སྤྱིར་འཁོར་བ་ན་སྡུག་བསྔལ་ལས་སྐྱིད་སྣང་མེད་པ་ཁམས་གསུམ་གྱི་བླ་མ་མཁས་པ་རྣམས་ཀྱིས་གནའ་ནས་གསུངས་ཡོད་པ་རེད། འཁོར་བ་ན་སྐྱིད་སྣང་ཏིལ་འབྲུ་ཙམ་ཡང་མེད་པར། ཡོད་ཚད་སྡུག་བསྔལ་གྱི་འབྱུང་ཁུངས་ཁོ་ནར་ཟད་དེ། ད་བར་དུ་འཁོར་བའི་ཀློང་ནས་མགོ་འཁོར་ཏེ་བསྡད་པའི་རིང་འདིར། མི་ལོ་མང་པོ་རིང་གི་འདས་མ་ད་གསུམ་ལ་དུས་དེ་རིང་མིག་གིས་ཕྱིར་ལྟ་རེ་བྱས་ཚེ། ངོ་མ་འཁོར་བ་ན་རང་ལ་སྡུག་བསྔལ་ལས་སྐྱིད་མེ་སྟག་ཙམ་ཡང་མེད་པ་ར་སྤྲོད་བྱུང་བ་རེད། ད་བར་དུ་སྐྱིད་ལ་སྡུག་པའི་འཇིག་རྟེན་འཁོར་བ་འདིར་ཞེན་ཆགས་བཟོད་གླགས་མེད་པ་སྐྱེས་ཏེ་འདུག་དགོས་དོན་ནི་མི་རྟག་པའི་ཕྱི་རོལ་ཡུལ་གྱི་གཟུགས་སྣང་སྣ་ཚོགས་ལ་སེམས་གཡེང་དྲགས་པ་དང་། སྤྱི་ཚོགས་ཀྱི་རྫུ་བག་སྣ་ཚོགས་ཀྱི་འགྲན་རྩོད་དང་བཅོས་མའི་ཁོར་ཡུག་དག་གིས་རང་སེམས་འདི་བསླུ་བྲིད་བཏང་སྟེ། ནམ་ཡང་ཞེན་ཆགས་དང་འདོད་ཆགས། ཕྲག་དོག གཡོ་སྒྱུ། བཅོས་འཛུམ། ཚུལ་འཆོས། ང་རྒྱལ། གཏི་མུག་ལ་སོགས་པའི་མངའ་ཁོངས་ལས་གདའ་རུ་མ་བཅུག་པར། རང་སེམས་གྱོང་བོ་འདི་རྒོད་ལ་ཤོར་དྲགས་སུ་བཅུག་པས་འཁོར་བར་ངོས་འཛིན་གསལ་བོ་ཞིག་བྱེད་མ་ཤེས་པར་མི་ཚེ་ཕྱེད་ཀ་ཞིག་འཁོར་བའི་ཀློང་དུ་འཐིམས་སོང་།
    དུས་དེ་རིང་མི་རྟག་པའི་རང་གཟུགས་ཕྱི་ལ་མངོན་ནས་འཁོར་བར་ངོས་འཛིན་ཞིག་བྱས་ཚེ། ཅི་ཡང་མེད་པའི་ངའི་སེམས་ངོགས་ནས་སྨྱོ་ལབ་འདི་འདྲ་ཞིག་དབང་མེད་དུ་ཁ་ནས་ཤོར་སོང་བ་འདི་ལྟ་སྟེ། འཁོར་བ་ནི་སྐྱིད་སྣང་དང་། འཁོར་བ་ནི་འཇིག་རྟེན་གྱི་བྱ་གཞག འཁོར་བ་ནི་མི་རྣམས་ཀྱིས་བློས་བསླངས་བྱས་པའི་རྟོག་བཟོའི་ཡུལ་གྲུ་ཁྱད་པར་ཅན་ཞིག འཁོར་བ་ནི་སྐྱིད་སྡུག་འདྲེས་མའི་ལོ་ཟླའི་ཟོ་ཆུན་ཞིག འཁོར་བ་ནི་སུས་ཀྱང་ཡིད་སྨོན་འཆོར་བའི་ཡུལ་ལྗོངས་ཁྱད་པར་བ་ཞིག  འཁོར་བ་ནི་སྒྲིག་ལམ་ཞིག འཁོར་བ་ནི་མིག་ཆུ་ཞིག འཁོར་བ་ནི་རང་བྱུང་གི་མཛེས་པ་ཞིག འཁོར་བ་ནི་སུས་ཀྱང་དོ་སྣང་མི་བྱེད་པའི་འཇིག་རྟེན་ཡ་མཚན་ཞིག འཁོར་བ་ནི་རྫོགས་རྒྱུ་མེད་པའི་གཤིན་རྗེའི་ཞིང་ཁམས་ཤིག འཁོར་བ་ནི་བཤད་ནས་ཚར་རྒྱུ་མེད་པའི་གཏམ་རྒྱུད་རིང་མོ་ཞིག  འཁོར་བ་ནི་ལས་འབྲས་དྲང་སྙོམས་མིན་པའི་གཡོ་རྫུན་འདྲེས་མའི་རྣམ་ཐར་འཆད་སའི་ཁོར་ཡུག་ཅིག འཁོར་བ་ནི་གཡོ་སྒྱུས་འཁོར་ལོ་བསྐོར་མཁན་རྣམས་ཀྱི་ཕ་ཁྱིམ་གྲུ་བཞི། འཁོར་བ་ནི་བདེན་དྲང་གི་ལམ་ལ་ཕྱོགས་མཁན་གྱི་བདེན་སྐྱོང་བ་རྣམས་གསོད་མཁན་གྱི་ཁྲིམས་ར་ཞིག འཁོར་བ་ནི་དབུལ་ཕོངས་བ་རྣམས་ཀྱི་སྡུག་བསྔལ་མྱོང་སའི་གཞི་ཁྱིམ་སྟོང་བ་ཞིག  འཁོར་བ་ནི་ཚུལ་འཆོས་དང་རྫུ་བག་ལ་མཁས་པའི་གནས་ལུགས་མི་སྐྱོང་བའི་ཁྱི་རྒན་མང་པོའི་གནས་མལ་དྲོན་མོ། འཁོར་བ་ནི་རང་དོན་དང་ཁེ་ཕན་ཁོ་ན་བསམས་མཁན་གྱི་བསམ་ངན་ཁོག་ངན་སྐོར་ཞིག་གིས་རྐང་བྲོ་རྡུང་སའི་བྲོ་ར་ཁྲ་མོ། འཁོར་བ་ནི་དྲང་པོའི་ལོ་རྒྱུས་ལ་འཁྱོག་ཐིག་གི་རི་མོ་འབྲི་བའི་གཡོ་ཟོལ་གྱི་ཡུལ་ལྗོངས་ཤིག འཁོར་བ་ནི་ཅི་ཡང་བྱས་མི་ཆོག་པའི་སྒྲིག་ལམ་བཙན་པོ་ཞིག  འཁོར་བ་ནི་སྡུག་སྣང་ལས་སྐྱིད་སྣང་མང་བར་འདོད་པའི་རྟོག་གེ་བ་ཞིག  འཁོར་བ་ནི་རྣམ་དཔྱོད་ཅིག འཁོར་བ་ནི་དྲི་བ་ཞིག འཁོར་བ་ནི་སྡུག་བསྔལ་ཞིག འཁོར་བ་ནི་བཤད་མི་ཤེས་པའི་གསང་བ་་ཡ་མཚན་ཞིག   འཁོར་བ་ནི་བུད་མེད་ཅིག འཁོར་བ་ནི་ཟོལ་བཅོས་དང་གཡོ་ཟོལ་གྱིས་འཐབ་འཁྲུག་རྒྱག་སའི་གཡུལ་ས་ཞིག  འཁོར་བ་ནི་རྫུན་གཏམ་བཤད་ས་དང་ལབ་བརྡོལ་འབྱིན་སའི་བཟོ་གྲྭ་ཆེན་པོ་ཞིག འཁོར་བ་ནི་རང་དབང་དང་འདྲ་མཉམ་མེད་པའི་ནམ་མཁའ་སྟོང་བ་ཞིག  འཁོར་བ་ནི་ནམ་ཡང་རྫོགས་རྒྱུ་མེད་པའི་གད་སྙིགས་ཀྱི་ཕུང་བོ་ཆེན་པོ་ཞིག འཁོར་བ་ནི་དྲང་བོའི་མི་ནི་འཁྱོག་པོའི་ལམ་དུ་ཁྲིད་མཁན་གྱི་སྣེ་ཤན་པ་ཞིག འཁོར་བ་ནི་མྱོས་བྱེད་ཆང་དང་ཐ་མ་ཁའི་རང་གཟུགས་ངོ་མ། འཁོར་བ་ནི་འཚེ་མེད་ཞི་བདེ་གླེང་སའི་སྟེགས་བུ་ཆེན་པོ་ཞིག འཁོར་བ་ནི་ཉོན་མོངས་དུག་གསུམ་འཕྱུར་སའི་ཆུ་བོའི་མགོ་ཁུངས་ཤིག འཁོར་བ་ནི་ཞེ་སྡང་གཏི་མུག ཕྲག་དོག་གིས་དུག་རླངས་གཏོང་མཁན་གྱི་དུག་རྫས་ཤིག   འཁོར་བ་ནི་མ་ཤི་བར་དུ་བཤད་མི་ཚར་བའི་ངའི་སྨྱོ་ལབ་ཅིག་གོ།
 

རྩོམ་ཁུངས། ངེད་དྲ་བ།