ཨེ་མ་སྤྲོ་བས་བརྟས་པའི་ཁྱོད་ཀྱི་གསུང༌།།
རྣ་བར་སིམ་པས་བདག་སེམས་བདེ་དགས་ཁྱབ།།
ཁུ་བྱུག་ཁྱོད་ཉིད་བྱ་རུ་འབོད་པའམ།།
ཡང་ན་དབྱངས་སྙན་འཕྱོ་བར་སེམས་ན་འོས།།

ང་ཡིས་ནེའུ་གསེང་གཞུང་ན་ངལ་གསོ་དུས།།
ཁྱོད་ཀྱི་བརྩེགས་མར་བྱོས་པའི་སྐད་སྙན་ཐོས།།
དེ་ནི་རི་བོ་གཅིག་གིས་གཅིག་བརྒྱུད་ལྟར།།
སྐབས་རེར་རིང་ལ་སྐབས་རེར་ཧ་ཅང་ཉེ།།

ཉི་འོད་མེ་ཏོག་བཀྲ་བའི་རི་ལུང་ལ།།
གཏད་ནས་སྦྲང་ཆར་སིལ་མའི་གདངས་འགྲོས་ཀྱིས།།
རྨི་ལམ་འཕྲུལ་བའི་ལྗོངས་ཀྱི་དོན་བྱ་རེ།།
ང་ཡི་སྙིང་ལ་བརྣག་ཕྱིར་ལྷོད་ཀྱིས་གྱེར།།

ཨེ་མ་དཔྱིད་ཀྱི་གཅེས་ཕྲུག་བྱ་མ་ཡིན།།
ཁྱོད་ནི་མིག་གིས་གཟུང་བར་མི་རིག་སྟེ།།
ཁྱོད་ནི་དབྱངས་སམ་ཁྱོདནི་གབ་ཚིག་ཅིག།
ང་ཡིས་སྤྲོ་བ་འབུམ་གྱིས་ཁྱོད་རང་བསུ།།

ང་ནི་དེ་དུས་དགེ་ཕྲུག་ཡིན་དུས་སུ།།
ཁྱོད་གསུང་རྣ་བར་འདྲེན་པའི་སྐལ་བཟང་ཤར།།
ཚང་ཚིང་ནགས་དང་ཡངས་བའི་མཁའ་དབྱིངས་སུ།།
འཚོལ་བའི་ངལ་བ་མྱངས་བ་ཐེངས་གཅིག་མིན།།

ཁྱོད་ཉིད་འཚོལ་ཕྱིར་ནགས་དང་སྤང་ལ་འཁྱམས།།
འོན་ཀྱང་ཁྱོད་ནི་མཛེས་པའི་སྙེགས་ཡུལ་ལམ།།
ཡང་ན་དུང་བ་ཞིག་གམ་འདྲི་རྟགས་ཤིག།
མིག་གི་ལོངས་སུ་སྤྱོད་པའི་བསོད་ནམ་བྲལ།།

དེ་ལྟ་ནའང་གསུང་སྐད་མི་ཡལ་བས།།
ཁོ་བོ་སྤང་ལ་བསྙེས་ནས་རྣ་བ་གཏད།།
མཛེས་པའི་ཚིག་ཚོགས་གང་གིས་མཚོན་མིན་པའི།།
དུས་བཟང་ཡང་བསྐྱར་ཤར་བའི་སྣང་བ་སྐྱེས།།

ཨེ་མ་བདེ་དགའ་རྫོགས་པའི་འདབ་ཆགས་ཁྱོད།།
འུ་ཅག་སྤྲོ་འཁྱམ་གཏོང་བའི་སྣང་བ་དེས།།
ལྷ་ཡུལ་མངོན་དུ་ཤར་བའི་འཁྲུལ་བ་སྟེར།།
དེ་ནི་ཁྱོད་ཀྱི་སྙེགས་ཡུལ་མ་ཡིན་ནམ།།
                  ༢༠༠༦. ༡༢. ༧ཉིན་རྒྱ་ཡིག་ནས་བསྒྱུར།

             (གཡག་བུ་དཔལ་རྩལ་གྱིས་བསྒྱུར)

རྩོམ་ཁུངས། ངེད་དྲ་བའི་གླེང་སྟེགས།