རབ་མཛེས་བཞིན་རས་ཟླ་བའི་ཉམས་ལྡན་མ། །
      གནག་སྣུམ་ལན་བུས་རྩེ་མོར་བསིལ་བྱེད་བརྒྱན། །
      འཕྲང་ཞིང་རབ་རྒྱས་མྱོས་བུམ་ཟག་མེད་བདེ། །
      ལན་གཅིག་ནུ་བའི་མཆོག་གི་དངོས་གྲུབ་སྩོལ། །

　　ཉེ་དུས་དྲྭ་ལམ་ཁག་དང་མི་ཆེ་མ་ཆུང་གསུམ་གྱིས་གླེང་བའི་«གཟི་»ཞེས་པའི་གློག་བརྙན་འདི་དྲྭ་བའི་སྤྱི་ཚོགས་འདིར་ཁྱབ་གདལ་དུ་འགྲོ་བའི་སྐབས། གུས་པས་ཀྱང་མ་བསྐུལ་དང་བླངས་ཀྱིས་དྲྭ་ལམ་ཁག་ནས་བརྙན་འདི་ཉོས་ཏེ་ལྟ་ཤོར་སོང་བས་བརྙན་འདིའི་སྐོར་ཅུང་ཟད་ཅིག་གླེང་བར་འདོད། དེ་ཡང་ཆ་འཕྲིན་གྱི་དུས་རབས་མ་དར་གོང་རྟོག་བཟོའི་སྒྲུང་རིང་མ་ཐུང་གསུམ་མི་ཉུང་བ་ཞིག །རྩོམ་པ་པོ་མང་པོས་བྲིས་རྩོམ་གྱི་ངལ་བ་ལྷོད་མེད་བསྟེན་ཏེ་ཡི་གེའི་ལམ་ནས་ཀློག་པ་པོའི་ཡིད་འགུགས་པའི་ཐབས་ཤེས་ཀྱི་བྲོ་གར་འཁྲབ་མོད།

　　ཆ་འཕྲིན་གྱི་དུས་རབས་དར་རྗེས་འདས་མ་ད་གསུམ་གྱི་ལོ་རྒྱུས་དང་རྟོག་བཟོའི་བཅོས་སྒྲུང་། འཚོ་བའི་ཉམས་མྱོང་བཅས་ལ་རྒྱབ་རྟེན་བཅོལ་ཏེ། སྐད་ངག་འགུལ་སྤྱོད་གསུམ་གྱི་ལམ་ནས་དངོས་སུ་ཚབ་མཚོན་མི་སྣས་འཁྲབ་སྟེ་བརྙན་དུ་ཕབ་པས་སྔར་དང་མི་འདྲ་བར་ཡི་གེ་ཤེས་མིན་དང་དེབ་ཡོད་མེད་ཙམ་ལ་མ་ལྟོས་པར། གཟུགས་བརྙན་འབུར་འདོན་ལམ་ནས་ལོ་རྒྱུས་དང་བཅོས་སྒྲུང་སོགས་སྟབས་བདེ་པོའི་ངང་ནས་བལྟ་བའི་གོ་སྐབས་ལེགས་པོ་ཞིག་ཏུ་འཕེལ་རྒྱས་སོང་ཡོད། དེ་ནི་དངོས་ཡོད་ཡིན་པས་བདེན་དཔང་ཅི་ལ་དགོས། །

　　འཇིག་རྟེན་འཁོར་བ་མྱ་ངམ་ཐང་ཆེན་ཏེ། །
      བསྐོས་པའི་མཛའ་མོ་སྐྱོ་བ་བསང་རོགས་ཡིན། །
      གཅེས་ཤིང་བྱམས་པའི་རོགས་ལོ་མ་བསྐྱངས་པར། །
      གཅར་རྡུང་དྲག་པོས་ལྷད་མེད་བརྩེ་སེམས་སྟོར། །

　　ད་ལྟའི་འཚོ་བ་དངོས་དང་ཧ་ཅང་ཁ་ཐག་ཉེ་བའི་«གཟི»ཞེས་པའི་སྐར་58ཅན་གྱི་གློག་བརྙན་འདིའི་བརྗོད་བྱ་ལ་གཙོ་ཕལ་དཀྱུས་གསུམ་དུ་དབྱེ་སྟེ་གླེང་ན། བརྗོད་བྱ་གཙོ་བོ་ནི་བུ་ཕྲུག་གི་ཕ་མའི་ཁ་བརྡར་མ་ཉན་པས་མཐར་ལོག་ལམ་དུ་སོང་བའི་ཚུལ་དང་། བུ་ཕྲུག་གི་ཕ་མའི་བཀའ་དྲིན་མ་དྲན་པར་དྲིན་ལན་ལོག་འཇལ་གྱི་ལས་ཀྱི་རྣམ་པར་སྨིན་ཚུལ། ཆུང་བྱིས་པའི་དུས་ནས་བུ་ཕྲུག་སློབ་གསོ་གསུམ་གྱིས་སྐྱོང་དགོས་ཚུལ་བཅས་ཁ་གསལ་གོ་བདེའི་ལམ་ནས་དྲངས། མ་རྒན་གྲོངས་བའི་རྗེས་ཤུལ་དུ་ཕ་གཅིག་པུས་བུ་སྐྱོང་བའི་འགན་འཁྲི་ལྗིད་པོ་ཞིག་ཕྲག་སྟེང་དུ་བབས་རྗེས། ཁྱིམ་གྱི་མེ་ཁ་གསོ་མཁན་དང་བུ་རབས་ཚ་རྒྱུད་སྤེལ་བའི་མནའ་མ་ཞིག་ལེན་ཏེ་ཁྱིམ་དེར་སླར་གསོན་ཤུགས་གསར་པ་བསྐྲུན་མོད། ཡིན་ཡང་བུ་དེས་ཚེ་གཅིག་བསྐོས་པའི་གཏན་གྲོགས་གཡོག་བཞིན་བརྡུང་། ཕ་དང་ཨ་ཁུ་གཉིས་ཀྱི་བསླབ་བྱ་འགོ་བའི་ནད་བཞིན་སྤངས་ཏེ་ཉིན་ཤ་ཉིན་གྱིན་ཟ་བཞིན། ཉིན་ཁྲག་ཉིན་གྱིན་འཐུང་བའི་གཏུམ་པོའི་གཅན་གཟན་ལྟ་བུར་གྱུར། དྲིན་ཅན་ཕ་མའི་ཁ་ལ་མི་ཉན་སྐྱ་ཁྲ་ཤིག་ཤིག །དབང་ཆེན་དཔོན་པའི་ཁ་ལ་མི་ཉན་སྔོ་ཁྲ་ཤིག་ཤིག །ཟེར་པའི་དཔེ་ལྟར་སུས་ཀྱང་གཅུན་མི་ཐུབ་ཅིང་། སུས་ཀྱང་འདུལ་མི་ཐུབ་པའི་རེ་ཞིག་སྟག་རྒོད་རི་ལ་ཤོར་བ་བཞིན་དྲངས་པས། ད་ལྟའི་ན་གཞོན་མང་པོ་ཞིག་ལ་བསླབ་བྱའི་འགྲམ་ལྕག་ཚ་བེར་བེར་དུ་གཞུས། །

　　བརྙན་འདིའི་རྒྱབ་ལྗོངས་རོལ་དབྱངས་ནི་དུས་རབས་གོང་མར་དར་ཆེ་བའི་གླུ་གཞས་རྙིང་པའི་གདངས་ཀྱིས་རྒྱབ་སྣོན་བྱས། ཡིག་དྲུག་གི་མ་ཎི་དབྱངས་སུ་གྱེར་བས་སྐྱོ་སྣང་རབ་ཏུ་མཚོན་པར་བྱས། གཤིན་པོའི་འདས་ཆོས་སུ་སྒྲུབ་པའི་འཁྲུངས་རྟགས་གྱི་མདུན་དུ་མིག་ཆུའི་སྒྲ་དང་ཤུགས་རིང་གི་རོལ་ཆའི་ལྷན་དུ་གདུང་འབོད་ཀྱི་སྨྲེ་ངག་འདོན་པས་ཡིད་སྐྱོ་བའི་ཚོར་བ་ལྷག་མེད་དེ་ལས་སྐྱོབ་པའི་ནུས་པ་དཀོན་མཆོག་གསུམ་ལ་ཡོད་པའི་ཡིད་ཆེས་ཀྱི་དད་པས་སྐྱོབ་པའི་རེ་གསོལ་ཞུས། །

　　ཕ་རྒན་དེས་ཚ་མོ་ཆུང་ཆུང་བྱམས་ཀྱི་སྐྱོང་ཞིང་འདོར་མེད་ཀྱི་འགན་འཁྲི་ཕྲག་ཏུ་བསྣམས་ཏེ་ཕ་མེས་ནས་བརྒྱུད་པའི་སྲོལ་རྒྱུན་གྱི་རིག་གནས། ཆོས་ལུགས་ཀྱི་དད་མོས། གོམས་གཤིས་ཀྱི་སྤྱོད་ཚུལ། ཡ་རབས་ཀྱི་ཞེ་ས། མཆོད་རྟེན་ལ་ཞབས་སྐོར། དགའ་ལྡན་ལྔ་མཆོད་ཀྱི་དགོངས་རྫོགས་ཚུན་ནས་བུ་རབས་ཚ་རྒྱུད་ལ་བརྒྱུད་སྤྲོད་གནང་བའི་བསམ་གཞིགས་ལས། དེ་རིང་ཁ་རྩང་གི་ཕ་མ་ཚོར་སྙིང་ལ་ཚ་གཟེར་རྒྱག་ཏེ་འགྱེལ་དགོས་པའི་འབོད་དབྱངས་ཤིག་བསྒྲགས། །

　　ཡོད་དུས་ཡོད་པའི་གཅེས་འཛིན་མ་བྱེད་ན། །
      ནམ་ཞིག་རང་རང་གྱེས་བའི་སྐབས་ཤིག་འོང་། །
      དེ་དུས་འགྱོད་གདུང་བསམ་པས་ཅི་ལ་ཕན། །
      མཉམ་གཤིབ་དུས་ཚོད་དངུལ་གྱིས་ཉོ་ས་མེད། །

　　དགའ་སྐྱོ་ཆ་མི་སྙོམས་པའི་འཇིག་རྟེན་འདིར་སྐྱེ་བ་ནི་ཤི་བ་ཁོ་ན་བའི་རྒྱུ་ཡིན་པས་ཉིན་གཅིག་གསོན་པོར་གནས་པ་རང་དབང་ཡིན་ཡང་ནམ་འཆི་ལ་དུས་བཀག་མེད་སྟབས། གཤིན་རྗེའི་ཕོ་ཉའི་ཕ་རྒན་མགྲོན་དུ་བསུ་བའི་ཉིན། དྲིན་ལན་ལོག་ཏུ་འཇལ་བའི་བུ་དེ་སྐུ་གམ་དུ་མེད་ཅིང་། བཙུམས་ཁའི་མིག་ཟུང་ཅེར་ས། འཆི་ཁའི་སེམས་པ་འཁྲེན་ས། ཤི་བོའི་རྣམ་ཤེས་འཁོར་ས་ཚ་མོ་ལས་མེད་པས་འཆི་ཁའི་སྡུག་བསྔལ་རེ་རེ་མྱོང་དུས། བརྙན་བལྟ་མི་ཚོ་ཡང་དབང་མེད་ལས་ཀྱིས་དེད་པའི་ལམ་དེར་སྔ་ཕྱི་མ་གཏོགས་ཚང་མ་འཇུག་དགོས་པའི་གོ་བརྡ་དང་མྱོང་བའི་ར་སྤྲོད་གསལ་པོར་སྟོན་པའི་སྣང་ཚུལ་ལས་མིག་ནས་མཆི་མ་ལྷུག་ལྷུག་ཏུ་འཛག་པའི་ཡིད་འབྱུང་བའི་ངལ་བ་མི་སྟེར་བ་ག་ལ་ཡིན། དྭངས་ཤིང་གཙང་བའི་ལས་འབྲས་ཀྱི་ཆུ་མོ་རྒྱུན་དུ་མི་སྙོག་པར་གཟབ་དགོས་ཤིང་། གལ་ཏེ་བསྙོགས་རྗེས་ལས་ཀྱི་འབྲས་བུ་ལྡོག་ཏུ་མེད་པའི་ཆོས་ཉིད་ཀྱི་བདེན་པ་བསྣུབ་ཏུ་མེད་པར་བཤད། བརྙན་འདི་དགོད་སྒྲ་ཞབས་གཞས་ཀྱི་ངང་ནས་འགོ་ཚུགས་ཀྱང་མཇུག་མཐར་མཆི་མས་སྐྱེལ་དགོས་པའི་གནས་ལུགས་སྟོན་པའི་སྒྲོན་མེ་རུ་སྦྱར་བ་བྱས་སོ། །

　　ལྷག་བསམ་ཡིད་ཀྱི་མཚོ་མོ་དུག་མཚོར་སྣང་། །
   　ལེགས་བཤད་གཏམ་དེ་བསླུ་བའི་རྒྱུ་རུ་མཐོང་། །
   　ཁ་ཁོག་མི་མཐུན་གཏམ་ལ་བདེན་པར་བཅའ། །
   　སྨིག་རྒྱུའི་གྲོང་ཁྱེར་འདི་ན་རྨོངས་པས་ཁེངས། །

　                             　2024/11/7

རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།