ཉིན་གཅིག་རང་གི་སེམས་ལ་ཤར་བ་ལྟར་ཉམས་དབྱངས་འདི་བླངས་སོ། །
   བྲག་རི་ཡི་ཁང་བཟང༌།  །  ལྗོན་ཤིང་གི་བསིལ་གྲིབ།  ། སྔོ་ལྗང་རྩྭའི་སྐྱིལ་ཆུང༌། ། རས་དཀར་གྱི་གུར་སོགས། །  གང་དགའ་རུ་སྡོད་པའི། ། རྣལ་འབྱོར་པ་གུ་ཡངས། ། བློ་བདེ་ངས་སྐྱིད་པའི། །རྒྱང་གླུ་ཞིག་ལེན་ནོ། ། རང་ཉིད་ལ་བཀའ་དྲིན། ། སངས་རྒྱས་ལས་ལྷག་པའི། ། མཚན་ལྡན་གྱི་བླ་མ། ། དམ་པ་ལ་བརྟེན་ནས། ། འཁོར་འདས་ཀྱི་ཆོས་རྣམས། ། སྣང་སྟོང་ནི་ཟུང་འཇུག ། གང་སྣང་ཀུན་སེམས་ཀྱི། ། ཆོ་འཕྲུལ་དུ་གོ་སོང༌། ། འཁོར་འདས་ཀྱི་རྩ་
བ། ། རང་སེམས་ཀྱི་གནས་ལུགས། ། དངོས་བཟུང་མེད་སྟོང་གསལ། ། འཛིན་མེད་དུ་རྟོགས་སོང༌། ། དབེན་གནས་སུ་བསྡད་དེ། ། གནས་ལུགས་ཀྱི་ངང་ལ། ། རས་བལ་བཞིན་ཤེས་པ། ། གློད་ནས་རང་བཞག་པས། ། མ་རིག་པའི་མུན་པ། ། རང་དྭངས་ལ་སོང་ནས། ། ཆོས་དབྱིངས་ཀྱི་ནམ་མཁའ། ། ཡངས་པ་དེ་ལངས་བྱུང༌། ། གནས་ལུགས་དེ་ཡིན་མིན། ། ཐེ་ཚོམ་གྱིས་དོགས་པ། ། རྒྱལ་བ་རྣམས་བྱོན་ཀྱང༌། ། འདྲི་རྒྱུ་ཞིག་མི་སྣང༌། ། རྩ་གསུམ་ལྷའི་ཞིང་ཁམས། ། མཁའ་སྤྱོད་དངོས་ཙཱ་རི། །ཉམས་རྟོགས་ཀུན་གཅིག་ཆར། ། འཁྲུངས་གནས་ན་བཞུགས་པའི། ། མིང་དོན་གཉིས་མཐུན་པའི། ། ཕྱག་ཆེན་གྱི་རྣལ་འབྱོར། ། གནས་ལུགས་ཀྱི་རང་ཞལ། ། མཇལ་བ་ཡི་ཚོགས་རྣམས། ། ནམ་མཁའ་བཞིན་སང་ངེ༌། ། ཉི་མ་བཞིན་ས་ལེ། ། མེ་ལོང་བཞིན་ཝལ་ལེ། །མིག་འབྲས་བཞིན་ཧྲིག་གེ ། ཆོས་ཀྱི་སྐུའི་ཁྱད་ཆོས། །བཞི་ལྡན་འདི་སྐྱོངས་དང༌། ། ཆོས་དབྱིངས་ཀྱི་ཞིང་ལ། ། དུས་མཉམ་དུ་ཆས་འགྲོ །དབུ་མ་བ་ལུང་རིགས། ། ཀུན་མཁྱེན་གྱི་དགེ་བཤེས། ། ཆོས་གྲྭ་རུ་བགྲོ་གླེང༌། ། བཏང་བ་དེ་སྙན་བཞིན། ། ཕྱག་རྫོགས་པ་གཅིག་ཤེས། ། ཀུན་གྲོལ་གྱི་རྣལ་འབྱོར། ། དབེན་པ་རུ་ཉམས་མགུར། ། བླངས་པ་ཡང་སྙན་ཡོང༌། །  ཞེས་བླངས་པས་དེར་བཞུགས་པའི་རྟོགས་ལྡན་འཕྲུལ་ཞིག་རྣམས་ཐུགས་དགྱེས་པར་གྱུར་ཏོ། །