༄༅།། སྙིང་ཉེ་བའི་རྒྱང་རིང་གི་མི་ཡ། ངས་མིག་ཆུ་མེད་པའི་སྡུག་བསྔལ་གྱི་གཏིང་རིམ་ཞིག་ཏུ་ཁ་གཏད་དུ་འབར་གྱིན་པའི་ མེ་རླབས་དང་དེའི་ནང་དུ་ཙག་སྒྲ་དང་བཅས་འབར་གྱིན་པའི་ཉིན་ཐོ་འབྲི་དེབ་དེ་ཚོར་ཅེར་བཞིན། འདས་དོན་གྱི་གཏམ་རྒྱུད་གསལ་གསལ་ཐིང་ཐིང་ཕྱིར་དྲན་གྱི་ངོགས་སུ་དྲངས། ངས་བརྗེད་མེད་པའི་ལོ་ཟླ་རེ་རེ་དང་དུས་ཚིགས་རེ་རེ་ནི་ངའི་མཛེས་པའི་ལང་ཚོའི་དཀྱོགས་མཚམས་རེ་རེ་དང་འདྲ་ལ། ཁྱེད་ཉིད་དྲན་ཤིང་བར་བཅུག་ཏེ་ལོ་ཟླ་གང་མང་ཤོར་སོང་བར་འཛུམ་མདངས་དང་ཁེར་བཤད་ཅིག་གིས་བདེ་མོ་འཇོག་དགོས་བྱུང་།
    སློབ་ཆུང་ལོ་རིམ་དྲུག་པ་ནས་ང་རང་ཁྱེད་ཉིད་དང་བྲལ་བ་མེད་པའི་གྲིབ་མ་དེར་གྱུར་ཞིང་། ངས་རང་གི་མི་ཚེ་དམིགས་ཡུལ་ཡང་ཁྱེད་ཁོ་ན་ཡིན་པར་འདོད་དེ། ཁྱེད་ཉིད་ནི་ང་ལ་འཐོབ་འདོད་པའི་མངའ་ཐང་དང་ལོངས་སྤྱོད་ཁོ་ན་དེ་ཡིན་པར་འདོད། ཁྱེད་ཀྱིས་ཨེ་ཤེས། ང་ཁྱེད་ཀྱི་ཆེད་དུ་སློབ་འབྲིང་དང་མཐོ་འབྲིང་ཚང་མ་འཕྲོ་རིམ་འཕྲོར་བརྗེ་སྤོར་ བྱེད་བཞིན་ཡོང་ལ། ངས་རང་གི་ཕ་མ་སྤུན་ཟླ་ལ་འགྲིག་འགྲིག་གི་རྫུན་གཏམ་བསྒྲིགས་ཏེ་ཁྱེད་རང་གང་དུ་སློབ་གྲྭ་སྤོར་ན་ང་ཡང་དེ་བཞིན་ཁྱེད་ཀྱི་རྗེས་སུ་འབྲངས་ནས་ཡོང་། སྐབས་དེ་དག་ལ་ང་ཡི་སེམས་པ་ཆུང་ཆུང་བར་གྱི་གསང་བ་སྙིང་རྗེ་བོ་དེ་སུ་དང་གང་ གིས་ཀྱང་མི་ཤེས་ལ། སྐབས་དེ་དག་ལ་ཁྱེད་ཀྱིས་ཀྱང་ང་རང་ཁྱེད་ལ་ཅི་ཙམ་གྱིས་དགའ་བར་རྒྱུས་ལོན་དང་གསལ་ཆ་མེད།
    མོ་ལོ་བཅོ་ལྔར་ལོན་པའི་དབྱར་གཞུང་དེ་ལ་ཁྱེད་རང་སྟོད་ཉི་མ་ལྷ་སར་འགྲོ་རྒྱུ་ཡིན་པས། ང་དང་ཡུལ་གཅིག་སློབ་གྲོགས་ཚོ་ལ་གྱེས་ཁའི་དགོང་ཚོགས་ཤིག་འཚོགས་བྱུང་ལ། ཁྱེད་ཀྱིས་དགོང་མོ་དེར་ཆང་གི་བཟི་བའི་ལག་ཟུང་དྲོན་མོ་དེ་ངའི་ལག་མགོར་འཇུ་ཞོར། ཚེ་རིང་སྐྱིད། བདེ་མོ་བྱོས། ཞེས་སྐད་ཆ་བཤད་ཤེས་པ་ལྟ་བུའི་མིག་ཟུང་གིས་ང་ལ་ཡུན་རིང་ཅེར་རྗེས། ལག་པ་གློད་དེ་སློབ་གྲོགས་ཚོའི་ཁྲོད་དུ་ཕྱིན་སོང་། དགོང་མོ་དེར་ང་རང་ཁ་རོག་གེར་ཁྱེད་ཀྱི་ལག་ཟུང་དྲོན་མོའི་དེའི་ཚ་རླངས་ཁྱེར་ ཏེ་དགོང་ཚོགས་དེ་དང་གྱེས་ཤིང་། ཟླ་འོད་ཀྱིས་ཡོངས་སུ་ཁྱབ་པའི་བསང་ཆུའི་འགྲམ་ནས་མཚན་གང་བོར་ཕ་བོང་ཞིག་ཏུ་ ཙོག་ཏེ་བསྡད། དེ་དུས་མོ་ལོ་བཅོ་ལྔ་ཙམ་ཡིན་པས་ངས་དོན་དངོས་ཀྱི་བརྩེ་དུང་ནི་ཁ་དོག་གང་འདྲ་ ཞིག་ཡིན་མིན་མི་ཤེས་མོད། མཚན་གང་གི་མིག་ཆུ་དང་གསལ་ཁ་མེད་པའི་སྐྱོ་སེམས་དེ་ལ་ཡང་ཡང་དུ་བསམ་གཞིགས་བྱ་ དགོས་བྱུང་།
   ཉིན་ཤས་ཀྱི་རྗེས་སུ་ཁྱེད་རང་ ཡོངས་སུ་གྱེས་ཏེ་ཕྱིན་སོང་། སྔོན་གྱི་དགའ་དད་ཞེན་ཆགས་ཆེ་སའི་སློབ་གྲྭ་དེ་གློ་བུར་དུ་སྐྱ་ཐང་ཐང་གི་མྱ་ངམ་ཐང་ཞིག་དང་མཚུངས་སོང་། ངའི་སེམས་ཁམས་སྟོང་ལྷང་ལྷང་དང་ངའི་ཁོར་ཡུག་ཡིད་མུག་མུག་ལྟ་བུ་ཡིན་པས། རང་ཉིད་ཀྱི་བླ་བོར་བརླག་ཏུ་བྱིན་པ་ལྟར་གསོན་ཤུགས་མེད་པར་ཨ་ཆད་ཨུ་ཐུག་གི་ངང་ ནས་ཟླ་ངོ་ཁ་ཤས་འགོར་སོང་། གློ་བུར་དུ་སློབ་གྲྭའི་ནང་གི་གསར་འགྱུར་ལྟར་ན་ཁྱེད་རང་སྟོད་རྒྱ་གར་འཕགས་པའི་ཡུལ་དུ་འབྱོར་ཏེ་དེར་སློབ་གྲྭ་འགྲིམས་བཞིན་པ་གོ་བྱུང་བས། ད་ནི་ཤར་ལྷོ་ནུབ་བྱང་གང་དུ་ཡོད་མེད་མི་ཤེས་པའི་ཡུལ་དེར་འགྲོ་རྒྱུའི་ཆོད་ སེམས་བརྟན་པོའི་ངང་ནས་སླར་ཡང་། ཡུལ་ཕ་མར་འགྲིག་འགྲིག་པའི་གཏམ་དང་འབད་འབད་དུང་དུང་གི་སྐད་ཆ་བཤད་རྗེས་སྟོད་ ཉི་མ་ལྷ་སར་འབྱོར་ཞིིང་། སླར་ཡང་གཡང་གཟར་དང་བྲག་རི། མུན་ནག་དང་བྱེ་ཐང་བསྐོར་ནས། གྲང་ཞིང་ངལ་བའི་ན་ཟུག་ཐོག་མར་མྱངས་ཤིང་། ལྟོགས་ཤིང་སྐོམ་པའི་སྡུག་བསྔལ་ཐོག་མར་ཚོར་བའི་ངང་བལ་ཡུལ་བརྒྱུད་ཁྱེད་ཀྱི་ཉེ་ འགྲམ་དུ་འབྱོར་བྱུང་།
    དེ་ནི་སྤྱི་ལོ་༡༩༩༩ལོའི་ སྤྱི་ཟླ་བདུན་པའི་ཚེས་༢༣ཡིན་པ་དང་། ང་རང་ཁྱེད་ཉིད་ཡོད་སའི་སློབ་གྲྭ་དེར་འབྱོར་རྗེས་ཁྱེད་ཉིད་བདག་ལ་ཐུག་འཕྲད་དུ་སླེབས་བྱུང་མོད། དེ་དུས་ངས་ཁྱེད་ཀྱི་དཀར་ཞིང་གཙང་བའི་ངོ་གདོང་དེ་དམར་ནག་ལྟ་བུའི་བཅོམ་ཞིང་ཁྱེད་ཀྱི་སྣང་མཐོ་སྤོབས་སེམས་ཀྱི་གཤིས་ཀ་ཉམ་ཆུང་གིས་བཅོམ་པའི་ཚུལ་མཐོང་ རྗེས། གཞན་ཡུལ་ནས་དཀའ་སྡུག་མྱངས་སོང་ངམ་ཞེས་སེམས་གཏིང་ནས་ཤོར་བའི་དྲི་བ་དེ་དང་ ལྷན་དུ་མིག་ཆུ་མེད་པར་དྲན་པ་འཐོར་སོང་།
     ད་ལྟ་ཕྱིར་འདང་རྒྱབ་ན་ ཁྱེད་དང་ང་ཡི་བར་དུ་སྐབས་དེ་དུས་ཚིག་དྲོན་མོ་ཞིག་གི་སེམས་རྟེན་མེད་ལ། ཤ་མཆིན་པའི་བར་གྱི་བརྩེ་དུང་ཁ་གསལ་གཏིང་གསལ་གང་ཡང་བྱེད་མ་མྱོང་ཡང་། འཆར་ཡན་དང་ཚོར་བས་བསྐྲུན་པའི་སེམས་ངོགས་ཀྱི་བརྩེ་དུང་ལ་ནི་དེ་འདྲའི་ཤུགས་ཆེ་ཞིང་དེ་འདྲའི་རྔམ་བརྗིད་པ་ཞིག་རེད་ཨང་།
      གཞན་ཡུལ་གྱི་མི་ཚེ་ནི་ དྲོད་ཁོལ་ཅི་ཡང་མེད་ཀྱང་ཁྱེད་རང་ང་དང་སློབ་གླིང་གཅིག་ཏུ་ཡོད་པ་དེ་ལས། ང་ལ་སེམས་ཀྱི་རྟེན་ས་ཞིག་རྙེད་ཅིང་། ང་ལ་མིག་གི་ལོངས་སྤྱོད་ཅིག་དབང་བས་ངས་ནམ་དུས་གང་རུང་ལ་ཕ་ཡུལ་གཅིག་པའི་མིང་ ཚིག་འདི་བེད་སྤྱོད་ཀྱིས་ཁྱེད་ཀྱི་མདུན་བརྒྱབ་ཏུ་འཁོར་ཐབས་བྱས། མཚན་གུང་རེ་རེ་ལ་ཡུལ་ཕ་མ་དྲན་པས་གདུང་སྐབས་ཁྱེད་ཉིད་ཡིད་ལ་བསྒོམས་ཏེ་སེམས་གསོ་བྱེད་ཅིང་ཁྱེད་དང་ཐག་ཉེར་ཡོད་པའི་སེམས་བརྟེན་ཁྲོད་ནས་ས་མཐའི་དྲོད་ཁོལ་ དབེན་པའི་སློབ་གླིང་གི་འཚོ་བ་འཁྱོལ་ཐབས་བྱེད། དེ་ལྟ་བུའི་ཕ་མ་དང་ཕུ་ནུའི་བདག་སྐྱོང་དང་བྱམས་སེམས་མེད་པའི་ལོ་ཟླ་རེ་རེའི་ ནང་དུ་ངས་ཀྱང་རང་མགོ་རང་ཐོན་དང་རང་བརྩི་རང་གཅེས་བྱ་དགོས་པའི་གོ་རིམ་བརྒྱུད་ཅིང་དེ་ལྟ་བུའི་གོ་རིམ་དང་སེམས་ཚོར་བར་ནས་ང་ཡང་རིམ་བཞིན་འཚར་ལོངས་བྱུང་ སོང་།
       ཁྱེད་ཀྱིས། གྲོགས་པོ་ཞིག་བརྒྱུད་དེ་ང་རང་ཁྱེད་ཁོ་ནའི་ཆེད་དུ་འཚོ་བའི་གནས་ཚུལ་རྟོགས་ རྗེས། ཁྱེད་ཀྱིས། ང་ལ་གཏན་ནས་མི་དགའ་ཞིང་ཐ་ན་སྐར་ཆ་གཅིག་ལ་ཡང་སེམས་པ་བཀུག་མ་མྱོང་བས། དེ་ལྟ་བུའི་བསམ་བློ་འདོར་རོགས་ཞེས་བྲིས་འདུག་པའི་འཕྲིན་ཡིག་ཅིག་བསྐུར་བྱུང་ བས། ངས་ཉིན་མཚན་དུས་དྲུག་ཏུ་ཕ་མ་ལས་ཀྱང་སྙིང་དམར་པོའི་དཀྱིལ་གྱི་ཚི་ལུ་ལ་སྒོམ་པའི་ཁྱེད་ཀྱིས་ང་རང་དངོས་སུ་རྨས་སོང་། ཡིན་ན་ཡང་ངས་ཁྱེད་ལ་ང་ཡི་དམར་ཆུང་སེམས་པ་བསྟན་མ་མྱོང་བས། ངས་དངོས་སུ་ང་རང་ཁྱེད་ལ་ཅི་ཙམ་དགའ་བ་བརྗོད་མ་མྱོང་བས། སྐབས་དེ་དུས་ངས་ཁྱེད་ལ་ལེ་གདའ་གཏན་ནས་བྱས་མ་མྱོང་། ཡིན་ན་ཡང་ངས་གོ་སྐབས་དེ་དང་མཉམ་དུ་མི་ལོར་མང་པོར་སེམས་ཀྱི་གྲལ་མགོར་བཞག་ ཡོད་པའི་ཁྱེད་ལ། ང་རང་ཅིའི་ཕྱིར་ཕ་མ་དང་ཕུ་ནུ་བཞག་ཏེ་ས་མཐའ་སྡེ་མཐའ་ལ་ཡོང་དོན་བཤད་སྐབས། ཁྱེད་ཀྱིས་ཐ་ན་ངེད་གཉིས་མཉམ་དུ་གནས་ཐུབ་སའི་སློབ་གྲྭ་ཡང་བློས་གཏོང་གིས་ང་ དང་རྒྱང་དུ་གྱེས་སོང་།
       དེ་ནས་བཟུང་ངས་རྫོགས་པ་མེད་པའི་སྙན་ངག་བྲིས་ཤིང་། སྙན་ངག་གི་ཤུགས་སུ་སྟོན་བཞིན་པའི་མཛད་མེད་ཆུ་བོའི་རྒྱུན་གྱི་བརྩེ་དུང་གི་དམར་བཤད་མང་པོས། སྙན་ངག་གི་ཚིག་རྐང་རེ་རེའི་སྤུབས་སུ་ཉར་ཡོད་པའི་ངའི་དྭངས་མཐའ་མེད་པའི་སྡུག་བསྔལ་མཚོན་སྟངས་དེ་དག་ལས། མི་མང་གིས་འཕྱ་སྨོད་དང་ཟུར་ཟའི་ཚིག་རྩུབ་རེ་རེ་ནི་ང་རང་དམ་པོར་ལངས་ཏེ་འཇིག་རྟེན་ལ་མིག་ཟུང་ཇེ་ཆེར་ཕྱེ་ཏེ་ལྟ་དགོས་པའི་བསླབ་བྱ་དང་སྐུལ་ལྕག་ལྟ་ བུར་གྱུར་ན་ཡང་། ཁྱེད་ཀྱི་ངའི་ལང་ཚོ་དང་སེམས་པ་དང་དུ་མ་བླངས་པར་རྒྱང་དུ་གྱེས་པའི་གོ་རིམ་དེ་དག་ནི་ང་ཡི་བླ་སྲོག་གཅོད་པའི་སྟ་རེ་ཞིག་དང་མཚུངས་སོང་བས། དེ་ནས་བཟུང་ངས་བདེ་སྡུག་གྲངས་མེད་པ་དང་སྙིང་གཏམ་རྫོགས་མཐའ་མེད་པ་སྙན་ངག་གི་ལམ་ནས་མཚོན་པར་བྱེད། 《ཚོད་ཚོད་ལ་ཁྱེད་རང་དྲན》དང་། 《ཁྱེད་རང་དྲན་པ་ཐེངས་གཅིག་མིན》ལ་སོགས་པའི་སྙན་ངག་གི་ལོངས་སྤྱོད་མང་པོའི་བར་དུ་ངས་དམར་དམར་རྗེན་རྗེན་དུ་ཁྱེད་ལ་བརྗོད་འདོད་པ་ཡོད་ཚད་མི་ཚོགས་ལ་བཤད།
     སྐབས་ཤིག་ལ་ཁྱེད་དུས་ཚོད ངེས་མེད་ཅིག་ལ་སློབ་གྲྭར་འབྱོར་ཏེ་ང་དང་འཕྲད་ཅིང་། ཁྱེད་ཀྱིས་སྐད་ཆ་གང་ཡང་མེད་པར་ཚོད་མེད་དུ་མིག་ཆུ་ཤོར་རྗེས་ངའི་ལག་ཟུང་དམ་ པོར་འཇུས་ཏེ། ང་དང་འགྲོགས་ནས་ཕ་ཡུལ་ལ་འགྲོ ས་མཐའ་རུ་འུ་གཉིས་ལ་དབང་བའི་ཁྱིམ་གཞི་མེད་ལ། ངས་ཁྱེད་ལ་་གང་ཡང་སྤྲོད་ཐབས་མེད་པས་འུ་གཉིས་ཕ་ཡུལ་ལ་ལོག་འགྲོ་ཟེར། འགྲོ་ཁར་ཁྱེད་ཀྱིས་ང་ལ་ཉིན་ཐོའི་དེབ་ཅིག་སྤྲད་དེ་བུད་སོང་། དགོང་མོ་དེར་གཞི་ནས་ཁྱེད་ཀྱིས་ས་མཐའ་ནས་ང་ལ་ཅིའི་ཕྱིར་ངོས་ལེན་མེད་པའི་རྒྱུ་མཚན་རྟོགས་ཤིང་། དགོང་མོ་འདིར་ཁྱེད་ཀྱིས་ང་ལ་ང་ལས་ལྷག་པའི་སེམས་ཁྲལ་དང་དུང་ཞེན་ཟབ་པ་ཤེས་ སོང་། དགོང་མོ་འདིར་གཞི་ནས་ངས་དགའ་བའི་མིག་ཆུ་ཤོར་ཞིང་སུས་ཀྱང་མི་ཚོར་བའི་འཛུམ་མདངས་ཤིག་ཀྱང་ཁ་རོག་གེར་ཤོར་སོང་།
      ཡིན་ན་ཡང་ངས་མགོ་མཇུག་མེད་པར་བསམ་བློ་བཏང་རྗེས་ངས་དྲིན་ཆེན་ཕ་མ་དོན་ཆུང་གིས་བཞག་ཅིང་ངས་ཕུ་ནུ་མིང་སྲིང་བརྩེ་མེད་ངང་བཞག ངས་ད་དུང་ཕ་མའི་རྔུལ་ཆུས་བསྐྲུན་པའི་ཤེས་རིག་སྦྱོང་བའི་གོ་སྐབས་བཞག་ཏེ་ཕ་མའི་སྙིང་གི་ཚི་ལུ་ལྟ་བུའི་མདོ་མེད་བུ་མོ་ང་ཡིས། འཇིག་རྟེན་འདིར་ང་ནི་ཁྱེད་ཁོ་ནར་དབང་བའི་སྡོམ་ཚིག་བཀོད་མྱོང་བས། མདོ་མེད་བུ་མོ་ཞིག་དེ་ལྟར་ཕ་ཡུལ་དུ་འགྲོ་བར་སྤོབས་པ་མེད་སོང་བས། ཁྱེད་ཀྱིས་ང་ལ། ཁྱེད་སྔོན་ལ་སོང་ནས་ཕ་ཡུལ་དུ་འུ་གཉིས་ལ་བདག་པའི་གཞིས་ཁྱིམ་དྲོན་མོ་ཞིག་བཟུང་ནས་ང་ལ་སྒུག་ཆོག་ཅེས་བརྗོད་དེ་བུད་སོང་།
    མི་རྣམས་ཀྱིས་ང་ལ། ཁོའི་ཆེད་དུ་ཧི་མ་ལ་ཡ་རྐང་ཐང་གིས་བརྒལ་ཏེ་སླར་ཡང་ཁོའི་ཆེད་དུ་ཧི་མ་ལ་ཡ་རྐང་ ཐང་གིས་བརྒལ་ཚེ་ཁྱེད་ཀྱི་ལྷམ་མགོ་ཟད་པ་ལས་མེད་ཅེས་ཤོད་བཞིན་འདུག
    དེ་ལྟ་བུའི་འགལ་འདུ་ཁྲི་མ་འབུམ་གྱི་བར་ནས་ངས་རླུང་ཡན་དང་འགྲོགས་ནས་ཨ་ཕ་འཇིག་རྟེན་དང་གྱེས་པ་གོ་རྗེས། ང་དང་ཁྱེད་ཀྱི་ལས་འབྲས་ལ་ཡང་སྡོམ་ཚིག་བཀོད་སོང་ཏེ། ཁྱེད་ཀྱི་ཆེད་དུ་ཕ་ལོར་མ་ཐུག་པའི་ནོངས་འགྱོངས་ལས་ཁྱེད་ལ་འཁང་ར་ཁྲི་མ་འབུམ་ གྱི་འཚང་ཁ་རྒོད་ལ། གང་ལྟར་ཁྱེད་ཡིད་ལ་འཁོར་ན་ངས་བློས་མི་བཟོད་པའི་སྡུག་བསྔལ་གཞན་ཞིག་ལ་གདོང་ལེན་བྱ་དགོས་པའི་གོ་རིམ་གྱི་བར་ནས། ང་ཡུན་རིང་དུ་ཁྱེད་ལ་དགའ་བ་དེ་གློ་བུར་དུ་སྡང་བར་གྱུར་ཞིང་། སྡང་བ་ནས་དྲན་པ་དང་། དྲན་པ་ནས་ཨུ་ཚུགས་ཀྱིས་འདོར་བ་སོགས་དགའ་སྐྱོ་འདྲེས་མའི་ཟློས་གར་གྱི་ཁྲོད་ནས། ཁྱེད་ཉིད་བརྗེད་ཆེད། སྐྱེས་པ་གཞན་དང་འགྲོགས་ཤིང་། ཁྱེད་རང་བརྗེད་ཆེད་གཞན་གྱི་བརྩེ་དུང་ལ་ཀུ་རེ་བརྩེས་ཤིང་གཞན་གྱི་དུང་ཞེན་ལ་རྡོག་རོལ་བཏང་། དེ་ནི་ཁྱེད་ཀྱིས་ང་ལ་སྤྲད་པའི་སྡུག་བསྔལ་སེལ་བའི་སྨན་མཆོག་ཅིག་ཏུ་འདོད་མྱོང་ལ། དེ་ནི་ང་རང་བརྩེ་དུང་ལས་རྒྱལ་བའི་ལམ་ཀ་རེ་འདོད་མྱོང་། ཡིན་ན་ཡང་ངས་ནི་སྐྱེས་པ་གཞན་དང་འགྲོགས་ཤིང་གཞན་གྱིས་བརྩེ་དུང་ལ་ཅི་ཙམ་གྱིས་ལོངས་སྤྱོད་བྱེད་ཀྱང་། ངས་སྔར་བཞིན་ལག་འཇུ་ཐེངས་གཉིས་བར་ནས་དུང་ཞེན་གྱིས་ལོངས་སྤྱོད་འཚོལ་སའི་ཁྱེད་ཉིད་ཇེ་དྲན་རེད། ངའི་སེམས་ངོགས་སུ་ང་སྔར་བཞིན་ཁྱེད་ལ་དགའ་ཞིང་ཁྱེད་ཉིད་དྲན་པས། ཁྱེད་ཉིད་དྲན་པ་ནི་དུག་སྦྲུལ་བཞིན་ངའི་ལས་སེམས་གཉིས་ལ་འཁྱུད་འདུག་པས། ཁྱེད་ཉིད་ནི་ཉལ་ཐ་ལྟ་བུའི་དུག་རྫས་ཤིག་དང་འདྲ་བར་ངའི་ལུས་བོའི་སྟོད་སྨད་བར་གསུམ་གྱི་ཁྲག་རྩའི་བར་ཁྱབ་ཅིང་། ཁྱེད་ཉིད་ནི་ངའི་ཁྲག་རྩའི་སྤུབས་སུ་ཡོད་པའི་འབུ་ཕྲ་དེ་དག་བཞིན་ང་ཡི་ཟུངས་ཁྲག་འཇིབ་ཅིང་ང་ཡི་རྣམ་ཤེས་དང་བླ་སྲོག་གི་གཞི་བདག་ལ་གྱུར། ངས་ངེས་པར་དུ་དུག་རྫས་ལྟ་བུའི་ཁྱེད་ཉིད་འདོར་དགོས་ཤིང་ངེས་པར་དུ་རྣམ་ཤེས་ དང་བླ་སྲོག་གི་གཞི་བདག་གཞན་ཞིག་བཙལ་ནས་ཁྱེད་ཉིད་ཕམ་པར་བྱ་འོས།
     དེ་ལྟ་བུའི་དུས་སྐབས་ཤིག་ལ་ཁྱེད་ཀྱིས་ངའི་ནང་མི་ལ་དམ་བཅའ་བཞག་ཏེ་མི་ལོ་ལྔ་ལ་ངའི་ལོག་ཡོང་ལ་སྒུག་རྒྱུ་ཡིན་པར་བཤད་པས། ངས་སླར་ཡང་མི་ཚེ་འདིའི་ནང་གི་ཁྱེད་ཀྱི་ལག་འཇུ་དེ་གཉིས་ཡིད་ལ་བཅངས་ནས་ཁྱེད་ཉིད་ས་མཐའི་ཁེར་རྐྱང་གི་ལམ་བྲོ་ལ་རྩིས། དེ་ལྟར་ཁྱེད་ཉིད་ནོངས་འགྱོད་དང་བློས་གཏོང་གིས་ངང་ནས། ཁ་ཡ་ན་ཟླའི་འཕྱ་སྨོད་དང་དྲིན་ཆེན་ཕ་མའི་བཀའ་བཀྱོན། སྡེ་ཆེན་ལུང་པའི་གོམས་སྲོལ་མཐའ་དག་རྣ་བའི་ལྟག་རྒྱབ་ལ་གཡུག་ཏེ་ང་ལ་སྒུག་བཞིན་པའི་བར་ལམ་དུ། སླར་ཡང་བདག་གི་མ་ཡུམ་ཡང་འཇིག་རྟེན་དང་ཞལ་གྱེས་སོང་བས། ངའི་བསམ་པའི་བར་གྱི་རེ་བ་དང་དུང་ཞེན་མཐའ་དག་རྨེག་མེད་དུ་བཅོམས་སོང་ལ། ད་ལྟ་ང་དངོས་སུ་ཁྱེད་ལ་དགའ་བ་ཡིན་ནམ་སྡང་བ་ཡིན་པའི་འདུ་ཤེས་རབ་རིབ་ཀྱི་འོག་ ནས། ངས་ཁྱེད་ལ་མནར་གཅོད་གཏོང་བཞིན་པའི་ཚོར་བ་སྐྱེས་ཤིང་། ཡུལ་སྲོལ་གོམས་ལུགས་མཁྲེགས་པའི་ཕ་ཡུལ་དུ་ཕོ་ལོར་༣༠བུད་པའི་སྐྱེས་པ་ཁྱེད་ཀྱིས། ད་དུང་ཡང་རེ་འབྲས་ཡོད་མེད་མ་ངེས་པར་ང་ལ་སྒུག་པ་བསམ་ན། མནར་གཅོད་དེ་ཁྱེད་ལ་མི་དགོས་ཤིང་། ཤ་འཁོན་ལྟ་བུའི་འཁོན་སེམས་དང་བྱ་སྤྱོད་དེ་ང་ཡིས་ཀྱང་འདོར་བར་འོས་པས། ངས་མཚམས་འདི་ནས་འུ་གཉིས་ཀྱི་གཏམ་རྒྱུད་འདི་གཏན་ནས་འབྲི་མཚམས་འཇོག་དགོས་ བྱུང་།
      རེད་ཡ། སྙིང་ཉེ་བའི་མི། འདི་ལྟ་བུའི་དུས་ཚིགས་ཀྱི་འཁོར་སྐྱོད་ཁྲོད་དུ་ང་རང་ཁྱེད་ལ་དགའ་མྱོང་བ་ བདེན་ན་། ངས་ཀྱང་ཁྱེད་ཉིད་འཆི་བདག་གི་ཞགས་པ་ལྟ་བུ་ལས་གློད་དགོས་ལ། གལ་ཏེ་ང་རང་ཁྱེད་ལ་དུང་མྱོང་བ་བདེན་དུ་མཆིས་ན། ངས་ཁྱེད་ཉིད་ལ་མདོ་དོན་མེད་པའི་རེ་བ་སྤྲོད་མི་ཉན་པས། ངས་རང་གི་དྲན་པ་མཐའ་དག་ཉིན་ཐོར་བཀོད་པ་དང་ངས་སྔར་བཞིན་རེ་སྒུག་དང་འཆར་ཡན། སྟོང་བསམ་དང་རྨི་ལམ་བར་དུ་སྒོམ་པའི་འགོས་ནད་ལྟ་བུ་འདི་དག་ཉིན་ཐོར་བཀོད་པའི་ ཁྲོད་དུ། ང་ཡིས་ང་རང་སྲས་མོ་བཞིན་གཅེས་པའི་སྐྱེས་པ་མང་པོའི་སེམས་པར་རྨ་ཁ་བཞག་པའི་ རྒྱབ་བརྗོད་ཀྱི་གཏམ་རྒྱུད་མང་པོ་མང་པོ་ཡོད་ཀྱང་། མི་ལོ་གང་མང་ལ་རྒྱང་ཐག་རིང་སར་ཡོད་པའི་ཁྱེད། ང་ཡི་སྙིང་གི་ཚི་ལུ་དེ་ཡིན་པ་བདེན་དུ་མཆིས་ཚེ། ངས་ཇི་སྲིད་དུ་དྲན་སྣང་དང་སྐྱོ་གདུང་འདི་མཛེས་སྡུག་ལ་སྒོམ་ཏེ་མུ་མཐུད་ནས་ ཁྱེད་རང་དྲན་པའི་ན་ཚས་བསླུས་པ་ཡིན་ན། དེ་ནི་ང་ཡི་མི་ཚེ་ཡི་ཕམ་ཁ་ཞིག་དང་ཁྱེད་ཀྱི་མི་ཚེ་ཡི་མནར་གཅོད་ཅིག་དང་འདྲ་བྱུང་བས། ང་ནི་ཆག་རོ་རྣམས་རེ་རེ་བཞིན་ཟགས་གྱིན་པའི་ཤེལ་གྱི་་མཆོད་རྟེན་ཞིག་འདྲ་འདུག་ པས། ངས་ཀྱང་དེ་རིང་ཉིན་ཐོ་གྲངས་མེད་ཀྱི་འབྲི་དེབ་མཐུག་པོ་རྣམས་རེ་རེ་བཞིན་མེ་ལ་སྒྲོན་ཞོར་ང་ཡི་སྙིང་གི་ཚི་ལུ་ལ་སྒོམ་པའི་ཁྱེད་ཀྱང་མེ་ལྕེ་དང་ལྷན་དུ་འཚིག་པར་གྱུར་ཅིག དུ་བ་དགུང་ལ་འཕྱོ་བ་ཡིས་ང་ཡི་དྲན་པ་ཁྱེར་བར་མཛོད། མེ་འོད་དམར་པོའི་རླབས་ཀྱིས་ང་ཡི་སྐྱོ་བ་བསྲེགས་་པར་མཛོད།
        དེ་དགོང་ང་རང་ཆེས་ཐོག་མར་དགའ་སའི་སྐྱེས་པ་ཁྱེད་ལ་བདེ་མོ་འཇོག་གིན་ཡོད། དེ་རིང་གཞི་ནས་སེམས་དང་བསམ་པ། ཤ་དང་མཆིན་པའི་བར་ནས་ཁྱེད་ལ་བདེ་མོ་འཇོག་བཞིན་ཡོད།
        ཁྱེད་ཉིད་ཡང་ང་ལ་སྒུག་ཏེ་ མི་ལོ་བརྒྱད་འགོར་བྱུང་།ད་ལྟ་ཁྱེད་རང་ཕོ་ལོ་༣༠ཟིན་སོང་། ཁྱེད་ཀྱིས་ངས་སླར་ཡང་ཁྱེད་ལ་དུས་ཆད་ཅིག་བཟོ་རོགས་ཟེར། ཡིན་ཡང་ད་ནི་ང་དང་ཁྱེད་ཀྱི་བར་དུ་སྣེ་གཉིས་ར་འཕྲོད་སའི་དུས་ཚོད་མི་འདུག་པས། ཁྱེད་ཉིད་དྲན་པ་དང་ཁྱེད་ལ་དགའ་བའི་་ངའི་སེམས་པས་ངས་སླར་ཡང་དྲིན་ཆེན་ཕ་མར་བསྐྱར་ཐུག་མེད་པའི་ནོངས་འགྱོད་ཁྲི་མ་འབུམ་ལ་གདོང་ལེན་བྱ་དགོས་པས། ད་ནི་ང་ཡིས་ཁྱེད་རང་གློད་ཆོག་ལ་ཁྱེད་ཀྱིས་ང་རང་དོར་ཆོག་ཅེས་ངས་ཕུ་བོ་བརྒྱུད་དེ་ཁྱེད་ཀྱི་ནང་མི་ལ་བཤད་རྗེས། ཟླ་ངོ་ཁ་ཤས་ལས་མ་འགོར་བར་ཁྱེད་ཀྱིས་རང་གི་མི་ཚེ་ཕ་མའི་བཀའ་བཀོད་ལ་སྤྲད་སོང་། ད་ནི་ཁྱེད་རང་གཞན་གྱི་སྐྱེས་པར་འགྱུར་དགོས། གཞན་གྱི་ཨ་ཕ་ཆགས་དགོས། ཁྱེད་རང་ཁྱིམ་ཚང་ཞིག་གི་ཀ་བ་ལྟ་བུའི་བཟའ་ཟླ་དང་ཕ་ལོ་དེ་བྱ་དགོས་པས། སེམས་པ་སོང་བའི་མི་ལགས། འདི་ནི་ང་ལ་ཆུང་ནས་འདྲིས་པའི་ཁྱེད་ཉིད་དྲན་པའི་ན་ཚ་ལས་སྐྱོབས་ཐབས་ཡག་ཤོས་དེ་ཡིན་ལ། འདི་ནི་ཁྱེད་དང་ང་ཡི་གཏམ་རྒྱུད་དང་སྙིང་ནད། དགའ་དུང་དང་ཞེན་ཆགས། ཡོད་ཚད་ནས་ཡོད་ཚད་མཇུག་སྒྲིལ་རན་པའི་འགྲོ་ལམ་དེ་ཁོ་ན་དེ་ཡིན་པས། བདེ་མོ་བྱོས། སུས་ཀྱང་ཚབ་བྱ་མི་ཐུབ་པའི་སྙིང་ཉེ་བའི་མི། གང་གིས་ཀྱང་ཚབ་བྱ་མི་རུང་བའི་སྙིང་ཉེ་བའི་ཆུང་འདྲིས་བྱམས་པ། དེ་རིང་ནི་སྤྱི་ལོ་༢༠༠༨ལོའི་སྤྱི་ཟླ་དྲུག་པ་རེད། དེ་རིང་ནི་ང་ཡིས་དངོས་སུ་ཁྱེད་རང་བདེ་མོ་འཇོག་པའི་དུས་ཚིགས་ཡིན་པས། ཆུང་འདྲིས་བྱམས་པ། སྙིང་གི་ཚིལ་ལུ། བདེ་མོ་བྱོས།