2024-08-22 རྫོགས་ཚང་གཡུང་དྲུང་སྙན་གྲགས།(ལྷ་ས) ཀློག་གྲངས། མཆན ཡོད།

མི་ཚོས་བཤད་རྒྱུར
འུ་གཉིས་གནམ་འོག་གཅིག་ཏུ་ཡོད་པ་བདེན་ནའང
གཙང་བོ་རབ་མེད་ཅིག་གི་ཕར་ཚུར་ཡིན་ཟེར
འུ་གཉིས་ས་གཞི་གཅིག་གི་ཡིན་པ་བདེན་ནའང
ཁྱོད་ནི་མཐོ་སྒང་གི་གངས་ལྷ་མེ་ཏོག་དང
ང་ནི་སྲང་ལམ་ན་སྤུར་བའི་སྡོང་ལོ་ཡིན་ཟེར

ནམ་ཞིག
ང་རང་ཁྱོད་ཀྱི་རྒྱབ་གཟུགས་ཙམ་ཡང་མི་མངོན་པའི
རྒྱུས་མེད་པའི་འཇིག་རྟེན་ཞིག་ཏུ་ཐོན་སོང་ན
ངས་ད་དུང་ཁྱོད་ཀྱིས་བྱིན་པའི་ཞེན་ཆགས་ཀྱི་ཐ་གུ་དེར་འཐམས་ནས
ཁྱོད་ཀྱི་ཕྱོགས་སུ་ཆེས་མཐའ་མའི་རྒྱང་མིག་གློད་དེ
ཆེས་རྣམ་དག་གི་མིག་ཆུ་དག་ཀྱང་ཨུ་ཚུགས་ཀྱིས་བསྲན་ཞིང
ཨུ་ཚུགས་ཀྱིས་ཁྱོད་རང་སེམས་ནས་བརྗེད་ཐུབ་པར་འབད་དགོས

ང་རང་འདི་ལྟར
དྲན་གདུང་དང་སྨག་རུམ་འདྲེས་པའི་མཚན་གཞུང་མང་པོ་ཞིག་བརྒལ་ཏེ
ཕ་རོལ་ནས་ཕ་རོལ་ཏུ་ཕྱིན་སོང་ཚེ
ཁྱོད་ཀྱིས་ད་དུང་མེ་ཏོག་དང་ཆར་ཆུ་སྙོམ་ས་དེ་རུ
ངའི་ལོག་ཕེབས་ལ་སྒུག་དགོས་དོན་མི་འདུག
དེ་བས
ཁྱོད་རང་རང་ཉིད་ལ་མངའ་བའི་གཤོག་ཟུང་བགྲད་དེ
ང་རང་དྲན་མི་སྲིད་པའི་ནགས་ཀླུང་གཞན་ཞིག་ཏུ་འཕུར་ཞིག་ཨང
          ༢༠༢༤.༨.༨

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

རུས་མིང་།

གསང་ཨང་། མིང་མི་འགོད་པར་སྤེལ།

ར་སྤྲོད་ཨང་།

དཔྱད་མཆན།