རྩོམ་པ་པོ་གྲགས་ཅན་ཞིག་ལ་སློབ་སྟོན་ཞུ་རུ་བསྐྱོད་པའི་དྲན་འཆར།

ཀླུ་སྨྱོན་ཧེ་རུ་ཀ མཆོད་མེ་བོད་ཀྱི་རྩོམ་རིག་དྲ་བ། 2017-12-23

image001.jpg

ཟླ་ཚེས་གསལ་བོ་ཞིག་མི་དྲན་ཡང་དུས་ཚིགས་དེ་ནི་མཚོ་སྔོན་པོའི་ལྷོ་ཕྱོགས་ཀྱི་ཧ་ཅང་གྲང་བའི་དགུན་ཁ་ཞིག་ཡིན་ཞིང་། རི་ཀླུང་ཐང་གསུམ་གྱི་དབྱེ་བ་མེད་པར་གཡུགས་པའི་གྲང་རླུང་དེ་ཡིས་སྨན་བུ་མོའི་མྱོས་བུམ་དང་སྟག་ཤ་རའི་དཔུང་ཤ་ཡང་འཁུམ་དུ་བཅུག་ཡོད་པར་ཐེ་ཚོམ་མེད། དེ་དུས་ཀྱི་ང་རང་ལ་མཚོན་ན་ཉིན་རེའི་བྱ་བའི་ཁྲོད་དུ་གོ་གནས་གལ་ཆེན་ཞིག་བཟུང་ཡོད་པ་ནི་རྩོམ་ཡིག་འབྲི་རྒྱུ་དེ་ཡིན་ཞིང་། རྩོམ་ཡིག་གི་ཁྲོད་ནས་ཀྱང་བརྩམས་སྒྲུང་འབྲི་རྒྱུ་དང་བརྩམས་སྒྲུང་གི་རྩོམ་པ་པོ་ཚོར་གྲོགས་འབྲེལ་བསྒྲིག་རྒྱུ་དང་ཁོང་ཚོའི་ས་ནས་བསླབ་བྱ་དང་བཀའ་སློབ་ཞུ་རྒྱུ་དེ་དོན་དག་གཞན་གང་ཞིག་ལས་ཀྱང་གལ་ཆེན་དུ་གྱུར་ཡོད། དེ་དུས་ཀྱི་བོད་ཀྱི་རྩོམ་པ་པོའི་ཁྲོད་དུ་སྒྲུང་རྩོམ་པ་གྲགས་ཅན་ཚེ་རིང་དོན་གྲུབ་དང་སྟག་འབུམ་རྒྱལ་གཉིས་ནི་ངའི་སེམས་གཏིང་གི་ཉི་མ་དང་ཟླ་བ་ལྟ་བུར་གྱུར་པ་དང་། ཁོ་གཉིས་ལ་ཅིག་ཐུག་འདོད་པའི་ཚོར་བ་དྲག་པོ་ཞིག་གིས་ངའི་མགོ་ལུས་ཡོངས་སུ་ཁྱབ་བསྡད་ཡོད། ཡིན་ན་ཡང་ཚེ་རིང་དོན་གྲུབ་རྩེ་ཁོག་རྫོང་དུ་ཡོད་པས་དེ་དུས་ཀྱི་ལུང་ཁུག་གི་མི་ང་ལྟ་བུར་མཚོན་ན་ཧ་ཅང་ཐག་རིང་ཞིག་ཏུ་སྣང་། ཡིན་ན་ཡང་སྟག་འབུམ་རྒྱལ་དང་ངེད་གཉིས་རྫོང་གཅིག་གི་མི་ཡིན་པས་མི་ཚད་ངའི་ཁྱིམ་གཞིས་དེ་ཡང་ལོ་ངོ་དྲུག་ཅུའམ་བདུན་ཅུའི་ཡར་སྔོན་དུ་ཁོ་ཚོའི་སྡེ་བ་དེ་ནས་ས་འདིར་གནས་སྤར་བ་ཞིག་རེད་འདུག་པས། ཕྱོགས་གང་ཐད་ནས་སྟག་འབུམ་རྒྱལ་ལ་ཐུག་འཕྲད་བྱེད་དུ་འགྲོ་རྒྱུ་དེ་ལ་ཆ་རྐྱེན་ངེས་ཅན་ཞིག་ལྡན། དེའི་ཕྱིར་ངས་རང་གི་ལས་གནས་ནས་ཉིན་གཉིས་གསུམ་ཞིག་གི་དགོངས་པ་ཞུས་རྗེས་རྒྱ་མི་ལྕི་བ་སྐམ་པོ་སྒྲུག་མཁན་ཞིག་ལ་རྒྱ་སྒོར་ལྔ་སྤྲད་དེ་ཁོའི་ལག་སྐྱོར་འཕྲུལ་འཁོར་དུ་བསྡད་ནས་རྫོང་མཁར་གྱི་ཕྱོགས་སུ་བསྐྱོད། ལམ་ཞོར་དུ་ཨང་གཉིས་པ་དང་གསུམ་པ་ཟེར་བའི་རྒྱ་གྲོང་ཞིག་བརྒྱུད་ནས་འགྲོ་དགོས་ཤིང་། རིག་གསར་སྐབས་རྒྱ་མི་སྟོང་ཕྲག་མང་པོ་ཞིག་ངལ་རྩོལ་སྒྱུར་བཀོད་ཀྱི་ཆེད་དུ་ས་འདིར་འོངས་ནས་གཞིས་ཆགས་ཏེ་ས་རྐོ་རྡོ་སློག་བྱེད་བཞིན་གང་འཚམ་ཞིག་བསྡད་པ་རེད་ལ། དེ་དུས་ཀྱི་རྒྱ་མི་ན་གཞོན་སྐོར་ཞིག་གིས་བོད་རིགས་ལུག་རྫི་རྒན་པོ་ཞིག་ལ་ཁོའི་ལུག་གིས་རྒྱ་མིའི་ཞིང་ཁའི་ལོ་ཏོག་ཟོས་པར་བསྙད་བཏགས་ཏེ་རྐུབ་ལ་དབུགས་མདའ་བརྒྱབ་ནས་མངགས་པའི་བཤད་རྒྱུན་ཞིག་ཀྱང་ཡོད་ལ། ང་རང་ཆུང་དུས་སློབ་གྲྭ་ན་ཡོད་སྐབས་ཁྱིམ་མཚེས་དག་གི་ཁྱི་དང་ཞི་མི་རྐུན་མ་བརྒྱབ་ནས་ས་འདིའི་རྒྱ་མིར་བཙོངས་ཏེ་ཆང་དང་ཐ་མག་ཉོས་པ་ཡང་ཉུང་ཉུང་མིན། ཡིན་ན་ཡང་དེ་དུས་ཀྱི་བྱིས་པ་སྣབས་ལུག་དེ་ད་ལྟ་ཕོ་བཟོ་དོད་པའི་གསར་རྒོད་ཅིག་ཏུ་གྱུར་ནས་རྩྭ་ཐང་གི་བུ་མོ་ཚོའི་སྙིང་གི་ནོར་བུ་ཞིག་ཏུ་འགྱུར་བཞིན་པ་མ་ཡིན་ནམ།

རྫོང་མཁར་དུ་བསླེབས་ནས་དགོང་མོ་དེར་རིན་གོང་དམའ་བའི་འགྲུལ་ཁང་ཞིག་ཏུ་འཛུལ་བ་ན། ངའི་ངོ་ཤེས་ཤིག་དང་ཁོའི་ཕ་རྒན་གཉིས་ཀྱང་ཆབ་ཆ་ལ་འགྲོ་ཕྱིར་དེར་ཡོང་ནས་བསྡད་འདུག དགོང་མོའི་ཁ་ཟས་ཟོས་རྗེས་ཁོང་གཉིས་གློག་བརྙན་ལ་བལྟ་རུ་འགྲོ་གི་ཡིན་ཟེར་ནས་ཕྱི་རོལ་ཏུ་བུད་སོང་ལ། ངས་ལྕགས་ཐབ་ཏུ་རྡོ་སོལ་གང་འཚམ་ཞིག་བརྫངས་རྗེས་སྒོ་གཏན་ཏེ་ཉལ་ནས་བསྡད། དུས་ཡུན་ཅི་ཙམ་ཞིག་འགོར་བ་མི་ཤེས་པར་མི་མང་པོ་ཞིག་གི་སྐད་སྒྲས་ང་རང་གཉིད་གོང་ནས་དཀྲོགས་སོང་ལ། མགོ་བོ་དགྱེ་ནས་ཅིག་བལྟ་བསམས་དུས་ཐོག་མར་མིག་འབྱེད་འཛུམ་ཡང་བྱེད་ཧ་ཅང་དཀའ་ཡང་བཙན་གྱིས་མིག་གདངས་ནས་ཅིག་ལྟ་དུས། ཁང་པའི་ནང་ཧྲིལ་བོར་རྡོ་སོལ་གྱི་དུ་བས་ཁེངས་པའི་ཀློང་ན་གློག་འོད་རབ་རིབ་ཅིག་འཕྲོ་བ་དང་། སྒེའུ་ཁུང་ཕྱི་རོལ་ཏུ་མི་མང་པོ་ཞིག་གིས་སྐད་ཅོར་རྒྱག་བཞིན་སྒོ་རྡུང་གིན་འདུག ང་ཡར་ལངས་གྲབས་བྱས་པ་ན། ཨ་ཁ། ངའི་མགོ་ནང་ཧྲིལ་བོར་སྨུག་པ་ཞིག་འཐིབས་ནས་ཡར་ལངས་གྲབ་བྱེད་དུས་མར་རིལ་ཡོང་གི་འདུག ཡིན་ན་ཡང་ངས་ཨུ་ཚུགས་ཆེན་པོས་ལུས་པོ་གོག་མ་ནུར་གྱིས་སོང་སྟེ་སྒོ་ཕྱེ་བ་ན། འགྲུལ་ཁང་བདག་པོ་རྒྱ་མི་ལོ་གཞོན་ཁྱོ་ཤུག་གཉིས་ཀྱིས་གཙོས་པའི་རྒྱ་བོད་སྐོར་ཞིག་གིས་ང་ལ་ཁྱོད་རང་འཆི་ན་འདོད་དམ་ཞེས་གཤེ་གཤེ་སྣ་ཚོགས་གཏོང་ཞོར་དུ་ཁང་པའི་སྒོ་དང་སྒེའུ་ཁུང་ཆེ་ཆེར་ཕྱེས་ནས་ནང་དུ་འཐིབས་པའི་རྡོ་སོལ་གྱི་དུ་བ་ཕྱིར་འགྲོ་ཐབས་བྱེད་བཞིན་འདུག་ན་ཡང་། ངའི་ལུས་ཧྲིལ་བོར་བཟི་སྨན་བརྒྱབ་པ་ལྟར་ཡམ་མེ་ཡོམ་མེར་གྱུར་ནས་སྟོབས་ཟད་ཤུགས་རྫོགས་སུ་གྱུར་འདུག

དེ་ལྟར་འཇིགས་སུ་རུང་བའི་མཚན་མོ་ཞིག་བསྐྱལ་རྗེས་ཀྱི་ཉིན་གཉིས་པ་དེར། ང་རང་རྫོང་མཁར་ནས་ཁྲི་ཀར་འགྲོ་བའི་སྤྱི་སྤྱོད་རླངས་འཁོར་ཞིག་ཏུ་བསྡད་ནས་མགོ་མང་གྲོང་བརྡལ་དུ་བསྐྱོད། ཉིན་དེར་རླུང་དམར་དྲག་པོ་ཞིག་གིས་ས་མང་གཞོང་སྟོད་སྨད་བར་གསུམ་ཡོངས་སུ་བཏུམས་པས། སྤྱི་སྤྱོད་རླངས་འཁོར་ཡང་སྐབས་རེར་མདུན་སྐྱོད་བྱེད་མ་ཐུབ་པར་སྐར་མ་འགའ་རེར་གློག་གཞུ་སྤར་ཏེ་སྡོད་དགོས་ཀྱི་འདུག གང་ལྟར་ཆུ་ཚོད་གསུམ་དང་ཕྱེད་ཀ་ཙམ་དུ་བསྐྱོད་མཐར་མགོ་མང་གྲོང་བརྡལ་དུ་བསླེབས་སོང་། མགོ་མང་གྲོང་བརྡལ་ནི་རླངས་འཁོར་སྣ་ཚོགས་མང་རྫོང་ནས་ཁྲི་ཀ་དང་། ཁྲི་ཀ་ནས་རྩེ་ཁོག་དང་འབའ་རྫོང་དུ་བསྐྱོད་ལམ་གྱི་བཞི་མདོ་ཞིག་ཏུ་གྱུར་ཡོད་པས། གྲོང་བརྡལ་འདིར་ནམ་རྒྱུན་རྒྱ་མི་འབྲས་འཚོང་མཁན་དང་ཁ་ཆེ་པགས་ཉོ་མཁན། རོང་བ་ནས་འཚོང་དང་འབྲོག་པ་ལུག་འཚོང་། རྒྱལ་ཁམས་འགྲིམ་པའི་སྨད་འཚོང་མ། དགོན་པ་ཁག་གི་གཉེར་བ་ཞལ་འདེབས་སློང་མཁན། ཁྲི་ཀའི་ཆུ་ཁོལ་དུ་འགྲོ་བའི་ནད་པ། ཐག་རིང་ནས་ཡོང་བའི་རྐུན་ཇག ཐག་ཉེ་ནས་འདུས་པའི་ཁྲམ་པ་སོགས་མི་རིགས་སྣ་མང་འདུས་ནས་དོན་རྐྱེན་འདྲ་མིན་འབྱུང་སའི་མཐོ་སྒང་གི་ཧོང་ཁོང་ཆུང་ཆུང་ཞིག་ཡིན་པས། ངས་རྩད་ཞིབ་ཧ་ཅང་ཞིབ་ཚགས་པོའི་སྒོ་ནས་རང་གི་སྒོར་རྡོག་དེ་ཚོར་ཉེན་ཁ་དང་རིན་གོང་གཉིས་ཀ་ཆུང་བའི་སྒེར་གཉེར་མགྲོན་ཁང་ཞིག་རང་གི་ཞག་གཅིག་གི་གནས་མལ་དུ་བདམས་རྗེས། ཐད་ཀར་མི་ཞིག་གི་ལམ་སྟོན་བཞིན་གྲོང་བརྡལ་དེའི་སློབ་ཆུང་གི་ཕྱོགས་སུ་སོང་བ་དང་། ཅུང་མ་འགོར་བར་ངའི་སེམས་གཏིང་ནས་ཡི་རང་ཞུ་སའི་རྩོམ་པ་པོ་སྟག་འབུམ་རྒྱལ་གྱི་སྡོད་ཁང་ཡང་རྙེད་བྱུང་། ངས་རང་གི་ལང་ལོང་དུ་འཕྱུར་བའི་སེམས་ཁམས་ཅུང་ཟད་ལྷོད་དུ་བཏང་རྗེས་ཐག་ཐག་ཐག་ཅེས་ཁང་པའི་སྒོ་ལན་འགའ་བརྡུངས་པ་ན། ནང་ནས་སུ་ཡིན་ཞེས་པའི་མོ་སྐད་ཅིག་གྲགས་པ་དང་མཉམ་དུ་སྒོ་ཕྱེས་བྱུང་ལ། ངའི་མིག་མདུན་དུ་མངོན་པ་ནི་གཟུགས་པོར་ལྡེམ་ལྡེམ་འཁྱུག་འཁྱུག་གི་སྒེག་ཆོས་ལྡན་ཞིང་ངོ་གདོང་ལ་དཀར་དཀར་དམར་དམར་གྱི་སྐག་ཚོས་བྱུགས་པའི་བུད་མེད་གཞོན་ནུ་མ་ཞིག་རེད་ལ། མོས་ངའི་བཟོ་ལྟ་དང་ངོ་གདོང་ལ་ལྟ་ཙམ་དང་ངོ་གདོང་སྙེར་ཙམ་གྱིས། ཁྱོད་ཀྱིས་སུ་འཚོལ་གྱིན་ཡོད། ཅེས་སྐད་ཆ་ཞིག་དྲིས་པ་དང་། ངས་རང་གི་སེམས་པ་དང་ངོ་གདོང་གཉིས་ཀ་རང་བབས་སུ་ཡོང་བའི་རེ་བ་དང་བཅས། ངས་སྟག་འབུམ་རྒྱལ་འཚོལ་བཞིན་ཡོད། འདི་ཁོང་ཚང་ཨེ་རེད། ཅེས་དྲིས་པ་ན། ལྕམ་སྐུ་ཞབས་དེས་གདོང་ལ་ཨུ་ཚུགས་ཀྱི་འཛུམ་མདངས་ཤིག་བཟུང་ནས། རེད་རེད། ཡིན་ན་ཡང་ཁོ་ད་ལྟ་ཁྱིམ་ན་མེད། ཟེར་ཞོར་ཕྱིར་ཁྱིམ་དུ་འགྲོ་གྲབས་བྱེད། ངས། ཁོ་གང་དུ་བུད་སོང་། ང་མང་རྫོང་ནས་ཁོ་ལ་དོན་དག་ཅིག་གི་ཆེད་དུ་ཐུག་འཕྲད་བྱེད་པར་ཡོང་བ་ཡིན། སྐད་ཆ་དེ་གོ་མ་ཐག་ལྕམ་མོ་འདིའི་གདོང་གི་རྣམ་འགྱུར་ལྡབས་འགྱུར་གྱིས་ལྐོག་གྱུར་ཅིག་ཏུ་སྣང་བ་དང་འབྲེལ་ཁ་ནས། ཨོ། སྟག་འབུམ་རྒྱལ་འབྲུ་རིགས་ཁང་དུ་གྲོ་ཕྱེ་ཞིག་ལེན་དུ་བུད་སོང་། ཁྱེད་ལ་འདིར་སྒུག་པའི་དུས་ཚོད་མེད་ན་འབྲུ་རིགས་ཁང་དུ་ཐད་ཀར་སོངས་དང་ཁོ་ལ་ཐུག་གི་རེད། རེད། འབྲུ་རིགས་ཁང་དེ་མི་དམངས་ཁྲོམ་རའི་སྒོ་ཆེན་གྱི་གཡས་ཕྱོགས་སུ་ཡོད་པའི་སྨན་ཁང་དེའི་རྒྱབ་ལོགས་སུ་ཡོད། ་་་ ་་་ དེ་ནས་ང་རང་ལྕམ་སྐུ་ཞབས་དེ་དང་ཁ་གྱེས་ནས་མིང་དུ་གྲགས་པའི་རྩོམ་པ་པོ་དེའི་ཁང་པའི་ནང་གི་གཡེར་བག་ཅན་གྱི་ལྕམ་སྐུ་ཞབས་དེའི་ལུས་ཀྱི་སྒེག་ཆོས་དང་གདོང་གི་མང་དྲགས་པའི་སྐག་ཚོས་དང་གྲང་དྲགས་པའི་རྣམ་འགྱུར་སོགས་ལ་བསམ་བློ་འདྲ་མིན་ཞིག་གཏོང་བཞིན་འབྲུ་རིགས་ཁང་གི་ཕྱོགས་སུ་བསྐྱོད་པ་ཡིན།

འབྲུ་རིགས་ཁང་དུ་བསླེབས་པ་ན། དེ་རུ་རླུང་དམར་འུར་འུར་དུ་ལྡང་བའི་ཁྲོད་དུ་འབྲོག་པ་ཕོ་མོ་རྒན་གཞོན་མང་པོ་ཞིག་གིས་ལོ་གསར་གྱི་ཆེད་དུ་གྲོ་ཕྱེ་ལེན་བཞིན་ཡོད་པ་དང་། མི་མང་ཆེ་བའི་ངོ་གདོང་ལ་གྲོ་ཕྱེ་འགོས་ནས་མི་ཞིག་ལས་སླ་བོའི་སྒོ་ནས་རྩད་གཅོད་ཐུབ་རྒྱུར་དཀའ་ངལ་འདུག ངས་དེར་ཆུ་ཚོད་ཕྱེད་ཀ་ཙམ་ཞིག་ལ་བསྒུགས་པ་ན་ལུས་པོ་ཡོངས་ལ་གྲོ་ཕྱེ་འགོས་པའི་གསར་བུ་ཞིག་གིས་ཚུར་ང་ལ་ལྟ་ཙམ་བྱེད་བཞིན་འདུག་ལ། ངས་སྔོན་ཆད་དུས་དེབ་ཁག་ཅིག་ལས་མཐོང་མྱོང་བའི་འདྲ་པར་དག་གིས་བདེན་དཔང་བྱས་པ་ལྟར་ན་མི་དེ་ནི་རྩོམ་པ་པོ་སྟག་འབུམ་རྒྱལ་ལགས་རེད་འདུག དེར་ང་རང་ཕར་ཁོའི་གམ་དུ་སོང་ནས་ཁྱེད་རང་སྟག་འབུམ་རྒྱལ་ཡིན་ནམ། ཞེས་དྲིས་པ་ན། ཁོང་གིས། ཨ། ཨོ། ང་སྟག་འབུམ་རྒྱལ་ཡིན། ཁྱོད་གང་ནས་ཡོང་བ་ཡིན། ང་མང་རྫོང་ནས་ཡོང་བ་ཡིན། ཁྱེད་ཀྱི་ཁང་བའི་ནང་དུ་སོང་བ་ན་ཁྱེད་མི་འདུག ཨོ། དེས་ན་ཁྱོད་ཀྱིས་ཇ་ཞིག་བཏུངས་པ་ཡིན་ནམ། མ་འཐུངས། ཅིའི་ཕྱིར། དམྱལ་བ་མ་དེས་ཇ་ཞིག་འཐུང་ཡང་མི་ཟེར་རམ། མོས་དེ་འདྲ་མི་ཟེར་ཡང་། སྐབས་དེར་ང་ཡང་ཁྱེད་རང་འཚོལ་རྒྱུར་བྲེལ་བ་ཆེ་བས་མོ་ལ་དེ་ལྟར་འདྲི་བའི་དུས་ཚོད་མ་བྱུང་བ་ཡིན་རྒྱུ་རེད། ཁྱོད་ཀྱིས་ང་རང་འཚོལ་དགོས་དོན་ཅི་ཡིན། དེ་ལ་རྒྱུ་མཚན་མང་ཡང་གལ་ཆེན་ཞིག་ནི། ང་རང་ཁྱེད་ཀྱི་སྒྲུང་རྩོམ་དག་གི་ཀློག་པ་པོ་ཞིག་ཡིན་ཞིང་། ནམ་རྒྱུན་སྦྲང་ཆར་ལ་སོགས་པའི་དུས་དེབ་གསར་བ་ཞིག་ལག་ཏུ་འབྱོར་མ་ཐག་དང་པོར་ཁྱེད་ཀྱི་སྒྲུང་གཏམ་ཞིག་དེ་རུ་ཨེ་ཡོད་ལྟ་གིན་ཡོད་ལ། ད་ལྟ་ངས་ཀྱང་ཚོད་ལྟའི་ཆེད་དུ་སྒྲུང་གཏམ་རེ་གཉིས་འབྲི་གིན་ཡོད་མོད། རང་ཉིད་ལ་རྩོམ་རིག་གི་ཆེད་སྦྱོང་ཅི་ཡང་མེད་པས་ངོ་མ་དཀའ་མོ་ཞིག་རེད། དེ་རིང་ང་ས་འདི་རུ་ཁྱེད་རང་འཚོལ་བར་ཡོང་དོན་ནི་འདིའི་སྐོར་ལ་སྐད་ཆ་ཞིག་འདྲི་རྒྱུའི་ཆེད་དུ་ཡིན། ཨོ་ཨོ། ཁྱེད་ཀྱིས་དེ་རིང་རླུང་དམར་འདི་འདྲའི་ནང་ལ་ས་ཐག་རིང་ནས་ཡོང་སྟེ་དཀའ་ངལ་མྱངས་འདུག ཡ་ཡ། ཐོག་མར་འུ་གཉིས་ངེད་ཚང་ལ་འགྲོ ཁོང་གིས་གྲོ་ཕྱེ་རས་ཁུག་གང་ཕྲག་ཏུ་བཀྱགས་ནས་ངེད་གཉིས་ཁོ་ཚང་ལ་སོང་། ད་གིན་གྱི་ལྕམ་ཆུང་མ་དེས་རང་གི་ཁྱོ་བོའི་མདུན་དུ་ང་ལ་རྣམ་འགྱུར་སྡུག་པོ་ཅི་ཡང་བསྟན་མ་བྱུང་ལ་མོ་རང་གི་ལག་གཉིས་འགུལ་ནས་ངེད་གསུམ་ལ་ཐུག་པ་ཚ་བོ་ཞིག་ཀྱང་བསྐོལ་སོང་བས། ངས་ལོ་ངོ་ཉི་ཤུའི་རྗེས་ཀྱི་ད་ལྟ་ཡང་མོ་ལ་ཐུགས་རྗེ་ཆེ་ཞུ་འོས། གང་ལྟར་དགོང་མོ་དེར་སྟག་འབུམ་རྒྱལ་བཟའ་ཟླ་གཉིས་ཉལ་མ་རན་བར་དུ་ངས་ཁོང་གི་རྩ་ནས་སྒྲུང་རྩོམ་འབྲི་བའི་སྐོར་གྱི་སློབ་ཁྲིད་དམ་མན་ངག་མི་ཉུང་བ་ཞིག་ཞུས་པ་ཡིན་ལ། རང་གིས་བྲིས་པའི་”སྦྲ་ནག་ལས་གྱེས་པའི་རྐང་རྗེས་”ཞེས་པའི་སྒྲུང་ཐུང་དེ་ཡང་ཁོང་ལ་སྤྱན་བསྟར་ཞུས་པ་ཡིན། ཁོང་གིས་ངའི་སྒྲུང་ཐུང་དེར་གདེང་འཇོག་ཡག་པོ་ཞིག་གནང་སོང་ལ་རྗེས་སུ་ང་རང་རྒྱ་གར་དུ་འབྱོར་ནས་ཅུང་མ་འགོར་”གངས་རྒྱན་མེ་ཏོག་”ཅེས་པའི་དེབ་དེབ་ཅིག་གི་སྟེང་དུ་བཀོད་འདུག དགོང་མོ་དེར་སྟག་འབུམ་རྒྱལ་ལགས་ཀྱིས་ང་ལ་བཞག་པའི་བག་ཆགས་ལས། ཁོང་ནི་སྒྲུང་རྩོམ་འབྲི་རྒྱུར་མངའ་བརྙེས་པ་ཞིག་དང་། ངག་སྒོ་དེ་ཙམ་བདེ་བོ་མེད་པ། མི་བབ་ཆགས་དང་གཤིས་རྒྱུད་དྲང་མོ་ཞིག་རེད་ལ། བཤད་བཤད་པའི་མཐའ་མར་ཁོང་གི་ལྕམ་མོ་སྒེག་མོ་དེ་ཡང་ངའི་གཉེན་འབྲེལ་ཞིག་རེད་འདུག ང་རང་འགྲོ་ཁར་ཁོང་གིས་ང་ལ་ཁོང་གི་སྒྲུང་འབྲིང་”མི་རྐྱང་གཅོད་པའི་གཏམ་རྒྱུད་ཁྲོད་ཀྱི་སྒྲོལ་མ”ཞེས་པ་ཞིག་བསྟན་བྱུང་ལ། རྗེས་སུ་དེ་མཚོ་སྔོན་མང་ཚོགས་སྒྱུ་རྩལ་ཞིག་གི་སྟེང་ནས་མཐོང་སོང་། དགོང་མོར་ཕྱིར་མགྲོན་ཁང་དུ་ལོག་ནས་མར་ཉལ་རྩིས་བྱེད་དུས་མགོ་ནང་དུ་ཟུག་གཟེར་དྲག་པོ་ཞིག་ལངས་ཏེ་བཟོད་ཐབས་མེད་པའི་གནས་སུ་གྱར་བས། མགྲོན་ཁང་གཅིག་ཏུ་ཁེལ་བའི་བླ་རྒན་གྲྭ་ཞྭ་སེར་པོ་བཙོང་མཁན་ཞིག་གིས་མགོ་སྨན་དཀར་ལེབ་གཉིས་བྱིན་པ་ཟོས་ནས་ཅུང་མ་འགོར་བར་ན་ཟུག་དེ་མེ་ནང་དུ་ཆུ་བླུགས་པ་བཞིན་འཇགས་སོང་། ་་་ ་་་

ད་ལྟ་སྟག་འབུམ་རྒྱལ་དང་ངའི་གཉེན་ཚན་ལྕམ་མོ་དེ་གཉིས་མཉམ་དུ་བསྡད་མེད་པ་དང་། ཁོང་ཡང་ལས་གནས་བརྗེས་ནས་མང་རྫོང་མི་རིགས་སློབ་འབྲིང་གི་དགེ་རྒན་ཡིན་རབས་འདུག ཡིན་ན་ཡང་ངའི་གཉེན་ཚན་ལྕམ་སྐུ་ཞབས་དེ་ད་ལྟ་ས་གནས་གང་ཞིག་ཏུ་ཡོད་མེད་ང་ལ་ཆ་རྒྱུས་ཅི་ཡང་མེད། ་་་ ་་་


རྩོམ་སྒྲིག་པ། གངས་དགའ།

(མཆོད་མེའི་པར་དབང་གཞན་གྱིས་དགོལ་མི་རུང)

 


རྩོམ་ཁུངས། ངེད་དྲ་བ།

གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རྩོམ་པ་པོ་གྲགས་ཅན་ཞིག་ལ་སློབ་སྟོན་ཞུ་རུ་བསྐྱོད་པའི་དྲན་འཆར།

2017-12-23 ཀླུ་སྨྱོན་ཧེ་རུ་ཀ ཀློག་གྲངས། མཆན ཡོད།

image001.jpg

ཟླ་ཚེས་གསལ་བོ་ཞིག་མི་དྲན་ཡང་དུས་ཚིགས་དེ་ནི་མཚོ་སྔོན་པོའི་ལྷོ་ཕྱོགས་ཀྱི་ཧ་ཅང་གྲང་བའི་དགུན་ཁ་ཞིག་ཡིན་ཞིང་། རི་ཀླུང་ཐང་གསུམ་གྱི་དབྱེ་བ་མེད་པར་གཡུགས་པའི་གྲང་རླུང་དེ་ཡིས་སྨན་བུ་མོའི་མྱོས་བུམ་དང་སྟག་ཤ་རའི་དཔུང་ཤ་ཡང་འཁུམ་དུ་བཅུག་ཡོད་པར་ཐེ་ཚོམ་མེད། དེ་དུས་ཀྱི་ང་རང་ལ་མཚོན་ན་ཉིན་རེའི་བྱ་བའི་ཁྲོད་དུ་གོ་གནས་གལ་ཆེན་ཞིག་བཟུང་ཡོད་པ་ནི་རྩོམ་ཡིག་འབྲི་རྒྱུ་དེ་ཡིན་ཞིང་། རྩོམ་ཡིག་གི་ཁྲོད་ནས་ཀྱང་བརྩམས་སྒྲུང་འབྲི་རྒྱུ་དང་བརྩམས་སྒྲུང་གི་རྩོམ་པ་པོ་ཚོར་གྲོགས་འབྲེལ་བསྒྲིག་རྒྱུ་དང་ཁོང་ཚོའི་ས་ནས་བསླབ་བྱ་དང་བཀའ་སློབ་ཞུ་རྒྱུ་དེ་དོན་དག་གཞན་གང་ཞིག་ལས་ཀྱང་གལ་ཆེན་དུ་གྱུར་ཡོད། དེ་དུས་ཀྱི་བོད་ཀྱི་རྩོམ་པ་པོའི་ཁྲོད་དུ་སྒྲུང་རྩོམ་པ་གྲགས་ཅན་ཚེ་རིང་དོན་གྲུབ་དང་སྟག་འབུམ་རྒྱལ་གཉིས་ནི་ངའི་སེམས་གཏིང་གི་ཉི་མ་དང་ཟླ་བ་ལྟ་བུར་གྱུར་པ་དང་། ཁོ་གཉིས་ལ་ཅིག་ཐུག་འདོད་པའི་ཚོར་བ་དྲག་པོ་ཞིག་གིས་ངའི་མགོ་ལུས་ཡོངས་སུ་ཁྱབ་བསྡད་ཡོད། ཡིན་ན་ཡང་ཚེ་རིང་དོན་གྲུབ་རྩེ་ཁོག་རྫོང་དུ་ཡོད་པས་དེ་དུས་ཀྱི་ལུང་ཁུག་གི་མི་ང་ལྟ་བུར་མཚོན་ན་ཧ་ཅང་ཐག་རིང་ཞིག་ཏུ་སྣང་། ཡིན་ན་ཡང་སྟག་འབུམ་རྒྱལ་དང་ངེད་གཉིས་རྫོང་གཅིག་གི་མི་ཡིན་པས་མི་ཚད་ངའི་ཁྱིམ་གཞིས་དེ་ཡང་ལོ་ངོ་དྲུག་ཅུའམ་བདུན་ཅུའི་ཡར་སྔོན་དུ་ཁོ་ཚོའི་སྡེ་བ་དེ་ནས་ས་འདིར་གནས་སྤར་བ་ཞིག་རེད་འདུག་པས། ཕྱོགས་གང་ཐད་ནས་སྟག་འབུམ་རྒྱལ་ལ་ཐུག་འཕྲད་བྱེད་དུ་འགྲོ་རྒྱུ་དེ་ལ་ཆ་རྐྱེན་ངེས་ཅན་ཞིག་ལྡན། དེའི་ཕྱིར་ངས་རང་གི་ལས་གནས་ནས་ཉིན་གཉིས་གསུམ་ཞིག་གི་དགོངས་པ་ཞུས་རྗེས་རྒྱ་མི་ལྕི་བ་སྐམ་པོ་སྒྲུག་མཁན་ཞིག་ལ་རྒྱ་སྒོར་ལྔ་སྤྲད་དེ་ཁོའི་ལག་སྐྱོར་འཕྲུལ་འཁོར་དུ་བསྡད་ནས་རྫོང་མཁར་གྱི་ཕྱོགས་སུ་བསྐྱོད། ལམ་ཞོར་དུ་ཨང་གཉིས་པ་དང་གསུམ་པ་ཟེར་བའི་རྒྱ་གྲོང་ཞིག་བརྒྱུད་ནས་འགྲོ་དགོས་ཤིང་། རིག་གསར་སྐབས་རྒྱ་མི་སྟོང་ཕྲག་མང་པོ་ཞིག་ངལ་རྩོལ་སྒྱུར་བཀོད་ཀྱི་ཆེད་དུ་ས་འདིར་འོངས་ནས་གཞིས་ཆགས་ཏེ་ས་རྐོ་རྡོ་སློག་བྱེད་བཞིན་གང་འཚམ་ཞིག་བསྡད་པ་རེད་ལ། དེ་དུས་ཀྱི་རྒྱ་མི་ན་གཞོན་སྐོར་ཞིག་གིས་བོད་རིགས་ལུག་རྫི་རྒན་པོ་ཞིག་ལ་ཁོའི་ལུག་གིས་རྒྱ་མིའི་ཞིང་ཁའི་ལོ་ཏོག་ཟོས་པར་བསྙད་བཏགས་ཏེ་རྐུབ་ལ་དབུགས་མདའ་བརྒྱབ་ནས་མངགས་པའི་བཤད་རྒྱུན་ཞིག་ཀྱང་ཡོད་ལ། ང་རང་ཆུང་དུས་སློབ་གྲྭ་ན་ཡོད་སྐབས་ཁྱིམ་མཚེས་དག་གི་ཁྱི་དང་ཞི་མི་རྐུན་མ་བརྒྱབ་ནས་ས་འདིའི་རྒྱ་མིར་བཙོངས་ཏེ་ཆང་དང་ཐ་མག་ཉོས་པ་ཡང་ཉུང་ཉུང་མིན། ཡིན་ན་ཡང་དེ་དུས་ཀྱི་བྱིས་པ་སྣབས་ལུག་དེ་ད་ལྟ་ཕོ་བཟོ་དོད་པའི་གསར་རྒོད་ཅིག་ཏུ་གྱུར་ནས་རྩྭ་ཐང་གི་བུ་མོ་ཚོའི་སྙིང་གི་ནོར་བུ་ཞིག་ཏུ་འགྱུར་བཞིན་པ་མ་ཡིན་ནམ།

རྫོང་མཁར་དུ་བསླེབས་ནས་དགོང་མོ་དེར་རིན་གོང་དམའ་བའི་འགྲུལ་ཁང་ཞིག་ཏུ་འཛུལ་བ་ན། ངའི་ངོ་ཤེས་ཤིག་དང་ཁོའི་ཕ་རྒན་གཉིས་ཀྱང་ཆབ་ཆ་ལ་འགྲོ་ཕྱིར་དེར་ཡོང་ནས་བསྡད་འདུག དགོང་མོའི་ཁ་ཟས་ཟོས་རྗེས་ཁོང་གཉིས་གློག་བརྙན་ལ་བལྟ་རུ་འགྲོ་གི་ཡིན་ཟེར་ནས་ཕྱི་རོལ་ཏུ་བུད་སོང་ལ། ངས་ལྕགས་ཐབ་ཏུ་རྡོ་སོལ་གང་འཚམ་ཞིག་བརྫངས་རྗེས་སྒོ་གཏན་ཏེ་ཉལ་ནས་བསྡད། དུས་ཡུན་ཅི་ཙམ་ཞིག་འགོར་བ་མི་ཤེས་པར་མི་མང་པོ་ཞིག་གི་སྐད་སྒྲས་ང་རང་གཉིད་གོང་ནས་དཀྲོགས་སོང་ལ། མགོ་བོ་དགྱེ་ནས་ཅིག་བལྟ་བསམས་དུས་ཐོག་མར་མིག་འབྱེད་འཛུམ་ཡང་བྱེད་ཧ་ཅང་དཀའ་ཡང་བཙན་གྱིས་མིག་གདངས་ནས་ཅིག་ལྟ་དུས། ཁང་པའི་ནང་ཧྲིལ་བོར་རྡོ་སོལ་གྱི་དུ་བས་ཁེངས་པའི་ཀློང་ན་གློག་འོད་རབ་རིབ་ཅིག་འཕྲོ་བ་དང་། སྒེའུ་ཁུང་ཕྱི་རོལ་ཏུ་མི་མང་པོ་ཞིག་གིས་སྐད་ཅོར་རྒྱག་བཞིན་སྒོ་རྡུང་གིན་འདུག ང་ཡར་ལངས་གྲབས་བྱས་པ་ན། ཨ་ཁ། ངའི་མགོ་ནང་ཧྲིལ་བོར་སྨུག་པ་ཞིག་འཐིབས་ནས་ཡར་ལངས་གྲབ་བྱེད་དུས་མར་རིལ་ཡོང་གི་འདུག ཡིན་ན་ཡང་ངས་ཨུ་ཚུགས་ཆེན་པོས་ལུས་པོ་གོག་མ་ནུར་གྱིས་སོང་སྟེ་སྒོ་ཕྱེ་བ་ན། འགྲུལ་ཁང་བདག་པོ་རྒྱ་མི་ལོ་གཞོན་ཁྱོ་ཤུག་གཉིས་ཀྱིས་གཙོས་པའི་རྒྱ་བོད་སྐོར་ཞིག་གིས་ང་ལ་ཁྱོད་རང་འཆི་ན་འདོད་དམ་ཞེས་གཤེ་གཤེ་སྣ་ཚོགས་གཏོང་ཞོར་དུ་ཁང་པའི་སྒོ་དང་སྒེའུ་ཁུང་ཆེ་ཆེར་ཕྱེས་ནས་ནང་དུ་འཐིབས་པའི་རྡོ་སོལ་གྱི་དུ་བ་ཕྱིར་འགྲོ་ཐབས་བྱེད་བཞིན་འདུག་ན་ཡང་། ངའི་ལུས་ཧྲིལ་བོར་བཟི་སྨན་བརྒྱབ་པ་ལྟར་ཡམ་མེ་ཡོམ་མེར་གྱུར་ནས་སྟོབས་ཟད་ཤུགས་རྫོགས་སུ་གྱུར་འདུག

དེ་ལྟར་འཇིགས་སུ་རུང་བའི་མཚན་མོ་ཞིག་བསྐྱལ་རྗེས་ཀྱི་ཉིན་གཉིས་པ་དེར། ང་རང་རྫོང་མཁར་ནས་ཁྲི་ཀར་འགྲོ་བའི་སྤྱི་སྤྱོད་རླངས་འཁོར་ཞིག་ཏུ་བསྡད་ནས་མགོ་མང་གྲོང་བརྡལ་དུ་བསྐྱོད། ཉིན་དེར་རླུང་དམར་དྲག་པོ་ཞིག་གིས་ས་མང་གཞོང་སྟོད་སྨད་བར་གསུམ་ཡོངས་སུ་བཏུམས་པས། སྤྱི་སྤྱོད་རླངས་འཁོར་ཡང་སྐབས་རེར་མདུན་སྐྱོད་བྱེད་མ་ཐུབ་པར་སྐར་མ་འགའ་རེར་གློག་གཞུ་སྤར་ཏེ་སྡོད་དགོས་ཀྱི་འདུག གང་ལྟར་ཆུ་ཚོད་གསུམ་དང་ཕྱེད་ཀ་ཙམ་དུ་བསྐྱོད་མཐར་མགོ་མང་གྲོང་བརྡལ་དུ་བསླེབས་སོང་། མགོ་མང་གྲོང་བརྡལ་ནི་རླངས་འཁོར་སྣ་ཚོགས་མང་རྫོང་ནས་ཁྲི་ཀ་དང་། ཁྲི་ཀ་ནས་རྩེ་ཁོག་དང་འབའ་རྫོང་དུ་བསྐྱོད་ལམ་གྱི་བཞི་མདོ་ཞིག་ཏུ་གྱུར་ཡོད་པས། གྲོང་བརྡལ་འདིར་ནམ་རྒྱུན་རྒྱ་མི་འབྲས་འཚོང་མཁན་དང་ཁ་ཆེ་པགས་ཉོ་མཁན། རོང་བ་ནས་འཚོང་དང་འབྲོག་པ་ལུག་འཚོང་། རྒྱལ་ཁམས་འགྲིམ་པའི་སྨད་འཚོང་མ། དགོན་པ་ཁག་གི་གཉེར་བ་ཞལ་འདེབས་སློང་མཁན། ཁྲི་ཀའི་ཆུ་ཁོལ་དུ་འགྲོ་བའི་ནད་པ། ཐག་རིང་ནས་ཡོང་བའི་རྐུན་ཇག ཐག་ཉེ་ནས་འདུས་པའི་ཁྲམ་པ་སོགས་མི་རིགས་སྣ་མང་འདུས་ནས་དོན་རྐྱེན་འདྲ་མིན་འབྱུང་སའི་མཐོ་སྒང་གི་ཧོང་ཁོང་ཆུང་ཆུང་ཞིག་ཡིན་པས། ངས་རྩད་ཞིབ་ཧ་ཅང་ཞིབ་ཚགས་པོའི་སྒོ་ནས་རང་གི་སྒོར་རྡོག་དེ་ཚོར་ཉེན་ཁ་དང་རིན་གོང་གཉིས་ཀ་ཆུང་བའི་སྒེར་གཉེར་མགྲོན་ཁང་ཞིག་རང་གི་ཞག་གཅིག་གི་གནས་མལ་དུ་བདམས་རྗེས། ཐད་ཀར་མི་ཞིག་གི་ལམ་སྟོན་བཞིན་གྲོང་བརྡལ་དེའི་སློབ་ཆུང་གི་ཕྱོགས་སུ་སོང་བ་དང་། ཅུང་མ་འགོར་བར་ངའི་སེམས་གཏིང་ནས་ཡི་རང་ཞུ་སའི་རྩོམ་པ་པོ་སྟག་འབུམ་རྒྱལ་གྱི་སྡོད་ཁང་ཡང་རྙེད་བྱུང་། ངས་རང་གི་ལང་ལོང་དུ་འཕྱུར་བའི་སེམས་ཁམས་ཅུང་ཟད་ལྷོད་དུ་བཏང་རྗེས་ཐག་ཐག་ཐག་ཅེས་ཁང་པའི་སྒོ་ལན་འགའ་བརྡུངས་པ་ན། ནང་ནས་སུ་ཡིན་ཞེས་པའི་མོ་སྐད་ཅིག་གྲགས་པ་དང་མཉམ་དུ་སྒོ་ཕྱེས་བྱུང་ལ། ངའི་མིག་མདུན་དུ་མངོན་པ་ནི་གཟུགས་པོར་ལྡེམ་ལྡེམ་འཁྱུག་འཁྱུག་གི་སྒེག་ཆོས་ལྡན་ཞིང་ངོ་གདོང་ལ་དཀར་དཀར་དམར་དམར་གྱི་སྐག་ཚོས་བྱུགས་པའི་བུད་མེད་གཞོན་ནུ་མ་ཞིག་རེད་ལ། མོས་ངའི་བཟོ་ལྟ་དང་ངོ་གདོང་ལ་ལྟ་ཙམ་དང་ངོ་གདོང་སྙེར་ཙམ་གྱིས། ཁྱོད་ཀྱིས་སུ་འཚོལ་གྱིན་ཡོད། ཅེས་སྐད་ཆ་ཞིག་དྲིས་པ་དང་། ངས་རང་གི་སེམས་པ་དང་ངོ་གདོང་གཉིས་ཀ་རང་བབས་སུ་ཡོང་བའི་རེ་བ་དང་བཅས། ངས་སྟག་འབུམ་རྒྱལ་འཚོལ་བཞིན་ཡོད། འདི་ཁོང་ཚང་ཨེ་རེད། ཅེས་དྲིས་པ་ན། ལྕམ་སྐུ་ཞབས་དེས་གདོང་ལ་ཨུ་ཚུགས་ཀྱི་འཛུམ་མདངས་ཤིག་བཟུང་ནས། རེད་རེད། ཡིན་ན་ཡང་ཁོ་ད་ལྟ་ཁྱིམ་ན་མེད། ཟེར་ཞོར་ཕྱིར་ཁྱིམ་དུ་འགྲོ་གྲབས་བྱེད། ངས། ཁོ་གང་དུ་བུད་སོང་། ང་མང་རྫོང་ནས་ཁོ་ལ་དོན་དག་ཅིག་གི་ཆེད་དུ་ཐུག་འཕྲད་བྱེད་པར་ཡོང་བ་ཡིན། སྐད་ཆ་དེ་གོ་མ་ཐག་ལྕམ་མོ་འདིའི་གདོང་གི་རྣམ་འགྱུར་ལྡབས་འགྱུར་གྱིས་ལྐོག་གྱུར་ཅིག་ཏུ་སྣང་བ་དང་འབྲེལ་ཁ་ནས། ཨོ། སྟག་འབུམ་རྒྱལ་འབྲུ་རིགས་ཁང་དུ་གྲོ་ཕྱེ་ཞིག་ལེན་དུ་བུད་སོང་། ཁྱེད་ལ་འདིར་སྒུག་པའི་དུས་ཚོད་མེད་ན་འབྲུ་རིགས་ཁང་དུ་ཐད་ཀར་སོངས་དང་ཁོ་ལ་ཐུག་གི་རེད། རེད། འབྲུ་རིགས་ཁང་དེ་མི་དམངས་ཁྲོམ་རའི་སྒོ་ཆེན་གྱི་གཡས་ཕྱོགས་སུ་ཡོད་པའི་སྨན་ཁང་དེའི་རྒྱབ་ལོགས་སུ་ཡོད། ་་་ ་་་ དེ་ནས་ང་རང་ལྕམ་སྐུ་ཞབས་དེ་དང་ཁ་གྱེས་ནས་མིང་དུ་གྲགས་པའི་རྩོམ་པ་པོ་དེའི་ཁང་པའི་ནང་གི་གཡེར་བག་ཅན་གྱི་ལྕམ་སྐུ་ཞབས་དེའི་ལུས་ཀྱི་སྒེག་ཆོས་དང་གདོང་གི་མང་དྲགས་པའི་སྐག་ཚོས་དང་གྲང་དྲགས་པའི་རྣམ་འགྱུར་སོགས་ལ་བསམ་བློ་འདྲ་མིན་ཞིག་གཏོང་བཞིན་འབྲུ་རིགས་ཁང་གི་ཕྱོགས་སུ་བསྐྱོད་པ་ཡིན།

འབྲུ་རིགས་ཁང་དུ་བསླེབས་པ་ན། དེ་རུ་རླུང་དམར་འུར་འུར་དུ་ལྡང་བའི་ཁྲོད་དུ་འབྲོག་པ་ཕོ་མོ་རྒན་གཞོན་མང་པོ་ཞིག་གིས་ལོ་གསར་གྱི་ཆེད་དུ་གྲོ་ཕྱེ་ལེན་བཞིན་ཡོད་པ་དང་། མི་མང་ཆེ་བའི་ངོ་གདོང་ལ་གྲོ་ཕྱེ་འགོས་ནས་མི་ཞིག་ལས་སླ་བོའི་སྒོ་ནས་རྩད་གཅོད་ཐུབ་རྒྱུར་དཀའ་ངལ་འདུག ངས་དེར་ཆུ་ཚོད་ཕྱེད་ཀ་ཙམ་ཞིག་ལ་བསྒུགས་པ་ན་ལུས་པོ་ཡོངས་ལ་གྲོ་ཕྱེ་འགོས་པའི་གསར་བུ་ཞིག་གིས་ཚུར་ང་ལ་ལྟ་ཙམ་བྱེད་བཞིན་འདུག་ལ། ངས་སྔོན་ཆད་དུས་དེབ་ཁག་ཅིག་ལས་མཐོང་མྱོང་བའི་འདྲ་པར་དག་གིས་བདེན་དཔང་བྱས་པ་ལྟར་ན་མི་དེ་ནི་རྩོམ་པ་པོ་སྟག་འབུམ་རྒྱལ་ལགས་རེད་འདུག དེར་ང་རང་ཕར་ཁོའི་གམ་དུ་སོང་ནས་ཁྱེད་རང་སྟག་འབུམ་རྒྱལ་ཡིན་ནམ། ཞེས་དྲིས་པ་ན། ཁོང་གིས། ཨ། ཨོ། ང་སྟག་འབུམ་རྒྱལ་ཡིན། ཁྱོད་གང་ནས་ཡོང་བ་ཡིན། ང་མང་རྫོང་ནས་ཡོང་བ་ཡིན། ཁྱེད་ཀྱི་ཁང་བའི་ནང་དུ་སོང་བ་ན་ཁྱེད་མི་འདུག ཨོ། དེས་ན་ཁྱོད་ཀྱིས་ཇ་ཞིག་བཏུངས་པ་ཡིན་ནམ། མ་འཐུངས། ཅིའི་ཕྱིར། དམྱལ་བ་མ་དེས་ཇ་ཞིག་འཐུང་ཡང་མི་ཟེར་རམ། མོས་དེ་འདྲ་མི་ཟེར་ཡང་། སྐབས་དེར་ང་ཡང་ཁྱེད་རང་འཚོལ་རྒྱུར་བྲེལ་བ་ཆེ་བས་མོ་ལ་དེ་ལྟར་འདྲི་བའི་དུས་ཚོད་མ་བྱུང་བ་ཡིན་རྒྱུ་རེད། ཁྱོད་ཀྱིས་ང་རང་འཚོལ་དགོས་དོན་ཅི་ཡིན། དེ་ལ་རྒྱུ་མཚན་མང་ཡང་གལ་ཆེན་ཞིག་ནི། ང་རང་ཁྱེད་ཀྱི་སྒྲུང་རྩོམ་དག་གི་ཀློག་པ་པོ་ཞིག་ཡིན་ཞིང་། ནམ་རྒྱུན་སྦྲང་ཆར་ལ་སོགས་པའི་དུས་དེབ་གསར་བ་ཞིག་ལག་ཏུ་འབྱོར་མ་ཐག་དང་པོར་ཁྱེད་ཀྱི་སྒྲུང་གཏམ་ཞིག་དེ་རུ་ཨེ་ཡོད་ལྟ་གིན་ཡོད་ལ། ད་ལྟ་ངས་ཀྱང་ཚོད་ལྟའི་ཆེད་དུ་སྒྲུང་གཏམ་རེ་གཉིས་འབྲི་གིན་ཡོད་མོད། རང་ཉིད་ལ་རྩོམ་རིག་གི་ཆེད་སྦྱོང་ཅི་ཡང་མེད་པས་ངོ་མ་དཀའ་མོ་ཞིག་རེད། དེ་རིང་ང་ས་འདི་རུ་ཁྱེད་རང་འཚོལ་བར་ཡོང་དོན་ནི་འདིའི་སྐོར་ལ་སྐད་ཆ་ཞིག་འདྲི་རྒྱུའི་ཆེད་དུ་ཡིན། ཨོ་ཨོ། ཁྱེད་ཀྱིས་དེ་རིང་རླུང་དམར་འདི་འདྲའི་ནང་ལ་ས་ཐག་རིང་ནས་ཡོང་སྟེ་དཀའ་ངལ་མྱངས་འདུག ཡ་ཡ། ཐོག་མར་འུ་གཉིས་ངེད་ཚང་ལ་འགྲོ ཁོང་གིས་གྲོ་ཕྱེ་རས་ཁུག་གང་ཕྲག་ཏུ་བཀྱགས་ནས་ངེད་གཉིས་ཁོ་ཚང་ལ་སོང་། ད་གིན་གྱི་ལྕམ་ཆུང་མ་དེས་རང་གི་ཁྱོ་བོའི་མདུན་དུ་ང་ལ་རྣམ་འགྱུར་སྡུག་པོ་ཅི་ཡང་བསྟན་མ་བྱུང་ལ་མོ་རང་གི་ལག་གཉིས་འགུལ་ནས་ངེད་གསུམ་ལ་ཐུག་པ་ཚ་བོ་ཞིག་ཀྱང་བསྐོལ་སོང་བས། ངས་ལོ་ངོ་ཉི་ཤུའི་རྗེས་ཀྱི་ད་ལྟ་ཡང་མོ་ལ་ཐུགས་རྗེ་ཆེ་ཞུ་འོས། གང་ལྟར་དགོང་མོ་དེར་སྟག་འབུམ་རྒྱལ་བཟའ་ཟླ་གཉིས་ཉལ་མ་རན་བར་དུ་ངས་ཁོང་གི་རྩ་ནས་སྒྲུང་རྩོམ་འབྲི་བའི་སྐོར་གྱི་སློབ་ཁྲིད་དམ་མན་ངག་མི་ཉུང་བ་ཞིག་ཞུས་པ་ཡིན་ལ། རང་གིས་བྲིས་པའི་”སྦྲ་ནག་ལས་གྱེས་པའི་རྐང་རྗེས་”ཞེས་པའི་སྒྲུང་ཐུང་དེ་ཡང་ཁོང་ལ་སྤྱན་བསྟར་ཞུས་པ་ཡིན། ཁོང་གིས་ངའི་སྒྲུང་ཐུང་དེར་གདེང་འཇོག་ཡག་པོ་ཞིག་གནང་སོང་ལ་རྗེས་སུ་ང་རང་རྒྱ་གར་དུ་འབྱོར་ནས་ཅུང་མ་འགོར་”གངས་རྒྱན་མེ་ཏོག་”ཅེས་པའི་དེབ་དེབ་ཅིག་གི་སྟེང་དུ་བཀོད་འདུག དགོང་མོ་དེར་སྟག་འབུམ་རྒྱལ་ལགས་ཀྱིས་ང་ལ་བཞག་པའི་བག་ཆགས་ལས། ཁོང་ནི་སྒྲུང་རྩོམ་འབྲི་རྒྱུར་མངའ་བརྙེས་པ་ཞིག་དང་། ངག་སྒོ་དེ་ཙམ་བདེ་བོ་མེད་པ། མི་བབ་ཆགས་དང་གཤིས་རྒྱུད་དྲང་མོ་ཞིག་རེད་ལ། བཤད་བཤད་པའི་མཐའ་མར་ཁོང་གི་ལྕམ་མོ་སྒེག་མོ་དེ་ཡང་ངའི་གཉེན་འབྲེལ་ཞིག་རེད་འདུག ང་རང་འགྲོ་ཁར་ཁོང་གིས་ང་ལ་ཁོང་གི་སྒྲུང་འབྲིང་”མི་རྐྱང་གཅོད་པའི་གཏམ་རྒྱུད་ཁྲོད་ཀྱི་སྒྲོལ་མ”ཞེས་པ་ཞིག་བསྟན་བྱུང་ལ། རྗེས་སུ་དེ་མཚོ་སྔོན་མང་ཚོགས་སྒྱུ་རྩལ་ཞིག་གི་སྟེང་ནས་མཐོང་སོང་། དགོང་མོར་ཕྱིར་མགྲོན་ཁང་དུ་ལོག་ནས་མར་ཉལ་རྩིས་བྱེད་དུས་མགོ་ནང་དུ་ཟུག་གཟེར་དྲག་པོ་ཞིག་ལངས་ཏེ་བཟོད་ཐབས་མེད་པའི་གནས་སུ་གྱར་བས། མགྲོན་ཁང་གཅིག་ཏུ་ཁེལ་བའི་བླ་རྒན་གྲྭ་ཞྭ་སེར་པོ་བཙོང་མཁན་ཞིག་གིས་མགོ་སྨན་དཀར་ལེབ་གཉིས་བྱིན་པ་ཟོས་ནས་ཅུང་མ་འགོར་བར་ན་ཟུག་དེ་མེ་ནང་དུ་ཆུ་བླུགས་པ་བཞིན་འཇགས་སོང་། ་་་ ་་་

ད་ལྟ་སྟག་འབུམ་རྒྱལ་དང་ངའི་གཉེན་ཚན་ལྕམ་མོ་དེ་གཉིས་མཉམ་དུ་བསྡད་མེད་པ་དང་། ཁོང་ཡང་ལས་གནས་བརྗེས་ནས་མང་རྫོང་མི་རིགས་སློབ་འབྲིང་གི་དགེ་རྒན་ཡིན་རབས་འདུག ཡིན་ན་ཡང་ངའི་གཉེན་ཚན་ལྕམ་སྐུ་ཞབས་དེ་ད་ལྟ་ས་གནས་གང་ཞིག་ཏུ་ཡོད་མེད་ང་ལ་ཆ་རྒྱུས་ཅི་ཡང་མེད། ་་་ ་་་


རྩོམ་སྒྲིག་པ། གངས་དགའ།

(མཆོད་མེའི་པར་དབང་གཞན་གྱིས་དགོལ་མི་རུང)

 


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།