ཧ་པའི་རང་གཏམ།
ལས་དབང་བཙན་པོ་ཞིག་གི་བཀོད་སྒྲིག་གིས་ལྕགས་ཐག་གི་སིལ་སྒྲ་ཙམ་ནི་ངའི་རྒྱན་ཆ་ཡིན་སོང་། བསྐྱར་ཟློས་ཀྱི་བགྲང་བྱ་མང་པོ་ཞིག་གི་འཕོ་འགྱུར་ཁྲོད་དུ་ངས་རྒྱུས་མེད་ཀྱི་འདུ་ལོང་ལ་འཐབ་ཞོར་ཁེར་རྐྱང་གི་སྨྲེང་གླུ་གྱེར།
འགྲོ་བ་མི་ལ་ལས། ང་ནི་དོན་དག་ཆེ་མ་ཆུང་གསུམ་གང་ལ་ཐུག་ཀྱང་། བདེན་ལུགས་ཡོད་མེད་ཀྱི་དབྱེ་བ་མི་འབྱེད་པར། དབང་ཆེན་ལ་གཉའ་སྒུར་སྒུར་དང་དབང་མེད་ལ་རྫིག་ཉམས་སྟོན་པའི་འཚོ་བ་དངོས་ཀྱི་སེམས་ཅན་གང་རུང་གི་མིང་གི་ཐ་སྙད་ལ་སྦྱར་ནས་ཧ་པ་ཞེས་རང་གཤིས་དམར་རྗེན་དུ་ཕྱུང་བའི་མིང་གང་འོས་ཤིག་འདོག་བཞིན་ཡོད། འོན་ཀྱང་། མི་དེ་ཚོས་ངའི་བདག་པོའི་ཆེད་དུ་སྟོབས་ཤུགས་ཡོད་དགུ་འདོན་པ་དང། དབྱར་ཚ་བའི་སྡུག་བསྔལ་དང་དགུན་གྲང་རླུང་ཙག་ཡུག་གིས་གཙེས་པའི་ངར་ཁ་ནས་ངས་ན་ཟུག་ཐེབས་པའི་ཁོག་འདར་རྒྱག་ཞོར་རྟ་ནོར་ལུག་གསུམ་ལ་སྲུང་སྐྱོབ་བྱེད་བཞིན་པ་སུ་ཞིག་གིས་ཚོར། ད་དུང་། རྨི་ལམ་ལ་གཡེང་བའི་བདག་པོས་ང་ལ་དམོད་ཚིག་བརྒྱབ་ཀྱང་། ངའི་བློ་སྤོབས་ཀྱི་ངར་ཁ་ནམ་ཡང་འགྱུར་མ་མྱོང་ལ་ནོར་ལུག་གི་འཁུན་སྒྲས་ང་ལ་སྤྲོ་སྣང་སྦྱིན། ཞོགས་པའི་སྐྱ་རེངས་དང་མཉམ་དུ་ངའི་མིག་འོད་བདག་པོ་ལ་གྱེར་ཞིང་སྒུག ཡིན་ན་ཡང་། བདག་པོས་སྡུག་རྩུབ་ཆེ་བའི་རྡོག་བརྫི་ཞིག་དང་དམོད་ཚིག་ཅིག་གིས་ང་རང་འཇིགས་སྐྲག་དང་བཅས་མི་འབྲོ་ཐབས་མེད་བྱུང་།
དགུན་གསུམ་གྲང་རླུང་རིང་མོའི་ཁྲོད་དུ་དམྱལ་ཁམས་ལྟ་བུའི་གྲང་འཁྱགས་ཀྱི་མནར་གཅོད་མྱངས་ཀྱང་ངས་དཔའ་ཞུམ་པའི་ངུ་འབོད་བསྒྲགས་མ་མྱོང་། དབྱར་གསུམ་ཚ་གདུང་དྲག་པོའི་ཁྲོད་ནས་ཡི་དྭགས་ལྟ་བུའི་བཀོལ་སྤྱོད་ཀྱི་སྡུག་བསྔལ་མྱངས་ཀྱང་ངས་སྟོབས་ཤུགས་ཞན་པའི་རང་མདངས་ཆགས་མ་མྱོང་། ངའི་ཟུག་སྐད་གསལ་བོ་དེ་ནམ་ཡང་རྩྭ་ཐང་འདིའི་རི་ལུང་ཐང་གསུམ་ཀུན་ཏུ་བསྐྱིལ་ཡོད་ལ། ངའི་ཉམས་མེད་སྟོབས་ཤུགས་དེ་ནམ་ཡང་རྩམ་དྲི་མར་དྲི་འཐུལ་བའི་མགོ་ནག་བོད་པ་ལ་བཅོལ་ཡོད། ངས་ཚེ་གཅིག་གི་སྐྱོ་གར་གནས་འདི་ནས་མྱངས་ཤིང་། དུས་བཞིའི་འགྱུར་བ་རྩུབ་མོ་ཐོལ་གྱིས་བརྒལ་བ་སུ་ཞིག་གི་ཆེད་དུ་ཡིན།
ཀྱེ་ཧུད། རང་གི་བདག་པོས་རང་ལ་མནར་ཞིང་དམོད་པའི་མཐའ་མར། ང་རང་ལོ་ན་རྒས་ཤིང་ལུས་ཟུངས་ཉམས། ངའི་གཟུགས་པོ་ཡར་དགྱེ་མི་ཐུབ་ལ་ཟུག་སྐད་ཀྱང་འབྱིན་མི་ནུས་པས་སྐྱ་ཐང་ཐང་གི་ཡུལ་གྲུ་འདི་ནས་ང་ཁོ་ན་ལུས། ཨ། བདག་པོ་ལགས། ཚེ་གཅིག་གི་བགྲོད་ལམ་རིང་མོའི་ཁྲོད་ནས་ངའི་དམྱལ་ཁམས་ཀྱི་སྐྱོ་སྡུག་མྱང་ཚར་ཡོད་དམ། འོན་ཀྱང་། འུ་ཚང་གི་རྒྱབ་ཕྱོགས་ན་ནོར་ལུག་ལ་རྔམ་པའི་སྤྱང་ཀི་གཏུམ་དྲག་ཅན་དེ་ཚོས་ལུག་ཁྱུ་ནང་འཛུལ་བའི་གོ་སྐབས་ལ་སྒུག་ཡོད་པས། ང་རང་བློ་མ་བདེ། ནམ་ཡང་། ……
རྩོམ་ཁུངས། ངེད་དྲ་བ།