ཁོ་ཚོས་ད་ལྟ་ཅོག་ཙེའི་སྟེང་གི་ཆང་གི་ཁ་འབྱེད་བཞིན་འདུག ཐུར་མ་མ་འགུལ་བའི་སྔོན་ལ། རང་གི་མདུན་གྱི་ཆང་ཕོར་གསུམ་སྒོག་གེར་འཐུང་ཚར་རྒྱུ་རེད། མི་ཞིག་གིས་ཕྱི་ནས་ཁོ་བོས་བྱུང་། མི་དེ་རྟ་བཞོན་ཡོད་པས། རྟ་ཕོའི་རྨིག་སྒྲ་ཐོས་ཐུབ།མི་དེས“ཁྱོད་ཀྱི་གྲོགས་པོ་མ་ཅེ་ལོན་གྱིས་ཁྱོད་འབོད་ཀྱིན་འདུག”ཅེས་ཟེར།

　　“དོན་དག་ཅི་ཞིག་རེད།”

　　“ཁྱོད་ལ་ལབ་རྒྱགས་གི་ཤོག་ཟེར།”

　　དེ་སྐད་བཤད་མ་ཐག་མི་དེས་རྟ་ལ་ལྕག་གིས་བྲབས་ནས་བུད་སོང་།

　　མ་ཅེ་ལོན་གྱི་ཕྱུགས་ར་དང་གྲོང་རྡལ་བར་དུ་བར་ཐག་སྤྱི་ལེ་བཅུ་ཕྲག་ཁ་ཤས་ཡོད།ཚང་མས“ཆང་རག་ཐུངས།འགྲོ་མི་འགྲོ་སང་ཉིན་བཤད་”ཅེས་སྐད་ཅོར་བརྒྱབ། ཁོས་ཅོག་ཙེའི་སྟེང་གི་ཆང་འཐུངས་ཀྱང་ཐུར་མ་ཡིས་ཚོད་མ་མ་ཟོས་པས།ཚང་མའི་གདོང་དུ་མི་དགའ་བའི་རྣམ་འགྱུར་ཞིག་མངོན་ཏེ“རྒན་མོ་ཞིག་ཁྲིད་ནས་ལབ་བརྒྱབ་ན་ལོས་ཆོག་། ཁྱོད་ངེས་པར་འགྲོ་དགོས་དོན་ག་ལ་ཡོད”ཅེས་ཟེར། མ་ཅེ་ལོན་གྱིས་ཕྱུགས་ར་ན་བ་གླང་མང་པོ་འཚོས་ཡོད། ཁོ་ཡང་མ་ཅེ་ལོན་གྱི་བ་གླང་ལ་དགའ། ཁོས“དགོངས་པ་མ་འཚོམས།ང་འགྲོ་དགོས་འདུག”ཅེས་བཤད། ཚང་མ་གཞུག་ན་ཧོན་ཐོར་ཡོད་ཀྱང་།ཁོས་དེ་ལ་ཁ་ཡ་མི་བྱེད་པར་དེ་མ་ཉིད་དུ་སྒོར་བུད་སོང་།

　　ཁོ་རྟ་ལ་བཞོན་ནས་མཐུར་མདའ་ཡིས་གསིག་འཐེན་ཞིག་བྱས་པ་ན། རྟ་ཡིས་རྨིག་སྒྲ་སྒྲོག་བཞིན་ལམ་དུ་འདུར་རྒྱུག་བྱས།ཁོ་གྲོང་རྡལ་གྱི་མཐའ་རུ་སླེབས་གྲབས་ཡོད་དུས།ཁོས་རྟ་ཁ་དཀྱུ་བཞིན་གྲོང་རྡལ་ནང་དུ་ཕྱིར་ལོག ཁོས་རྟ་བཞོན་ནས་ཚོང་ཁང་ཞིག་གི་སྒོ་ཁར་སླེབས་ཤིང་།དེ་ནས་རྟར་བཞོན་ཏེ་ཚོང་སྒྲོམ་གྱི་མདུན་དུ་བཅར། ཚོང་ཁང་ནང་གི་མི་ཚང་མས་མགོ་བོ་བཏེགས་ནས་ཁོ་ལ་བལྟས། ཁོའི་རྟ་ཡིས་སྣ་སྦྲིད་བསྟུད་མར་བརྒྱབ་བྱུང་བས། སྦྱིན་བདག་གིས་ཁོ་ལ“ཅི་ཞིག་དགོས་སམ”ཞེས་དྲིས། ཁོས་རྟ་གོང་ནས་འདི་དང་ཀན་ཞེས་མཛུབ་མོས་བསྟན་པས།སྤྱིན་བདག་གིས་མགྱོགས་མྱུར་ངང་ནས་ཚོང་སྒྲོམ་སྟེང་དུ་ལྗང་མདོག་གི་ཀ་ར་གྲུ་བཞི་ཅན་དང་།ཡུན་ནན་རྟགས་ཅན་གྱི་ཇ་ཐུམ་ཞིག་བཅས་བཞག་པར་མ་ཟད།ད་དུང་དབྱི་ལི་རྟགས་ཅན་གྱི་ཆང་དམ་བེ་བཞིའང་བཞག་སོང་། བདག་པོས་ཁོ་ལ“ད་དུང་ཅི་ཞིག་དགོས”ཞེས་དྲིས། ཁོའི་མིག་གིས་ཡར་བཙལ་མར་བཙལ་བྱས་པས།ད་གཟོད་བ་དམ་དང་རྒྱ་སྲན་མཐོང་བྱུང་བས།ཁོས་ཀན་དགོས་ཟེར། སྦྱིན་བདག་གིས་བ་དམ་དང་རྒྱ་སྲན་ཁུག་མ་འགའ་བླངས་ནས་ཁོ་ལ“ཅ་ལག་བཟང་བོ་ཧ་ཅང་མང་བས་ད་དུང་ཅི་དགོས་”ཞེས་དྲིས་པ་དང་།མེ་ཏོག་གངས་ལྷ་དམར་པོ་རྟགས་ཅན་གྱི་དུ་བ་ཤོག་ཐུམ་གཉིས་བླངས་ནས་བསྟན་པས།ཁོས་དུ་བ་ཤོག་ཐུམ་དེ་གཉིས་བླངས། ཡང་སྤྱིན་བདག་གིས་ཨ་ཧྥན་ཐི་རྟགས་ཅན་གྱི་འདག་ཕྱེ་ཁུག་མ་གཉིས་ལག་ཏུ་བླངས་ཏེ་ཁོ་ལ་བསྟན་པས།ཁོས་ཁ་ནས་ཨུན་ཞེས་ཟེར་རུང་ངོ་མདོག་ཤོར་བས།སྦྱིན་བདག་དོགས་མི་བདེ་བར་བཟོས།འགྲམ་གྱི་མི་ཚང་མ་དགོད་བཞིན་དུ་“ཁོ་ནི་བུད་མེད་མ་རེད།བུད་མེད་རྣམས་ཀྱིས་ད་གཟོད་འདག་ཕྱེའི་རིགས་ཉོ་བ་རེད”ཅེས་ཟེར། ཁོས་ཚོང་སྒྲོམ་སྟེང་གི་ཅ་ལག་སྟོན་བཞིན“ང་ལ་བསྡུ་གསོག་ཡག་པོ་བགྱི་རོགས” ཞེས་ཟེར་བས།སྦྱིན་བདག་གིས་སྦྲུལ་ལྤགས་ཀྱི་ཁུག་མ་ཞིག་བཙལ་ནས།དེའི་ནང་དུ་ཀ་ར་དང་ཇ་ཐུམ་བཅུག་ཅིང་།དབྱི་ལི་རྟགས་ཅན་གྱི་ཆང་དམ་བེ་བཞི་བོ་ཡང་དེའི་ནང་དུ་འཇོག་སྐབས།ཁོས་ལག་པ་བསྲིངས་ནས་ཆང་དམ་བེ་ཞིག་བཟུང་།དེ་དང་བསྟུན་ནས་རྟ་ཡི་མགོ་བོའང་ཚོང་སྒྲོམ་ལས་ཕྱིར་བུད་པས།ཅུང་ཙམ་མིན་ན་སྦྱིན་བདག་ཀྱང་སར་བསྒྱེལ་བྱུང་ལ།སྦྱིན་བདག་ཚོང་རྫས་སྒྲོམ་སྟེགས་ལ་མི་འཁེན་ཐབས་མེད་དུ་གྱུར། ཁོས་དབྱི་ལི་རྟགས་ཅན་གྱི་ཆང་དམ་བེ་རེ་རེ་བཞིན་ཁུག་མའི་ནང་དུ་བཞག་པ་དང་།རྟ་སྒའི་ཕྱོགས་གཉིས་ཀྱང་གྲི་ཡི་སོ་ཁ་བཞིན་འབུར་ཡོད།ཁོས་སྦྲུལ་ལྤགས་ཀྱི་ཁུག་མ་རྟ་སྒའི་སྟེང་དུ་བསྡམས་ཤིང་།དེ་ནས་རྟ་ཁ་འཐེན་བཞིན་སྒོ་ཕྱིར་བུད།

　　གྲོང་རྡལ་ནས་ཕྱིར་སླེབས་རྗེས།རྟ་ཡི་གོམ་འགྲོས་ཇེ་དལ་དུ་སོང་བ་དང་རྨིག་སྒྲ་ཡང་ཆུང་བར་གྱུར་ཡོད། རྟས་རང་གི་བདག་པོ་འདི་འདྲ་ལ་དགའ་བ་ཤེས་པས།ད་གཟོད་ཁོའི་འདོད་པར་བསྟུན་པ་དང་མཚུངས། བདག་པོའི་སྒལ་ཚིགས་དྲང་མོ་ཡིན་མོད།འོན་ཀྱང་མགོ་བོ་ནང་དུ་གུག་ཡོད།ཁོས་བལ་བཟོས་ཕྱི་ལྭ་ཡི་གོང་བ་གཉིས་འགྲམ་པར་སྦྱར་ཡོད་ལ།མིག་ཟུང་གཉིས་འབྱེད་མ་འཛུམ་གྱི་ངང་དུ་ཡོད་པས།རྟ་གོང་ནས་སིག་འདར་རེ་བྱེད་དུས་མིག་ཟུང་ནས་འོད་འཁྱུག་པས།དེ་ནི་ཆུ་ཡིས་བྲན་པ་དང་གཉིས་སུ་མེད།རྟ་ཡིས་ལ་རིང་ཞིག་བརྒལ་མགོ་བརྩམས།ལ་འདབས་ནས་དམའ་ཞིང་ཁ་ཐོར་ཅན་གྱི་རི་སྒང་ཆེ་ཆུང་མང་པོ་མིག་ལམ་དུ་མངོན།རི་བོ་ཚང་མ་ནི་རྫ་མདོག་གི་བྱེ་མ་དང་བྲག་རྡོ་ཡིན་པས་རྩི་ཤིང་གིས་བསྐོར་བ་ཤིན་ཏུ་ཉུང་། ཡུན་གྱིས་རྩྭ་དང་རྔ་མོང་ཚེར་མ་ཇེ་ཉུང་དུ་སོང་བ་དང་།མཐར་རྔ་མོང་ཚེར་མ་ཡང་མཐོང་རྒྱུ་མེད་པར་གྱུར། ཁོ་རྟ་ཐོག་ཏུ་གཉིད་སོང་།

　　ཁོར་རྟ་ཐོག་ཏུ་གཉིད་པའི་ནུས་པ་ཡོད། བྱེ་མའི་རྡོ་ཟེགས་ཀྱི་རི་ཁུལ་དུ་སླེབས་སྐབས་ཁོ་གཉིད་ལ་ཤོར། ཁོ་ནི་རྩི་ཤིང་དང་འདྲ་བར་བྱེ་མའི་རྡོ་ཟེགས་ལ་རེ་བ་ཅི་ཡང་བཅངས་མེད། ཁོའི་སྐྲ་ལོ་རླུང་གིས་སྐྱོད་བཞིན་ཡོད།སྐྲ་ལོ་འཇིལ་ལིར་གྱུར་བ་ཡང་རླུང་གིས་བཟོས་པ་རེད།བྱེ་རྡུལ་ཁོའི་མགོ་ཐོག་ལ་ལྷུང་རུང་མི་འགྱང་པར་མཐོང་རྒྱུ་མེད་པར་གྱུར་ཅིང་།བྱེ་རྡུལ་སྐྲ་ལོའི་གསེང་ནས་མགོ་ལྤགས་སྟེང་དུ་ཟགས་ཟིན་ཡང་སྐྲ་ལོ་ཧ་ཅང་ནག་པོ་རེད། བྱེ་རྡུལ་ད་དུང་མར་འཐིམ་བཞིན་འདུག བྱེ་རྡོག་ཆེན་པོ་དེ་དག་འབུ་དང་འདྲ་བར་མགོ་ལྤགས་བརྟོལ་ལ་ཁད་འདུག ཁོས་སྔ་ས་ནས་བྱེ་རྡུལ་གྱིས་སོ་འདེབས་པར་གོམས་ཡོད་ཅིང་།དེ་ནི་ཤིག་དང་ཁྱད་པར་མེད་པས།མ་མཐར་ཡང་ཟ་འཕྲུག་ལངས་དུ་བཅུག་ངེས།ཁོ་ལ་དངོས་གནས་ཟ་འཕྲུག་ཅིག་ལངས་པ་རེད། ཁོས་ཁ་ནས་སྔུར་སྒྲ་སྒྲོག།ཁོའི་སྔུར་སྒྲ་ནི་སྐད་གྲགས་ཅན་ཞིག་རེད།

　　ཁོས་མལ་ཁྲིའི་སྟེང་དུ་སྔུར་བ་འཐེན་བཞིན་པས།ཁོའི་ཆུང་མས་ཁོའི་ཁ་ནང་དུ་ཆུ་བྲན་བཞིན་འདུག ཡིན་ནའང་ཆུ་ཡིས་ཀྱང་ཁོའི་སྔུར་སྒྲ་འགོག་མི་ཐུབ།དེམ་ནང་གི་ཇ་གདུས་བ་བཞིན་ཁོ་རྦད་དེ་གཉིད་ལ་ཤོར།ཁོའི་བཟའ་ཟླས་བཟོད་མ་ཐུབ་པར་མིག་ནས་མཆི་མ་འབྱིན་བཞིན་ངུས་ཤིང་།བཟའ་ཟླ་ངུས་མ་ཐག་ཁོའི་སྔུར་བ་མཚམས་ཆད་ལ་ཁོ་ཡང་སད་བྱུང་། གཞན་གྱི་ཆུང་མ་ནི་གཅར་ནས་ངུས་བ་རེད།ཡིན་ནའང་ཁོའི་ཆུང་མའི་ངུ་སྐད་ནི་ཁོའི་སྔུར་སྒྲ་ལས་བྱུང་བ་རེད།ཁོས་ཆུང་མར་གཅར་མ་མྱོང་།སྐྱེས་པ་གཞན་གྱིས་ཆུང་མར་གཅར་དོན་ཅི་ཡིན་ནམ། ཁོང་གིས་ཆུང་མར་གཅར་རྒྱུར་དགའ་བའི་མི་དེ་ཚོར་སྐྱེས་པ་ཕོ་ལ་ཕོ་ཉམས་དགོས་པས་ཆུང་མ་ལ་གཅར་དོན་ཅི་ཡིན་ནམ།ལག་པ་ནི་སྐྱེས་པ་ལ་ངོ་ཡ་དང་ཁ་གཏད་འཇལ་བྱེད་རེད་ཅེས་བཤད། གཞན་གྱིས་ཁོ་ལ་བུད་མེད་འདུལ་ཐབས་ཅི་ཡོད་ཅེས་སྐད་ཅོར་རྒྱགས་སྐབས།ཁོས་སྔུར་བ་འཐེན་དགོས་ཟེར། ཁོའི་ཆུང་མ་ཁོ་ལ་དགའ་ཞིང་ཁོའི་སྔུར་བ་ལ་ཡང་དགའ། སྔུར་སྒྲས་མོ་ངུ་རུ་འཇུག་ཀྱང་།སྔུར་སྒྲས་ཁྱོ་གའི་རང་གཤིས་གཏུན་པོ་དེ་འཆོས་ཐུབ། ཆུང་མས་ཁོ་ལ་གཡོག་བྱས་ཏེ་ཁྱིམ་ནི་ཡག་པོར་སྐྱོང་ཡོད།ཁོས་ཟ་རྒྱུ་འཐུང་རྒྱུ་རྒྱགས་ཚད་ཅིག་ལོངས་སུ་སྤྱད་མ་ཐག་ཉལ་ཁྲིའི་སྟེང་དུ་གསེག་ལོག་ཅིག་བྱས་པ་ན།མལ་ཁྲིའི་སྟེང་ནས་འགད་གཏོར་གནམ་གྲུ་ཆེ་གྲས་ཤིག་གནམ་ལ་འཕུར་འགྲོ། ཁོས་རང་ཉིད་ཀྱི་སྔུར་སྒྲ་ནི་ཟིལ་ཤུགས་དང་འགྲན་ཟླ་མེད་པའི་འགད་གཏོར་གནམ་གྲུ་ཆེ་གྲས་ལ་དཔེ་འཇོག་བཞིན་ཡོད། ཁོའི་ངོས་ནས་བརྗོད་ན་གཉིད་ནི་མཚམས་བཞག་པ་མ་ཡིན་པར་འཇིག་རྟེན་གསར་པ་ཞིག་གི་མགོ་ཚུགས་པ་རེད། སྔུར་བ་ནི་རྨི་ལམ་སྒྱུ་མའི་རྟ་ལ་ཞོན་པ་ཡིན་པས།ཁྱོད་ཀྱིས་ཤོད་དང་།འདི་ནི་ཅི་འདྲའི་ངོ་མཚར་ལྡན་པ་ཞིག་རེད་ཨང་།

　　མ་ཅེ་ལོན་ནི་ཁོའི་གྲོགས་པོ་བཟང་པོ་ཞིག་རེད།མ་ཅེ་ལོན་གྱི་ཁྱིམ་དུ་མགྲོན་པོར་འགྲོ་སྐབས།ཁོ་ལ་ངོ་མཚར་ཆེ་བའི་ཚོར་སྣང་ཞིག་འདུག ཁོ་རྟ་ཐོག་ཏུ་རི་འགུལ་མཚོ་སྐྱོམ་ལྟ་བུའི་ངང་ནས་གཉིད་ཐུབ།

　　ཁོ་དང་ཁོའི་རྟ་ནི་འབུམ་ཚོགས་བཤམས་འདྲའི་རི་མ་ཐང་དུ་འགྲོ་བཞིན་ཡོད་ལ།རི་སྒང་རེ་བརྒྱུད་ནས་འགྲོ་དུས་གཟུགས་པོ་གློ་བུར་དུ་ཕྱིར་གསེག་ཅིང་།ཡང་གློ་བུར་དུ་ནང་དུ་བསྒུར་འགྲོ་མོད།འོན་ཀྱང་རྟ་ཐོག་ནས་ལྷུང་མི་སྲིད། ཁོས་ཁོག་སྟོད་སྔ་གཞུག་ཏུ་བསྒུར་བ་མ་གཏོགས་གཡས་གཡོན་དུ་གཏན་ནས་བསྒུར་མི་སྲིད།གལ་ཏེ་གཡས་གཡོན་དུ་བསྒུར་ན་རྟ་གོང་ནས་ལྷུང་བའི་ཉེན་ཁ་ཡོད།སྐབས་འགར་ལམ་ཧ་ཅང་དོག་ཅིང་།ལམ་ངོས་ཚང་མ་རྡོ་ཟེགས་ཀྱིས་ཁེངས་པས།རྟ་གནམ་ལ་ལྡིང་ཞིང་།ཅུང་མིན་ན་ཁོ་སད་དེ་ལུས་ཡོངས་རྫོགས་རྔུལ་ཆུ་ཁེངས་བས།ཁོ་གཉིད་འབུ་ལས་འདྲོགས་ལ་ཁད་བྱེད་ཀྱང་།ཁོའི་ཀླད་པ་ནི་དབུགས་ལྒང་མ་ཡིན་པར།གཉིད་ཅི་འདྲ་ལྕི་རུང་ཁོའི་ཀླད་པའི་ནང་དུ་འཚང་ཐུབ། ཁོའི་མགོ་བོ་ཡར་བཀྱགས་པ་ན།རི་སྒང་ནི་མར་གཤམ་ན་རྟ་ཕོའི་རྨིག་འོག་ཏུ་ལྷུང་བ་དང་མཚུངས། ཁོ་དང་ཁོའི་མགོ་བོ་རྟ་སྒའི་སྟེང་དུ་ཀྲོང་ངེར་འགྱིང་པས་།ཉི་མ་དང་བྱ་རྒོད་མ་གཏོགས།ཁོའི་མགོ་བོའི་ཡན་དུ་བརྒལ་ཐུབ་མཁན་གཞན་ཅི་ཡང་མི་འདུག

　　ནམ་མཁའ་ནས་ལྗང་མདོག་གི་འོད་ཟེར་འཕྲོས་ཤིང་།རྩྭ་ཐང་ནི་ས་ངོས་ཀྱི་སྙོམས་ཐིག་ཏུ་མངོན་བྱུང་།རྟ་ཡིས་དགའ་སྤྲོའི་ངང་སྣ་སྦྲིད་ཅིག་བརྒྱབ་པས།ཁོ་ཡང་ལྗང་མདོག་གི་ཕང་བ་རུ་གཉིད་ལས་སད་བྱུང་། ཁོས་རྩྭ་ཐང་དུ་བ་གླང་གི་ཁྱུ་མཐོང་བྱུང་སྟེ།དེ་དག་ཚང་མ་ནི་འོ་མ་མང་པོ་འཇོ་ཐུབ་པའི་མ་གླང་ཁྲ་རིས་ཡིན་པ་དང་།དཀར་ནག་འདྲེས་མའི་བ་གླང་ཁྲ་རིས་དེ་དག་ནི་སྦྱར་གཟུགས་རི་མོ་ཞིག་དང་འདྲ། མ་ཅེ་ལོན་གྱི་བ་གླང་གི་རྒྱུད་པ་ནི་བ་གླང་འདི་དག་ལས་བཟང་། ཁོ་དང་ཁོའི་རྟ་བ་གླང་གི་ཁྱུ་དེའི་འགྲམ་ནས་ཕར་ལ་སོང་། དེ་གར་བ་གླང་འཚོ་བའི་སྐྱེས་པ་ཞིག་གིས་ཁོ་ལ་འཚམས་འདྲི་བྱས་པ་མ་ཟད།ད་དུང་ཐ་མག་རྐང་གཅིག་ཀྱང་ཁོའི་ཕྱོགས་སུ་གཡུགས་བྱུང་།ཁོས་ཀྱང་ཁོ་ལ་ཐ་མག་རྐང་གཅིག་ཕར་གཡུགས། ཕྱུགས་རའི་མི་ཚང་མས་ཁོ་ངོ་ཤེས།ཁོ་ནི་མ་ཅེ་ལོན་གྱི་གྲོགས་པོ་རེད།

　　མ་ཅེ་ལོན་གྱི་ཕྱུགས་རའི་ལྷས་ནི་སྟོང་པ་རེད།མ་ཅེ་ལོན་གྱི་བཟའ་ཟླས་ལྷས་རའི་ནང་ལྕི་བ་འཐུ་བཞིན་ཡོད། མོས་ཁོའི་ཁུག་མའི་ནང་གི་ཆང་དམ་དེ་མཐོང་རྗེས།ངག་ནས་ཁོ་ཐག་ཆད་པ་ལྟར་ཤུགས་རིང་ཞིག་འཐེན། ནམ་རྒྱུན་ཁོ་ཡོང་དུས་ཆང་གིས་བཟི་ཞིང་།མ་ཅེ་ལོན་ཡང་བཟི་ཡོད་ངེས།སྐྱེས་པ་གཉིས་ཆང་གིས་བཟི་དུས་ཅི་ལས་འདི་ལས་མེད་པས་ཁྱིམ་ནི་འཕྲོག་བཅོམ་བྱས་པ་དང་མཚུངས།བུད་མེད་དེ་ནི་ཁོ་གཉིས་ཀྱིས་ཆང་འཐུང་བར་མི་སྐྲག དེ་བས་ཁོ་གཉིས་ཀྱིས་ཅི་ལས་འདི་ལས་མེད་པའི་སྦྱོར་བ་ལ་སྐྲག་ངེས། སྐབས་འགར་ཁོ་གཉིས་ཀྱིས་ཆང་འཐུང་བ་ནི་བབ་ལྷོད་པོ་ཞིག་ཡིན་པས།ཆང་འཐུང་ཞོར་དུ་ལབ་རྒྱགས་པ་དང་།ཆུང་མ་ཡང་ཁོ་གཉིས་ཀྱིས་ལབ་རྒྱགས་པར་ཉན་རྒྱུ་དགའ།མོས་རྒྱུན་ཆད་མེད་པར་སྡེར་མའི་ནང་དུ་སྔོ་ཚལ་དང་ཤ་སྣོན་པ་བྱེད།དེ་ནི་ཁོ་གཉིས་བློ་ཡིད་ཚིམས་པའི་དུས་ཤིག་རེད། ཁོ་གཉིས་ཀྱི་གཟུགས་སྟོབས་རི་བོ་བཞིན་ཆེ་ཡང་། ཆང་རག་ཇི་ཙམ་འཐུང་ཡང་འཁྲུག་ཆ་མི་ཡོང་།ཆང་ནི་ཅི་ཞིག་རེད། དེ་ནི་ཤག་ཤག་ཏུ་བཞུར་བའི་ཆུ་མ་ཡིན་ནམ་། ཁོས་ཆང་མང་བོ་འཐུང་ཐུབ། ཡིན་ནའང་ཁོ་མ་ཅེ་ལོན་གྱི་དོ་ཟླར་མི་ཡོང་། རྒྱུན་དུ་ཁོ་སྔོན་ལ་བཟི་ན།མ་ཅེ་ལོན་གྱིས་ཀྱང་རང་ཉིད་བཟི་རུ་འཇུག་རྒྱུ་ལས་ཐབས་གཞན་མེད།དེ་ལྟར་མ་བྱས་ན་གྲོགས་པོའི་མདངས་མེད་པ་ལྟ་བུ་རེད། སྐབས་རེར་ཆང་འཐུང་དུས།མོས་རྒྱུན་པར་ཁོ་ལ་ཅེར་ནས་བསྡད་ཡོད།ཁོ་ལ་ཅེར་ནས་བསྡད་ན་ཁོ་སྐྱེས་པ་ཞིག་ཡིན་ཡང་ངོ་གནོང་སྲིད།

　　“སྲུ་མོ།ཁྱོད་ཀྱིས་ཅི་བྱེད་ཀྱིན་ཡོད་དམ།”

　　“སྲུ་མོས་ཁྱོད་བཟི་མི་འགྲོ་བསམ་ཡོད།”

　　“ཕུ་བོ་ཡང་བཟི་ཡོད་པ་མ་རེད་དམ།”

　　ཁོ་ཆང་གིས་བཟི་མ་བཟི་མཚམས་སུ་ཡོད་པས།ཁོས་ངེས་པར་དུ་མ་ཅེ་ལོན་སྔོན་ལ་བཟི་རུ་བཅུག་ན་འདོད་ཡོད།“ཕུ་བོ་ལགས།ཁྱོད་ནི་ཅི་འདྲའི་བརྟན་པོ་ཞིག་རེད།ངས་ཁྱོད་མགོ་ཡོམ་འཁོར་དུ་འཇུག་རྒྱུ་ཡིན” མ་ཅེ་ལོན་བགད་བྱུང་། བུད་མེད་དེས་བཤད་རྒྱུར“སྤུན་ཟླ་ཁྱོད་ཧ་ཅང་གླེན་པ་རེད།ཁྱོད་ནི་ཐག་རིང་ནས་ཡོང་བའི་མགྲོན་པོ་རེད།ཁོ་རང་བཟི་ཡང་འདི་ནི་ཁྱིམ་ཡིན་པས་ཅི་སྐྱོན།ཁྱོད་ཞག་འདུག་བྱེད་ན་མ་གཏོགས”ཞེས་ཟེར།

　　དེ་ལྟར་ཁོ་རྟ་བཞོན་ནས་གཉིད་པར་གོམས་ཡོད་པས།མ་ཅེ་ལོན་གྱིས་ཁོ་དང་ཆང་འཐུང་རུང་བཟི་ན་མཉམ་བཟི་དང་དྭངས་ན་མཉམ་དྭངས་བྱེད་པ་ལས་ཐབས་མེད།ཁྱད་དུ་འཕགས་པའི་ངང་ཚུལ་འདི་ལྟར་བྱུང་སྟེ།སུས་ཀྱང་འགྲན་མི་ནུས་བའམ་རྒྱལ་ཕམ་གྱི་དབྱེ་བ་འབྱེད་མི་ཐུབ་དུས་ལབ་རྒྱགས་འགོ་རྩོམ།ལབ་རྒྱགས་པའི་ནང་དོན་ནི་ཡངས་ཤིང་རྒྱ་ཆེ་བའི་ནམ་མཁའ་བཞིན་མུ་མཐའ་མེད་པ་ཞིག་རེད། ཕྱུགས་ར་ནི་མཐའ་འཁོབ་ཀྱི་ལུང་ཁུགས་དོག་མོ་ཞིག་གི་ནང་དུ་ཡོད་པས།ལབ་རྒྱགས་དུས་མ་ཅེ་ལོན་གྱིས་ག་དུས་ཡིན་ཡང་ཁོ་ལ་འགྲན་མི་ཐུབ།མ་ཅེ་ལོན་ནི་ཁོས་ལབ་རྒྱགས་པར་མཉན་རྒྱུར་དགའ་།ཕྱུགས་རའི་མི་ཚང་མ་ཁོས་ལབ་རྒྱགས་པར་དགའ།ཁོས་ལབ་རྒྱགས་པའི་ཁྱབ་ཁོངས་ནི་གྲོང་རྡལ་ཆུང་ངུ་དེ་ནས་ཁུའེ་ཐུན་དང་ཧྲི་ཧོ་ཙི།ཁྲང་ཅི་བཅས་ཡིན་ཅིང་།མཐར་ཝུའུ་ལུའུ་མུའུ་ཆི་ཡིན།དེ་ནི་ཁོ་འགྲོ་མྱོང་བའི་གྲོང་ཁྱེར་ཆེ་ཤོས་དེ་རེད།

　　ཁོ་གཉིས་ཆང་གིས་བཟི་བའི་དུས་ཇེ་ཉུང་དུ་འགྲོ་བཞིན་ཡོད་མོད།འོན་ཀྱང་སྲུ་མོས་མི་འདོད་པའི་རྣམ་འགྱུར་བསྟན་བྱུང་བས།ཁོས་སྙིང་ལ་སྡུག་པའི་བུད་མེད་དེ་ལ་ཀུ་རེ་ཚུལ་གྱིས“ཨ་ཅེ་ལོ་ལོ།ཁྱོད་ཀྱིས་དགོངས་དག་ཅིག་གནང་རོགས།ངེད་སྤུན་ཟླ་གཉིས་ལོ་ཕྱེད་ཀའི་རིང་དུ་བཟི་མ་མྱོང་”ཅེས་ཟེར། མོས“ཨ་ཅེ་ཁྱོད་ཚོའི་བཟི་ཉམས་ལ་དགའ་བོ་མེད”ཅེས་ཟེར་བས།མོར་དངོས་འབྲེལ་ཁོང་ཁྲོ་ལངས་སོང་།ཁོས་ཆང་དམ་བླངས་ནས་བུད་མེད་ལ་སྟོན་བཞིན“ད་ནི་དམ་བེ་ཉུང་ངུ་ཙམ་ལས་མེད།ཁྱོད་སྐྲག་མི་དགོས”ཞེས་གསལ་འདེབས་བྱས།

　　“ཁྱོད་ཀྱིས་ཨ་རག་བཟོ་གྲྭ་ཚུར་དབོར་ཡོང་ཡང་།ང་སྐྲག་གི་མི་འདུག ངས་ཁོང་ཕྱིར་བདས་ཟིན”

　　“སྲུ་མོ།ཁྱོད་ལ་ངོ་མ་སྙིང་རྗེ་མི་འདུག”

　　ཁོས་སྦྲུལ་ལྤགས་ཀྱི་ཁུག་མ་སྒོ་རའི་ནང་དུ་གཡུགས་པ་དང་།རྟ་གོང་ལ་བུད་ནས་རྐང་བ་ཡོབ་རྡེབ་ཅིག་བྱས་པས་རྟ་མདུན་དུ་བརྒྱུགས།བུད་མེད་དེ་ཡིས་སྒོ་རའི་ནང་ནས“ཁྱོད་ཀྱིས་ངེས་པར་དུ་ཁོ་ཕྱིར་འབོད་དགོས།ཁྱོད་ཚོས་ཁྱིམ་ནས་ཐུངས་དང་།ངས་ཁྱོད་གཉིས་ལ་ཤ་བཙོ་བ་ཡིན”ཞེས་སྐད་ཅོར་བརྒྱབ།

　　ཁོའི་ཡིད་ལ་རྒྱུན་ལྡན་མིན་པའི་ཚོར་བ་ཞིག་བྱུང་བས་ཁ་ནས་ཀི་རིང་ཞིག་བཏབ།མུ་མཐའ་མེད་པའི་རྩྭ་ཐང་དུ་ཆང་འཐུང་ན།ཅི་འདྲར་སྨྱོས་ཀྱང་ཅོག་ཙེ་དང་རྐུབ་སྟེགས་བཅག་འགྲོ་བར་སེམས་ཁྲལ་བྱ་མི་དགོས། ཁོ་དང་ཁོའི་རྟ་གཉིས་སྐྱི་སེར་རླུང་བུ་ཞིག་ཏུ་གྱུར་ཏེ།རི་སྒང་བརྒལ་དུས།ས་གཞི་ཆེན་པོས་དངོས་པོ་ཞིག་མིད་པ་དང་མཚུངས། ཁོ་ཡང་ནགས་ཚལ་དུ་འཛུལ་བས།སྡོང་བོའི་ལོ་མས་འདར་སིག་སིག་ཏུ་གླུ་ལེན་བཞིན་ཡོད།སྡོང་བོ་རྣམས་ད་ལྟ་ཡར་ལངས་བ་ནང་བཞིན་དྲང་ཞིང་མཐོ་རུ་བསྙེགས་ཡོད།

　　རྩྭ་ཐང་རིམ་བཞིན་རྒྱ་ཆེ་རུ་ཕྱིན་པས།དམའ་མོའི་རི་སྒང་དང་ཐར་ཐོར་དུ་གྱུར་བའི་ནགས་ཚལ་མཐོང་རྒྱུ་མི་འདུག མིག་ལམ་ནི་ཡངས་ཤིང་ཁོད་སྙོམས་པས།ཉི་མ་འཛུམ་གོར་རེར་ནམ་མཁའ་རུ་ཤར་ཡོད།ཁོས་ཉི་མ་ལ་བལྟས།ཉི་མས་ཁོང་གི་གྲོགས་པོ་མ་ཅེ་ལོན་གང་དུ་ཡོད་པ་ཤེས་སྲིད།མ་ཅེ་ལོན་ནི་རྩྭ་ཐང་དུ་བསྡད་ཡོད།མ་ཅེ་ལོན་ནི་ཨུ་རུ་སུར་སོང་ཡང་།ཉི་མས་ཁོ་མཐོང་ཐུབ་པ་རེད། ཁོས་རྟ་ཐོག་ཏུ་མགོ་བོ་དགྱེ་བཞིན་ཉི་མར་བལྟས་པ་ན།ཉི་མའི་བགྲང་ལས་འདས་པའི་འོད་ཟེར་ཁྲོད།འོད་ཟེར་ཉག་གཅིག་སྦོམ་ཞིང་རིང་པོར་གྱུར་ཡོད་པས།འོད་ཟེར་དེ་ཕོག་ས་ནི་མ་ཅེ་ལོན་ཡོད་སའི་ས་གནས་དེ་རེད། ཁོས་སྲབ་མདའ་ཡིས་རྟ་ཁ་དེའི་ཕྱོགས་སུ་དཀྱུས་ནས་བརྒྱུགས།

　　ཁོས་སྨུག་འདོག་གི་འབུ་སུ་ཧང་ཐང་བརྒལ་ཞིང་།མཐིང་མདོག་གི་རྩི་ཐོག་ཐང་བརྒལ་བ་ན།མིག་ལམ་དུ་ལུག་མིག་མེ་ཏོག་ཚོམ་བུ་མང་པོ་ཞིག་བཞད་པ་མཐོང་བྱུང་།ཁོའི་གྲོགས་པོ་མ་ཅེ་ལོན་ནི་གསེར་མདོག་གི་ལུག་མིག་མེ་ཏོག་ཁྲོད་དུ་བསྡད་ཡོད། ཁོའི་གྲོགས་པོ་མ་ཅེ་ལོན་གྱི་གདོང་ལ་འཛུམ་དམུལ་དམུལ་བྱེད་ཅིང་།འཛུམ་མདངས་དེ་ནི་མེ་ཏོག་ཁྲོད་དུ་བཞད་པ་དང་གཉིས་སུ་མེད།མ་ཅེ་ལོན་མེ་ཏོག་གི་གདན་ཆའི་སྟེང་སྐྱིལ་དྲུང་དུ་བསྡད་ཡོད་ལ།ངག་རྒྱུན་དུ་ཧ་སག་རྒྱལ་པོས་འདི་ལྟར་ཕྱིང་བ་དཀར་པོའི་སྟེང་དུ་བསྡད་དེ།འབྱེད་འཛུམ་གྱི་མིག་ཟུང་གིས་ཁོང་གི་མཛེས་སྡུག་ལྡན་པའི་རྩྭ་ཐང་ལ་བལྟས། མ་ཅེ་ལོན་གྱིས་མ་ནེ་ཡི་ཁ་སྤུ་ནག་པོར་བྱིལ་བྱིལ་བྱེད་བཞིན“ངའི་གྲོགས་པོ།ཁྱོད་བདེ་མོ”ཞེས་ཟེར་བ་དང་།ལག་པས་འགྲམ་གྱི་སྤང་ལྗོངས་བསྟན་པས་ཁོ་མ་ཅེ་ལོན་འགྲམ་གྱི་སྤང་ཁ་རུ་ལྟིག་སེ་བསྡད། ཁོས་རྐུབ་འོག་ཏུ་འབར་འབུར་དུ་གྱུར་བའི་ལུག་མིག་མེ་ཏོག་ཡོད་པ་ཚོར་ལ།ལུག་མིག་མེ་ཏོག་ནི་གཙག་དྲུབ་ཀྱི་གོས་ཆེན་བཞིན་མཛེས་པས།ཁོའི་ལག་པས་དེ་ལ་བྱིལ་བྱིལ་བྱས།དབྱི་ལི་རྟགས་ཅན་གྱི་ཆང་དམ་བེ་བཞི་རྔོན་ཁྱི་ཆུང་ཆུང་བཞི་དང་འདྲ་བར།ཁོའི་རྐང་བའི་སྣེ་རུ་ཙོག་པུར་བསྡད་ཡོད་པ་ལྟར་བཞག་འདུག། ཁོ་ལའང་དབྱི་ལི་རྟགས་ཅན་གྱི་ཆང་དམ་བེ་བཞི་ཡོད་ཅིང་།ཁོའི་དབྱི་ལི་རྟགས་ཅན་གྱི་ཆང་དམ་བེ་བཞི་བོ་ནི་གྲི་ཡི་སོ་ཁ་བཞིན་སྟོད་གོས་ཀྱི་ཁུག་མའི་ནང་དུ་བཅུག་ཡོད། མ་ཅེ་ལོན་གྱིས“ཁྱོད་ཀྱི་ཆང་ཁྱོད་རང་གིས་ཕྱིར་ཁྱེར་རོགས།ང་མ་ཅེ་ལོན་གྱིས་ཁྱོད་ལ་ཆང་ལྡུད་ལོས་ཐུབ།ད་དུང་སྒམ་ནང་དུའང་དམ་བེ་མང་པོ་ཡོད”ཅེས་བཤད།

　　“ང་ཁྱོད་ཀྱི་ཆང་ལ་དགའ།”

　　ཁོས་ཁུག་མ་ལས་རྒྱ་སྲན་དང་བ་དམ་བླངས་ཀྱང་འཇོག་ས་མེད་པས།འགྱིག་ཐུམ་གྱི་ཁ་ཕྱེ་ནས་བཞག་པར་མ་ཟད།ད་དུང་མ་ཅེ་ལོན་གྱིས་ཀྱང་འགྱིག་ཐུམ་ལས་རྒྱ་སྲན་འགའ་བླངས་ནས་ཟོས། ཁོ་གཉིས་ཀྱིས་མི་རེ་ཆང་དམ་བེ་རེ་བཟུང་ནས་འཐུང་བཞིན་ཡོད། རྒྱ་སྲན་ཁ་ཚ་བས་མ་ཅེ་ལོན་གྱིས“འདི་ཟ་རོགས”ཞེས་འགྲམ་ནས་ལུག་མིག་མེ་ཏོག་རྐང་ཅིག་བཏོགས་ནས་ཁ་ནང་དུ་བཞག་པ་ན།ཁོས་ཀྱང་ལུག་མིག་མེ་ཏོག་གཅིག་བཏོགས་ནས་ཁ་ནང་དུ་བཞག་པ་དང་།ག་ལེར་བལྡད་པས་ལྕེ་སྦྲིད་པ་དང་སྔོ་དྲི་བཙན་པོ་ཞིག་འཐུལ་འོང་།དེ་ནས་མགྲིན་པ་རུ་མིད་པ་ན།དྲི་ཞིམ་ཞིག་སྣ་ཁུང་ནས་ཕྱི་རུ་འཐུལ་ཡོང་།ཁོས“དྲི་མ་གློ་ཡི་ནང་དུ་འཐིམ་འགྲོ་བས།ཅི་འདྲའི་དྲི་བཙན་པོ་ཞིག་རེད་ཨང་”ཞེས་བཤད། མ་ཅེ་ལོན་གྱིས“ནམ་རྒྱུན་ཟ་བར་གོམས་ཟིན་པས་བྲོ་བ་མྱོང་མི་ཐུབ”ཟེར་བ་ན།ཁོས“ག་ལེར་བལྡད་ནས་བཟའ་རོགས་”ཟེར་བས།མ་ཅེ་ལོན་གིས་ཆུར་བ་ཟ་བ་བཞིན་དུ་གལ་ལེར་བལྡད་ནས་ཟོས་པ་ན།དྲི་ཞིམ་བཙན་པོ་ཞིག་སྣ་ཁུང་ནས་ཕྱི་རུ་ལྡང་ཞིང་།ཁ་ནས་སྐྱིད་སྣང་གི་ཧབ་སྦྲིད་ཅིག་ཀྱང་བརྒྱབ་བྱུང་། མ་ཅེ་ལོན་གྱིས་ཆང་ཁམ་གང་འཐུངས་པ་ན།ཁོས་ཀྱང་ཁམ་གང་འཐུང་། མ་ཅེ་ལོན་གྱིས“ངས་ད་དུང་ཧབ་སྦྲིད་ཅིག་རྒྱག་འདོད་འདུག”ཅེས་ཟེར་བ་དང་། ཁོས་འགྲམ་ནས་ལུག་མིག་མེ་ཏོག་ཅིག་བཏོགས་ནས་མིད་པ་ན་ཡང་ཧབ་སྦྲིད་ཅིག་བརྒྱབ་བྱུང་། མ་ཅེ་ལོན་གྱིས“ཧ་ཅང་སྐྱིད་པོ་འདུག ང་འདི་འདྲ་སྐྱིད་མ་མྱོང་”ཟེར་བས། ཁོས“འདི་སྣ་ཐ་རེད”་ཟེར། མ་ཅེ་ལོན་གྱིས་མིག་ཆེར་གདངས་ཤིང་ལག་ཏུ་ཡོད་པའི་ཆང་དམ་ཡང་དངངས་སྐྲག་སྐྱེ་བ་བཞིན་འོད་ཆེམ་ཆེམ་འཕྲོ་བཞིན་ཡོད། ཁོས“ཆིང་རྒྱལ་རབས་ཀྱི་རྒྱལ་བློན་དང་སྐུ་དྲག་རྣམས་ཀྱིས་ཐ་མག་འདི་ཡི་རིགས་འཐེན་བཞིན་ཡོད།ཁོ་ཚོས་ཐ་མག་འདིའི་རིགས་རིན་ཆེན་གཡང་ཊིའི་རྫེའུ་བུམ་ནང་དུ་བླུགས་ནས་སྣ་ཁུང་ནང་འཐེན་གྱིན་ཡོད”ཅེས་བཤད།།

　　“ཁ་ནང་དུ་འཐེན་བཞིན་མེད་དམ།”

　　“འོ་ལེ།ཁ་ནང་དུ་འཐེན་གྱིན་ཡོད་པ་མ་རེད།”

　　“དེས་ན་དེའི་རྫས་རྩྭ་ཐང་ནས་ཐོན་པ་ཞིག་ཡིན་ཁོ་ཐག་རེད།”

　　“རེད།དེའི་རྫས་ནི་རྩྭ་ཐང་ཐོག་གི་ལུག་མིག་མེ་ཏོག་རེད།”

　　ཁོས་རྩྭ་ཐང་གི་ལུག་མིག་མེ་ཏོག་ཅིག་བཏོགས་ཤིང་།དེ་ནས་“ཆིང་རྒྱལ་རབས་ཀྱི་མེས་པོ་ནི་བྱང་ཕྱོགས་རྩྭ་ཐང་ཆེན་པོའི་ཐོག་ནས་ཡོང་བ་ཞིག་རེད།པེ་ཅིང་དུ་སླེབས་སྐབས།ཕ་ཡུལ་གྱི་ཁྱད་ཐོན་དངོས་རྫས་དྲན་གྱིན་ཡོད་པས།རྩྭ་ཐང་གི་ནོར་བུ་དེ་དུ་བ་བཟོས་ཀྱང་ཁ་ནས་མི་འཐེན་པར་སྣ་ཁུང་ནང་བསྣམས་རྗེས་བྲོ་བ་ཚང་མ་ཐོན་གྱིན་འདུག”ཅེས་བཤད།

　　“རྩྭ་ཐང་གི་བྲོ་བ་འདི་ལས་བྲོ་བ་ཡག་པོ་ཞིག་གང་ན་ཡོད།”

　　“ད་རུང་ཧབ་སྦྲིད་ཀྱང་ཡོད།”

　　“ཧབ་སྦྲིད་བརྒྱབ་ན་ངོ་མ་སྐྱིད་གི་ཡ།”

　　ཁོས་ཧབ་སྤྲིད་ཅིག་བརྒྱབ་པ་དང་།མ་ཅེ་ལོན་གྱིས་ཀྱང་ཧབ་སྦྲིད་ཅིག་བརྒྱབ།

　　མ་ཅེ་ལོན་གྱིས“བུད་མེད་དྲན་དུས་ད་གཟོད་ཧབ་སྦྲིད་རྒྱག་ངེས།ཡིན་ནའང་རིན་ཆེན་ནོར་བུ་ཆུང་ཆུང་འདི་ཡིས་ཀྱང་ཧང་སྦྲིད་རྒྱག་ཏུ་འཇུག་ཐུབ”ཟེར་བ་དང་། མ་ཅེ་ལོན་གྱིས་རྩྭ་ཐང་གི་ལུག་མིག་མེ་ཏོག་ཅིག་བཏོགས་པ་ན།མེ་ཏོག་གི་གང་བུ་གནམ་ལ་འཕུར།མ་ཅེ་ལོན་གྱིས་ལག་པས་ཁོའི་ཕྲག་པར་རྡེབ་བཞིན“ནུ་བོ་ལགས།ཕུ་བོ་ང་ཁྱོད་ཀྱི་ལབ་རྒྱགས་པར་མཉན་རྒྱུར་དགའ།ཡ།ངེད་གཉིས་ཀྱིས་ཆང་ཐུངས”ཞེས་བཤད།

　　ཁོ་གཉིས་ཀྱིས་དམ་བེའི་ཁ་མཆུ་ལ་སྦྱར་ནས་སྒོག་གེར་འཐུང་པས།དམ་བེའི་ཁ་ནས་གླང་རྭ་བུས་བ་ལྟ་བུའི་སྒྲ་གྲག་བྱུང་།ཁོ་གཉིས་ཀྱིས་དམ་བེ་གང་རེ་འཐུངས་རྗེས།ཡང་བསྐྱར་དམ་བེ་གཉིས་པའི་ཁ་ཕྱེས། སོ་ཡིས་དམ་བེའི་ཁ་ལེབ་ཕྱེ་བ་ན།ཆང་དྲི་ཕྱི་རུ་འཐུལ་ཞིང་།ཆང་དྲི་ནི་དམ་ལས་ཐར་བའི་གདོན་འདྲེ་ཞིག་དང་འདྲ་བར།རྩྭ་ཐང་གི་ཕྱོགས་བཞི་མཚམས་བརྒྱད་དུ་ཁྱབ། མ་ཅེ་ལོན་གྱིས“ངས་ང་ལ་གདོན་ཞུགས་ཡོད་པ་ཤེས་སོང”ཟེར་བ་ན། ཁོས“ང་ཡང་དེ་འདྲ་རེད”ཅེས་ལན་བཏབ། མ་ཅེ་ལོན་གྱིས“འདི་ནི་ད་གཟོད་ངའི་སྤུན་མཆེད་དགའ་བོ་རེད།ངེད་གཉིས་ལ་གདོན་མཉམ་དུ་ཞུགས་ཡོད”ཅེས་བཤད།

　　ཁོ་གཉིས་ཀྱིས་ཆང་དམ་ཡར་བཀྱགས་ནས་ཉི་མ་ལ་བལྟས། མ་ཅེ་ལོན་གྱིས“ཉི་མ་བུད་མེད་དུ་གྱུར་འདུག།ཉི་མས་བྲང་ཁེབས་དམར་པོ་གྱོན་འདུག”ཅེས་བཤད། ཁོས་ཀྱང་ཉི་མའི་བྲང་ཁེབས་དམར་བོ་མཐོང་བས།ཉི་མ་ཤ་རྒྱགས་པོ་ཡིན་ཡང་།ཤ་ཚང་མ་བྲང་ཁེབས་དམར་པོས་བཏུམས་ཡོད་སྙམ།ཁོས་ཉི་མའི་བྲང་ཁེབས་དམར་པོ་དེ་གཤགས་པ་ན།དེ་ནི་དོན་དངོས་སུ་རི་མོར་བྲིས་པའི་རྟགས་བྱང་ཞིག་ཡིན་འདུག དབྱི་ལི་རྟགས་ཅན་གྱི་ཆང་གི་རྟགས་བྱང་ནི་མདོག་དམར་པོ་རེད།ཉི་མས་གོན་ན་ཤིན་ཏུ་འཚམ་པོ་རེད། ཁོས“ཧ་ཧ།ཉི་མ་ནི་ཁེར་རྐྱང་དུ་ལུས་འདུག”ཟེར་བས། མ་ཅེ་ལོན་གྱིས་ཀྱང་“ཉི་མ་ནི་བུད་མེད་ཅིག་རེད”ཅེས་སྐད་བརྒྱབ། ཁོས“ང་ཚོས་སྐད་ཆ་བཤད་ན་མཉམ་པ་འཇོག་དགོས་མ་གཏོགས་བུད་མེད་ཀན་གྱིས་ངེད་གཉིས་ལ་བལྟས་ཡོད”ཅེས་ཟེར། ཁོས་ལུས་པོ་དྲང་མོར་ལངས་ནས་བསྡད་པས།མ་ཅེ་ལོན་གྱིས་ཀྱང་ཁོག་སྟོད་ཡར་ལ་དགྱེ།མ་ཅེ་ལོན་གྱིས“ཁྱོད་ཀྱི་སྲུ་མོ་ནི་སྐད་ཆ་ལྡབ་ལྡིབ་བཤད་པར་དགའ་ཡང་།དོན་དངོས་སུ་མོ་ངེད་གཉིས་ཀྱིས་ཆང་འཐུང་བ་ལ་དགའ་ཞིང་།ཁྱོད་ཀྱིས་ལབ་རྒྱགས་པར་ཡང་དགའ”ཞེས་ཟེར།

　　“སྲུ་མོ་ནི་སྲུ་མོ་བཟང་པོ་ཞིག་ཡིན་པས།ངེད་གཉིས་ཀྱི་སྲུ་མོར་ཆང་ཞིག་འདྲེན།”

　　ཆང་དམ་བེ་གཉིས་མཉམ་དུ་ཐུག

　　ཁོ་གཉིས་ཀྱིས་ཆང་འཐུང་བ་དང་བསྟུན་ནས།ཡིད་ཀྱི་སྤྲོ་བ་དཔག་མེད་རྒྱས་པས་ཉི་མ་ལ་ཆང་དྲངས། ཁ་ནས་ཅི་བཤད་པ་ཉི་མས་མི་གོ་མོད།འོན་ཀྱང་ཉི་མས་ཁོ་གཉིས་ཀྱིས་ཆང་འདྲེན་བཞིན་པ་གསལ་པོ་མཐོང་བྱུང་བས།ཉི་མ་ཁོ་གཉིས་ཀྱི་འགྲམ་དུ་སླེབས།ཁོ་གཉིས་ཀྱིས་ཆང་རག་བཏུངས་ནས་ཨིག་ག་ཡང་ཡང་རྒྱག་མོད། འོན་ཀྱང་ཁོ་གཉིས་ཧ་ཅང་དྲང་མོར་ཙོག་ཡོད། མ་ཅེ་ལོན་གྱིས“ཆུང་མ་བཟང་མོ།དེ་རིང་ཚལ་མི་ཟ་བ་དང་ཤ་ཡང་མི་ཟ་བར།ཆང་རག་ཁོ་ན་འཐུང་ནས་ལབ་རྒྱག་ཆོག”ཅེས་བཤད། ཉི་མ་ལག་སྟོང་ཡིན་པས།ཅི་ཡང་འཁྱེར་མེད།ཉི་མ་སྣང་དོགས་ཅི་ཡང་མེད་པར་ཁོ་གཉིས་ཀྱི་འགྲམ་དུ་སླེབས་བྱུང་།མ་ཅེ་ལོན་གྱིས“ཆུང་མ་ཁྱེད་རང་བཞུགས”ཞེས་ཟེར་བཞིན་ལག་ཟུང་གིས་བསུ་བ་བྱས།ཁོས་ཀྱང་རང་གི་ལག་པ་འགུལ་ནས“སྲུ་མོ་རྒན་པ་ལགས།ཁྱེད་རང་སྡོད”ཅེས་བརྗོད། དེ་མ་ཐག་ཉི་མའི་ངོ་གདོང་དམར་པོར་གྱུར། མ་ཅེ་ལོན་གྱིས“ནུ་བོ་མ་རབ་ཁྱོད།ཁྱོད་རང་གི་སྲུ་མོ་རྒས་མི་འདུག་པས།ཁྱེད་ཀྱིས་སྲུ་མོ་རྒན་པ་ཟེར་ན་མོ་རང་ཁྲོ་ལངས་སྲིད”ཅེས་བཤད།

　　“སྲུ་མོ་ད་དུང་ན་ཚོད་གཞོན།”

　　“དེས་ན་ཁྱོད་ཀྱིས་སྲུ་མོ་རྒན་པ་ཞེས་མོ་རྒས་འདུག་ཟེར་བ་མིན་ནམ།”

　　“རྒན་པའི་དོན་ནི་བཟང་བོ་ཟེར་བ་རེད་ཡ།ང་ཚོ་ཀྲུང་གོ་བས་སུ་ལ་བརྩི་འཇོག་བྱས་ན་དེ་ལ་རྒན་པ་སུ་དང་རྒན་པ་གང་ཟེར་བ་མ་རེད་དམ།”

　　མ་ཅེ་ལོན་གི་གདོང་ལ་དགའ་བའི་འཛུམ་མདངས་རྒྱས་ཏེ“སྤུན་ཟླ་དགའ་བོ།ང་ཁྱེད་ཀྱིས་ལབ་རྒྱགས་པར་མཉན་རྒྱུ་དགའ་པོ་ཡོད”ཅེས་བཤད།

　　མ་ཅེ་ལོན་གྱིས་མིག་གིས་ཉི་མར་ཐེངས་གཅིག་བལྟས་ཏེ“ཆུང་མ་ལགས།ངས་ཁྱོད་ལ་སྙིང་སྡུག་མ་མི་ཟེར།སྙིང་སྡུག་མ་ཟེར་བ་ལས་ཆུང་མ་ཟེར་ན་བརྩེ་བ་འདུག”ཅེས་ཟེར་བ་དང་། མ་ཅེ་ལོན་གྱིས་ཉི་མ་ལ་གདོང་གཏད་ནས་ཆུང་མ་ཟེར་བ་དང་།ཁོས་ཉི་མ་ལ་གདོང་གཏད་ནས་སྲུ་མོ་ཞེས་བོས།

　　ཉི་མ་ནི་མཇོར་སྒེག་དང་མཚར་སྡུག་ལྡན་པ་མ་ཟད།གསེར་མདོག་གི་བཟབ་ཆས་སྤྲོས་ཡོད་པས།མོས་འོད་མདངས་བཀྲ་བའི་ཐུ་སྣེ་ལག་པས་བཟུང་ནས་ཕར་ལ་ཆས།

　　“ཁྱོད་ཀྱི་སྲུ་མོ་ནི་འདི་འདྲ་རང་ཡིན་པས།མོ་ལ་སྔོ་ཚལ་བཙོ་དགོས་ཞེས་མ་བཤད་ཀྱང་མོས་བཙོ་ཁོ་ཐག་ཡིན།”

　　ཉི་མ་ནི་ལྗང་མདོག་གི་རྩྭ་ཐང་དུ་བཞུགས་ཡོད།རྩྭ་ཐང་དུ་འོད་ཆེམ་ཆེམ་འཕྲོ་བཞིན་ཡོད། རྩྭ་ཐང་གི་བུད་མེད་ཚང་མས་འདི་ལྟར་ཟ་མ་གཡོ་སྐོལ་བྱེད་བཞིན་ཡོད།ཁོ་ཚོས་ཨོང་བ་སྐམ་པོ་མེར་བསྒྲོན་པ་དང་དེའི་སྟེང་འོ་ཇ་བསྐོལ་བ་དང་ཤ་བཙོ་ངེས།

　　“རྩྭ་ཐང་གི་བུད་མེད་རྣམས་ནི་ལས་སླ་མོ་མ་རེད།ཁྱིམ་དུ་སྐྱེས་པ་ཚོར་གཡོག་བྱེད་དགོས་ལ།སྐྱེས་པ་ཚོ་ཕྱིར་རུ་སོང་ཤུལ་ནས་སྒོ་ཕྱུགས་དང་མཉམ་དུ་གུར་ནང་དུ་ཉལ་དགོས།”

　　“སྲུ་མོ་ཁྱོད་ཀྱི་རྗེས་འབྲངས་ནས་རྩྭ་ཐང་གི་ཁུགས་སྣེ་མང་པོར་བསྐྱོད་མྱོང་།”

　　“བེའུ་ཕྲུག་བཙས་མ་ཐག་གསོ་དགོས་ལ།རྩྭ་ཐང་གི་རྩྭ་ཆུ་གང་བཟང་ན་རུ་དེ་ལ་སྤར་དགོས།ད་ཆ་བེའུ་ཕྲུག་རྣམས་ཤ་ཤེས་རྒྱས་ཏེ་འདིར་ལྟར་གྱུར་ཡོད།”

　　མ་ཅེ་ལོན་གྱིས་པང་ནས་ཤོག་ལེབ་ཅིག་བླངས་བ་ན་ཤོག་སྒྲ་ཧྲག་ཧྲག་ཏུ་གྲགས། དེ་ནི་དངུལ་འཛིན་ཡི་གེ་ཞིག་རེད།སྟེང་དུ་ཁུའེ་ཏུན་གྱི་བཟའ་བཅའི་བཟོ་གྲྭ་ཞིག་གི་ཐེམ་ག་བརྒྱབས་ཡོད།དངུལ་གྱི་གྲངས་ཀ་ནི་སྒོར་འབུམ་གཅིག་དང་ཁྲི་གཉིས་ལྔ་སྟོང་རེད།

　　“སྤུན་ཟླ་ཁྱོད་ཕྱུག་པོ་ཆགས་འདུག ཁྱོད་ཀྱིས་ཅི་ཞིག་བཤད་བཞིན་ཡོད།”

　　“བ་གླང་མང་པོ་ཞིག་ཕྱི་རྒྱལ་གྱི་ཨང་ཀིར་གྱུར་འདུག ད་འདི་ཅི་རེད་ཟེར་དགོས།”

　　“དེ་ནི་དངོས་འབྲེལ་མགོ་ན་བའི་བྱ་བ་ཞིག་རེད།”

　　“སྤུན་ཟླ།ངའི་མགོ་ན་ཡི་འདུག ཁྱོད་ཀྱི་སྲུ་མོའི་མགོ་ཡང་ན་གི་འདུག”

　　“མོར་སྐྱོན་མེད།ང་ཡོང་དུས་མོས་ཕྱུགས་རའི་ནང་ལས་ཀ་ལས་བཞིན་ཡོད།ཕར་བལྟས་ན་མོའི་ནང་སེམས་སྤྲོ་བས་ཁེངས་ཡོད།”

　　ཉི་མས་རྩྭ་ཐང་དུ་ལྕི་བ་འཐུ་བཞིན་ཡོད་ཅིང་།ཉི་མས་ཨོང་བ་བཏུས་ནས་ཧ་ཅང་མང་པོ་ཞིག་སྤུངས་འདུག

　　“ཁྱོད་ཀྱི་སྲུ་མོ་ནི་འདི་འདྲ་བ་ཞིག་ཡིན།མོས་ནུས་ཤུགས་ཡོད་དགུ་བཏོན་ནས་ཁྱིམ་གྱི་ལས་ཀ་ཡག་པོ་ལས་བཞིན་ཡོད།མེ་འབུད་དུས་ལྷས་རའི་ནང་གི་ལྕི་བས་འདང་ཡང་།མོས་ལྷས་རའི་ཕྱི་ཡི་ལྕི་བ་ཚང་མ་བཏུས་ཡོང་བས།ལྷས་རའི་ནང་དུ་ཨོང་བའི་རི་བོ་ཆུང་ཆུང་བཞིན་བརྩིགས་ཡོད”

　　ཉི་མས་ཨོང་བ་མེ་རུ་བསྲེགས་པས།མེ་ལྕེ་རབ་ཏུ་འབར་ཞིང་།མེ་སྒྲ་ནི་འབྲུག་སྒྲ་ལྡིར་བ་ལྟར་གྲག

　　“དེ་ནི་ངའི་བ་གླང་གི་སྐད་རེད།” མ་ཅེ་ལོན་གྱིས་ལག་པས་རང་གི་ངོ་གདོང་ཕྱིས་པ་ན།མིག་མཐའི་མཆི་མ་མཐོང་རྒྱུ་མི་འདུག མ་ཅེ་ལོན་གྱིས“ང་ལ་སྐྱོན་མེད་”ཅེས་བཤད། མ་ཅེ་ལོན་གྱིས་ཁོ་ལ་མིག་གིས་ལྟ་བཞིན“ང་ལ་ངོ་མ་སྐྱོན་མེད།ངས་ཁྱོད་ཀྱི་སྲུ་མོར་བ་གླང་ཁ་ཤས་བཞག་ཡོད།བུད་མེད་ཀྱི་སེམས་སྙི་བ་རེད།མ་གཞིར་བེའུ་གཉིས་འཇོག་རྩིས་ཡོད་ཀྱང་།མོས་མི་འདོད་པའི་སྐད་ཅོར་བརྒྱབ་བྱུང་པས།རྗེས་ནས་བ་གླང་གཉིས་བཞག་ཡོད།དེ་ནི་བེའུ་ཡི་ཕ་དང་མ་རེད”ཅེས་བཤད།

　　“ངས་མཐོང་བྱུང་།”

　　“ཁྱོད་ཀྱིས་ངོ་མ་མཐོང་བྱུང་ངམ།”

　　“འོ་ལེ།ལྷས་ར་ན་ཡོད་གི ཡག་པོ་འདུག”

　　“ཁྱོད་ཀྱིས་ཀྱང་ཡག་པོ་འདུག་བསམས་ཡོད་དམ།”

　　“དེ་ནི་ཁྱོད་མ་ཅེ་ལོན་གྱི་བ་གླང་རེད།མ་ཅེ་ལོན་གྱི་བ་གླང་ནི་རྩྭ་ཐང་གི་བ་གླང་ཆེས་ཡག་ཤོས་རེད།”

　　“འོན་ཀྱང་ངའི་བ་གླང་ཁོ་ཚོས་ཕྱིར་དེད་སོང་།”

　　“སྤུན་ཟླ་ལགས།ཁྱེད་ཀྱིས་གཞན་ལ་བཙོངས་པ་ཡིན་པས།གཞན་གྱིས་ཁྱེད་ལ་སྤྲད་པའི་རིན་གོང་ལའང་བཤད་རྒྱུ་མེད།”

　　“རིན་གོང་ལ་བཤད་རྒྱུ་མེད།ཡིན་ནའང་ངས་དངོས་གནས་བཟོད་མི་ཐུབ།མཚན་གོང་ལ་བསླེབས་དུས།ངས་གོམས་ལོབས་ལྟར་ལག་སྒྲོན་བཀར་ནས་བ་གླང་ལ་གཟན་ཆས་བྱིན་པ་ཡིན།ཡིན་ནའང་ལྷས་ར་སྟོང་པ་རེད།ངའི་སེམས་ལ་གདོན་ཞུགས་པ་ལྟར།ལག་ཏུ་མེ་མདའ་ཐོགས་ཤིང་རྟ་བཞོན་ཏེ་རྩྭ་ཐང་སྟེང་ནས་མཚན་ཧྲིལ་བོར་སྟོང་རྒྱུག་བྱས་པས།མེ་མདའི་ནང་གི་མདེའུ་ཚང་མ་འཕངས་ཚར།

　　ང་ཁུའེ་ཐུན་དུ་འབྱོར་རྗེས།སེམས་ཀྱི་རྫ་རིའི་སྟེང་སྐྱོ་གདུང་གི་ན་བུན་འཐིབས་བྱུང་།དེ་གར་རྩྭ་མེད་པས་ངའི་བ་གླང་ལྟོགས་ཁོ་ཐག་རེད། གང་ལྟར་བཤད་ཀྱང་།ངས་ངའི་བ་གླང་རྩྭ་ཐང་དུ་ཕྱིར་འདེད་དགོས། ངའི་སྐད་ཆ་དེ་བཟོ་གྲྭའི་ནང་གི་ལས་བཟོ་བ་ཚོའི་རྣར་འགྲོ་བཞིན་མེད།ཁོ་ཚོས་ངས་འོས་མེད་བྱེད་བཞིན་ཡོད་ཟེར།ངའི་བ་གླང་གི་ཆེད་དུ་ང་ལ་འཛེམ་དོགས་ཅི་ཡང་མེད།ངས་ཁོ་ཚོར་བཤད་རྒྱུར།འདི་ནི་བ་གླང་འཚོ་ས་ཞིག་གཏན་ནས་མ་རེད།བ་གླང་ནི་མ་གཞི་ནས་རྩྭ་ཐང་དུ་འཚོ་དགོས་ཅེས་བརྗོད་པ་ན།བཟོ་གྲྭའི་འགོ་འཛིན་གྱིས་ངོ་གནག་ནས།ཁྱོད་ཀྱིས་སྐད་ཆ་ཆོ་མེད་བཤད་པས་ཆད་པ་གཅོད་དགོས་ཟེར། ངས་དེ་ལ་ཁ་ཡ་མི་བྱེད།ཆད་པ་ཅི་ལྟར་གཅོད་ན་ཆོད།ང་ལ་ངའི་བ་གླང་དགོས་ཟེར་བ་ན། བཟོ་གྲྭའི་འགོ་འཛིན་གྱིས་བཟོ་གྲྭའི་བཤས་རྭ་ལ་ཁ་པར་བཏང་བྱུང་།ཁོས་ཁྱོད་འགྱོད་པ་སྐྱེས་ཀྱང་འཕྱིས་དྲགས་ཟིན།བ་གླང་ཚང་མ་བཤས་ཚར་འདུག་ཟེར། ངའི་སེམས་ཤིན་ཏུ་སྡུག་བྱུང་བས།དེ་ནི་བ་གླང་ཉིས་བརྒྱ་རེད་ཡ་ཟེར་ནས་སྐད་ཅོར་བརྒྱབ། བཟོ་གྲྭའི་འགོ་འཛིན་གྱིས་ང་ཚོའི་བཟོ་གྲྭའི་གཤས་རྭ་ནི་འཕྲུལ་ཆས་ཅན་དང་མུ་འབྲེལ་ལས་སྒྲུབ་ཀྱི་བཤས་རྭ་ཡིན་ཞེས་ཟེར་བ་ན།ཁོའི་འཁོར་གཡོག་ཅིག་གིས་བ་གླང་ཉིས་བརྒྱ་ཙམ་མ་ཟད།བ་གླང་ཉིས་སྟོང་བཤའ་དགོས་ཀྱང་དེ་ནི་སྐད་ཅིག་ཙམ་གྱི་དུས་ཚོད་རེད། ངས་ཁོ་ཚོར་ཁྱོད་ཚོས་བ་གླང་བཤས་ནས་ཅི་བྱེད།བ་གླང་དང་ཁྱེད་ཚོར་འཁོན་འགྲས་ཡོད་དམ་ཞེས་བརྗོད་པ་ན། ཁོ་ཚོས་ང་ནི་རྒྱུ་སྤུན་(ཞིན་ཅང་བས་སྨྱོན་པ་ལ་རྒྱུ་སྤུན་ཞེས་འབོད་ཀྱིན་ཡོད)ཞིག་ཡིན་པས།ཁོ་ཚོས་རྒྱུ་སྤུན་དང་སྐད་ཆ་བཤད་རྒྱུ་མིན་ཟེར།”

　　“ཁྱོད་ལ་དངོས་གནས་ཅུང་ཟད་སྨྱོ་ཞད་འདུག”

　　“ཁྱོད་ཀྱིས་བལྟས་ན་ངའི་བ་གླང་ཕྱིར་ཡོང་ཐུབ་བམ།”

　　“ཕྱིར་ཡོང་ཐུབ།”

　　“དེས་ན་ཁྱོད་ཀྱིས་ངའི་བ་གླང་ཅི་ལྟར་ཕྱིར་ཡོང་བའི་ཐད་ནས་ལབ་ཅིག་རྒྱགས་རོགས།”

　　“ཀན་ན་གཅིག་ཡོད།”ཁོས་རྩྭ་ཐང་གི་ཉི་མར་མཛུབ་མོ་བཙུགས་ཏེ།མ་ཅེ་ལོན་ལ“སྲུ་མོས་འོ་མ་བཞོ་བཞིན་འདུག”ཅེས་བཤད།

　　མ་ཅེ་ལོན་གྱིས་མིག་འབྱེད་མ་འཛུམ་གྱིས་དེའི་ཕྱོགས་སུ་བལྟས་བ་དང་།མ་ཅེ་ལོན་གྱིས་ཆང་རག་འཐུང་དུས་ཀྱང་མིག་ཟུང་དེ་དང་ཁ་བྲལ་མེད།

　　ཉི་མས་སྨད་གཡོགས་སེར་པོ་དེ་ས་ཐོག་ཏུ་དྲུད་ཅིང་།ཉི་མའི་ལག་པ་ཡང་སེར་པོ་གསེར་ལ་གྱུར་འདུག རྩྭ་ཐང་གི་ལུག་མིག་མེ་ཏོག་སྟེང་དམར་མདངས་རྒྱས་པའི་ནུ་མ་ཞིག་ཡོད་ལ།ཉི་མའི་གསེར་མདོག་གི་ལག་པས་ནུ་མར་རེག་པས།ནུ་མ་ལས་འོ་ཐིག་དཀར་བོ་ཞིག་ཕྱིར་ཕྱུར།

　　མ་ཅེ་ལོན་གྱིས་མཛེས་ཞིང་སྡུག་ལ།འོད་ཀྱི་གཟི་བྱིན་ཆེ་བའི་ཉི་མར་བལྟས་ནས་བསྡད་ཡོད།མ་ཅེ་ལོན་གྱིས་ཆང་ཡང་འཐུང་མི་འདོད་པར་གྱུར།ཁོས་མ་ཅེ་ལོན་གྱི་ཕྲག་པར་བརྡེབས་ཙམ་བྱས་པས།ད་གཟོད་མ་ཅེ་ལོན་ཡང་འགུལ་ཙམ་བྱས་བྱུང་།ཡིན་ནའང་མ་ཅེ་ལོན་ནི་འཕྲུལ་ཆས་ཀྱི་མི་ཞིག་དང་ཁྱད་པར་ཅི་ཡང་མེད། ཁོར་རང་གི་གྲོགས་པོ་མ་ཅེ་ལུང་ལ་ཆ་རྒྱུས་ཡོད་ལ།མ་ཅེ་ལོན་གྱི་གཟའ་ཚང་ལ་ཡང་ཆ་རྒྱུས་ཡོད།ཁོས་མ་ཅེ་ལོན་གི་ཁ་ནང་དུ་ལུག་མིག་མེ་ཏོག་ཅིག་བཞག་པ་ན།ཁོས་སྐད་གདངས་དམའ་མོས“འདི་ནི་བ་གླང་གི་ནུ་མ་རེད”ཅེས་བཤད། མ་ཅེ་ལོན་གྱི་མཁུར་ཚོས་གཉིས་འགུལ་བྱུང་བས།ཁ་ནང་དུ་ལུག་མིག་མེ་ཏོག་ལྡད་པའི་སྒྲ་ཐོས་ཐུབ།མ་ཅེ་ལོན་གྱིས་འོ་མའི་བྲོ་བ་མྱོང་ཟིན་པས།ཁོས་སྐད་ཆུང་ངུས“ཁྱེད་ཀྱིས་རྩྭ་ཐང་དྲན་གྱི་འདུག་གམ།དེ་ནི་ཁྱེད་ཀྱི་བློ་ལ་ཡོད་ངེས། རྩྭ་ཐང་གི་རྟ་བ་གྲགས་ཅན་མ་ཅེ་ལོན་གྱིས་ལེ་བར་བརྒྱ་ཕྲག་འཕྲེད་དུ་གཅོད་ནས་འགྲོ་དུས།སྐོམ་ནས་བཟོད་མ་ཐུབ་པར་བཞོན་མ་གཅིག་བཟུང་ནས།་ནུ་མ་ནུས་ཏེ་ནུ་མ་གཉིས་སྟོང་བ་བཟོས་སོང་།”ཞེས་བཤད། “སྟོང་པར་གྱུར་འདུག” མ་ཅེ་ལོན་གྱིས་ལུག་མིག་མེ་ཏོག་མགྲིན་པ་ནས་མིད་པ་དང་།ཡང་བསྐྱར་རྩྭ་ཐང་ནས་ལུག་མིག་མེ་ཏོག་ཅིག་བཏོགས་ནས།ཁ་ནང་དུ་བཞག་པ་དང་ལྷན་དུ་“རེད།རེད།གཉིས་རེད།ནུ་མ་གཉིས་རེད”ཅེས་བཤད།

　　“ཁྱེད་ཀྱི་དྲན་ཤེས་ཡག་པོ་འདུག ནུ་མ་གཉིས་རེད།ཁྱོད་ཀྱིས་སྐོམ་པ་སེལ་མ་ཐག་རྟ་ལ་ལྕག་ཚན་བྲབས་ནས་སོང་།ཁྱོད་སད་པའི་སྐབས་སུ།བ་གླང་དེ་གུར་གྱི་ཕྱི་རུ་ཉལ་ཡོད། བ་གླང་གིས་མཚན་མོ་གཅིག་ལ་རྩྭ་ཟོས་པས།ནུ་མ་དབོས་བས་སྦོམ་པར་གྱུར་ཡོད་གཤིས།བཞོན་མས་ད་དུང་ཁྱེད་ལ་ནུ་མ་ཐེངས་གཅིག་ནུ་རུ་བཅུག་པས།ཁྱོད་ཀྱི་སེམས་དགའ་ལྷང་ལྷང་དུ་གྱུར།ཐེངས་གཅིག་ཙམ་གྱིས་ག་ལ་ཚད། ཁྱོད་ལ་ཉིན་རྟག་པར་ནུ་མ་ནུ་རུ་བཅུག། ཁྱེད་རང་དགའ་དྲགས་ནས་ལུས་པོ་འདར་སིག་རྒྱག་བཞིན་ཡོད།ཡིན་ནའང་ད་ཐེངས་ཁྱོད་ཀྱིས་བ་གླང་གི་ནུ་མ་ནུ་ཐུབ་ཀྱིན་མི་འདུག བ་གླང་གི་མིག་ཟུང་ཆེ་རུ་བགྲད་ཅིང་།ཉི་མའི་དཀྱིལ་འཁོར་དང་འདྲ་བར་ཁྱོད་ལ་ལྟ་བཞིན་ཡོད་པས།ཁྱོད་ལ་སེམས་འགུལ་ཆེན་པོ་ཐེབས་ཏེ་མིག་ནས་མཆི་མ་བཞུར་བྱུང་།ཁྱོད་ཀྱིས་བ་གླང་གིས་བཤད་པའི་སྐད་ཆ་དེ་ཐོས་ཡོད་ཁོ་ཐག་རེད”

　　“བཞོན་མས་ངོས་གནས་དེ་ལྟར་བཤད་སོང་ངམ།”

　　“འོ་ལེ།དེ་མིན་ན་ཁྱོད་མ་ཅེ་ལོན་ལ་མིག་ཆུ་བཞུར་སྲིད་དམ།དེ་མིན་ན་ཁྱོད་མ་ཅེ་ལོན་ལ་མོའི་ནུ་མ་ནུ་བའི་སྙིང་སྟོབས་དེ་གང་ནས་བྱུང་བ་ཡིན་ནམ།ད་དུང་གཞན་གྱི་བུ་མོ་ཡང་ཁྲིད་ཡོང་ཡོད།”

　　མ་ཅེ་ལོན་གྱི་སེམས་ལ་སྔངས་འཚུབ་སྐྱེས་ཀྱང་ཆང་ཁམ་བུ་གང་རེ་གང་རེ་འཐུང་བཞིན་ཡོད་ལ།ཁོས“ངའི་སྤུན་ཟླ།ངའི་སྤུན་ཟླ་བཟང་པོ”ཞེས་ཟེར་བ་དང་། ཁོའི་སྐད་སྒྲ་ཇེ་ཆུང་ནས་ཇེ་ཆུང་དུ་གྱུར་པས།ཡུན་གྱིས་ཤུབ་བུར་ཟློ་བ་ལས་ཅི་ཡང་ཐོས་རྒྱུ་མི་འདུག ཁོས“བཞོན་མ་དེར་ལྷ་ཡི་སྡོངས་གྲོགས་མཛད་ཡོད་པས།ལྷ་ཡི་རྣམ་ཤེས་ཞུགས་ཡོད་པའི་སྲོག་ཆགས་ཡིན་ཚེ།མི་སྐད་བཤད་ཤེས་བ་མ་ཟད།མི་རྣམས་ལ་གནས་ལུགས་ཅན་གྱི་སྐད་ཆ་བཤད་ངེས།བཞོན་མ་དེ་བདེ་སྐྱིད་ལྡན་པའི་མིར་འགྱུར་དགོས་ན།ངེས་པར་དུ་རང་གི་བདག་པོ་གདན་འདྲེན་ཞུ་དགོས།བདག་པོའི་ལག་པས་འོ་མ་ཆུ་མིག་ལྟར་རྒྱུན་ཆད་མེད་པར་བཞུར་དུ་འཇུག་ངེས”ཞེས་བཤད། གཉེན་བསྒྲིགས་པའི་དགོང་མོར།ཁྱོད་བྲེལ་བ་ལངས་ཆེ་བས་མནའ་མ་ནི་བ་གླང་དུ་བརྩིས་ཤིང་།ཁྱོད་ཀྱིས་མནའ་མའི་མིང་ནས་མི་འབོད་པར།མནའ་མ་ལ་བ་གླང་ཡ།ང་ཡི་བ་གླང་ཞེས་བོས”ཞེས་ཟེར།

　　“ངས་ངོ་མ་དེ་ལྟར་བོས་ཡོད་དམ།”

　　“ཁྱོད་ཀྱིས་དེ་ལྟར་བོས་ཡོད་པ་ཁོ་ཐག་ཡིན།ཁྱོད་ཀྱིས་བྲེལ་འཚུབ་ཀྱི་སྒོ་ནས་མནའ་མའི་ནུ་མ་ནུས།

　　“དོན་དག་དེ་འདྲ་ཡོད་དམ”

　　“དོན་དག་དེ་འདྲ་ཞིག་ཡོད་ཁོ་ཐག་ཡིན།ལྷ་ཡིས་གནམ་ནས་ཁྱོད་ལ་གཟིགས་ཏེ་བསྡད་ཡོད།ཁྱོད་ཀྱིས་ནུ་མ་ནུ་མ་ཐུབ་པ་རེད།”

　　“ནུ་མ་ནུ་མ་ཐུབ།”

　　“ནུ་མ་སྟོང་བ་བཟོ་མ་ཐུབ་བམ།”

　　“སྟོང་བ་བཟོ་མ་ཐུབ།”

　　“ནུ་མ་ཅི་ཙམ་ནུས་ན་དེ་ཙམ་གྱིས་ཇེ་ཆེ་རུ་གྱུར་འགྲོ།”

　　“ཅི་ཙམ་ནུས་ན་དེ་ཙམ་གྱིས་ཆེ་རུ་གྱུར་འགྲོ།”

　　“རྩྭ་ཐང་གི་བ་གླང་ཚང་མ་མཉམ་དུ་བསྲེས་ནའང་།བཞོན་མ་ཆུང་ཆུང་དེ་འདྲ་ཞིག་དང་བསྡུར་ཐབས་མེད།”

　　མ་ཅེ་ལོན་གྱིས་ཆང་ཚང་མ་སྒོག་གེར་འཐུངས་ཚར།མ་ཅེ་ལོན་གོག་འགྲོས་ཀྱིས་ཁ་རུ་གསེར་མདོག་ལྡན་པའི་ལུག་མིག་མེ་ཏོག་ཟོས་ཤིང་།ཁ་ནས“ཨེ་མ།ངའི་ནུ་མ།ངའི་བ་གླང་ ”ཞེས་བོས།

　　མ་ཅེ་ལོན་གྱི་སྐེ་ཚིགས་ཡར་བཏེགས་པ་ན།ས་གཞི་ཧྲིལ་བོ་རིམ་གྱིར་ཡར་འཕགས་ཤིང་།མ་ཅེ་ལོན་གྱིས་ས་གཞི་ཆེན་པོའི་ནུ་མར་སོ་བཏབ་ནས་མགོ་བོ་ཡུང་རྡོག་བཞིན་གཡུགས་ཏེ་ཡུན་རིང་ནུས་ཤིང་།དེ་ནས་མགོ་ཡར་བཏེགས་ནས་དབུགས་འབྱིན་རྔུབ་བྱེད་བཞིན“ངའི་བ་གླང་ཕྱིར་སླེབས་བྱུང་”ཅེས་ཟེར། མ་ཅེ་ལོན་གྱིས་ཁོ་ལ་བལྟས་མ་ཐག“སྤུན་ཟླ།ངའི་བ་གླང་ཕྱིར་སླེབས་བྱུང་”ཞེས་བསྐྱར་དུ་བཟླས།

　　ཁོས“ངའི་བ་གླང་ཡང་ཕྱིར་སླེབས་བྱུང་”ཅེས་བཤད།

　　ཁོའི་ཀླད་པའི་ནང་དུ་སྒྲ་ཞིག་གྲགས་པས།ཁོས་ཅི་ཞིག་བྱ་དགོས་པའང་མ་ཤེས།ཁོས་ཁུག་མའི་ནང་ནས་མཇུག་མཐའི་དབྱི་ལི་རྟགས་ཅན་གྱི་ཆང་དམ་བེ་གང་ཡོད་པ་བླངས་ནས་ཁ་ཕྱེ་ཞིང་།དམ་བེ་ཁ་ལ་གཏད་ནས་སྒོག་གེར་འཐུངས་པས།དེ་ནི་བརྗིད་ཉམས་ལྡན་པའི་སྒོ་ནས་གླང་རྭ་བོས་བ་དང་མཚུངས།ཐེངས་འདིར་ཁོས་ཉི་མའི་བྲང་ཁེབས་དམར་པོ་མཐོང་མ་བྱུང་ལ།ཤེལ་དམ་སྟེང་གི་རྟགས་བྱང་ཡང་བཤག་མ་བྱུང་།ཉི་མས་གྱོན་ཆས་གོན་མི་དགོས་ལ་སུ་ལ་མནའ་མར་ཡང་འགྲོ་མི་དགོས།ཉི་མའི་ཧམ་པ་ནི་ཚ་ཐག་ཆོད་ཅིག་རེད།མགོ་བོའི་སྟེང་རྭ་ཅོ་གཉིས་སྐྱེས་ཡོད་ལ།ས་གཞིའི་སྟེང་གོམ་པ་ཁྱར་ཁྱོར་སྤོ་བཞིན་རྒྱུག་པར་བྱེད།

　　ཁོས“བ་གླང་སླེབས་འདུག”ཅེས་བཤད།

　　མ་ཅེ་ལོན་གྱིས“དེ་ནི་ངའི་བ་གླང་རེད”ཅེས་བཤད།

　　ཁོས“དེ་ནི་ངའི་རེད།ཕོ་གླང་ཞིག་རེད།ཁྱོད་ཀྱིས་ལྟོས་དང་།དེ་ལ་ནུ་མ་མི་འདུག་”ཅེས་བཤད།

　　ཁོ་གཉིས་ཀྱིས་དེའི་ཐད་ནས་རྩོད་གླེང་བྱས།

　　མ་ཅེ་ལོན་གྱིས་རང་གིས་རང་ལ“ཆུང་མ།དགོངས་པ་མ་འཚོམས།ངས་ད་དུང་རྙོག་དྲ་ཅུང་ཟད་བཟོ་དགོས”ཞེས་ཟེར།

　　ཁོས་ཀྱང་རང་ཉིད་ལ“སྲུ་མོ།དགོངས་པ་མ་ཚོམས།ངས་ཀྱང་ད་དུང་རྙོག་དྲ་ཅུང་ཟད་བཟོ་དགོས”ཞེས་བཤད།

　　ཁོ་གཉིས་ཀྱིས་མགོ་བོ་གཏུགས་ནས་གདོང་ཐུག་བརྒྱབ་པ་དང་།ཡང་བསྐྱར་གདོང་ཐུག་བརྒྱབ།ཁོ་གཉིས་ཀྱི་མགོ་ལ་རྭ་ཅོ་སྐྱེས་ཡོད།ཁོ་གཉིས་ཀྱིས་ཧ་ཧ་ཞེས་གད་མོ་དགོད་བཞིན“བ་གླང་གི་རྭ་ཅོ།ཁྱོད་ལ་བ་གླང་གི་རྭ་ཅོ་ཆ་གཅིག་དང་ང་ལ་ཡང་ཆ་གཅིག་ཡོད་”ཅེས་ཟེར།ཁོ་གཉིས་ཀྱིས་རྭ་ཅོས་གདོང་ཐུག་དྲག་པོ་བརྒྱབ་ཅིང་།རྭ་ཅོའང་ཇེ་ཆེ་ནས་ཇེ་ཆེ་རུ་གྱུར།ཁོ་གཉིས་ཧ་ལས་པ་ནི་རྭ་ཅོ་ནི་བུད་མེད་ཀྱི་ནུ་མ་དང་འདྲ་བར་ཇེ་ཆེ་ནས་ཇེ་ཆེ་རུ་ཕྱིན་པས།ཁོ་གཉིས་ཀྱིས་རང་རང་གི་ཐོད་པར་རེག་པ་ན།དེའི་སྟེང་དུ་དངོས་གནས་བ་གླང་གི་རྭ་ཅོ་སྐྱེས་འདུག

　　ཁོ་གཉིས་ཀྱིས་རྭ་ཅོ་གདོང་ཐུག་མི་བྱེད་པར་གུར་གྱི་ཕྱོགས་སུ་ཕྱིན། སྒོ་འགྲམ་དུ་སླེབས་སྐབས།བུད་མེད་དེས“མགོ་ལ་ཅི་བྱུང་བ་རེད”ཅེས་དྲིས་བས། ཁོ་གཉིས་ཀྱིས“བ་གླང་གིས་བརྡུངས་བྱུང”ཞེས་ལན་བཏབ།།

　　《ལུའུ་ཞུན་རྩོམ་རིག་བྱ་དགའི་བརྩམས་ཆོས་བོད་འགྱུར་དཔེ་ཚོགས》(སྒྲུང་ཐུང་པོད་གཉིས་པ)ལས་དྲངས།

ཅོ་ནེ་ཡུམ་ཚེ་རིང་གིས་བསྒྱུར།

རྩོམ་སྒྲིག་པ། གངས་དགའ།

རྩོམ་ཁུངས། ངེད་དྲ་བ།