རེབ་གོང་གི་དཔྱིད་ཀ
༡
དཔྱིད་ཀ་དལ་གྱིས་སླེབས་ནའང
དཔྱིད་རླུང་འདི་ལྟར་བྲེལ་འཚུབ་ཀྱིས་གཡུགས་ཏེ
རེབ་གོང་གི སྣོད་བཅུད་ཀྱི་ངོ་གདོང་ཡོད་ཚད་རྡུལ་གྱིས་གཡོགས་སོང
འབྲུག་ཆུང་ཡ
ཁྱོད་ད་དུང་གཏི་མུག་གི་འདམ་དུ་གནས་སམ
སྦྲང་ཆར་ཨང ཁྱོད་ཀྱང་སུ་ཞིག་གི་སྤར་མཐིལ་ན་ལུས་ཡོད
རེབ་གོང་གི་རི་བོ རེབ་གོང་གི་ཆུ
རེབ་གོང་གི་ནགས་དང་ས་ཞིང་ཡོད་ཚད་ཀྱང
ཇི་འདྲའི་སྐྱང་ཐང་ཐང་ཞིག་རེད
རླུང གཡུགས་ཤིག
ཧ་ཅང་གི་དུད་སྤྲིན་ཁུར་བའི་སྟོབས་ཀྱིས་གཡུགས་ཤིག
དགུན་གཞུང་གི་འཁྱག་གྲང་དང
ཟོལ་བཅོས་ཀྱི་སྔོ་ལྗང
སྤྱང་ལྟོགས་ཀྱི་ངར་སྐད་རྣམས་ཀྱང རྒྱང་རིང
རྒྱང་རིང་རྒྱང་རིང་གི་མཐའ་རུ་ཁུར་ཅིག
༢
འདུ་ཁང་གི་དུང་སྒྲ་འདིས
དྲོད་འཇམ་ལ་ཕྱག་ཟུང་བརྐྱངས་ནས་ཡུན་རིང་འགོར་ནའང
ནེ་ཙོ་དག་གི་སྨྲ་བརྗོད་ཀྱིས་རེ་བཞག་གི་དྭངས་གཙང་བརླག་སོང
རླུང་རྟའི་ཚོགས་ཀྱང དཀྱེལ་ཆེ་ཀློང་ཡངས་ཀྱི་ནམ་མཁའི་ཁྱོན་ནས
སྦྲང་ཆར་ཡ ལ་ཐང་མེད་པར་བོབས་ཤིག
ནག་ནོག་གི ཧྲལ་ཧྲུལ་གྱི
རེབ་གོང་གི་ཕྱི་ནང་གཙང་མར་ཁྲུས་ཤིག
མེ་ཏོག་དང་ཞི་འཇགས
དྭངས་བསིལ་གྱི་ཆབ་དང་ཆུ་བོ་རྒྱས་པར་མཛོད་ཅིག
ས་སྒང་གི་སྤྱི་གཙུག་ནས
གོམ་ཤུགས་ཀྱིས་སོང་སོང་བའི་རེབ་གོང་གི་འགྲོ་བ་དག
འདི་ལྟར ས་རྡུལ་རིམ་པ་གཅིག་གི་ཀློང་ན
ཁ་རོག་གེར ཐོ་ཡོར་བཞིན་འགྲེང་ཡོད
ཨ འཆར་གཞི་དང་རེ་སྟོང་གི་རྡུལ་རིམ་འདིའི་གསེབ་ན
ཆགས་སྲེད་ཀྱིས་གཡོ་བའི་ཤོག་བྱ་དུ་ཙམ་ཡོད་ཨང
༣
ད་ལོའི་དཔྱིད་ཀ་ནི་རླུང་རྐྱང་རྐྱང་གི་དཔྱིད་ཀ་རེད
ད་ལོའི་དཔྱིད་རླུང་ནི་རྡུལ་རྐྱང་རྐྱང་གི་དཔྱིད་རླུང་རེད
ཁྲ་ལམ་ལམ་འཁུར་བའི་ཆུ་ཤོག་གི་ཁྱུ
ས་ཆེན་གྱི་སྟེང་འོག་མྱུལ་བའི་ནད་འབུ་རེད
ཁངས་དང་ཆར་རྒྱུན་གྱི་ཐིགས་པ་དེ་དག་ཀྱང་
སྙིང་རྗེ་མེད་པའི་སྐུ་དྲག་གི་གསེར་དངུལ་འདྲ
རེབ་གོང་གི་རླུང རེབ་གོང་གི་རྡུལ
གཡུག་གིན་གཡུག་གིན
འཐིབ་ཀྱིན་འཐིབ་ཀྱིན
མིག་གི་མཐོང་ལམ་དུ་འཚུབ་ཅིང
སེམས་པའི་གཏིང་རིམ་དུ་བབས་སོང
༤
དོན་དངོས་སུ དཔྱིད་ཀ་ནི་མེ་ཏོག་གི་གྲོང་ཚོ་ཡིན་འོས
དོན་དངོས་སུ དཔྱིད་ཀ་ནི་ཨ་མའི་སྙན་འཇེབས་ཀྱི་གླུ་སྒྲ་ཡིན་འོས
སྦྲང་ཆར་གྱི་ཐིགས་པ་དེ་དག་ཀྱང
སྟོན་པའི་ལྷུང་བཟེད་ནང་གི
རིགས་དྲུག་དབྱེར་མེད་པའི་གསོལ་ཇ་ཡིན་འོས
༥
རེབ་གོང ཁྱི་ཚོགས་ཀྱི་ཚང་མལ་ཞིག་གམ
རལ་གོག་གི་གནའ་བོའི་སྡོང་རྒན་ཞིག་རེད
དཔྱིད་ཀ བསླུ་བྲིད་ཀྱི་གཏམ་རྒྱུད་ཅིག་གམ
ས་སྨྱུག་གི་འཇབ་རྒོལ་ཞིག་རེད
ཞོགས་པ་ནས་ཉིན་གུང
ས་སྲོད་ནས་མཚན་གཞུང་གང་དུའང
ས་རྡུལ་ཁོ་ན་འབབ་ཅིང
རྣར་གཟན་པའི་འུར་སྒྲ་ཁོ་ན་ལྷང་ལྷང་གྲགས
རྩོམ་ཁུངས། ༢༠༠༤ལོའི་གངས་རྒྱན་མེ་ཏོག་དེབ་གཉིས་པ།