ཀ་ལ་པ་རུ་སྣུམ་པའི་བཅུད་ཡོད་ན།།

ཁ་ནས་དོན་མེད་ཚིག་སྟོང་མི་སྒྲོག་པར།།

ག་རེ་དུས་རབས་གསར་བ་འདིའི་ནང་དུ།།

ང་ཡིས་དམངས་ལ་ཅི་ལྟར་ཙན་འདོགས་སོམས།།

ཅ་རིལ་བཞིན་དུ་ཁང་མིག་ནང་བསྒོངས་ནས།།

ཆ་རྒྱུས་མེད་ཀྱང་བློ་ལ་ཤར་ཚོད་ཀྱིས།།

ཇ་རིན་དུ་རིན་ལེན་ཐབས་ཙམ་དམིགས་པའི།།

ཉ་ཉོག་ཚིག་བསྒྲིགས་སྙན་ངག་ཡིན་ནོ་ལོ།།

ཏ་ལའི་ཀླུང་བཞིན་ཟབ་ཅིང་རྒྱ་ཆེ་བའི།།

ཐ་སྙད་བདེན་ཕྱོགས་འཇིག་རྟེན་བྱ་བཞག་དང་།།

ད་ལྟའི་དུས་ཀྱི་ཁྱད་ཆོས་ལྷང་འདོན་པའི།།

ན་རའི་འཚོ་བ་སྙུག་རྩེར་ལེན་པ་གཅེས།།

པ་ཏྲ་རི་མོ་བཞིན་དུ་ཚིག་མཛེས་ཕྱིར།།

ཕ་ལེ་ཕོ་ལེ་ལྷན་པ་བསྒྲིགས་པའི་རྩོམ།།

བ་ལང་ངུར་སྒྲ་སེའུ་བཅུ་བའི་ངག།

མ་དྲོས་མཚོ་ལྟར་རྒྱས་ཀྱང་དགོས་པ་ཆུང་།།

ཙ་ཏུར་འཛུགས་སྐྲུན་གཟུགས་མཐོང་བཞིན་གྱི་སྣོད།།

ཚ་གྲང་དྲོད་ཚད་ཤེས་བྱེད་དངུལ་ཆུའི་སྦུག།

ཛ་ཏིའི་རོ་བཞིན་འཚོ་བའི་བྲོ་བ་ཅན།།

ཝ་ལེར་བློ་སྒོ་འབྱེད་པའི་རྩོམ་རིགས་མཁོ།།

ཞ་རའི་མིག་གི་སྒྲིབ་གཡོགས་མི་སེལ་བར།།

ཟ་འོག་རྒྱལ་མཚན་བཟོས་པས་ཅི་ལ་ཕན།།

འ་ཅག་རང་གི་རིགས་ལ་ཕན་པའི་ཕྱིར།།

ཡ་མཚན་ཐབས་ཤེས་གཞན་ལས་ཅིས་མི་ལེན།།

ར་བ་དོག་པོར་རང་བློ་མ་བཅིངས་པར།།

ལ་ལུང་ཀུན་ཏུ་ཤེས་རྒྱ་བསྐྱེད་ན་བཟང་།།

ཤ་དང་གླ་བ་རི་ལུང་མ་ཉུལ་བར།།

ས་གཅིག་བཟུང་བས་ནུས་པ་ཉམས་ཞེས་གྲགས།།

ཧ་ནུ་མན་ཐས་མགྲིན་བཅུའི་གཟུགས་དངོས་དང་།།

ཧ་ཅང་མཚུངས་པའི་གཟུགས་བརྙན་ཕྱེ་བ་ལྟར།།

ཨ་རག་ཆུ་ནག་སོ་སོར་མ་འདྲེས་པར།།

ཨ་མྲྀ་ཏ་འདྲའི་རྩོམ་རིག་སྤེལ་ཞིག་ཀྱེ།།

རྩོམ་ཁུངས། དོར་ཞིའི་གསུང་རྩོམ་ཐོར་བུ།