བཤེར་འཚོལ།
རྩེ་སྨིན་གྲོལ་གྱི་སྙན་ངག་བདམས་བཀོད།
ལོ་སར་ལ་ཕུལ་བའི་ཤིས་ཚིག
—བརྩེ་བའི་སློབ་ཚོགས་ལ།
—བརྩེ་བའི་སློབ་ཚོགས་ལ།
ཟླ་ཤེལ་ཞུན་མའི་རླབས་རིས་འཕུར་བའི་ཟིལ། །
དཔལ་དུ་རྫོགས་པ་གངས་ལྡན་ཁ་བའི་ལྗོངས། །
བྱིན་དཀར་འོད་ཀྱིས་སྲུང་བའི་སེམས་དཔའ་ཀྱེ། །
བདག་ཅག་ཐུགས་རྗེ་དམ་པས་སྐྱོང་བར་མཛོད། །
དགུན་ཁའི་དུས་ཚིགས་སྐྱོ་བས་བར་སྣང་བཟུང་། །
སེམས་ཀྱི་བདེ་བ་འཚོལ་བའི་མི་ཚོགས་འཁྲིགས། །
ཁ་དཀར་སྲབ་བུས་ཁོར་ཡུག་ཡོངས་སུ་བཏུམས། །
རྩེ་གཞུང་རྫོང་མཁར་འཁྱག་རོམ་དར་གྱིས་མཛེས། །
བདག་ཡིད་གངས་ཀྱི་སུལ་ན་མངོན་བཞད་ཅིང་། །
རྣམ་པར་དཔྱོད་པའི་འདབ་མ་ཡོངས་གྲོལ་བ། །
ཐོས་དོན་བསུང་ཞིམ་བདུད་རྩི་འབུམ་འཇོ་བའི། །
རིག་པའི་བུ་རྣམས་ཚར་དུ་དངར་བས་མཛེས། །
གཞུང་མང་ཐོས་པ་གསོག་པའི་གཞོན་སྐྱེས་ནི། །
ཙན་དཀར་ལྗོན་པའི་ཚལ་བཞིན་ཡིད་དུ་འོང་། །
ལང་ཚོའི་ཡལ་ག་རྒྱས་པའི་མཛེས་སྡུག་གིས། །
འཇིག་རྟེན་དགེ་ལེགས་བྱེད་འདི་ཡི་གར་འོང་། །
བདག་དང་འདྲིས་པའི་བརྩེ་བ་རྨད་བྱུང་བས། །
ཉེ་བར་འཁྱུད་པའི་སློབ་ཚོགས་ཤེས་རབ་ཅན། །
ཚེ་རབས་ཕྲེང་བར་ཐོས་བསམ་སྒོམ་པ་ཡིས། །
བསྟན་དང་འགྲོ་བའི་དོན་བཟང་རྒྱས་གྱུར་ཅིག །
འཇམ་པའི་གཤིས་བཟང་ཤེས་རབ་འོད་དུ་འཚེར། །
བརྩོན་པའི་རྒྱུན་བཟང་དད་གསུམ་ལང་ཚོ་འབར། །
ཐོས་བསམ་དོན་བཟང་སེམས་ཀྱི་མཐིལ་དུ་སྦྱོར། །
ཁྱེད་ཅག་གཞུང་བཟང་རྒྱ་མཚོར་འཇུག་པར་ཤོག །
བཀྲ་ཤིས་ནོར་བུ་འཛིན་པའི་ཕང་བར་འཁྱིལ། །
ཆོས་དང་རིག་གཞུང་རླབས་ཀྱི་ཕྲེང་བ་འཕྱོ། །
ལེགས་བྱས་ཐང་མར་བརྡལ་བའི་གླིང་ཆེན་པོའི། །
གྲྭ་བཙུན་འདུས་སྡེ་ཡོངས་ཀྱི་ལོ་གསར་དགེ །
གངས་ཅན་བསྟན་སྲིད་མངའ་ཐང་རྒྱས་པ་དང་། །
བླ་མའི་ཞབས་བརྟན་བཤད་དང་སྒྲུབ་པ་འཕེལ། །
ནད་མུག་འཁྲུག་རྩོད་ཞི་ཞིང་འགྲོ་རྣམས་སྐྱིད། །
བཀྲ་ཤིས་དཔལ་འབར་འཛམ་གླིང་བདེ་བར་ཤོག།
2023.01.22
ཡོས་ལོ་ཚེས་པའི་སྙན་ངག
ངོ་མཚར་མཛད་བཟང་ཡངས་པའི་རྒྱལ་ཁམས་སུ། །སྤྲིན་དཀར་སྟོད་གཡོག་འཕུར་བའི་མཛེས་སྡུག་ཅན། །
བརྩེ་བའི་ཆར་ཟིམ་འབེབས་པའི་བྱིན་རླབས་ཀྱིས། །
འགྲོ་ཚོགས་དགེ་ལེགས་དམ་པས་སྲུང་གྱུར་ཅིག །
དེ་རིང་ལོ་གསར་ཚེས་པས་སྨོན་ཚིག་དཀར། །
དཀར་འཇམ་ཁ་བའི་མེ་ཏོག་བཞིན་དུ་འཁོར། །
འཁོར་ལོ་གསུམ་གྱི་སྒྲུབ་པར་བརྩོན་པའི་སྡེ། །
སྡེ་བཞིའི་དཔལ་གྱིས་མཐོ་བའི་སྨོན་འདུན་ཞུ། །
བླ་སློབ་སྐུ་འཁོར་མཛད་ཆེན་ཆོས་དང་སྲིད། །
སྲིད་ཞིའི་དཔལ་དུ་དགེ་བའི་ངོ་མཚར་རྨད། །
རྨད་བྱུང་ཐོས་དོན་སྒྲུབ་ལ་བརྩོན་པའི་རྒྱུན། །
རྒྱུན་བཟང་དབྱར་གྱི་ཆུ་བོ་འཕེལ་བ་བཞིན། །
གཏེར་ཆེན་བླ་མའི་སྐུ་བསོད་ཉིན་བཞིན་རྒྱས། །
སློབ་ཚོགས་རྒྱུ་སྐར་ཕྲེང་བས་ཡོངས་སུ་བསྐོར། །
ལེགས་བྱས་ནམ་མཁའ་མཛོད་ཀྱི་སྒོ་ཕྱེས་ཏེ། །
བཀྲ་ཤིས་ཆོས་ཀྱི་ཐང་ཆེན་བཟུང་བས་མཛེས། །
འདྲིས་པའི་བརྩེ་བྱམས་འོ་ཆུའི་ངང་ཚུལ་བཞིན། །
ཐུགས་མཐུན་དམ་གཙང་ཆོས་ཀྱི་སློབ་བུ་རྣམས། །
དགའ་སྐྱིད་འཚོ་བའི་དཔལ་ལ་རོལ་བའི་མུར། །
ཤེས་བརྩོན་དད་པའི་གཞུང་ལ་རྟག་ཏུ་རོལ། །
གངས་ཅན་ཁ་བ་དཀར་བའི་ཞིང་ཁམས་འདིར། །
བླ་མའི་ཞབས་བརྟན་མཛད་པ་ཆོས་བསོད་རྒྱས། །
དད་ལྡན་འགྲོ་རྣམས་ནད་མེད་ལང་ཚོ་འཕེལ། །
ལོ་བརྒྱར་འཚོ་ཞིང་སྟོན་བརྒྱ་མཐོང་བར་ཤོག །
ཁྱད་པར་བཀྲ་ཤིས་ཆོས་འབྱོར་ཐང་མར་རྒྱས། །
གཏེར་སྤྲུལ་བླ་མའི་སྐུ་ཚེའི་མཛད་བཟང་རྒྱས། །
བུ་སློབ་འཁོར་ཚོགས་ཤེས་རིག་ཡོན་ཏན་རྒྱས། །
གྲྭ་བཙུན་དགེ་བསྙེན་ཚེ་ཆོས་མཐར་ཕྱིན་ཤོག །
སྐབས་བབ་བྱ་བའི་འཇུག་ཚུལ་ཅུང་མང་ཕྱིར། །
ལྷན་འཛོམས་ལོ་སར་བསུ་ལ་ཡུལ་གྱིས་བསྐལ། །
འོན་ཀྱང་སེམས་མཐིལ་ཉུལ་བའི་གྲོགས་པོ་དག །
སྙིང་གཏམ་བདུད་རྩི་འཐུང་བར་བྲེལ་བ་ཤེས། །
དེ་སླད་ངག་གི་རིག་བྱེད་སྙན་པའི་གདངས། །
ཙན་དཀར་ལྗོན་བཟང་མཛེས་པའི་ལྡིང་ཁང་ནས། །
སོར་མོའི་འདུ་བྱེད་རྩེན་པའི་འཕྲུལ་དང་འབྲེལ། །
ཁྱེད་ཅག་དགྱེས་པའི་ཐབས་སུ་གུས་པས་ཕུལ། །
ཆུང་གྲོགས་ཤིག་དྲན་པ།
ཁྲེལ་གཞུངས་ཕྱི་ཐག་ཆུ་བོའི་རྒྱུན་ལ་བྲེས། །སྒེག་པའི་འཛུམ་བག་ཅན་གྱི་ཤག་སྲུང་མས། །
དེ་རིང་དངོས་གྲུབ་ཆར་གྱི་བསིལ་བ་ཞིག །
མོས་པའི་བུ་ལ་གདུང་བའི་མཆོག་ཏུ་ཕོབ། །
ཡིད་ཀྱི་ཆུ་བོ་འཕེལ་བའི་གདེངས་ཀ་ནས། །
བརྩེ་བའི་གཤོག་སྣེ་འགུལ་བའི་ཁྲུང་ཁྲུང་མོ། །
སྤྲིན་དཀར་རླབས་ལ་བཅིབས་པའི་ངང་ཚུལ་དེ། །
དྲན་པའི་དུངས་ཀ་འཕྱུར་བའི་ཟིལ་བར་ལྷུང་། །
ནགས་ཀྱི་མཛེས་པ་སྟོན་གྱི་རང་མདངས་ནི། །
བསིལ་རླུང་འཇམ་པོས་ཁྱེར་བའི་ངག་གི་སྒོ །
དབྱངས་ཀྱི་སྐུད་པར་བརྒྱུས་པ་དྲན་པའི་སྣེ། །
སེམས་ཀྱི་མཐིལ་དང་རྣ་བའི་དྲུང་ལ་ཟུག །
འབུམ་ཕྲག་རི་ལུང་བཅད་པའི་ཕ་རོལ་ན། །
འདུན་པའི་རི་མོ་གཅིག་ཏུ་བྲིས་པ་ཁྱེད། །
འཁོར་བའི་ཕུན་ཚོགས་འཐུང་བ་ལ་སྲེད་པས། །
འདི་ལྟར་མཛའ་བའི་ཆུ་རྒྱུན་གངས་ལ་ཐིམ། །
བགྲང་བྱའི་ཁུར་བོ་དཔྲལ་བའི་རི་མོར་གསལ། །
སྐྲ་ལོའི་ནགས་ཚལ་བལ་དཀར་ཁ་ཆུ་བཞིན། །
སེམས་འདུན་མེ་ཏོག་ས་ཆེན་རྡུལ་གྱིས་གོས། །
རེ་བའི་མི་ཚེ་རྫོགས་ཀྱང་དྲན་པས་གདུངས། །
རྩེ་གཞུང་གཡུ་ཆུ་ལྷུང་ལྷུང་འབབ་པའི་འགྲམ། །
དུངས་པ་གཞས་ལ་འགུགས་པའི་རི་གྲོང་སྟེ། །
རི་ཤོད་ཕྱུགས་ཀྱིས་བཟུང་བ་འབྲོག་གི་ཐང་། །
འུ་ཅག་འཁོར་བའི་མཛེས་སྡུག་ལང་ཚོ་ཡིན། །
གདུང་བའི་ཡུས་ལ་བབ་པའི་འཕྲིན་པ་འདི། །
གློ་བུར་སད་པའི་བག་ཆགས་སྐྱོ་བས་དྲངས། །
ཁྱེད་དང་ཁྱེད་ལ་དུངས་པའི་འདབ་བཟང་གི །
བདེ་སྐྱིད་འཚོ་བའི་དཔལ་ཡོན་ཚེས་པར་ཤོག །
2023.03.31 ཉིན།
ཁྱེད་རང་དྲན་པ།
རིག་བྱེད་ཚིག་གི་ཟིལ་བ་ལ་འཐུངས་པའི། །
ངག་གི་མཆོད་ཚོགས་དབྱངས་ཀྱི་འཇུག་ངོགས་དེར། །
སྐྱབས་ཀྱི་དྭངས་མ་པད་མའི་མཛེས་སྡུག་ཅན། །
བདག་གི་ལེགས་བྱས་རྒྱ་མཚོའི་གཙུག་ན་ལྷམ། །
དུངས་པའི་མགྲིན་པ་འཕྱོར་བའི་གཏམ་གྱི་ཕུལ། །
དད་པའི་སོར་མོ་འགུལ་བའི་སྙན་འཇེབས་ནི། །
ཤེལ་དཀར་ཞུན་མ་ལས་གྲུབ་ཕང་འགྲོའི་གདངས། །
གཉིས་མེད་གསང་བ་དམ་པས་ཁྱེད་ལ་མཆོད། །
སེམས་ཀྱི་མཚོ་ལས་བབས་པའི་རླབས་ངོགས་ལས། །
ཡིད་ཀྱི་གཤོག་དཀར་རྩེན་པའི་ཁྲུང་ཁྲུང་མོ། །
སྟོན་ལྗོངས་ལྷོ་ལམ་མཛེས་པའི་གདེངས་ཀ་ན། །
ཁྱེད་ཀྱི་བརྩེ་བྱམས་དམ་པས་གཡོ་ཞིང་འདར། །
གདུང་བའི་རི་བོར་ཤལ་བའི་གངས་ཀྱི་རྡུལ། །
དྲན་པའི་ཆུ་ལ་འཐོར་བས་དངངས་པ་སྟེར། །
ཡིད་ཀྱི་ཟེ་བར་འཁྱིལ་བ་དྭངས་མའི་ཆབ། །
བདག་སེམས་འཛིན་མའི་ལྗོངས་ལ་ཕྲི་ལི་ལི། །
སོ་གའི་དཔལ་མོར་འཁྲིལ་བའི་ཆར་ཟིམ་དེས། །
རི་ཐང་གཤོང་གི་འཇིག་རྟེན་མཛེས་པར་བྱས། །
གཡུ་འབྲུག་སྐད་སྙན་འཇེབས་པས་ཁོར་ཡུག་འདིར། །
སྣང་བའི་ལྗོན་ཚལ་སྨུག་པོས་ཁེབས་ན་སྐྱོ། །
མི་ཟད་གདུང་བའི་སྣོན་མ་འདི་དག་གིས། །
ཁྱེད་དྲན་སྙན་ངག་དཀར་ལ་དམར་བའི་མདངས། །
ཡིད་ཀྱི་འཇའ་ཚོན་བསླུ་བའི་ནམ་མཁའ་ལས། །
རྣམ་པར་འཕྲུལ་བ་འཁོར་བའི་ཐབས་འདི་སྡུག །
2023.04.22
སེམས་ཀྱི་རང་བྱུང་རྒྱལ་མོ།
— རོལ་དབྱངས་ཤིག་ལ་མཉན་རྗེས།
— རོལ་དབྱངས་ཤིག་ལ་མཉན་རྗེས།
གཉུག་མ་སེམས་ཀྱི་གཏིང་ལ་ལྷུང་བའི་སྐྱོ་ངལ། །
སྤྲིན་དཀར་ལམ་རྙིང་འདེད་པའི་གླུ་བ་ཁེར་འགྲོ། །
ནགས་ཀློང་འགྲིམ་པའི་ཁུ་བྱུག་ངག་གི་གདུང་བ། །
འུ་གཉིས་བར་ཐག་སྟུང་བའི་འཕྲིན་པ་མིན་འགྲོ། །
གངས་ཀྱི་འོད་ལ་རེ་བའི་ལྷག་བསམ་དེས་ནི། །
ནམ་ཡང་ཁྱེད་སར་སྙེག་པའི་འདུན་པ་ཆེ་སྐད། །
དམར་པོ་ན་བཟའི་བྱིན་གྱི་མཛེས་སྡུག་འོག་ནས། །
གསར་བུའི་ཕོད་ཚོད་དེ་ཡང་ཕྱི་རྫིག་ནང་སྟོང་། །
མི་རིགས་སྣ་ཚོགས་འདུས་པའི་ཁྲོམ་གྱི་ཟུར་ནས། །
བརྩེ་བའི་གཞས་ཆུང་ལ་ཡང་ན་བུན་འཁོར་ཡོང་། །
དྲན་པའི་ཟིལ་བ་དཀར་པོ་སེམས་ལ་ཟགས་པས། །
ཡིད་གདུང་སྐྱོ་བའི་དངན་པ་སུ་ལ་བཅོལ་དགོས། །
སྐྲ་འདབས་ཁ་བས་ཟོས་ཀྱང་ཧམ་པ་འདི་ཡིས། །
འཁོར་བའི་མཚོ་མོ་དེ་ཡང་མིད་ལ་ཐོགས་ཡོང་། །
རྒྱང་མཐའི་རི་ངོགས་ལ་ནི་མཚར་སྡུག་ལྡན་ཡང་། །
བརྩེ་བའི་དྲོད་ཁོལ་འཁྱིལ་སའི་ཕ་ཁྱིམ་མིན་འགྲོ། །
འདི་ནས་ཁྱེད་ལ་འཐེན་པའི་རྐང་ལམ་ཀྱག་ཀྱོག །
མཚན་གྱི་ཆར་བ་འཐུང་བའི་འགྲུལ་བཞུད་དེ་ཡིན། །
བུ་ཡུག་ཇི་ལྟར་གཙུབས་ཀྱང་སྣང་བ་སྐྱིད་པས། །
དྲུང་དུ་སྙེག་པའི་སྐྱིད་ལ་མེ་ཏོག་འཁྲུངས་ཡོད། །
རི་དང་ལུང་བ་རྫ་ཆབ་དྭངས་མས་བཀྲུས་ཤིང་། །
བྱེའུ་ཆུང་འཕུར་བས་རྩྭ་ལོའི་ཟིལ་བ་སྒུལ་བའི། །
མཛའ་བའི་བདུད་རྩི་འཇོ་བ་དབྱར་གྱི་དུས་དེ། །
འུ་ཅག་ལྷན་དུ་འཛོམས་པ་འདི་ལས་གང་ཡོད། །
འཛུམ་ལ་འཁོར་བ་ཙམ་མིན་བརྩེ་བའི་དམ་ཚིག །
རྡོ་རྗེའི་གཤིས་སུ་མདུད་པའི་གྱེས་ཚིག་དེས་ནི། །
རྔོན་པས་རི་བར་བཙུད་པའི་ཤེའུ་ཆུང་ཇི་བཞིན། །
བསྐྱར་མཇལ་སྨོན་པས་རི་དང་ལུང་བ་འཇལ་ཡོད། །
བརྡ་འཕྲིན་དུས་ཀྱི་རླབས་རྩེ་གང་སར་འཐེན་མོད། །
སྙིང་གི་གཏམ་དང་གཟུགས་ཀྱི་མཛེས་པ་མི་མཐོང་། །
ལྕང་ཚལ་ངོགས་ལས་བཀུག་པ་ཁུ་བྱུག་སྐད་སྙན། །
སེམས་འཕྲིན་ཉིད་དུ་སྨོན་པའི་དངན་པ་ཤོར་ཡོང་། །
མདང་གི་རྨི་ལམ་དེ་ཡང་མོག་པོར་འཁྲུགས་འདྲ། །
ཆུང་ནས་འདྲིས་པའི་སྤང་ཐང་བདེ་ཞིང་འབོལ་བ། །
ཤང་ཤང་འབབ་པའི་རྩེ་གཞུང་གཡུ་ཆུ་སྔོན་མོས། །
བརྩེ་བའི་དར་ཐག་དཀར་པོ་ཁྱེད་སར་བྲེས་ཡོད། །
ཞོགས་ཉི་སེར་པོས་ལྷོ་ལྟའི་སྒེའུ་ཡོལ་ཕྱེས་བྱུང་། །
ཕྱུགས་ཀྱིས་རི་ཐང་བཟུང་བའི་ཕ་ཡུལ་མཐོང་ཡོང་། །
ཁྱེད་མཇལ་རེ་བའི་འདུན་པ་གཡོ་བར་བྱས་པས། །
གདུང་བའི་བག་ཆགས་དེ་ཡང་སད་པ་འདྲ་སོང་། །
སྤྱི་ཟླ་ལྔ་པའི་ཚེས་ཉེར་བརྒྱད་ལ།
གློ་བུར་བའི་སེམས་ཚོར།
སྐྱོ་བའི་གདུང་ངལ་ཁུར་བའི་གྲོགས་ཀྱི་འདང་། །
ངག་རིག་ཚོན་གྱིས་འབྲི་བར་དཀའ་བ་སྟེ། །
ཚོང་འདུས་འགྲོན་ཚོགས་ལྟ་བུའི་འཁོར་བ་འདི། །
སྐྱིད་སྡུག་སྣོལ་མར་འཐབ་པའི་དྲ་ཚང་ཞིག །
ལོ་དང་ཟླ་བས་བགྲངས་ཀྱང་མི་ཟིན་པའི། །
ལས་ཀྱིས་མྱངས་པའི་འཚོ་བའི་རི་མོ་འབུམ། །
ཅིག་ཆར་གཟིགས་པའི་དམ་པ་མཆོག་དེ་ཡིས། །
ཁྱེད་ལ་བརྩེ་བའི་འཛུམ་པ་འཁོར་བར་ངེས། །
རྒས་པས་ཐུབ་ཀྱང་སེམས་ཀྱི་རང་ཤེད་འདིས། །
རིག་པའི་ཕུན་ཚོགས་བསུ་ལ་མོས་པའི་གདེང་། །
ཁྱེད་ཐུགས་རེ་བའི་དཔལ་ལས་མ་ལྷུང་བས། །
སྐྲ་དཀར་གཉེར་མའི་ཚོགས་དེས་ཅི་ཞིག་ཐུབ། །
གདོད་ནས་རྣམ་པར་དག་པའི་ཤེས་རབ་མཆོག །
མཐའ་མེད་ཤེས་བྱའི་ཚལ་ལ་འཇུག་ལྡང་གིས། །
གངས་ཅན་རི་བོའི་ཁོང་ཡངས་བརྒལ་བྱས་པས། །
ཁྱེད་ལ་འཁྲེང་བའི་གྲགས་དཀར་འགག་པ་མེད། །
སྐྱོ་སྐྱོའི་དུངས་ཀར་འཁྱིལ་བའི་ཐུགས་བརྩེ་དེ། །
ཡི་གེའི་གཟུགས་སུ་ཕབ་པའི་གོ་འགོག་པར། །
གདུང་བས་མ་སྐྱོ་སྐྱོ་ངལ་འཁུར་བའི་གྲོགས། །
ཕྱིས་འབྱུང་མཁའ་ལམ་ཡངས་ལ་དོགས་པ་བྲལ། །
དབྱངས་ཀྱི་ཁ་ཚར་དཔྱངས་པའི་མགུར་གྱི་འགྲོས། །
རེ་ཞིག་ལས་བསོད་དམན་པས་མཐོང་བ་བྲལ། །
ཞེ་མཚལ་རུས་པར་ཟུག་པའི་ངག་གི་གདངས། །
རྡོ་རྗེའི་ཁམས་སུ་འཇགས་པའི་དཔལ་ནི་མཐོ། །
འཁོར་ཚོགས་རྒྱ་མཚོས་བསྐོར་བའི་ཕྱི་དང་ནང་། །
གཅིག་ཏུ་འབབ་ལ་རྒྱལ་བའི་མཐུ་རྡུགས་ན། །
ཟླ་ཤེལ་བྱེ་རླུང་འཚུབ་པའི་གངས་ཁྲོད་འདིར། །
བདག་སེམས་གཡོ་བའི་ངང་ཚུལ་སུ་ཡིས་འདུལ། །
སེམས་ཀྱི་འཁྱེར་སོ་མང་བ་འཁོར་བའི་ནགས། །
ཐིབས་པོར་འཁྲིགས་པའི་ཀློང་ལ་ངལ་གསོ་བ། །
ཁྱེད་དྲན་ངག་གི་དཔལ་ལ་དབང་འབྱོར་བའི། །
བཙུན་པའི་ཚུགས་ཀར་འཚོ་བའི་བན་རྒན་སྐྱོ། །
2023.11.07
ལོ་མཇུག་གི་དྲན་པ།
ཆུང་ནས་འདྲིས་པའི་བརྩེ་བྱམས་དྲི་མེད་དེས། །ཡུན་རིང་སེམས་ལ་བཟུང་བའི་འདྲེན་པ་ཁྱེད། །
ཉིན་མཚན་ལོ་ཟླའི་ཁོར་ཡུག་མཐའ་དག་ཏུ། །
དྲན་པའི་མཐིལ་དུ་རྩེན་པས་མཛེས་གྱུར་ཅིག །
བདེ་སྟོང་ཡེ་ཤེས་གཟིགས་པ་དག་པའི་ཁམས། །
ལྷུན་གྲུབ་ཆོས་སྐུའི་རང་ཞལ་མཇལ་བའི་མགོན། །
དད་གསུམ་དཔངས་པ་མཐོ་བའི་གདེངས་ཀ་རུ། །
བྱིན་ཆེན་ཟེར་མ་འཁྲིགས་པས་དགེ་ལེགས་སྩོལ། །
གངས་ལྡན་རི་བོའི་འདབ་མ་འབུམ་གྲོལ་བའི། །
ཡངས་པའི་རྒྱལ་ཁམས་ཉུལ་བའི་བློ་གྲོས་ཅན། །
བདེ་གཤེགས་ཐུབ་པའི་རྗེས་ལ་སྨོན་པའི་བཞིན། །
འདི་ན་ལེགས་བྱས་གསར་བའི་དཔལ་གྱིས་སྒེག །
ཚེ་རབས་ཕྲེང་བར་བསགས་པའི་ལས་སྨོན་དེས། །
ཁྱེད་ཀྱི་བརྩེ་བའི་དབྱིངས་དང་མཚམས་སྦྱར་བས། །
རྣམ་ཀུན་བདག་སེམས་ངལ་བའི་གསོས་སྨན་དུ། །
གསུང་དབྱངས་བདུད་རྩིའི་ཆར་ནི་ཅི་དགར་འཇོ། །
འཁོར་འདས་ཆོས་ཉིད་ཟབ་མོའི་རྡུལ་གྱི་རླབས། །
རང་སྣང་གཉུག་མའི་མཐའ་ལ་རབ་བརྒལ་བས། །
སྡེ་བཞིའི་ཕུན་ཚོགས་འཁྲིགས་པའི་ཡོ་ལང་ལ། །
ཕན་ཚུན་མཛའ་བོར་འཐམས་འདིས་ཡིད་རེ་མུག །
གནའ་དེང་རིག་པའི་འཕེལ་འགྲིབ་ཟླ་བའི་ཟིལ། །
ཐང་ཆེན་ཕ་མཐར་དཀྲིགས་པའི་འཇུག་ངོགས་ཀྱི། །
ཤེས་བརྩོན་གཤོག་ཟུང་རྐྱོང་བའི་མི་ཚོགས་ཁྲོད། །
འཁོར་བའི་ཡང་སྙིང་འཚོལ་བར་བདག་ཀྱང་བྲེལ། །
འཚོ་བའི་ཐུན་མཚམས་ལས་ནི་རེ་དོགས་ཀྱིས། །
གདུང་བའི་མདུད་པ་དཀྲིས་པས་ངལ་བ་སློང་། །
འོན་ཀྱང་ཡང་དག་དྲན་པའི་བག་ཆགས་ལས། །
ཁྱེད་ཞལ་མཇལ་བའི་འདུན་པ་གཏོང་མི་འོས། །
འཁོར་བའི་བདེ་དགའ་སྩོལ་བའི་ཡིད་འཕྲོག་གི །
ཏིང་འཛིན་རིག་པའི་གསང་བ་ཕུན་ཚོགས་དེས། །
མི་ཕྱེད་མཛའ་བའི་པགས་པ་བརྐྱངས་པའི་ཐང་། །
དྲན་གདུང་ཁ་བས་གཡོགས་པ་མེད་པར་སྨོན། །
གློ་བུར་སེམས་ལ་འཁོར་བའི་མཛེས་སྡུག་གི །
དྲན་པའི་ལང་ཚོ་འབར་བའི་གཏམ་གྱི་རྒྱུན། །
རྒས་པའི་རྨི་ལམ་སད་པའི་རླབས་ཕྲེང་ལྟར། །
ལྷག་མེད་བཟུང་བའི་སྐྱོ་གདུང་དྭངས་པར་ཤོག །
2023.12.31
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།