ཁྱོད། སྨད་འཚོང་མར་ཨེ་དོ།
༡
སྨད་འཚོང་མ་ཏག་ཏག་སྨད་འཚོང་མ་ཡིན་པས། རླབས་ཆེན་ཏུ་བརྩིས་ན་རེད།
༢
གློག་དམར་བོ་དེ་སྨད་འཚོང་མའི་གཡོ་འཛུམ་བཞིན་འཚེར་ཡང་། སྨག་སྟུག་པོ་དེ་སྨད་འཚོང་མའི་སྒོར་མོ་བཞིན་མཐུག མུན་པ་ཆེས་ནག་དུས་ཀྱི་མཚན་གུང་རེ་རེར། འཇིག་རྟེན་ན་འོད་སྣང་ཞིག་ཡོད་ས་ནི་ཏག་ཏག་སྨད་འཚོང་མའི་སྒོ་འགྲམ་ཡིན་ལ། ལྷགས་རླུང་ཆེས་རྒོད་དུས་ཀྱི་མཚན་གུང་རེ་རེར། འཇིག་རྟེན་འདིར་ཆེས་དྲོད་ཁོལ་འཛོམས་སའང་སྨད་འཚོང་མའི་ཤག་ཆུང་རེད། སྨད་འཚོང་མས་ཆེས་ལྕི་བའི་མུན་ནག་གི་ཉལ་གོས་དེ་གོན་ནས། འཇིག་རྟེན་འདིའི་འདོད་ཆགས་ཡོད་ཚད་འཁུར་ཡོད་ལ། འཁོར་བ་འདིའི་སྐྱོ་སྡུག་མ་ལུས་བསྒོམས་ཡོད། མུན་སྨག་མཐུག་ས་ནས། སྨད་འཚོང་མ་བྱིས་པ་ལྟ་བུའི་སྐྱེས་པ་ཚོའི་ཡུམ་ཆེན་རེད་ལ། གྲང་ངར་རྩུབ་ས་ནས། སྨད་འཚོང་མ་བརྩེ་དུང་འཚོལ་མཁན་ཚོའི་མཐའ་མའི་གནས་མལ་རེད།
༣
ཡོད་ཚད་ཁེར་རྐྱང་གིས་བགམས་ཚར་ལ། ཐམས་ཅད་མུན་སྨག་གིས་མིད་ཚར་བའི་མཚན་ལྗོངས་རེར། འཇིག་རྟེན་འདིར་ཆེས་རང་དབང་གི་མི་ནི་སྨད་འཚོང་མ་དང་ཁོ་མོའི་སྐུ་མགྲོན་ཚོ་རེད། སྨད་འཚོང་མའི་ཐུ་འོག་ནས་འདོད་ཆགས་ཀྱི་ཆུ་འཁོལ་གདུ་ཐེངས་རེ་ནི། ཁོ་ཚོས་སེམས་གཏིང་གི་ཨག་རྒྱངས་དངོས་མ་དེ་སྒོར་ཕུད་ཐེངས་རེ་ཡིན་ལ། སྨད་འཚོང་མའི་ཁ་ནས་བརྩེ་དུང་གི་ཁ་གཡང་འབོད་ཐེངས་རེ་ནི། ཁོ་ཚོས་དཔའ་སྤོབས་ཀྱི་དར་ཤིང་ཀེར་དུ་སློང་ཐེངས་རེ་ཡིན།
༤
བུད་མེད་ཚོའི་ཁྲོད་དུ། སྨད་འཚོང་མ་ད་གཟོད་བུད་མེད་དངོས་མ་ཞིག་རེད་ལ། དོ་དགོང་གི་མིའི་རིགས་ཀྱི་ཁྲོད་ནས། སྨད་འཚོང་མ་ད་གཟོད་ཆེས་རླབས་ཆེན་གྱི་མི་དེ་རེད།
སྨད་འཚོང་མའི་འཇིག་རྟེན་དུ། སྐྱེས་པ་ཚོའི་བརྩེ་དུང་ད་གཟོད་རང་དབང་ཡིན་ལ། སྨད་འཚོང་མའི་མདུན་དུ། སྐྱེས་པ་ཚོ་ད་གཟོད་རྒན་གཞོན་མཐོ་དམའ་མེད་པར་འདྲ་མཉམ་ཡིན། ཏག་ཏག་སྨད་འཚོང་གི་དུས་མཚམས་འདིར། སྐྱེས་པ་ཚོ་ད་གཟོད་ཤོག་སྒོར་གྱི་བྲན་ལས་ཐར་ཞིང་གསར་ཚུགས་སྤྱོམ་བཞིན་ཡོད།
སྨག་ནག་ས་འདི་རུ། ཏག་ཏག་སྨད་འཚོང་མ་གཅིག་པུ་དྲང་བདེན་གཉན་པོ་ཞིག་དང་། འདྲ་མཉམ་བཙན་པོ་ཞིག བརྩེ་དུང་ཟབ་མོ་ཞིག་བདག་པོ་དེ་རེད།
༥
སྨད་འཚོང་མས་འཚོང་བཞིན་པ་ནི་ལུས་ཏག་ཏག་རེད་ལ། དེ་བས་ཀྱང་ལུས་པོའི་སྨད་ཀྱི་ཆ་ཙམ་རེད། སྨད་འཚོང་མས་ཁྱོད་ལ་བརྩེ་དུང་ངོ་མ་ཞིག་བཙོངས་མྱོང་མེད་ལ། ཁྱོས་ཀྱང་སྨད་འཚོང་མའི་བརྩེ་དུང་ངོ་མ་ཞིག་ཉོ་ཐུབ་མེད། དེ་བཞིན་རྡོ་ཁང་གྲུ་བཞི་དེའི་མངའ་ཁོངས། མལ་ཁྲི་གྲལ་དག་དེའི་དྲོད་ཁོལ། སྒོ་གློག་དམར་པོ་དེའི་དཀར་ངོགས། ཡོད་ཚད་སྒྱུ་མ་ཙམ། ཐམས་ཅད་རྨི་ལམ་ཙམ། ཁྱོད་ལ་ཐོབ་མྱོང་ཡོད་པ་ལས་དབང་མྱོང་མེད། ཁྱོད་རང་ཆགས་མྱོང་ཡོད་པ་ལས་འཁྱེར་ཐུབ་མེད། རྒྱུ་མཚན། དེ་ནི་ཏག་ཏག་སྨད་འཚོང་མས་དབང་བསྒྱུར་བའི་སྨད་འཚོང་གི་རྒྱལ་ཁམས་དེ་རེད། དེ་རུ་སྨད་འཚོང་མ་གཅིག་པུས་རང་བདག་བྱས་ཡོད་ལ། སྨད་འཚོང་རྐྱང་རྐྱང་གིས་ཁ་ལོ་སྒྱུར་བཞིན་ཡོད།
དེ་རུ་སྨད་འཚོང་མ་གནམ་ཡིན། དེ་རུ་སྨད་འཚོང་མ་ཐོག་ཡིན། གསར་བུ་མདོ་མེད་ཅིག་ལ་རིན་མེད་དུ་བརྩེ་ཞིང་དཔོན་པོ་རྒྱུ་ཅན་ཞིག་ལ་མཐོང་ཆུང་གིས་གྱེས་ཀྱང་ཆོག ཕོ་གསར་བསམ་མེད་ཅིག་ལ་ཅི་འདོད་ཀྱིས་སྤྱད་ནས་གསར་རྒོད་ཡ་མེད་ཅིག་ནི་གང་བྱུང་གིས་གཡུགས་ཀྱང་ཆོག དབུལ་བོ་སྣོད་བཟེད་ཅིག་ལ་འདོད་ཆགས་ཀྱིས་རོལ་ཅིང་ཕྱུག་པོ་གཏེར་བདག་ཅིག་ལ་མིག་བལྟས་ཤིག་མ་བགྱིས་ཀྱང་ཁོ་མོ་ཚོའི་རང་དབང་རེད། ཁོ་མོ་ཚའི་འདྲ་མཉམ་རེད།
༥
འོན་ཏེ། ང་ཚོས་འཚོང་བཞིན་པ་ནི་ལུས་ཡིན་པ་མ་ཟད། སེམས་ཀྱང་རེད། སེམས་ཀྱི་བརྩེ་དུང་། སེམས་ཀྱི་ལ་རྒྱ། སེམས་ཀྱི་བསམ་བློ། དེ་བས་ཀྱང་དྲང་བདེན་དང་འདྲ་མཉམ་སོགས། བཙོང་མི་འོས་པ་མང་བོ་ཞིག་གཞི་ནས་བཙོངས་ཚར་བས། དུས་འདིར་ང་ཚོར་ཅི་ཞིག་ལྷག་ཡོད། དུས་འདིར་ང་ཚོས་ཅི་ཞིག་རྙེད་ཡོད། སྨད་འཚོང་མའི་མདུན་དུ། ང་ཚོ་ཇི་འདྲའི་ཉམ་ཆུང་ཨང་། ཉམ་ཆུང་། ང་ཚོིའི་ཁ་གཏད་དུ། སྨད་འཚོང་མ་ཇི་འདྲའི་རླབས་ཆེ་ཨང་། རླབས་ཆེ། སྨད་འཚོང་མའི་སྙིང་སྟོབས་ལ་སློབ་སྦྱོང་བྱ་འོས་ཤིང་། སྨད་འཚོང་མའི་རང་དབང་ལ་དེ་བས་ཀྱང་དད་པ་བྱ་འོས། དེ་བས། མུན་ནག་ས་འདི་ནས། སྨད་འཚོང་མའི་གློག་ངོགས་འཚོལ་བར་འགྲོ་ཞིང་། སྨད་འཚོང་མའི་དྲོད་ཁོལ་མྱོང་བར་འགྲོ། དེ་བས་ཀྱང་། སྨད་འཚོང་མའི་རང་དབང་ལ་རྩེ་བར་འགྲོ སྨད་འཚོང་མའི་འདྲ་མཉམ་ལ་རོལ་བར་འགྲོ སྨད་འཚོང་མའི་བདེན་ལུགས་ལ་སྤྱོད་པར་འགྲོ
༧
དཔའ་སྤོབས་ཀྱི་ལན་ཞིག་ལྡོན་དང་། ངའི་སྤུན་ཟླ། ཁྱོད། སྨད་འཚོང་མར་ཨེ་དོ།
རྩོམ་ཁུངས། ངེད་དྲ་བ།