མཚན་མོ་དེའི་འདུ་འཛོམས་ཁྲོད།
    ང་རང་ཆང་གིས་བཟི་སོང༌།
    སྲང་ལམ་གྱི་བཞི་མདོ་ནས།
    གོམ་ཁ་མི་ཐུབ་པའི་ཁོ་བོ།
    ཝི་རག་གི་དམ་བུར་དམ་དུ་འཇུས་ནས།
    དཔའ་བོ་ཞིག་གི་སྐུ་རུ་བཞེངས།
 
    ཨམ་ཕྲག་ན་དངུལ་ཁུག་སྟོང་བ་ཞིག
    ཁ་ཁུག་ན་ཁ་ཆུ་མོད་པོ་ཞིག
    ཝི་ཆང་རྔམ་འཐུང་ལ་བྲེལ་བའི་ང༌།
    རྣལ་འབྱོར་པ་སུ་ཞིག་གི་ཡང་སྲིད་ཡིན་ནམ།
 
    སྙིང་གཏམ་མེད་ཀྱང་ཉོག་བཤད་ལ་མཁས་པ།
    སྤོབས་པ་མེད་ཀྱང་སྟོང་ལབ་ལ་བྱང་བ།
    དབུགས་རྒྱུ་ཐ་མ་ཙམ་ལ་བརྟེན་པའི་ང༌།
    དྲི་མ་ཚ་བའི་ཆང་རག་ལ་ཆགས་ནས།
    མི་ཚོགས་ཀྱི་རྡོག་འོག་ན་འགྱེལ་མ་ལངས།
 

རྩོམ་ཁུངས། ངེད་དྲ་བ།