ན་མོ་གུ་རུ། བླ་མ་ལ་ཕྱག་འཚལ།

བླ་མ་རྣམས་དང་ཡི་དམ་དཀྱིལ་འཁོར་ལྷ།།

ཕྱོགས་ཀྱི་དུས་གསུམ་རྒྱལ་བ་སྲས་དང་བཅས།།

བདག་ལ་བརྩེ་དགོངས་བདག་གི་སྨོན་ལམ་རྣམས།།

ཇི་བཞིན་འགྲུབ་པའི་མཐུན་འགྱུར་བྱིན་བརླབས་མཛོད།།

བདག་དང་མཐའ་ཡས་སེམས་ཅན་ཐམས་ཅད་ཀྱི།།

བསམ་སྦྱོར་རྣམ་དག་གངས་རི་ལས་སྐྱེས་པའི།།

འཁོར་གསུམ་རྙོག་མེད་དགེ་ཚོགས་ཆུ་རྒྱུན་རྣམས།།

རྒྱལ་བ་སྐུ་བཞིའི་རྒྱ་མཚོར་འཇུག་གྱུར་ཅིག།

ཇི་སྲིད་དེ་མ་ཐོབ་པ་དེ་སྲིད་དུ།།

སྐྱེ་དང་སྐྱེ་བ་ཚེ་རབས་ཀུན་ཏུ་ཡང་།།

སྡིག་དང་སྡུག་བསྔལ་སྒྲ་ཡང་མི་གྲགས་ཅིང་།།

བདེ་དགེ་རྒྱ་མཚོའི་དཔལ་ལ་སྤྱོད་པར་ཤོག།

དལ་འབྱོར་མཆོག་ཐོབ་དད་བརྩོན་ཤེས་རབ་ལྡན།།

བཤེས་གཉེན་བཟང་བསྟེན་གདམས་པའི་བཅུད་ཐོབ་ནས།།

ཚུལ་བཞིན་བསྒྲུབ་ལ་བར་ཆད་མ་མཆིས་པར།།

ཚེ་རབས་ཀུན་ཏུ་དམ་ཆོས་སྤྱོད་པར་ཤོག།

ལུང་རིག་ཐོས་པས་མི་ཤེས་སྒྲིབ་ལས་གྲོལ།།

མན་ངག་བསམ་པས་ཐེ་ཚོམ་མུན་ནག་བཅོམ།།

སྒོམ་བྱུང་འོད་ཀྱིས་གནས་ལུགས་ཇི་བཞིན་གསལ།།

ཤེས་རབ་གསུམ་གྱི་སྣང་བ་རྒྱས་པར་ཤོག།

རྟག་ཆད་མཐའ་བྲལ་བདེན་གཉིས་གཞི་ཡི་དོན།།

སྒྲོ་སྐུར་མཐའ་བྲལ་ཚོགས་གཉིས་ལམ་མཆོག་གིས།།

སྲིད་ཞིའི་མཐའ་བྲལ་དོན་གཉིས་འབྲས་ཐོབ་པའི།།

གོལ་འཆུག་མེད་པའི་ཆོས་དང་ཕྲད་པར་ཤོག།

སྦྱང་གཞི་སེམས་ཉིད་གསལ་སྟོང་ཟུང་འཇུག་ལ།།

སྦྱོང་བྱེད་ཕྱག་ཆེན་རྡོ་རྗེའི་རྣལ་འབྱོར་ཆེས།།

སྦྱང་བྱ་གློ་བུར་འཁྲུལ་པའི་དྲི་མ་རྣམས།།

སྦྱངས་འབྲས་དྲི་བྲལ་ཆོས་སྐུ་མངོན་པར་ཤོག།

གཞི་ལ་སྒྲོ་འདོགས་ཆོད་པ་ལྟ་བའི་གདེངས།།

དེ་ལ་མ་ཡེངས་སྐྱོང་བ་སྒོམ་པའི་གནད།།

སྒོམ་དོན་ཀུན་ལ་རྩལ་སྦྱོང་སྤྱོད་པའི་མཆོག།

ལྟ་སྒོམ་སྤྱོད་པའི་གདེངས་དང་ལྡན་པར་ཤོག།

ཆོས་རྣམས་ཐམས་ཅད་སེམས་ཀྱི་རྣམ་འཕྲུལ་ཏེ།།

སེམས་ནི་སེམས་མེད་སེམས་ཀྱི་ངོ་བོས་སྟོང་།།

སྟོང་ཞིང་མ་འགག་ཆིར་ཡང་སྣང་བ་སྟེ།།

ལེགས་པར་བརྟག་ནས་གཞི་རྩ་ཆོད་པར་ཤོག།

ཡོད་མ་མྱོང་བའི་རང་སྣང་ཡུལ་དུ་འཁྲུལ།།

མ་རིག་དབང་གིས་རང་རིག་བདག་ཏུ་འཁྲུལ།།

གཉིས་འཛིན་དབང་གིས་སྲིད་པའི་ཀློང་དུ་འཁྱམ།།

མ་རིག་འཁྲུལ་པའི་རྩད་བདར་ཆོད་པར་ཤོག།

ཡོད་པ་མ་ཡིན་རྒྱལ་བས་ཀྱང་མ་གཟིགས།།

མེད་པ་མ་ཡིན་འཁོར་འདུས་ཀུན་གྱི་གཞི།།

འགལ་འདུ་མ་ཡིན་ཟུང་འཇུག་དབུ་མའི་ལམ།།

མཐའ་བྲལ་སེམས་ཀྱི་ཆོས་ཉིད་རྟོགས་པར་ཤོག།

འདི་ཡིན་ཞེས་པ་གང་གིས་མཚོན་པ་མེད།།

འདི་མིན་ཞེས་བྱ་གང་གིས་བཀག་པ་མེད།།

བློ་ལས་འདས་པའི་ཆོས་ཉིད་འདུས་མ་བྱས།།

ཡང་དག་དོན་གྱི་མཐའ་ནི་ངེས་པར་ཤོག།

འདི་ཉིད་མ་རྟོགས་འཁོར་བའི་རྒྱ་མཚོར་འཁོར།།

འདི་ཉིད་རྟོགས་ན་སངས་རྒྱས་གཞན་ན་མེད།།

ཐམས་ཅད་འདི་ཡིན་འདི་མིན་གང་ཡང་མེད།།

ཆོས་ཉིད་ཀུན་གཞིའི་མཚང་ནི་རིག་པར་ཤོག།

སྣང་ཡང་སེམས་ལ་སྟོང་ཡང་སེམས་ཡིན་ཏེ།།

རྟོགས་ཀྱང་སེམས་ལ་འཁྲུལ་ཡང་རང་གི་སེམས།།

སྐྱེས་ཀྱང་སེམས་ལ་འགགས་ཀྱང་སེམས་ཡིན་པས།།

སྒྲོ་འདོགས་ཐམས་ཅད་སེམས་ལ་ཆོད་པར་ཤོག།

བློས་བྱས་རྩོལ་བའི་སྒོམ་གྱིས་མ་བསླད་ཅིང་།།

ཐ་མལ་འདུ་འཛི་རླུང་གིས་མ་བསྐྱོད་པར།།

མ་བཅོས་གཉུག་མ་རང་བབས་འཇོག་ཤེས་པའི།།

སེམས་དོན་ཉམས་ལེན་མཁས་ཤིང་སྐྱོང་བར་ཤོག།

ཕྲ་རགས་རྟོག་པའི་རྦ་རླབས་རང་སར་ཞི།།

གཡོ་མེད་སེམས་ཀྱི་ཆུ་བོ་ངང་གིས་གནས།།

བྱིང་རྨུགས་རྙོག་པའི་དྲི་མ་དང་བྲལ་བའི།།

ཞི་གནས་རྒྱ་མཚོ་མི་གཡོ་བརྟན་པར་ཤོག།

བལྟར་མེད་སེམས་ལ་ཡང་ཡང་བལྟས་པའི་ཚེ།།

མཐོང་མེད་དོན་ནི་ཇི་བཞིན་ལྷག་གེར་མཐོང་།།

ཡིན་མིན་དོན་ལ་ཐེ་ཚོམ་ཆོད་པ་ཉིད།།

འཁྲུལ་མེད་རང་ངོ་རང་གིས་ཤེས་པར་ཤོག།

ཡུལ་ལ་བལྟས་པས་ཡུལ་མེད་སེམས་སུ་མཐོང་།།

སེམས་ལ་བལྟས་པས་སེམས་མེད་ངོ་བོས་སྟོང་།།

གཉིས་ལ་བལྟས་པས་གཉིས་འཛིན་རང་སར་གྲོལ།།

འོད་གསལ་སེམས་ཀྱི་གནས་ལུགས་རྟོགས་པར་ཤོག།

ཡིད་བྱེད་བྲལ་བ་འདི་ནི་ཕྱག་རྒྱ་ཆེ།།

མཐའ་དང་བྲལ་བ་དབུ་མ་ཆེན་པོ་ཡིན།།

འདི་ནི་ཀུན་འདུས་རྫོགས་ཆེན་ཞེས་ཀྱང་བྱ།།

གཅིག་ཤེས་ཀུན་དོན་རྟོགས་པའི་གདེངས་ཐོབ་ཤོག།

ཞེན་པ་མེད་པའི་བདེ་ཆེན་རྒྱུན་ཆད་མེད།།

མཚན་འཛིན་མེད་པས་འོད་གསལ་སྒྲིབ་གཡོགས་བྲལ།།

བློ་ལས་འདས་པས་མི་རྟག་ལྷུན་གྱིས་གྲུབ།།

རྩོལ་མེད་ཉམས་མྱོང་རྒྱུན་ཆེད་མེད་པར་ཤོག།

བཟང་ཞེན་ཉམས་ཀྱི་འཛིན་པ་རང་སར་གྲོལ།།

ངན་རྟོག་འཁྲུལ་པ་རང་བཞིན་དབྱིངས་སུ་དག

ཐ་མལ་ཤེས་པ་སྤང་བླང་བྲལ་ཐོབ་མེད།།

སྤྲོས་བྲལ་ཆོས་ཉིད་བདེན་པ་རྟོགས་པར་ཤོག།

འགྲོ་བའི་རང་བཞིན་རྟག་ཏུ་སངས་རྒྱས་ཀྱང་།།

མ་རྟོགས་དབང་གིས་མཐའ་མེད་འཁོར་བར་འཁྱམས།།

སྡུག་བསྔལ་མུ་མཐའ་མེད་པའི་སེམས་ཅན་ལ།།

བཟོད་མེད་སྙིང་རྗེ་རྒྱུད་ལ་སྐྱེ་བར་ཤོག།

བཟོད་མེད་སྙིང་རྗེའི་རྩལ་ཡང་མ་འགགས་པའི།།

བརྩེ་དུས་ངོ་བོ་སྟོང་དོན་རྗེན་པར་ཤར།།

ཟུང་འཇུག་གོལ་ས་བྲལ་བའི་ལམ་མཆོག་འདི།།

འབྲལ་མེད་ཉིན་མཚན་ཀུན་ཏུ་བསྒོམ་པར་ཤོག།

སྒོམ་སྟོབས་ལས་བྱུང་སྤྱན་དང་མངོན་ཤེས་དང་།།

སེམས་ཅན་སྨིན་བྱས་སངས་རྒྱས་ཞིང་རབ་སྦྱངས།།

སངས་རྒྱས་ཆོས་རྣམས་འགྲུབ་པའི་སྨོན་ལམ་རྫོགས།།

རྫོགས་སྨིན་སྦྱངས་གསུམ་མཐར་ཕྱིན་སངས་རྒྱས་ཤོག།

ཕྱོགས་བཅུའི་རྒྱལ་བ་སྲས་བཅས་ཐུགས་རྗེ་དང་།།

རྣམ་དཀར་དགེ་བ་ཇི་སྙིད་ཡོད་པའི་མཐུས།།

དེ་ལྟར་བདག་དང་སེམས་ཅན་ཐམས་ཅད་ཀྱི།།

སྨོན་ལམ་རྣམ་དག་ཇི་བཞིན་འགྲུབ་གྱུར་ཅིག།

རྩོམ་ཁུངས། ངེད་དྲ་བ།