བཤེར་འཚོལ།
ཐ་སྐར་གྱི་སྙན་ངག་བདམས་བཀོད།
ཐ་སྐར། མིང་དངོས་ལ་གནུབས་ཟུར་བསྟན་པ་དར་རྒྱས་སུ་འབོད།1999ལོར་མགོ་ལོག་པདྨའི་འབྲོག་སྡེ་སྤུང་ཡུལ་དུ་སྐྱེས། སྙན་ངག་གཙོ་བྱས་པའི་བརྩམས་ཆོས་དག《སྦྲང་ཆར།》དང་།《གངས་རྒྱན་མེ་ཏོག》《ཟླ་ཟེར》《རང་གྲོལ》《ལྷོ་ཁའི་རྩོམ་རིག་སྒྱུ་རྩལ》སོགས་དུས་དེབ་དང་ཚགས་པར་སྣ་ཚོགས་སུ་བཀོད། རྩོམ་རིག་གི་གཟེངས་སྐྱེས་རེ་འགའ་ཡང་ཐོབ་མྱོང་། 2024སྒེར་དེབ《རྨི་ལམ་རྒལ་བ》འགྲེམ་སྤེལ་བྱས།
གཟིག
གཟིག་ཁྲ་ཁྲ་དེ
སད་དང་མ་སད་མི་འདུག
རྨི་ལམ་གྱི་ནགས་ཚལ་ནས་འབུད་མ་ནུས
ཞེད་སྣང་།
ང་རང་འོད་ཟེར་ལ་མགོ་ཡུ་འཁོར་ཏེ
ནང་སེམས་སུ་ཕྱིར་ལོག་མི་ཐུབ་པའི་མི་ཞིག་ཏུ་གྱུར
དེའི་རྗེས་སུ
མིག་ཟུང་གི་སྣོད་དུ
ལྟད་མོ་ཇི་འདྲ་བརྩིགས་ཀྱང
སེམས་པ་སྟོན་ཐབས་མི་འདུག་པས
ཉིན་མོའང ཁང་པའི་སྒོ་དང་སྒེའུ་ཁུང་བརྒྱབ
མི་ཡུལ་ལུང་པའི་ནང་གི་བཟི་བོ་ང
མིག་ཕྱེ་ཚེ་བཙུམ་པར་སྐྲག་ཅིང
མིག་བཙུམས་དུས་ཕྱེ་བར་སྐྲག
སྙན་ངག
མིག་ཆུའི་བཞུར་ཁུངས་དེད་ནས
ཐ་སྙད་ཀྱི་ངོས་སུ་ཆགས་པའི་རྡུལ་སྤྲུགས་ནས
སེམས་ཀྱི་གྱ་གྱུ་མེ་རུ་བསྒྲོན་ནས
དུས་ཚོད་ཀྱིས་གཙབས་པའི་ལང་ཚོར་ཧད་ནས
འཇའ་ཚོན་གོས་སུ་འཐག་པའི་སྟོང་འདང་བཅངས་ནས
སེམས་དང་སེམས་ཀྱིས་མཐུད་པའི་བར་ཐག་མྱངས་ནས
མ་ཤི་གསོལ་བྲལ་གྱི་སྡུག་བསྔལ་བརླན་ནས
ཀུན་རྟོག་གི་བུམ་པ་འདི་བར་མེད་དུ་བཅུར་ནས
འཚོ་བའི་ཁྲོད་ཀྱི་ཁེར་རྐྱང་བསྣུབས་ནས
རྟོག་འགྱུ་ཡི་ཕྲ་ཕུང་ཡོད་ཚད་ཆད་པར་བསྒུགས་ནས
སྨྲ་ལྕེའི་གཡོ་ཇུས་ཞིག་པར་སྔངས་ནས
སྙིང་ལ་བཀབ་པའི་མུན་པ་བརྟོལ་ནས
ལྷོག་ལྷོག་ལྡིང་གིན་པའི་སྙིང་གསོན་པོར་ཉན་ནས
སྙན་ངག
ཁྱོད་ཁོ་ན་བཙལ
ནམ་གུང་ལ་བུ་མོ་ཞིག་གི་སྐྱོ་གདུང་ལ་རེག་པ།
ངས
སྙིང་གི་རུས་པ་བཞུས་ཏེ
རང་ཉིད་ཇེ་ཆུང་དུ་བཏང་ཡང
ཁྱོད་ཀྱི་བརྩེ་གདུང་གི་ཟབ་ཚད་ལས་བརྒལ་མ་ཐུབ
བུ་མོ
ཁྱོད་ནི་ལྕི་དྲགས་བཞག
ངའི་སེམས་པ་སྙི་མོས་ཐེག་མི་ཐུབ་པ་འདྲ
གྱང
གྱང་འདི
ལས་ཉོན་གྱིས་གྲུབ་ཅིང་བདག་འཛིན་གྱིས་བཏེགས
ཤིན་ཏུ་མཐུག་པའི
གྱང་འདི་ལ
སྒོ་དང་སྒེའུ་ཁུང་གང་ཡང་མི་འདུག
ཁོ་ཚོས རང་གི་ལུས་སྟེང་དུ་མུན་པ་འཐུ་བཞིན་འདུག
གྱང་འདི
གཟུགས་མཛེས་པ་ལས་གྲུབ
སྒྲ་སྙན་པ་ལས་གྲུབ
དྲི་ཞིམ་པ་ལས་གྲུབ
རོ་མངར་བ་ལས་གྲུབ
རེག་བྱ་འཇམ་པ་ལས་གྲུབ
གྱང་འདི དེ་དག་རེ་རེ་བཞིན་ཡིན་ཆོག་ལ
དེ་ཡང་མིན
སྡིག་སྒྲིབ་ཀྱི་འདོགས་ཐག
དུམ་སེར་བཅད་དེ
གྱང་འདིའི་ཕ་རོལ་དུ་བརྒལ་ཚེ
གྱང་གཞན་ཞིག་ཡོད་དམ
དེ་ནི་དྲི་མ་ཐམས་ཅད་ཀྱིས་མ་གོས་པའི་གྱང་ཞིག་ཡིན་ནམ
ཚེ་རབས་ཀྱི་རྩིབས་སྟོང
བར་མེད་བསྐོར་ཀྱང ང་དང་ཁྱོད
ད་དུང་ཡང་གྱང་འདི་ལས་བརྒལ་མ་ནུས
མི་ཚེ།
སྐད་ཆའི་སྒེའུ་ཁུང་ཁ་ནས
ཁྱོད་ནི་རྒྱང་རིང་རྒྱང་རིང་ཞིག་ཏུ་གྲུབ་འདུག་མོད
འདུན་མ་མང་པོས་མཆན་བུ་བཏབ་དུས
གློ་བུར་ཇེ་ཆུང་དུ་གྱུར་ཞིང
གདམ་གསེས་ཡང་ཡང་བྱས་པའི་ནམ་མཁའ་དེ
རབ་རིབ་ཏུ་གྱུར
ཟླ་བ་དང་ཆེས་ཐག་ཉེ་དུས་ཤིག་གི་མགྱོགས་བྲིས།
_DWLMལ།
ཁྱེད་མེད་ན
ཉིན་གང་བོར་མིག་ཟུང་བཙུམས་ནས་འདུག་པ་དང་ཅི་ཁྱད
སྨུག་པ་འཐིབས་ཏེ་ཕན་ཚུན་མི་མཐོང་བའི་དུས་སུ
ངས་སྨུག་པ་ལང་ལོང་དེའི་ནང་དུ་ཁྱོད་ཀྱི་གླུ་སྐད་ཨེ་ཁུགས་བལྟས
ཁྲག་རྒྱུན་དུ་འབབ་པའི་བརྩེ་གདུང་གི་ལས་སྐལ
འཇིགས་ཉེན་ངང་འཚོ་དགོས་བྱུང
སྨུག་པའི་སེང་རས་བར་ནས་མངོན་པའི་ཟླ་བ
རྣམ་ཀུན་ལས་སྒོར་ཞིང་གསལ
མི་ཚོགས་ཀྱིས་དྲུད་པའི་སྨུག་པའི་ནང་ནས
ཟླ་བ་ཞེས་པའི་བུ་མོ་ཞིག་ལ་བལྟས་ནས་བསྡད་དུས
ཉི་འོད་ཚ་ཐག་ཆོད་པའི་ཕྱི་དྲོ་ཞིག་ཡིན
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།