་སྒྲིབ་པ་ཡི།།
ལོ་བཅུའི་འཇིགས་པའི་གོད་ཆག་ཁྲོད།།
བསླབ་གསུམ་མིག་གི་འབྲས་ལྟར་བསྲུངས།།
སྐབས་རེར་བྱ་བཏང་བྲག་ལ་འཁོར།།
ལན་རེར་སྐུ་ལུས་སྡུག་ལ་སྦྱར།།
སྐབས་རེར་ལྷ་རྗེས་འགྲོ་དོན་མཛད།།
ཉམ་ཐག་ནད་པ་སྡུག་ལས་བསྐྱབས།།
མཁས་དབང་གསེར་རིའི་ལྷུན་པོ་ལས།།
རྗེ་བཙུན་འཇིགས་མེད་འཕྲིན་རྒྱམ་གཙོས།།
ཡོངས་འཛིན་བསང་ཁོག་འཇིགས་མེད་སོགས།།
ཞབས་པད་ཡུན་རིང་བསྟེན་བྱས་ཏེ།།
ཀུན་མཁྱེན་ཡབ་སྲས་གསུང་གི་ནོར།།
ཁྲིད་བཤད་མན་ངག་བཀླགས་ལུང་རྒྱུན།།
ཆེད་དུ་ཐུགས་གཉེར་དཔྱིས་ཕྱིན་གྱིས།།
མཛད་རྣམ་ལྷུན་པོའི་དཔངས་ལས་མཐོ།།
དུས་ངན་མུན་པའི་བར་གསེང་ནས།།
ཐོས་བསམ་དཔེ་ཀློག་ཉམས་ལེན་གྱི།།
བགྱི་བ་ལྷུར་ལེན་བསགས་སྦྱངས་སོགས།།
བསྟན་ལ་སྨན་པའི་མཛད་པ་མང་།།
སྨྲ་བའི་ཉི་མའི་བཀའ་ལུང་གིས།།
གསོ་རིག་གཞན་ཕན་རྒྱུད་སྨད་ཁྲིར།།
བཞེངས་ཏེ་རྒྱུད་བཞིའི་མན་ངག་དང་།།
ལམ་རིམ་བློ་སྦྱོང་བཤད་ཁྲིད་བགྱིས།།
དྲི་ལྡན་མེ་ཏོག་རྒྱང་རིང་དཔེའི།།
ཕྱོགས་ཀྱི་བུང་བ་མ་བསྡུས་འདུས།།
སྐོམ་པ་བདུད་རྩིས་སེལ་བ་ལྟའི།།
ཆོས་སྦྱིན་ཆོས་ཆར་འདོད་དགུར་སྩལ།།
བློ་གསལ་བྱེ་བའི་དགའ་སྟོན་དུ།།
ཉིན་མཚན་ཆོས་འཆད་དུས་འདའ་བའི།།
འཁོར་ལོ་གསུམ་གྱི་མཛད་བཟང་གིས།།
རིག་པའི་གྲོང་ཁྱེར་འོད་ཀྱིས་གསལ།།
འཆད་ཉན་ལུང་རིགས་ལྡིར་བའི་ཞིང་།།
རྩོད་ངག་མཁས་གྲུབ་སྨྲ་དབང་ཚོགས།།
སྟོན་པའི་དམ་ཆོས་རྣམ་གཉིས་ཀྱིས།།
གྲོགས་སུ་འགུག་པ་ཁྱོད་མིན་སུ།།
འཇམ་མགོན་བླ་མའི་ལུགས་བཟང་གི།།
དབྱངས་ཅན་ཞལ་གྱི་ཉི་མ་འབུམ།།
འཕྲིན་ལས་རྒྱ་མཚོ་མཁར་འདེགས་པའི།།
ཐུབ་པའི་བསྟན་ལ་ཀ་ཆེན་བཞིན།།
ཟབ་ཁྲིད་བཤད་ལུང་མན་ངག་གཏེར།།
མ་དྲོས་ཆུ་ཀླུང་འཕྱོ་བའི་རླབས།།
ཕུན་ཚོགས་སྡེ་བཞིའི་མཚར་སྡུག་གིས།།
བཤེས་གཉེན་དུལ་བའི་མཚན་བརྒྱ་འབར།།
གཞུང་ལུགས་འབུམ་ཕྲག་བརྡལ་བའི་ཀློང་།།
མཁྱེན་རབ་གོམ་སྟབས་གཅིག་གིས་བགྲོད།།
ཟབ་རྒྱས་གདམས་པའི་བང་མཛོད་ཀྱི།།
བདག་པོ་ཆེན་པོའི་སྐུ་རུ་བཞེངས།།
ལེགས་བྱས་འོད་བརྒྱའི་ཟེར་མ་ཡིས།།
ཆོས་སྲིད་ཟུང་གི་བསྟན་འགྲོའི་དོན།།
ཐུགས་འགན་ཁུར་ཅིང་དོ་དམ་ཁང་།།
སོགས་ནས་གྲྭ་ཚང་སྐུ་ཞབས་བསྒྲུབས།།
ཕྱོགས་འདུས་རིགས་སྨྲ་ངང་བའི་ཚོགས།།
ལྔ་ཟུང་པད་མཚོར་རྩེན་པ་ཡི།།
ནང་བསྟན་ཆོས་རིག་སློབ་པའི་གྲྭའི།།
སློབ་དཔོན་ཆེན་པོའི་བསླབ་གནས་བཞེས།།
བཤད་སྒྲུབ་བསྟན་པའི་འབྱུང་གནས་ཆེའི།།
འདུས་སྡེ་རྒྱ་མཚོའི་གཙུག་གིས་མཆོད།།
བླ་རབས་མཁན་སྤྲུལ་དུ་མ་ཡིས།།
རིགས་ཀྱི་ཅོད་པན་རྒྱན་དུ་བཞེས།།
རྒྱལ་མཆོག་དགེ་འདུན་གྲུབ་པ་ཡི།།
གདན་ས་གཞིས་རྩེ་བཀྲས་ལྷུན་དུ།།
སྟ་གོན་བཤད་པ་སྔོན་སོང་གི།།
དུས་ཀྱི་འཁོར་ལོའི་དབང་ཆེན་སྩལ།།
དབུས་གཙང་ལྷ་ཡི་དགའ་ཚལ་ནས།།
ཆོས་ཀྱི་སྒོ་འཕར་ཡངས་པོར་ཕྱེས།།
དད་ལྡན་སྐྱ་སེར་ཁྲི་མ་འབུམ།།
རིགས་ལྡན་འཁོར་ལོའི་ཞིང་དུ་བཀོད།།
བསྒྲུབ་བྱ་སྟོང་ཕྲག་བརྒལ་བ་ལ།།
དགེ་ཚུལ་སློང་གི་བསླབ་པར་བཀོད།།
ཕྲ་ཞིབ་འདུལ་བ་གླེང་གཞིའི་སྡེའི།།
ཇི་བཞིན་དགོངས་པའི་དོན་ལ་གནས།།
ལེགས་ཚོགས་འབུམ་སྡེའི་ཞིང་ས་རུ།།
བསླབ་གསུམ་ལོ་ལེགས་འབྲས་བུའི་ཁུར།།
དུད་ཅིང་ལྕི་བའི་ཡོན་ཏན་གྱིས།།
བློ་གྲོས་སྦྲུམ་ཞིང་དཔལ་སྟེར་བ།།
མཆོག་ཐུན་དངོས་གྲུབ་རིན་ཆེན་ནོར།།
སྦྱིན་ལ་མི་ཕམ་མགོན་པོའི་ཟླ།།
ཐུབ་པའི་དགོངས་འགྲེལ་དམ་ཆོས་དཀར།།
ཡང་དག་ལེགས་པའི་རྒྱན་དུ་བཅིངས།།
བཀའ་པོད་རྣམ་ལྔའི་ལྗགས་ཁྲིད་ཀྱིས།།
མཁས་ལ་རྫུ་བའི་མཁས་མིན་གྱི།།
མིད་དང་ལྕེ་ལ་མདུད་པ་བཏབ།།
ལུང་རིགས་མཚོན་རྣོན་སྙིང་ལ་སྣུན།།
ལེགས་བཤད་འོ་སྤྲིའི་ཞིམ་མངར་ཅན།།
བློ་གསལ་ཤེས་འདོད་རོ་ལ་ཆགས།།
གཞུང་ལུགས་འབུམ་ཕྲག་བསྲུབས་པའི་གཏེར།།
ཀུན་མཁྱེན་རྒྱལ་བའི་མདུན་སར་མཛེས།།
བཀྲ་ཤིས་སྒོ་མང་གཡས་འཁྱིལ་དུང་།།
བཀྲ་ཤིས་དབྱངས་སྙན་ཆོས་ཀྱི་སྒྲ།།
བཀྲ་ཤིས་དགེ་མཚན་སྟོང་གི་མཛོད།།
བཀྲ་ཤིས་འཁྱིལ་ཞེས་དབྱར་རྔའི་སྐད།།
རྗེ་ཡི་ལྟ་བའི་ལེགས་བཤད་ལས།།
དབུ་དགོངས་དྲང་ངེས་དཀའ་བའི་གནད།།
དགོངས་མཐིལ་བཀྲལ་བའི་པུསྟི་ཀས།།
མཆོག་མཛད་གསུང་གི་དོ་ཤལ་བཀོད།།
འཇམ་དབྱངས་གཞོན་ནུའི་མཁྱེན་རབ་འབར།།
རྣམ་དཔྱོད་ལྟ་བའི་དཔྱད་རྫོགས་ཤིང་།།
ལུང་རིགས་འདབ་བརྒྱ་ལྷུག་ལྷུག་གིས།།
བཞད་པའི་འཛུམ་ལ་དྷཱིཿ་སྐད་ཅན།།
མཁས་དགུའི་དབུས་སུ་སེངྒེའི་བུ།།
སྟོང་ཉིད་ང་རོའི་སྡེར་ཁྱིམ་བགྲད།།
ལོག་སྨྲའི་རྒོལ་ངན་ཝ་སྐྱེས་དཔུང་།།
རྡོ་རྗེའི་གསུང་གིས་སྙིང་བོ་བཅིལ།།
ཐབས་ཤེས་ཀྱོ་བ་རྣོན་པོའི་འཕྲུལ།།
རྟེན་འབྱུང་རིག་པ་རྒྱལ་མོའི་གར།།
འབེལ་བའི་ངག་གི་རྩེད་དགའ་ཡིས།།
སྨྲ་བའི་འབབ་སྟེགས་འོད་ཀྱིས་དཀྲུགས།།
སྐྱེ་དགུའི་བསོད་ནམས་ཆུ་གཏེར་ཆེ།།
ཐུབ་བསྟན་གངྒཱའི་རླབས་ཕྲེང་ངོགས།།
རབ་བྱེད་གསེར་གྱི་འཁོར་ལོའི་ཁྱོན།།
སྲིད་ཞིའི་ཁམས་སུ་རྟག་པར་བཀྲ།།
འཆད་པ་སྒྲ་བརྒྱ་དགོད་པའི་ཟིལ།།
མུ་སྟེགས་སྙིང་ལ་འཇིགས་སྟེར་བའི།།
གློག་གི་རླབས་ཕྲེང་དམར་པོའི་ལྗགས།།
སྟོང་གསུམ་འཇིག་རྟེན་གཡོ་བར་བྱེད།།
རྩོད་ངག་རིག་པའི་གནམ་ལྕགས་ཀྱིས།།
རྒོལ་བའི་ངག་སྒོར་རྒྱ་སྟེར་བའི།།
རྒྱབ་བསྟེན་ལུང་རིགས་བྲག་གི་རི།།
གཡོ་མེད་བསྟན་པའི་ལ་རྒྱར་བཞེངས།།
རྩོམ་པས་མཁས་དགུའི་སྙན་གྱི་དབང་།།
ཅིག་ཅར་འཕྲོག་པའི་གྲགས་སྙན་གྱིས།།
བ་དན་འཇམ་མགོན་བསྟན་པའི་རྒྱན།།
དུས་མཐར་སྒྲེང་མཁན་ཁྱོད་ལས་སུ།།
མཁས་མང་ཆོས་ཀུན་རབ་མྱོས་གྲོང་།།
དབུ་ཚད་མཇིང་བསྣོལ་འགྱིང་སྟབས་ཀྱིས།།
རྨད་བྱུང་སེང་ཆེན་འཕྱོ་བའི་ཁྲིར།།
བསོད་ནམས་རྒྱ་མཚོས་འདེགས་ལ་སྤྲོ།།
བཙུན་པའི་བསླབ་གསུམ་འོད་དཀར་གྱིས།།
བཤད་སྒྲུབ་བསྟན་པའི་པད་ཚལ་འབུམ།།
སྐྱོང་བྱེད་ག་བུར་དྲི་ཡི་སྨན།།
འགྱེད་ལ་དཔའ་བའི་བཤེས་གཉེན་གང་།།
བཟང་བོའི་རིན་ཆེན་ལྗོན་པའི་དབང་།།
ལྷོ་རླུང་དགེ་བས་སྐུལ་བྱེད་ན།།
མ་ལ་ཡ་ཡི་དྲི་ངད་ཀྱིས།།
ངང་བའི་ཁྱུ་ཚོགས་རྒྱང་ནས་བཀུག།
ལྟ་བ་རྟེན་འབྱུང་ཟབ་ལམ་གྱི།།
ཉམས་རྟོགས་ཡོན་ཏན་ནོར་བུའི་མཛོད།།
ལུགས་གཉིས་ཕུན་ཚོགས་ཕན་བདེའི་གཞིར།།
ལེགས་སྦྱིན་སྤོབས་པས་སྒོ་བརྒྱ་འབྱེད།།
སྒོམ་གཉིས་ཐབས་ཤེས་ཡ་མ་བྲལ།།
དཔྱད་གསུམ་ཚད་མའི་ཚངས་ཆེན་རིས།།
བརྟག་པས་དོན་ལ་སྒྲོ་འདོགས་བཅད།།
མཁས་པའི་རྒྱལ་ཐབས་གདེངས་ཐོབ་པ།།
སྤྱོད་པ་ཞི་དུལ་ཉམས་ལེན་གྱིས།།
བཀའ་གདམས་ཇོ་འབྲོམ་རྣམ་ཐར་བསྐྲུན།།
བརྟན་མཁས་ལྔ་ཕྲུགས་བསླབ་པའི་གཞི།།
མིག་འབྲས་ལྟ་བུར་གཅེས་སུ་འཛིན།།
ཉན་པོ་སྣོད་ཀྱི་རྒྱ་མཚོའི་རྡུལ།།
ཡངས་པའི་མཁའ་རུ་ཆེར་འཁྲིགས་ཏེ།།
མདོ་སྔགས་འོ་མའི་ཡོན་ཆབ་འབུམ།།
འཐུང་ལ་གུས་ཞུམ་དོན་གྱིས་བཟི།།
བློ་གྲོས་མཁའ་གླང་དར་མའི་སྟོབས།།
དུས་ཀྱི་མཁའ་རུ་འགྱིང་ལྡན་འགྲོས།།
གཞུང་དོན་གཉིས་འཐུང་ཞགས་པའི་ཁུགས།།
ངོམས་མེད་རྟག་ཏུ་རོལ་པར་དགྱེས།།
དཔེ་སྤུངས་རིག་མཛོད་རྒྱན་གྱི་མཆོག།
མུན་སེལ་སྒྲོན་མེའི་འོད་ལ་ཆགས།།
ཐུགས་རྒྱུད་བསླབ་གསུམ་གྱིས་དུལ་བས།།
ཉོན་མོངས་ཚ་གདུང་རང་སར་བཅིལ།།
སྐུ་ལ་དུ་ཀཱུ་ལ་ཡི་གོས།།
ལེགས་གསོལ་ངུར་སྨྲིག་ཚངས་པར་སྤྱོད།།
མཐོང་ན་དད་གུས་མགོ་བོ་ཡི།།
སྙེ་མའི་ཕོན་པོ་རང་སར་དུད།།
གསུང་ལ་བདེན་བཞི་ཆོས་ཀྱི་གཏམ།།
ལེགས་འཁྱིལ་བཀའ་ཡི་འཁོར་ལོའི་འགྲེལ།།
ཉན་ན་དཔྱོད་ལྡན་མོས་གུས་ཀྱི།།
སྙིམ་པའི་པདྨོ་རང་སར་ཟུམ།།
ཐུགས་ལ་ཉམས་རྟོགས་སྟོང་ཉིད་ལྟ།།
ལེགས་འཁྲུངས་བྱང་ཆུབ་སྤྱད་པ་སྤྱོད།།
བསམ་ན་ཀུན་གྱིས་ཡི་རང་གི།།
ལྷ་ཡི་ཕྱག་རིང་སྔུན་སར་བསྲིངས།།
གསུང་རྩོམ་ཐོར་བུ་མང་དུ་བདོག།
ནང་སྒོས་གླེགས་བམ་རྩེ་མོའི་གྲངས།།
ཕར་ཕྱིན་དོགས་སློང་བདུད་རྩིའི་ཐིགས།།
དབུ་མའི་ལེགས་བཤད་ཀུན་ལས་བཏུས།།
རྒྱལ་སྲས་ཆེན་པོ་ཞི་བ་ལྷའི།།
བྱང་ཆུབ་སྤྱོད་པར་འཇུག་པ་ཡི།།
རྣམ་བཤད་སྐལ་བཟང་ལེགས་བགྲོད་ཅེས།།
དགེ་ལྡན་བསྟན་པའི་རྒྱན་དུ་བལྟམས།།
འགྲོ་བའི་བདེ་སྐྱིད་གཞི་མ་ལ།།
བསྟན་པའི་རྩ་བ་དགེ་འདུན་སྡེའི།།
ཆོས་སྤྱོད་བཅུ་ཡི་འཆད་ཉན་གྱི།།
བགྱི་བ་ལྷུར་ལེན་མཛད་པའི་དར།།
དུས་ཀྱི་མཁའ་རུ་ཕྱར་བ་ཡིས།།
མདོ་སྔགས་ལམ་གྱི་སྙིང་བོའི་གནད།།
གཅིག་ཏུ་དྲིལ་མཛད་སྡེ་སྣོད་འཛིན།།
མང་ཐོས་ཀུན་གྱིས་གཙུག་གིས་མཆོད།།
ཀུན་གཟིགས་ཐུགས་རྗེ་ཉི་འོད་ཀྱིས།།
བསྐྱངས་པའི་མཐོ་རིམ་ནང་བསྟན་གྱི།།
སློབ་གླིང་རིག་པའི་པད་ཚལ་དུ།།
ཆེད་ཞུས་རིགས་སྨྲའི་མགོན་དུ་བཞེངས།།
བློ་སྦྱོང་མན་ངག་ནོར་བུའི་ཕྲེང་།།
གདུལ་བྱ་རྡུལ་གྱི་གྲངས་མཉམ་ལ།།
བློ་རུ་བུམ་པ་གང་བྱོ་ཡི།།
ཆོས་ཀྱི་བདུད་རྩིས་བྲུག་པར་བྱེད།།
སྐུ་ཡི་མཚན་དཔེ་བཞད་པའི་སར།།
ཁོ་ཚེ་བཀྲ་ཤིས་ཐང་གི་གཞིར།།
ཕྱོགས་འདུས་སེར་སྐྱ་འབུམ་ཕྲག་འགར།།
དུས་ཀྱི་འཁོར་ལོའི་དབང་ཆེན་གནང་།།
སྣོད་ལྡན་ཁྲིམས་གཙང་དམ་ཚིག་ཅན།།
སྨིན་གྲོལ་ཆུ་བོ་རྒྱུན་བཞིའི་རླབས།།
རྗེས་འཛིན་མན་ངག་གསུང་གི་མཆིད།།
ལེགས་པར་སྩལ་ཏེ་དཀྱིལ་འཁོར་བཙུད།།
དམར་སེར་བློ་གསལ་ངང་བའི་ཕྲེང་།།
སྡོམ་གསུམ་བསླབ་པའི་རྒྱ་མཚོར་བཅུག།
འདུལ་བསྟན་གསེར་གྱི་ལྗོན་པའི་བསིལ།།
ལེགས་བསྟེན་འཕགས་ཚོགས་འདུས་སྡེ་དར།།
ཐུགས་མཐུན་མཐུན་པའི་ཆོས་རིག་བགྲོའི།།
རྣམ་མང་མང་ཐོས་ཚུལ་ལྡན་བགྱིད།།
ཁྲིམས་གཙང་གཙང་སྤྱོད་ཞི་བར་གནས།།
གུས་མཆོད་མཆོད་པའི་ཡུལ་འདི་རྨད།།
ཁྱོད་ཞབས་པདྨོས་རེག་པའི་སར།།
བཀྲ་ཤིས་རྫོགས་ལྡན་དུས་སྟོན་སྨིན།།
གསུང་དབྱངས་ཚངས་ཆེན་མགྲིན་པ་ལས།།
སྙན་པ་ཆོས་ཀྱི་གླུ་དབྱངས་སྒྲོག།
སྟོན་མཚན་དྭངས་པའི་ཡར་ཟླའི་དཔལ།།
ལྷག་བསམ་དཀྱིལ་འཁོར་རབ་རྒྱས་དབུས།།
གཞན་ཕན་ག་བུར་འཕྲོས་པའི་གཟིས།།
ཁྲིམས་ལྡན་དགེ་བའི་འབབ་སྟེགས་ཅན།།
སྐལ་བཟང་དཔྱིད་ཀྱི་རྒྱལ་མོ་ཡིས།།
ལེགས་བསུས་རྒན་གྱའི་གསེར་ཆེན་ཐང་།།
དཔལ་ལྡན་དང་བོའི་རིང་ལུགས་ཀྱི།།
གྲངས་མེད་གདུལ་བྱར་ཆོས་འཁོར་བསྐོར།།
ལེགས་མཛད་སྟོན་པས་འཁོར་བསྒྱུར་གྱི།།
རྣམ་པར་ཐར་བའི་བཀའ་དྲིན་ལྕི།།
མཐའ་ཡས་དད་ལྡན་འབུམ་ཕྲག་ལ།།
ཆོས་ཀྱི་དགའ་སྟོན་དུ་མར་འགྱེད།།
མི་འཁྲུགས་རྣམ་པར་རྒྱལ་བའི་ཞིང་།།
དཔལ་ལྡན་བཀྲ་ཤིས་འཁྱིལ་བའི་གླིང་།།
འགྲོ་ཀུན་བསོད་ནམས་ཞིང་གི་རྟེན།།
ཆོས་ཀྱི་གཙུག་ལག་གནྡྷོ་ལ།།
གཟིགས་པ་ལྔ་ལྡན་རྗེའི་ལྷ་ཁང་།།
རྟེན་དང་བརྟེན་པའི་གཞལ་ཡས་ཁང་།།
ལེགས་ཚོགས་ཀུན་གྱི་ཞིང་ས་རུ།།
བཞེངས་པས་སྲིད་ཞིའི་རྒྱན་དུ་བཀྲ།།
འཇམ་དཔལ་དབྱངས་དངོས་བཞད་པའི་རྗེའི།།
ལེགས་གསུང་བཀའ་ཡི་ལུང་བསྟན་དང་།།
རྨད་བྱུང་མཛད་འཕྲིན་རྟ་བདུན་དབང་།།
དགུང་དུ་འདེགས་པའི་སྙིང་སྟོབས་ཆེ།།
དབུ་ལོ་དུང་གི་ཁ་དོག་གིས།།
འགྲོ་བའི་མིག་ལ་དོགས་པ་སྟེར།།
གསུང་དབྱངས་ཆོས་ཀྱི་རོལ་མོ་ཡིས།།
མཁས་པའི་སྙན་ལ་ངལ་གསོ་སྦྱིན།།
ཁྱོད་ཀྱི་སྐུ་དང་གསུང་གི་ཡོན།།
དུས་སྟེགས་འདི་རུ་ཟླ་བའི་དཔལ།།
རེ་ལྟོས་རྒྱུ་སྐར་མགོན་པོ་རུ།།
རྟག་ཏུ་མི་ནུབ་འཆར་བར་མཛོད།།
སྐུ་ཡི་དགུང་ན་དགུ་བཅུའི་གྲངས།།
མཐོང་བའི་མོད་ལ་དད་གུས་ཀྱིས།།
རྟེན་འབྲེལ་ཤིས་པའི་ཚིག་གི་ཕྲེང་།།
ཕུལ་འདོད་ཡིད་ཀྱི་ལྗོན་པ་གཡོ།།
ལེགས་གསུང་བདུད་རྩིའི་རོ་མངར་ལ།།
རོལ་པའི་སྐལ་བ་མ་ཐོབ་ཀྱང་།།
འདུན་པ་དྭངས་ཤིང་རྙོག་མེད་ཆུ།།
ཡིད་ཀྱི་གསེང་ན་ལྷོག་ལྷོག་གདུ།།
རང་སར་ཚིག་གིས་གཅམ་བསྟོད་དོར།།
གཞན་སར་རིས་བཅད་སྡང་ཚིག་སྤངས།།
ཕྱོགས་ལྷུང་འདམ་གྱིས་མ་སྦགས་པའི།།
དྲི་མེད་ལྷ་ཡི་དར་དཀར་འདི།།
ལྷག་བསམ་གངས་རིའི་ཁོངས་གསེང་ནས།།
ངག་རིག་གདོང་ལྔ་དགོད་པའི་དབྱངས།།
རབ་བྱེད་སྙན་ངག་དྲི་ཟའི་གླུ།།
ལེན་པར་གོམས་ལ་སྤྲོ་དགས་ཕུལ།།
དགུ་བཅུའི་དྲང་སྲོང་ཆེན་པོ་ཡི།།
མཛད་རྣམ་གང་ཐོས་ཚིག་གི་སྒྲ།།
ལེགས་བརྗོད་གཏམ་དུ་བྱས་པ་ན།།
གང་ལའང་ཚེ་ཡི་རྟེན་འབྲེལ་ཡོད།།
གང་གི་སྐུ་ཡོན་མཛད་པའི་ཕྲེང་།།
གུས་ཆུང་བླུན་པོས་བགྲང་མིན་ཀྱང་།།
འོན་ཏང་དམ་པས་རྗེས་འཛིན་ཕྱིར།།
སྨོན་པའི་ཀློང་ནས་ཐོལ་གྱིས་ཤོར།།
དེ་ལྟར་སྙམ་མོ་བཀྲ་ཤིས་སྐྱེས།།
དབྱངས་གསལ་ཕྲེང་བའི་སྡེབ་ལ་བསྐྱོན།།
ཚིག་གིས་སྤྲོས་པ་ཉུང་བསྡུས་ཏེ།།
ཡབ་འདབ་ལོ་མས་མ་བསྒྲིབས་པ།།
སྔོན་བྱོན་དམ་པའི་ཞབས་ཟུང་གི།།
འཁོར་ལོས་བསྒྱུར་བའི་ཁ་དོག་ཅན།།
སྟོད་སྨད་དགེ་ལྡན་ལུགས་བཟང་གི།།
བསྟན་པ་འཕེལ་ཞིང་རྒྱས་པའི་གླིང་།།
རབ་མཐོ་སྲིད་པའི་ཟོ་དོར་ཆེ།།
གཉན་ཆེན་སྔོ་ལྷ་གཡུ་རྩེའི་འདབས།།
ལུང་རིགས་སྒྲ་དབྱངས་སྒྲོག་པའི་ཞིང་།།
ལྔ་རིག་པདྨའི་དགའ་ཚལ་དུ།།
སྐྱེས་སྦྱངས་དབུལ་ཡང་འབྲིར་དགའ་བ།།
བླུན་པོ་དཀོར་ལ་འབགས་ཤེས་པའི།།
ཚིག་གི་བླ་དྭགས་ཁྱུང་སྔོན་ཞེས།།
མིང་དུ་གདགས་པ་གང་དེས་ཕུལ།།
ཅེས་ངེས་དོན་སྨྲ་བའི་དབང་ཕྱུག་མདོ་སྔགས་རིག་གནས་དང་བཅས་པ་ལ་མཁས་པའི་ཡང་རྩེར་སོན་པ། མདོ་སྨད་བསྟན་པའི་འབྱུང་གནས་དཔལ་ལྡན་བཀྲ་ཤིས་གཡས་སུ་འཁྱིལ་བའི་གླིང་གི་ཡོངས་ཀྱི་དགེ་བའི་བཤེས་གཉེན་ཆེན་པོ་༧ རྗེ་བཙུན་འཇམ་དབྱངས་རྒྱ་མཚོ་དཔལ་བཟང་བོ་མཆོག་བསྟན་པ་དང་འགྲོ་བའི་བསོད་ནམས་ཀྱི་ཞིང་སར་དགུང་གྲངས་དགུ་བཅུ་བདེ་བཞེས་ཀྱི་གོ་སྟོན་བསུ་བའི་རྟེན་འབྲེལ་དུ་དམ་པ་ཁོང་གི་དགུང་གྲངས་དང་མཉམ་པའི་རབ་བྱེད་ངག་གི་དབྱངས་ལ་དྲངས་པའི་ཤིས་པ་བརྗོད་པའི་ཚིག་ཕྲེང་ལེགས་ཚོགས་སྟོང་གི་ལྷ་དར་བསིལ་སྦྱིན་ཟླ་བའི་འོད་སྣང་ཞེས་བྱ་བ་འདི་ནི། གངས་ཅན་བོད་ཀྱི་རིག་པའི་གནས་ལ་འཇུག་པར་སྤྲོ་བའི་ངག་རིགས་སྨྲ་བ་ཁ་གྱའི་ཁྱུང་སྔོན་དུ་འབོད་པས་ཡུལ་མདོ་སྨད་ཀྱི་ཤར་ཕྱོགས་སྲིད་པའི་ཟོ་དོར་ཆེན་པོ་གཉན་ཆེན་སྔོ་ལྷ་གཡུ་རྩེའི་རྫ་ཞོལ་ནེའུ་གསིང་གཡུ་ཡི་མེ་ལོང་ལྟར་བཀྲ་བའི་ཁ་གྱའི་གནས་ཁང་ཐང་། སྔོན་བྱོན་སྐྱེས་ཆེན་མང་བོས་བྱིན་གྱིས་བརླབས་པའི་ཞིང་མཆོག ། ཁ་སྟོད་དགེ་ལྡན་ལྡན་བསྟན་འཕེལ་གླིང་གི་རང་ཤག་ཆོས་རིག་དཔེ་མང་སྤུངས་པའི་དགའ་ཚལ་ནས་བོད་རབ་བྱུང་བཅུ་བདུན་པའི་རབ་གནས་ཆུ་སྟག་ལོའི་ཁྲུམས་སྟོད་ཟླ་བའི་དམར་ཕྱོགས་ཀྱི་སྟོང་བ་གསུམ་པའི་ཉིན་མཇུག་གྲུབ་པར་སྦྱར་ཏེ་སྤེལ་བ་དགེའོ།། །། སརྦ་མངྒ་ལཾ། ༢༠༢༢ ༨ ༢༩
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།