དབང་ཕྱུག་ཚེ་བརྟན་གྱི་ཉེ་པར།

    ངས་ཆུང་དུས་ནས་རྒྱ་མི་རིགས་ཀྱི་སློབ་གསོ་མྱངས་ཏེ་འཚར་ལོངས་བྱུང་བ་ཡིན། བོད་ཀྱི་རིག་གནས་ཀྱིས་ང་ཚོར་ཐེབས་པའི་བག་ཆགས་ནི་ཕ་ཡུལ་གྱི་གུང་གསེང་གི་འཚོ་བ་དང་། ཕ་མའི་འཚོ་བའི་གོམས་གཤིས་སོགས་དང་འབྲེལ་བ་དམ་པོར་གནས་ལ། གཞན་ཡང་ལོ་རབས་བརྒྱད་ཅུའི་བཅོས་བསྒྱུར་སྒོ་འབྱེད་ཀྱི་སྲིད་ཇུས་རྒྱ་ཆེར་སྤེལ་བའི་སྐབས་མི་རིགས་རིག་གནས་སླར་གསོ་བྱས་པ་དེས་ང་ཚོར་ལྷག་པར་བག་ཆགས་བཟང་བོ་བཏབ་ཡོད་པ་རེད། ངའི་བསམ་པར་རྒྱ་ཡིག་གི་ལམ་ནས་སྙན་ངག་འབྲི་བའི་བོད་ཀྱི་སྙན་ངག་པར་བས་མཐའ་པའི་ཁྱད་ཆོས་ལྡན་ཏེ། ང་ཚོ་ནི་རིག་གནས་རིགས་གཉིས་ཀྱི་འབྲེལ་མཚམས་སུ་འཚར་ལོངས་བྱུང་བ་ཡིན་པས། ཕན་ཚུན་ལ་རྐྱ་ཐེབས་པའི་རིག་གནས་གཉིས་ཀྱི་གདོང་ཐུག་པའི་གསོན་ཤུགས་དང་རྐྱོང་ཤུགས། ཐ་ན་ཟློས་གར་གྱི་རང་བཞིན་དེ་དག་ང་ཚོས་སྔར་ནས་ཉམས་སུ་མྱངས་ཡོད་ཅིང་། ཕྱིས་སུ་རང་ཉིད་ཀྱིས་ཧྲང་ཧའེ་རུ་ནུབ་རྒྱུད་ཀྱི་འཚོ་བ་དང་གྲོང་ཁྱེར་ཆེན་པོའི་འཚོ་བ་སྐྱེལ་སྟངས་ཀྱི་གདོང་ཐུག་ཉམས་སུ་མྱངས་པ་མཐའ་དག་ང་ལ་མཚོན་ན་རྒྱུས་མངའ་གཏན་ནས་མེད་པའི་འཇིག་རྟེན་གསར་པ་ཞིག་ཡིན་པས། ངས་དེའི་ཁྲོད་ནས་ཚད་མེད་ཀྱི་གསོན་ཤུགས་མྱངས་ཡོད།

　　ངའི་སྙན་ངག་གི་རྨང་གཞི་ནི་མཐོ་འབྲིང་དང་སློབ་ཆེན་སྐབས་ཀྱི་དཔེ་ཀློག་གི་བློ་བསྐྱེད་དང་དཔེ་ཀློག་ཟིན་བྲིས་ལས་བྱུང་བ་ཡིན། ངས་མཐོ་འབྲིང་དགེ་རྒན་གྱིས་ང་ཚོར་ཟིན་བྲིས་འབྲི་བའི་གོམས་གཤིས་བཟང་པོ་ཞིག་གསོ་སྐྱོང་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དཔེ་ཀློག་ཟིན་བྲིས་དེ་དག་གིས་ངའི་གསར་རྩོམ་གྱི་ལམ་བུ་རིང་དུ་བསྲིངས་པར་མ་ཟད། ངའི་རྩོམ་རིག་གི་རྟོགས་པ་དང་བློ་སྦྱོང་ལ་ཕུན་སུམ་ཚོགས་པའི་སྟོབས་ཤུགས་བསྩལ། 1987ལོ་ནས་བཟུང་ངས་ལོ་རེར་སློབ་གྲྭའི་ཚགས་པར་དང་དུས་དེབ་སྟེང་སྙན་ངག་ཁ་ཤས་བཀོད་པར་མ་ཟད། ཞིང་ཆེན་རིམ་པའི་དུས་དེབ་སྟེང་དུའང་སྙན་ངག་སྤེལ་མགོ་ཚུགས།

　　2002ལོར། ངའི་སྙན་ངག་ཕྱོགས་བསྒྲིགས་ཀྱི་དེབ་གསར་པ་ཞིག་དཔེ་སྐྲུན་བྱས་ཏེ་ཀློག་མཁན་ཀུན་གྱི་སྤྱན་ལམ་དུ་བཀྲམས་པ་དེ་ནི་ངའི་གཞོན་པའི་དུས་སྐབས་ཀྱི་འཚོ་བའི་སྤྱི་བསྡོམས་ཤིག་ཡིན། ཕྱིས་སུ། ངའི་འཚོ་བ་ནི་ཕྱེད་ཀ་སྒྲིག་གཞིའི་ནང་དུ་ཚུད་ཅིང་ཕྱེད་ཀ་ཚོང་རའི་དཔལ་འབྱོར་གྱི་རླབས་རྒྱུན་ཁྲོད་དུ་ཐིམ་པས་སྙན་ངག་གསར་རྩོམ་གྱི་གྲངས་འབོར་ཡང་མངོན་གསལ་གྱིས་ཉུང་དུ་ཕྱིན་ཡོད། 2010ལོའི་རྗེས་སུ། སྤྱི་ཚོགས་ཡོངས་ཀྱི་དངོས་པོའི་རིང་ལུགས་ཀྱི་འཚོལ་སྙེག་རྣམ་པ་རིམ་གྱིས་འཇགས་པར་གྱུར་ཞིང་། བསམ་པའི་འཚོ་བའི་དགོས་མཁོ་ཉིན་བཞིན་སླར་གསོ་བྱུང་བ་རེད། སྐབས་འདིར། ང་ནི་ཏག་ཏག་དུས་རབས་ཀྱི་གོམ་སྟབས་དང་ཉེ་བར་བཅར་ཏེ་རང་ཉིད་ཀྱི་འཚོ་བ་ཡང་རིམ་གྱིས་ངང་ཐུང་འཚབ་འཚུབ་ཁྲོད་ནས་ལྷིང་འཇགས་སུ་གྱུར་ཞིང་དེང་རབས་དང་སྲོལ་རྒྱུན་གཉིས་འགལ་འཐབ་བྱུང་བའི་རིག་གནས་གསར་པ་ཞིག་གི་པང་དུ་ཞུགས།

　　1986ལོ་ནས་1990ལོའི་བར་ནི་ངས་སྙན་ངག་གསར་རྩོམ་བྱེད་པའི་དུས་རིམ་དང་པོ་ཡིན་ཞིང་། ཏན་ཏན་སྤྲོ་སེམས་བརྟས་པ་ཁོ་ནར་བརྟེན་ནས་གསར་རྩོམ་བྱེད་ཀྱི་ཡོད། 1990ལོ་ནས་2000ལོའི་བར་དུ། ངས་སྙན་ངག་གི་གཞུང་ལུགས་དང་སྙན་ངག་པའི་བརྩམས་ཆོས་མང་པོ་ཞིག་བཀླགས་ཤིང་། འཛམ་གླིང་སྙན་ངག་གི་ཟུར་ཚད་ནས་རང་གི་སྙན་ངག་ལ་ཕྱིར་ལྟ་བྱས་ཏེ། སྙན་ངག་གསར་རྩོམ་གྱི་ཁ་ཕྱོགས་གཏན་འཁེལ་བྱས་པས། བཀོལ་སྤྱོད་ཀྱི་ངོས་ནས་བཤད་ན་ཅུང་རང་དབང་ལྡན་པའི་དུས་རིམ་ཞིག་ཏུ་བསྙེགས་ཐུབ་པ་བྱུང་། 2010ལོ་ནས་བཟུང་ངའི་སྙན་ངག་གསར་རྩོམ་གྱི་རྣམ་པ་དེ་དུས་རིམ་གསུམ་པར་སླེབས་ཡོད་པ་དང་། དེ་ནི་སྙན་ངག་གི་ནང་དོན་ཐད་ནས་བརྗོད་ན། སེམས་ཁམས་ཉམས་ལེན་ངོས་ལ་གཞོལ་བ་ལྷག་ཏུ་མངོན་གསལ་ཆེ་ཞིང་། ཚིག་དང་ཡིག་འབྲུའི་དོན་སྙིང་ལ་བསྙབས་ཏེ་འཚོ་བའི་ཟབ་ས་སྔར་བས་སྔོག་འདོན་བྱས་པས། སྙན་ངག་གི་རྒྱབ་ལྗོངས་ལ་རྒྱ་བོད་ཀྱི་རིག་གནས་དང་ནང་བསྟན་རིག་པ་སོགས་མཉམ་འདྲེས་ཐུབ་པ་བྱུང་སྟེ་རྩོམ་རིག་གི་སྤྱི་ཚོགས་ནུས་པ་ཤུགས་དང་ལྡན་པར་གྱུར།

　　བོད་ཀྱི་སྙན་ངག་པ་ཞིག་ཡིན་པའི་ངོས་ནས་བརྗོད་ན། བོད་ཀྱི་སྲོལ་རྒྱུན་རིག་གནས་ཁྲོད་དུ་འཚོ་བར་འཚོལ་སྙེག་བྱེད་བདེ་བོ་བྱུང་བ་འདི་ནི་རང་བྱུང་གི་མཐུན་རྐྱེན་ཞིག་ཡིན་པས། རྒྱ་ཆེ་ཞིང་གཏིང་ཟབ་པའི་སྲོལ་རྒྱུན་རིག་གནས་དང་ཁོར་ཡུག་གསར་བ་འདིའི་ཁྲོད་དུ་གསར་རྩོམ་བྱེད་པ་ནི་ལས་སྐལ་ཡག་པའི་སྙན་ངག་པ་ཞིག་ཏུ་བརྩི་ཆོགང་ལ་ཤུགས་རྐྱེན་ཐེབས་མྱོང་བའི་རྒྱལ་ནང་གི་སྙན་ངག་པ་ནི་སུང་ལིན་དང་། ཀྲང་ཞའོ་པོ། ལུའོ་དབྱི་ཧོ། ཧའེ་ཙེ། ཞི་ཁྲོན། ཁའེ་ཡུས་སོགས་དང་། རྩོམ་པ་པོ་ནི་ལིན་པའེ་སོགས་ཡོད། ལྷག་པར་དུ་ཁའེ་ཡུས་ཀྱིས་བརྩམས་པའི་《དཔེ་མཛོད་ཁང་》 གི་སྤྲོས་བརྗོད་བྱེད་སྟངས་དང་དེ་མིན་ལིན་པེའི་མུ་འབྲེལ་བརྩམས་ཆོས་ཀྱིས་ངའི་དུས་རབས་20པའི་ལོ་རབས་90པའི་སྙན་ངག་གི་གསར་རྩོམ་ལ་ཤུགས་རྐྱེན་ཟབ་མོ་ཐེབས་ཡོད། དེར་མ་ཟད། ད་དུང་རྒྱ་ཡིག་ཏུ་བསྒྱུར་བའི་ཕྱི་རྒྱལ་གྱི་སྙན་ངག་པ་ནེ་རུ་ཌ། བྷོར་ཧེ་སི། ཤེག་སི་པེར། ཕུ་ཞི་ཅིན། ཡེ་སེན། ཚེ་ཝེ་ཐ་ཡ། ཕ་སི་སོགས་ཀྱི་བརྩམས་ཆོས་སྐོར་ཞིག་གིས་ཀྱང་ངའི་སྙན་ངག་གི་བརྗོད་གཞི་དང་སྒྱུ་རྩལ་ལ་ཕན་འབྲས་མི་ཉུང་བ་ཞིག་བསྐྱེད་བྱུང་།

　　སྙན་ངག་གི་གསར་རྩོམ་ནི་གོམས་གཤིས་ཤིག་རེད། འཚོ་བའི་གནོན་ཤུགས་དང་། མྱོང་གྲུབ། འཚོ་བའི་གོམ་སྟབས་སོགས་ཀྱིས་རིམ་བཞིན་གོམས་གཤིས་དེ་རྩ་མེད་དུ་གཏོང་གིན་ཡོད། གོམས་གཤིས་དེ་རིགས་བསྐྱར་དུ་གསོ་སྐྱོང་བྱས་ཏེ་ཀུན་ལ་རྒྱུས་མངའ་ལོན་པར་བྱེད་ན་སྙན་ངག་པའི་བསམ་བློའི་ཚད་རིམ་ཇེ་མཐོར་བཏང་སྟེ་སྒྱུ་རྩལ་གྱི་འགུགས་ཤུགས་ཇེ་དྲག་ཏུ་གཏོང་དགོས། དེ་བས། སྙན་ངག་གི་གསར་རྩོམ་ནི་རང་ཉིད་ཀྱི་ཉམས་མྱོང་དང་ཐུན་མིན་གྱི་ཚོར་སྣང་ཡོད་ཚད་སྤྱི་ཚོགས་ཀྱི་ཀློང་ལ་བཅོལ་བའི་ཐབས་ཤེས་ཡག་པོ་ཞིག་ཏུ་གྲུབ་འདུགཟུར་ཚད་མི་འདྲ་ན་བསམ་བློ་གཏོང་ཕྱོགས་ཀྱང་མི་འདྲ། བོད་ཀྱི་སྲོལ་རྒྱུན་རིག་གནས་དང་གཞན་པའི་རིག་གནས་སྣ་ཚོགས་ལ་ཉམས་ཞིབ་བྱས་པའི་རྟོགས་སད་ལས་སྙན་ངག་པས་སླར་ཡང་རང་གི་ཉེ་འགྲམ་གྱི་ཡོད་ཚད་ལ་དེ་བས་གཏིང་ཟབ་ཅིང་ཞིབ་ཚགས་ལྡན་པའི་ངེས་ཤེས་རྙེད་ཐུབ་ཀྱི་ཡོད།

　　སྙན་ངག་ནི་སྐད་བརྡ་སྤྱོད་པའི་རྩེར་སོན་གྱི་སྒྱུ་རྩལ་ཞིག་ཡིན་ཞིང་། དེར་རང་ཉིད་ཀྱི་ཆོས་ཉིད་དང་། ཐབས་རྩལ། ཐབས་ཤེས། དཔེ་མཚོན་བཅས་ཡོད་པས། གནད་ལ་ཁེལ་ཞིང་ནོར་འཁྲུལ་མེད་པའི་སྒོ་ནས་རང་ཉིད་ཀྱི་བསམ་པའི་ཚོར་ཤེས་མཚོན་པར་བྱེད་བསམ་ན། ལོ་མང་རིང་ཞིབ་འཇུག་དང་། བསམ་གཞིགས། ལག་ལེན་བཅས་ཟམ་མི་ཆད་པར་བྱེད་དགོས། སྙན་ངག་ནི་ལྷན་སྐྱེས་ཀྱི་རིག་པ་ཞིག་ཀྱང་ཡིན་ལ། དེ་ནི་སེམས་ཀྱིས་བཏང་བའི་གླུ་དབྱངས་ཀྱི་རང་བྱུང་གི་མངོན་ཚུལ་ཞིག་ཀྱང་ཡིན། ང་ཚོའི་རིག་གནས་ལ་ཕུན་སུམ་ཚོགས་པའི་ནོར་བུ་ཡོད་པས་ང་ཚོའི་སྙན་ངག་དང་མི་ཚེར་ཁྱད་ཆོས་སྣ་མང་གིས་ཕྱུག་ཡོད། ང་ཚོས་ལོ་མང་རིང་སློབ་སྦྱོང་དང་། རྟོགས་སད། ལག་ལེན་བཅས་ཟམ་མི་ཆད་པར་སྤེལ་ཏེ། རིག་གནས་སྣ་མང་གི་ཐོག་ནས་སེམས་ཁམས་ཀྱི་འཇིག་རྟེན་སྔོག་འདོན་བྱེད་དགོས་ཤིང་། གསར་རྩོམ་གྱི་རྣམ་འགྱུར་དེ་འདྲའི་བརྟུལ་ཞུགས་ལྷུར་ལེན་པ་ནི་ངའི་ད་ལྟའི་“མཐོ་ས་ནས་འཚོ་བ་སྐྱེལ་བ་”ཞེས་པ་དེ་ཡིན་ནོ། །

                                            རྡེའུ་དཀར་ནག་གིས་རྒྱ་ཡིག་ནས་བསྒྱུར།

རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།