སྤྱིར་ན་མི་སྒེར་སོ་སོས་ལས་རིགས་གང་ལ་འཇུག་པ་དེར་ཧུར་བརྩོན་ཆེན་པོས་བསྒྲུབ་རྒྱུ་གལ་ཆེ་བ་ལས། གཞན་ལ་འདི་འགྲིག་དང་འདི་མི་འགྲིག་ཅེས་ཁ་ནས་གང་ཐལ་ཐལ་དུ་སྨྲ་བ་ནི་ཅུང་མི་ལེགས་སྙམ། འོན་ཀྱང་། དེང་གི་བོད་རིགས་ཚོས་གླུ་གཞས་མྱོང་རོལ་དང་གླུ་གཞས་ལ་བཟུང་བའི་མཛེས་དཔྱོད་ལྟ་ཚུལ་དག་ལ་སྐབས་རེ་ངོ་མ་བགད་ཤོར་བའམ་ངུ་ཤོར་བ་དེ་འདྲ་འདུག གླུ་གཞས་ནི་ལྟད་མོ་བ་ལ་བརྟེན་ནས་བྱུང་བ་ཡིན་པས། གླུ་གཞས་ཡག་སྡུག་ཐམས་ཅད་དེའི་ལྟད་མོ་བའི་དགའ་ཕྱོགས་དང་མཛེས་དཔྱོད་ལྟ་བ་སོགས་ལ་འབྲེལ་བ་དམ་ཟབ་ཡོད་ལ།དྲ་འབར་དང་གཞས་པ་དག་ཀྱང་དེ་དག་གི་རྒྱབ་སྐྱོར་ལ་བརྟེན་ནས་བྱུང་བ་ཡིན། དེ་བས་ང་ཚོས་གླུ་གཞས་ཅུང་ལེགས་པ་དང་ཡག་པ་བཟང་བ་དག་ལ་དོ་སྣང་དང་མྱོང་རོལ་དགོས་པ་ལས། ཡོད་ཚད་མཚར་མཚར་བྱེད་ནས་བཞད་གར་གྱི་ལྟད་མོ་ལ་གཡེང་བ་དང་།བགད་གར་མཁན་དག་གིས་ཀྱང་རང་ཉིད་གླུ་པ་དང་སྒྱུ་རྩལ་པ་ཡིན་པར་རློམ་པ་ནི་ཅུང་གད་མོ་ཤོར་བ་ཞིག་རེད། བོད་ཀྱི་གཞས་པ་མང་པོ་ཞིག་གིས་ལོ་ཟླ་མང་པོར་དཀའ་སྤྱད་དང་སྙིང་རུས་ལ་བརྟེན་ནས་གྲུབ་པའི་གཞས་ཅུང་སྤུས་ཚད་ལེགས་པ་རེ་འགྲིམ་སྤེལ་གནང་སྐབས་ང་ཚོས་དེ་དག་ལ་རྒྱབ་སྐྱོར་གནང་འོས། དེ་ནི་གཞས་པ་དེ་ཙམ་མ་ཡིན་པར་བོད་གཞས་སྤྱི་ཡི་ཚེ་སྲོག་ལ་གསོན་ཤུགས་སྩོལ་སྟངས་ཤིག་རེད། མ་གཞི་ང་ཚོས་ཐོག་མར་བརྩམས་ཆོས་སམ་བྱ་གཞག་གང་ཞིག་ལ་རྒྱབ་སྐྱོར་དགོས་མིན་བསམ་བློ་གཏོང་སྐབས།རང་དང་འབྲེལ་བ་ཡོད་མེད། ཕ་ཡུལ་གཅིག་པ་ཡིན་མིན། ཡང་ན་གྲུབ་མཐའ་གཅིག་པ་ཡིན་མིན་སོགས་ལ་ལྟ་བ་ལས། བརྩམས་ཆོས་གང་དེའི་སྤུས་ཚད་དང་རིན་ཐང་ལ་མི་ལྟ་བ་ནི་ཧ་ཅང་ཐབས་སྐྱོ་པོ་ཞིག་རེད།དེ་བས་ང་ཚོས་རང་ཉིད་དགའ་སའི་བརྩམས་ཆོས་ཅི་ཞིག་མཐོང་རུང་ཕ་རོལ་པོ་དེ་སུ་ཡིན་མིན་མི་ལྟ་བར་བརྒྱུད་འགོད་དང་རྒྱབ་སྐྱོར་གནང་འོས་སྙམ་མོ།།

　　ཕྲན་གྱིས་ད་ནངས་ཞོགས་པར་གྲོགས་ཚོམ་དུ་གཞས་མ་དབྱངས་ཅན་ལྷ་མོས་གསར་དུ་བཏང་བའི་གཞས«ལམ»ཞེས་པ་བརྒྱུད་འགོད་བྱེད་ཞོར་གོང་གི་སྐད་ཆ་ཐུང་ངུ་དེ་སྤེལ་བས་མཆན་འདེབས་མཁན་མང་པོ་ཞིག་བྱུང་འདུགཐོག་མར་ཁྱེད་རྣམས་ཀྱིས་གུས་པས་སྤེལ་བའི་གནས་ཚུལ་ལ་དོ་སྣང་གནང་བར་ཐུགས་རྗེ་ཆེ་ཞུ། དེ་དང་འབྲེལ་ཏེ་ང་རང་གིས་དོན་དག་ཁ་ཤས་གསལ་བཤད་བྱེད་བསམ་སོང་།དེ་གང་ཡིན་ཟེར་ན། ཐོག་མར་ཞུ་འདོད་པ་ནི་དེང་གི་ཆར་དྲ་ལམ་ཁག་ཏུ་བོད་རིགས་དྲ་འབར་ཁ་ཤས་བྱུང་ཡོད་པ་རེད།དེ་དག་ཕལ་ཆེ་བ་གུས་པས་བགད་གར(搞笑)གྱི་ལས་རིགས་སུ་གཏོགས་པར་ངོས་འཛིན་བྱེད་བཞིན་ཡོད། དེར་བརྟེན་གུས་པས་ཐོག་མར་དེ་དག་ལ་ཟུར་ཟ་དང་དམའ་འབེབས་གང་ཡང་བྱེད་ཀྱིན་མེད། ཁོ་ཚོས་ནམ་རྒྱུན་ཐད་གཏོང་བརྒྱུད་ནས་བརྩི་འཇོག་མི་འདུག་ཅེས་སྐད་རྒྱག་བཞིན་པ་དེར་རྒྱུ་མཚན་ཡོད་པ་རེད། ང་ཚོས་ལས་རིགས་གང་འདྲ་ཞིག་གཉེར་མཁན་ཡིན་ནའང་དེ་དག་ལ་ཐོག་མར་བརྩི་འཇོག་གནང་འོས་སྙམ། ལྷག་ཏུ་དེང་གི་ཆར་བོད་རིགས་གཞོན་ནུ་ཁག་གིས་ལས་གནས་འཚོལ་དཀའ་བའི་དུས་སྐབས་འདི་འདྲ་ཞིག་ལ།ང་ཚོས་ཀྱང་ལས་རིགས་མང་པོ་ཞིག་ལ་ཚོད་ལྟ་དང་འབད་བརྩོན་དགོས་པས་མ་ཚད།དེ་དག་ལ་ཐོབ་འོས་པའི་བརྩི་འཇོག་དེ་ངེས་པར་དུ་དགོས་སྙམ།རེད་དེ། ཁོ་ཅག་གིས་འཁྲབ་བཞིན་པའི་བཞད་གར་དང་གླུ་གཞས་སྒྱུ་རྩལ་བར་ལ་ཧེ་བག་ཡོད་པ་དེ་ང་ཚོས་ཤེས་དགོས་ལ།ཁོ་ཅག་གིས་ཀྱང་གནད་དེ་ཡིད་ལ་ངེས་དགོས་སྙམ། དེ་མིན་འཁྲབ་སྟོན་མཁན་ཐམས་ཅད་གཞས་པ་དང་གཞས་མ་ཡིན་ཟེར་བ་དང་།ཐ་ན་ཁ་ཤས་ཀྱིས་གཞན་གྱི་གཞས་ཚིག་དང་དབྱངས་སོགས་གང་དྲན་དུ་གཅོད་གཏུབ་བྱེད་པ།གཞས་ཚིག་ལ་བསྲེས་སྐད་དང་དག་ནོར་མང་དུ་འབྲི་བ་སོགས་བྱེད་བཞིན་པ།དེ་དག་ལ་མང་ཚོགས་བྱིངས་ཀྱིས་དགའ་འབོད་བྱེད་པ་སོགས་ལ་ང་ཚོས་ངེས་པར་དུ་གཟབ་དགོས་སྙམ།སྤྱིར་ན་གཞས་པ་དང་གཞས་མ་དག་ལ་དགོས་པའི་མ་མཐའི་ཆ་རྐྱེན་ནི་ལྷན་སྐྱེས་ཀྱི་སྐད་ངག་ཡག་པོ་ཞིག་དགོས་པ་དེ་རེད། དེ་སུས་ཀྱང་ཤེས་ཐུབ་པའི་གནས་ལུགས་ཤིག་རེད། དེང་སང་འཕྲུལ་ཆས་ཀྱིས་ཇི་ལྟར་བཟོས་ཤིང་བཅོས་ཀྱང་ལྷན་སྐྱེས་སྐད་ངག་ཡག་པོ་མེད་ན།གཞས་ཡག་པོ་ཞིག་དང་གཞས་པ་ལེགས་པོ་ཞིག་ཡོང་ཐབས་མེད་དོ།།དེ་བས་ཐོག་མར་རང་ཉིད་གཞས་པ་ཞིག་བྱེད་པ་ལ་ཆ་རྐྱེན་དེ་དག་ལྡན་མིན་ལ་བསམ་གཞིག་བྱས་ན་ཡག་སྙམ།ཡང་བཞད་གར་གྱི་ལས་ལ་གཞོལ་བར་སྐད་ངག་དང་ལང་ཚོ་དེ་ཙམ་གལ་མི་ཆེ་བ་འདྲ་བས།རང་རང་ལ་ཐུན་མིན་གྱི་འཁྲབ་སྟོན་གང་ཡོད་པ་དེ་སྟོན་ཆོག་སྙམ།འོན་ཀྱང་།བྱ་བ་དང་ལས་རིགས་ཚང་མར་མ་མཐའི་རྩ་དོན་རེ་ཡོད་པ་རེད།དེ་སེམས་ལ་ངེས་ཐུབ་ན་བཟང་སྙམ།དེ་མིན་ཁ་སང་ཞག་རྒྱ་བོད་གང་ཡིན་མ་ཤེས་རུང་ཡུན་ནན་བདེ་ཆེན་ཁུལ་ཡིན་པ་འདྲ།འཁྲབ་སྟེགས་ཤིག་གི་ཐོག་ནས་གསར་བུ་ཞིག་གིས་བོད་ལྭ་ཐད་ཀར་མར་ཕུད་ནས་རྐང་པས་རྫི་བཞིན་འདུག་པས།དེ་དག་ནི་མི་རིགས་ཤིག་གི་རིག་གནས་དང་གོམས་སྲོལ་ལ་བརྩི་འཇོག་མ་བྱས་པ་ཡིན་པས། རྒྱལ་ཁྲིམས་དང་ཀུན་སྤྱོད་ཀྱི་རྩ་དོན་དང་འགལ་ཡོད་སྙམ།དེ་བས་སྒོར་མོ་འཚོལ་བའི་བར་གསེང་ནས་རང་ཉིད་མི་འབོར་རྒྱུ་དང་རང་གི་རྩ་དོན་ཆུང་ངུ་རེ་དགོས་པ་ཡང་གལ་ཆེ་བ་འདྲ། དེ་འདྲ་མེད་པས་ད་གཟོད་ཧ་ཅང་ཐལ་བའི་བསྲེས་སྐད་ཀྱི་གཞས་ཚིག་དག་བྱུང་བ་ཡིན། འདིར་གསལ་བཤད་དགོས་པ་ཞིག་ནི་གཞས་མ་གཏམ་ཁ་ཅིག་གི་གཞས་ཚིག་ལ་བོད་རྒྱ་དབྱིན་གསུམ་མཉམ་སྦྲེལ་བྱས་པ་ཡང་འདུག་པས་དེ་དག་ལ་མུ་མཐུད་དཔྱད་དགོས་པ་ལས། ད་ལྟ་ད་དུང་འགྲིག་དང་མི་འགྲིག་ཐག་གཅོད་མི་ཐུབ།དེས་ན་ང་ཚོས་ཐོག་མར་བགད་གར་དང་གླུ་གཞས་སྒྱུ་རྩལ་སོ་སོར་དབྱེ་ཤེས་པ་དང་དེ་དག་ལ་རང་རང་གི་ཐུན་མིན་ཁྱད་ཆོས་རེ་ཡོད་པ་ཤེས་དགོས་སྙམ།གུས་པས་གོང་དུ་གླེང་བ་བཞིན་བོད་ཀྱི་གཞས་པ་མང་པོས་ལོ་ཟླ་མང་པོར་དཀའ་སྤྱད་འབད་བརྩོན་བྱས་ནས་གྲུབ་པའི་གཞས་ཡག་པོ་ཁ་ཤས་ཐོན་བཞིན་ཡོད། ང་ཚོས་དེ་དག་ལ་ངོ་མ་རྒྱབ་སྐྱོར་གནང་འོས།མི་རིགས་ཤིག་ལ་མཚོན་ན་མང་ཚོགས་བྱིངས་ལ་བགད་གར་ལྟ་བུའི་ལྟད་མོ་དགོས་ཀྱང་། གླུ་གཞས་ཡག་པོ་རེ་ངེས་པར་དུ་འབྱུང་དགོས་པ་རེད། འབྱུང་འོས་པ་ཞིག་ཀྱང་རེད། དེ་བས་ང་ཚོས་གླུ་གཞས་ཚད་ལྡན་དེ་དག་ལ་གར་སྟེགས་བསྐྲུན་རྒྱུ་དང་བརྒྱུད་འགོད་བྱ་རྒྱུ། བརྩི་ཐང་སྤྲད་རྒྱུ་སོགས་ཧ་ཅང་གལ་ཆེ་བ་རེད། གོང་དུ་ཞུས་པ་དག་ནི་ང་རང་གི་བསམ་ཚུལ་ཁ་ཤས་ཐད་ཀར་བྲིས་པ་ཙམ་ཞིག་ལགས་སོ།།

　　                        ༢༠༢༣-༢-༢༣ཉིན།

　　རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།