གཡོན་ཅན་སྙན་པར་སྨྲ་བ་ནི།།

རང་དོན་ཡིན་གྱི་གུས་ཕྱིར་མིན།།

སྲིན་བྱ་སྙན་ནས་དགོད་པ་ནི།།

ལྟས་ངན་གཏོད་ཀྱི་དགའ་ནས་མིན།།

ངན་པས་ཐོག་མར་ཚིག་གིས་འབྲིད།།

བག་ཕེབས་གྱུར་ན་ཕྱི་ནས་བསླུ།།

ཉ་པས་ཟས་ཀྱིས་ཁ་བྲིད་ནས།།

ཉ་རྣམས་གསོད་པར་བྱེད་ལ་ལྟོས།།

དམན་པ་ཇི་སྲིད་ཉམ་ཆུང་བ།།

དེ་ཡི་བར་ལ་རང་བཞིན་བཟང༌།།

དུག་གི་ཚེར་མ་མ་སྨིན་པའི།།

བར་དུ་གཞན་ལ་འབིགས་མི་ནུས།།

ཡིད་ལ་བསམ་པ་གཞན་བྱས་ནས།།

ཚིག་ཏུ་སྨྲ་བ་གཞན་བྱེད་པ།།

གཡོན་ཅན་ཞེས་སུ་གྲགས་པ་སྟེ།།

བླུན་པོ་མཁས་པར་འཆོས་པ་ཡིན།།

ཧ་ཅང་གཡོ་སྒྱུ་མང་དྲགས་ན།།

རེ་ཞིག་གྲུབ་ཀྱང་ཐ་མར་བརླག།

གཟིག་ལྤགས་བཀབ་པའི་བོང་བུ་ཡིས།།

ལོ་ཏོག་ཟོས་མཐར་གཞན་གྱིས་བསད།།

 ཤེས་རབ་ལྡན་ན་མངོན་སུམ་གྱི།།

རྫུན་གྱིས་ཕ་རོལ་བསླུ་བར་ནུས།།

རྐུན་པོ་རྣམས་ཀྱིས་ཁྱེར་བཏགས་པས།།

ར་སྐྱེས་ཁུར་བ་བྲམ་ཟེས་བོར།།

ཉེས་པ་མངོན་སུམ་བྱེད་བཞིན་དུ།།

གཡོན་ཅན་ཚིག་གིས་ཕ་རོལ་བསླུ།།

ལྷ་ཆེན་སྨྲེ་སྔགས་ཤོར་བ་ལ།།

སྡུག་བསྔལ་བདེན་པ་བསྒྲགས་སོ་ལོ།།

གཡོ་ཅན་ཚུལ་གཟོབ་ངག་འཇམ་ལ།།

མ་བརྟགས་བར་དུ་ཡིད་མི་བརྟན།།

རྨ་བྱ་གཟུགས་མཛེས་སྒྲ་སྙན་ཡང༌།།

དེ་ཡི་ཁ་ཟས་དུག་ཆེན་ཡིན།།

གཡོ་ཅན་བཟང་པོའི་ཚུལ་བཟུང་ན།།

ཕྱི་ནས་དོན་ལ་བསླུ་བ་ཡོད།།

རི་དྭགས་རྔ་མ་བསྟན་ནས་ནི།།

ཁྲེལ་འདས་བོང་བུའི་ཤ་དག་འཚོང༌།།

ངོ་ཚ་ཆུང་རྣམས་གཞན་ནོར་ལ།།

བདག་གི་ཆེ་བ་སྒྲུབ་པ་ཡོད།།

མགྲོན་ལ་གྲོགས་ཀྱི་གོས་བཏིང་ནས།།

བདག་གི་གུས་རྟགས་སྟོན་པར་བྱེད།།

གཏིང་ནས་ཉམས་པའི་ཁྲེལ་འདས་རྣམས།།

རང་གི་གཏམ་ངན་ངོ་སོར་འཁྱེར།།

ཀཉྩའི་ཡུལ་གྱི་རྒྱལ་རིགས་འགའ།།

ཕ་བསད་པ་ལ་རྒྱལ་རྔ་རྡུང༌། །

བློ་ཆུང་རྣམས་ཀྱིས་ཕན་བཏགས་པ།།

འགའ་ཞིག་གནོད་པ་ཆེན་པོར་འགྱུར།།

སྐྱ་ཀའི་ཕྲུ་གུས་མ་ཡི་སྤུ།།

འཐོག་པ་དྲིན་ལན་ཡིན་པར་སྒོམ།།

གཞུང་ངན་གཞན་གྱི་བཀའ་དྲིན་ལས།།

བྱུང་བ་རང་གི་ཆེ་བར་སྒོམ།།

ཀླུ་ཡིས་འབད་ནས་ཕབ་པའི་ཆར།།

ཞིང་པ་རང་གི་དཔལ་དུ་རྩི།།

བློ་ངན་ལས་ལ་སྤྱོད་པ་ལ།།

རང་གི་འབད་པས་ཐོབ་པར་སེམས།།

ཁྱི་རྒན་ཡ་རྐན་ཕུག་པའི་ཁྲག།

རུས་པའི་བཅུད་དུ་བསྒོམས་ནས་འཆའ།།

མི་མཁས་པ་དག་གཉེན་བཅོམ་ནས།།

འབྲེལ་མེད་གཞན་དག་གསོ་བར་མཐོང༌།།

མགོ་བོ་བཅད་ནས་མཇུག་མའི་རྒྱན།།

སྨྱོན་པ་མིན་པ་སུ་ཞིག་བྱེད།།

བླུན་པོས་དགོས་པའི་སར་མི་བྱིན།།

མི་དགོས་པ་ལ་ལྷུག་པར་འཆོར།།

ཆུ་མིག་ངན་པ་དབྱར་འབབ་ཀྱི།།

དཔྱིད་དུས་དགོས་པའི་ཚེ་ན་སྐམ།།

སྐྱེ་བོ་དམ་པ་ཞི་བ་ལ།།

ངན་པ་ལྷག་པར་འཚེ་བར་བྱེད།།

སྣུམ་དང་ལྡན་པའི་སྡོང་བུ་ལ།།

མེ་ལྕེ་ཆགས་ཀྱི་གཞན་ལ་མིན།།

རྩུབ་པས་རྩུབ་པ་ཐུལ་འགྱུར་གྱི།།

ཞི་བས་འདུལ་བར་ག་ལ་ནུས།།

ཕོལ་མིག་བསྲེགས་དང་བཅད་པས་འདོན།།

ཞི་ཆོས་དེ་ཡི་དུག་ཏུ་འགྱུར།།

རྒྱལ་པོས་ཆོས་བཞིན་ས་བསྐྱང་སྟེ།།

མིན་ན་རྒྱལ་པོ་ཉམས་པའི་རྟགས།།

ཉི་མས་མུན་པ་མི་སེལ་ན།།

དེ་ནི་གཟའ་ཡིས་ཟིན་པའི་རྟགས།།

སྡིག་སྤྱོད་རྗེ་བོར་བསྐོས་པ་དང༌།།

ཁང་པའི་ཡང་ཐོག་གྲུམ་པ་དང༌། །

རི་རྩེ་ཤིན་ཏུ་ཞིག་པ་ཡི།།

འོག་ན་གནས་རྣམས་རྒྱུན་དུ་སྐྲག།

གལ་ཏེ་རིག་པ་ཡོད་ན་ཡང༌།།

སྐྱེ་བོ་རང་བཞིན་ངན་པ་སྤང༌།།

དུག་སྦྲུལ་ནོར་བུས་མགོ་བརྒྱན་ཡང༌།།

མཁས་པ་སུ་ཞིག་པང་དུ་ལེན།།

སྙན་གྲགས་རྒྱལ་པོ་བཞེད་བཞིན་དཀའ།།

བཀྱེད་ན་ཐུགས་ཀྱིས་འཛིན་པ་དཀོན།།

བར་མར་གནས་པ་གཡང་ཟ་བས།།

རྒྱལ་པོ་ལ་ལ་མེ་ཆེན་འདྲ།།

ཆུང་མ་ངན་དང་མཛའ་བོ་ངན།།

རྒྱལ་པོ་ངན་པ་སུ་ཞིག་བསྟེན།།

གཅན་གཟན་གདུག་པའི་ནགས་ཁྲོད་དུ།།

སེམས་ཤེས་རྟག་ཏུ་སྡོད་དམ་ཅི།།

དྲེགས་པས་ཡོན་ཏན་ཉམས་འགྱུར་ཞིང༌།།

འདོད་པས་ངོ་ཚ་ཉམས་པར་བྱེད།།

གཡོག་འཁོར་རྟག་ཏུ་སུན་ཕྱུང་ན།།

རྗེ་དཔོན་ཉམས་པར་འགྱུར་བ་ཡིན།།

ཕན་པར་སྨྲ་བ་དཀོན་པ་སྟེ།།

དེ་དག་བས་ཀྱང་ཉན་པ་དཀོན།།

སྨན་པ་མཁས་པ་རྙེད་དཀའ་སྟེ།།

དེ་ཡི་ཚིག་བཞིན་བྱེད་པ་ཉུང༌།།

ཧ་ཅང་རློམ་པ་ཆེས་དྲགས་ན།།

སྡུག་བསྔལ་བརྒྱུད་མ་ཐོག་ཏུ་བབ།།

སེང་གེ་ང་རྒྱལ་ཆེས་པའི་རྒྱུས།།

ཝ་ཡིས་ཁུར་པོ་བསྐུར་ཞེས་ཐོས།།

བྱ་རོག་དག་གིས་བསྐུངས་པ་དང༌།།

གཞུང་ངན་པ་ལ་ཕན་བཏགས་དང༌།།

ཞིང་ངན་ས་བོན་བཏབ་པ་རྣམས།།

རེ་བ་མང་སྟེ་སྤྱོད་པ་ཉུང༌།།

མ་བརྟགས་པར་ནི་སུ་ལ་ཡང༌།།

ཡིད་ཆེས་པ་དང་བསྒོ་མི་བྱ།།

བག་ཕབ་པ་ལས་སྐྱོན་བྱུང་དང༌།།

གྲོས་བཏབ་པ་ལས་དགྲར་གྱུར་མང༌།།

འཇིག་རྟེན་ངན་པ་མང་ཡོད་ཀྱང༌།།

སྐྱེ་བོ་ངན་འདྲའི་འཇིགས་པ་མེད།།

ངན་པ་གཞན་དག་བཅོས་རུང་གི།

སྐྱེ་བོ་ངན་པ་བཅོས་ན་འཇིག།

སྐྱེ་བོ་ངན་པ་ཡོན་ཏན་བརྒྱས།།

ཕན་པར་བྱས་ཀྱང་མགུ་མི་ནུས།།

གང་ཞིག་བརྟེན་པ་དགྲར་འགྱུར་འདི།།

སྐྱེ་བོ་ངན་པའི་ཁྱད་ཆོས་ཡིན།།

ངན་པ་ཇི་ལྟར་བཅོས་གྱུར་ཀྱང༌།།

རང་བཞིན་བཟང་པོ་འབྱུང་མི་སྲིད།།

སོལ་བ་འབད་དེ་བཀྲུས་ན་ཡང༌།།

ཁ་དོག་དཀར་མ་མི་སྲིད་དོ།།

སྐྱེ་བོ་ངན་པས་སུན་ཕྱུང་བའི།།

ས་དེར་དམ་པ་མཐོང་ཡང་སྤོང༌།།

སྦྲུལ་གྱིས་གཙེས་པའི་ས་ཕྱོགས་སུ།།

གསེར་གྱི་ཉག་ཐག་མཐོང་ཡང་འབྲོས།།

མཆོད་པ་དམ་པ་ལ་བྱ་ཡི།།

དམན་པ་མཆོད་ན་ཉེས་པའི་གཞི།།

འོ་མ་སྐྱེས་བུའི་བདུད་རྩི་སྟེ།།

སྦྲུལ་ལ་བྱིན་ན་དུག་འཕེལ་ལོ།།

འབད་དེ་ཀུན་ནས་བསྟན་བྱས་ཀྱང༌།།

ངན་པ་བློ་དང་ག་ལ་འདྲེས།།

མཆིལ་པ་ཇི་ལྟར་གསོས་གྱུར་ཀྱང༌།།

བག་ཕེབས་འགྱུར་བ་མི་སྲིད་དོ།།

རྟག་ཏུ་འབྱེད་ལ་བརྩོན་པའི་མིས།།

མཛའ་བ་བརྟན་པོའང་ཕྱེད་འགྱུར་ཏེ།།

ཆུ་ཡིས་རྟག་ཏུ་བཅོས་གྱུར་ན།།

བྲག་ལ་སེར་ག་མི་འབྱུང་ངམ།།

བདག་གིས་བསླུས་དང་ངན་བྱས་དང༌།།

མཁན་སློབ་གྲོགས་ཀྱི་སྐྱོན་བརྗོད་པ།།

རྫུན་ན་རྫུན་པས་ཡིད་བརྟན་མེད།།

བདེན་ན་ལྷག་པར་འཇིགས་པ་སྐྱེ།།

མི་གང་བརྗོད་བྱ་མ་ཡིན་པ།།

གཞན་གྱི་དྲུང་དུ་སུས་བརྗོད་པ།།

བདེན་ནམ་འོན་ཏེ་རྫུན་ཡང་རུང༌།།

མཁས་པས་དེ་ལ་བག་ཟོན་བྱ།།

གཞུང་ངན་ནོར་ལ་གཅེས་འཛིན་པ།།

མཛའ་བཤེས་ཡིན་ཡང་ཡིད་མི་བརྟན།།

ཆེན་པོ་རྣམས་ལ་གསུག་ཟོས་ནས།།

གཉེན་གྱིས་བརླགས་པར་བྱས་པ་མང༌།།

གནོད་པའི་མཚན་མ་ཁར་འབྱིན་པའི།།

དགྲ་བོ་དེ་དག་གཞོམ་པར་སླ།།

ཕན་པའི་བཟློག་རྟགས་ཁར་འབྱིན་པའི།།

དགྲ་བོ་དེ་དག་ཇི་ལྟར་གཞོམ།།

རྨ་གཞན་མཁས་ན་འཚོ་སྲིད་ཀྱི།།

ཉེས་པའི་ཚིག་རྨ་འདྲུབ་པ་མེད།།

ཁྭ་ཡིས་འུག་པ་རྨ་ཕབ་པས།།

བསྐལ་པའི་བར་དུ་འགྲས་ལ་ལྟོས།།

སྙིང་ལ་ཁོན་དུ་དམ་བཟུང་ནས།།

ཁ་ལ་ཚིག་བཟང་སྨྲའོ་ཞེས།།

དྲང་སྲོང་གདུག་པའི་གདམས་ངག་སྟེ།།

དམ་པའི་ཚུལ་དང་འགལ་བ་ཡིན།།

དུག་གི་རྩ་བ་འདོན་པ་ལྟར།།

དགྲ་བོ་རྩད་ནས་གཅོད་དོ་ཞེས།།

རྒྱལ་པོའི་ལུགས་ལ་འབྱུང་མོད་ཀྱི།།

བུ་བཞིན་བསྐྱངས་ན་བུ་བཞིན་བྱེད།།

རང་དོན་འབའ་ཞིག་བསྒྲུབ་པ་ཡི།།

མི་དང་འགྲོགས་པར་སུ་ཡིས་ནུས།།

སོ་ནམ་བརྩོན་པའི་ཞིང་གསེབ་ཏུ།།

ལྡུམ་གཞན་སྨིན་པའི་གོ་སྐབས་དཀའ།།

མི་གང་བྱས་པ་མི་གཟོ་བ།།

དེ་ལ་གྲོགས་བྱེད་ག་ལ་སྲིད།།

འབད་ཀྱང་འབྲས་བུ་མི་སྨིན་པའི།།

ཞིང་ལ་སོ་ནམ་སུ་ཡིས་ནུས།།

གཟུ་ལུམ་དག་གིས་སྤྱོད་པ་ཡིས།།

སྐྱེ་བོ་མྱུར་དུ་རྒུད་པར་འགྱུར།།

སྤྱི་བརྟོལ་ཅན་གྱི་གླང་རྒོད་ཀྱིས།།

གཅད་བྱ་མྱུར་དུ་མི་གཅོད་དམ།

དམན་ལ་ཇི་ལྟར་ཕར་བྱིན་ཡང༌།།

ཚུར་ལ་དགོས་ན་ག་ལ་སྟེར།།

སྐམ་པས་རྟག་ཏུ་བཟུང་ན་ཡང༌།།

ལྕགས་གོང་ཚུར་ལ་འཛིན་ནམ་ཅི།།

ངན་པས་གཞན་དོན་སྒྲུབ་བོ་ཞེས།།

སྙད་བཏགས་ནས་ནི་སྡིག་ལ་སྦྱོར།།

གཞན་དོན་ལྟར་སྣང་སྒྲུབ་དོན་དུ།།

མཁས་པ་སུ་ཞིག་རང་ཉིད་འཇོམས།།

བུ་ལོན་ལྷག་མ་དགྲ་བོའི་ཐེད།།

ཁྲིམས་ངན་རྣམས་དང་གཏམ་ངན་དང༌།།

རིགས་རྒྱུད་ངན་དང་སྤྱོད་ངན་རྣམས།།

མ་སྤེལ་བར་ཡང་རང་ཉིད་འཕེལ།།

ལེགས་པར་བཤད་པ་རིན་པོ་ཆེའི་གཏེར་ལས་ངན་སྤྱོད་བརྟག་པ་སྟེ་རབ་ཏུ་བྱེད་པ་ལྔ་པའོ།།

རྩོམ་ཁུངས། མི་རིགས་དཔེ་སྐྲུན་ཁང་།