མི་ཚོགས་བྲེལ་འཚུབ་ཀྱི་འདུ་འཛིའི་ཁྲོད 
སེམས་པ་ཞིག
ཁྱོད་ཀྱི་རྒྱབ་གཟུགས་ཀྱི་གཏིང་སར་ཐིམ
 
རྒྱུས་མེད་ཀྱི་མིག་ཟུང་དང་ལྷན་དུ
ཁོ་བོའི་ཡང་སྙིང་གང་དེ
གློ་བུར     ཁྱོད་ཀྱིས་ཁྱེར་སོང
 
རྣམ་ཤེས་ཀྱི་གདོང་ཁ་ན་འཚུབ་པ་ནི
རླུང་གིས་སྒུལ་བའི་སྐྲ་ལོ་དེའོ
 
སྐུ་མཁྱེན   ད་དུང
ཕྱིར་མིག་ཅིག་ཡོད་པར་ཞུ
ཐག་རིང་ཐག་རིང་གི་གོམ་འགྲོས་རབ་རིབ་ལས
ཅི་ཡང་མི་འདུག    ཅི་ཡང་མི་འདུག
                        ༢༠༠༦་༨་༢༠
 
             པོ་ཏ་ལ།
སྤྲོ་ལྷང་ལྷང་གིས
ཁྱོད་ཀྱི་མདུན་ལྗོངས་སུ་ཐོན་མ་ཐག
བཞུད་ཟིན་པའི་སྐྱེ་བོ་དེ་དག་མཐོང
གློ་བུར་དུ
ང་ཁྱོད་ཀྱི་བདག་པོ་ཡིན་པར་སྙམ
ག་ལེར     ཅི་ཞིག་གིས་ལབ་པ་ལྟར་ན
ང་ཁྱོད་ཀྱི་ལྟ་མོ་བར་གྱུར་ཟིན
སྐྱོ་ལྷང་ལྷང     སྐྱོ་ལྷང་ལྷང་གིས་རང་མལ་དུ་ལོག་དགོས་བྱུང
                                      ༢༠༠༦་༡༠་༦

               མཚན་གཞས།
བར་མེད་འཁྲིགས་པའི་སྤྲིན་དཀར་གྱི་གཞིས་ཁྱིམ་དབྱིངས་ལས
ཟླ་བ་ལྷན་དུ་ཁྱོད་ཉིད་འཛུམ
དལ་བུར་རྒྱུ་བའི་ལྷགས་རླུང་གི་ཟིལ་ཤུགས་ངོགས་སུ
ཅི་ཞིག་གིས་ཁྱོད་ཀྱི་སྐད་སྒྲ་འཁྱེར་ནས་འོངས
སྒེའུ་འགྲམ་དུ་ལྷུང་བའི་ཟླ་བའི་འོད་ཟེར་གྱིས
ཁེར་རྐྱང་གི་རྨི་ལམ་ཅི་ཙམ་བླུད་ཨང
གང་ཞིག་གི་རྐྱེན་གྱིས    རང་དབང་མེད་པར
 
ཨ་སྔོན་གྱི་ཆུ་འཛིན་དཀར་བོའི་ཚོམ་བུ་དག
ཉལ་བཞིན་པའི་དུར་ཁྲོད་ཀྱི་ཀེང་རུས་སུ་རོལ་བས
དོ་ནུབ     ངའི་ཚེ་སྲོག་གི་སྐུད་པ་རླུང་ཁར་གཡེང་འདུག
                            ༢༠༠༥་༡༢་༢༥
 

རྩོམ་ཁུངས། ངེད་དྲ་བ།