རི་བྱ་ང་ཡི་སྐད་ཆ།།
དབུ་ནག་བོད་ལ་གཏམ་རྒྱུད།།
རྫ་སྤང་མཚམས་སུ་གནས་པའི།།
བྱ་རྒྱལ་གོང་མོའི་སྐད་ཆ།།
མ་ཀི་འགྲོ་དྲུག་སེམས་ཅན།།
མིག་འཕྲུལ་ལས་ལ་སྤྱོད་པ།།
རི་དྭགས་སྐོམ་པའི་སྨིག་རྒྱུ།།
ཆུ་ལ་མཐོང་ནས་འཚོལ་ཡང༌།།
ལྟོ་རུ་ཕྱིན་པ་མི་འདུག།
ལུས་སེམས་སོས་དལ་མེད་པའི།།
སྡུག་བསྔལ་ལས་ལ་སྤྱོད་ཀྱང༌།།
མཐར་ཐུག་འབྲས་བུ་མི་འདུག།
ཟོ་ཆུན་ཁྱུད་མོ་བཞིན་དུ།།
ཡང་ཡང་འཁོར་བའི་སེམས་ཅན།།
སུན་པ་ཡིད་ལ་ཨེ་ཤར།།
སྐྱབས་མཆོག་བླ་མས་གཟིགས་དང༌།།
ཐར་འདོད་བློ་སྣ་ཡོད་ན།།
གོ་དཀའ་འདི་ལ་ཉོན་དང༌།།
དབྱར་གསུམ་སྐྱེས་པའི་མེ་ཏོག།
ཁ་ཏོག་ལྔ་རུ་འཚེར་བའི།།
འདབ་མ་ཟེའུ་འབྲུ་ལྡན་པ།།
ས་གཞི་ཀུན་ཏུ་ཁྱབ་པ།།
བུང་བ་འཁོར་ཞིང་གླུ་སྙན།།
འབུ་སྲིན་མང་པོའི་སྤྱོད་འགྲོས།།
མཐོང་ན་ཡི་མུག་གོ་དཀའ།།
བར་ཆད་གློ་བུར་འབྱུང་བ།།
ཁྲི་གདུགས་ཉི་མའི་ཚད་པ།།
ཐོག་དང་སེར་བས་བྲབས་ན།།
ཁ་དོག་ཉམས་དང་ཤུལ་མེད།།
ལུས་རྟེན་འཛོམས་པའི་འབུ་ཚོ།།
ཆུ་ཤུལ་རྩྭ་སྦུར་གསེབ་ལ།།
རོ་ཚོགས་ཐང་མ་བརྡལ་འདུག།
འཇིག་རྟེན་བྱ་བྱེད་དེ་ལྟར།།
ཚིག་དོན་དེ་ལ་གོ་དཀའ།།
འཛམ་གླིང་སྐྱེས་པའི་ཕོ་མོ།།
གོ་དཀའ་འདི་ལ་ཉོན་དང༌།།
བརྩེགས་པའི་ས་མཁར་རྡོ་མཁར།།
རྨང་རྡོ་སྲ་བརྟན་བླངས་ཀྱང༌།།
ཤི་བའི་ནངས་བར་མི་འདུག།
སྒྱུ་མ་ཡིན་པར་གོ་དཀའ།།
ཁ་བད་སྒེའུ་སྐར་འཛོམས་ཀྱང༌།།
སྙིང་བོ་མེད་པར་གོ་དཀའ།།
པད་འཇའ་གསེར་བད་བརྒྱན་པ།།
ཀུན་སློང་རྣམ་དག་སྒོ་ནས།།
བཞེངས་བའི་གཙུག་ལག་མ་གཏོགས།།
འཇིག་རྟེན་བརྩེགས་པའི་མཁར་ལ།།
སྙིང་བོ་མེད་པར་གོ་དཀའ།།
རྒྱལ་སྲིད་སྐྱོང་བའི་རྒྱལ་བོ།།
སྒྱུ་མའི་རྒྱལ་སར་སྤྱོད་དུས།།
ཀུན་ལ་ཕན་པའི་རྒྱལ་ཁྲིམས།།
དགུང་ལ་ཉི་ཟླ་ཤར་བཞིན།།
ལུགས་གཉིས་ཁྲིམས་ཀྱིས་སྐྱོངས་མཛོད།།
སྙིང་གཏད་ཐུབ་པ་གོ་དཀའ།།
རྒྱལ་སྲིད་མཐོ་བའི་མཐོ་རོགས།།
བློན་འབངས་འཁོར་ལ་རག་ལས།།
བློ་གཏད་ཐུབ་པའི་མི་ཆེན།།
བློ་ཁོག་ཡངས་ལ་རྩལ་ལྡན།།
བློ་རྒྱུད་ཆོས་ཁ་དཀར་བ།།
སྡེ་དཔོན་བདེ་ལ་བཀོད་པའི།།
དེ་འདྲའི་བློན་འབངས་གོ་དཀའ།།
རང་འདོད་ཕུག་ལ་བཅུག་པའི།།
གཡོ་ཁྲམ་ཅན་གྱི་མི་ངན།།
ཁ་མཁས་ཕྱི་བསྒྱུར་ནང་ལྡག།
ཞུམ་ཞུམ་མང་པོས་ཞུ་བ།།
འཕྲལ་འཕྲལ་བདེན་བདེན་འདྲ་ཡང༌།།
དེ་འདྲའི་ཁ་ལ་ཉན་ན།།
རང་གཞན་གཉིས་ཀ་ཕུང་ཡོང༌།།
ཆོས་སྲིད་བསྟན་ལ་གནོད་པའི།།
མི་ངན་ཚར་གཅོད་བྱེད་པའི།།
དེ་འདྲའི་རྒྱལ་བློན་གོ་དཀའ།།
བླ་ཆེན་བསྟན་འགྲོའི་དོན་བྱེད།།
རྒྱལ་བསྟན་འཛིན་པའི་བླ་མ།།
གོ་དཀའ་འདི་ལ་ཉོན་དང༌།།
རང་རྒྱུད་བརྟུལ་བའི་བླ་མ།།
གཞན་དོན་མཛད་པ་ཡིན་ན།།
གཞི་རྟེན་མི་འགྱུར་ཚུལ་ཁྲིམས།།
སོ་སོར་ཐར་བའི་སྡོམ་པ།།
རང་སྲོག་བཞིན་དུ་སྲུངས་དང༌།།
ལྟ་སྤྱོད་རྒྱལ་བའི་བཀའ་བཞིན།།
ཉིས་བརྒྱ་ལྔ་བཅུའི་སྲུང་ཚུལ།།
ཡིད་ལ་འབྲལ་མེད་ཆོངས་ཤིག།
འགྲོ་ལ་ཕན་པའི་སྙིང་རྗེ།།
ཕྱོགས་རིས་མེད་པའི་འགྲོ་དོན།།
ལུས་ངག་ཡིད་ཀྱི་ཕན་པ།།
དགྲ་ཉེན་མེད་པའི་སྤྱོད་པར།།
རྒྱལ་སྲས་སེམས་དཔའི་ལག་ལེན།།
རྟག་ཏུ་བརྩེ་བར་སྐྱོངས་མཛོད།།
མཚན་ལྡན་གཙུག་གི་ནོར་བུ།།
རྟག་ཏུ་སྤྱི་བོར་ཁུར་དང༌།།
དབང་བཞིའི་ཆར་རྒྱུན་ཕོབས་དང༌།།
སྣང་གྲགས་ལྷ་སྔགས་ཡེ་ཤེས།།
རོལ་བར་རང་ངོ་སྤྲོད་པའི།།
རང་ཞལ་ཡང་ཡང་མཇལ་བ།།
དེ་འདྲའི་བླ་མ་གོ་དཀའ།།
ཕྱི་ཚུལ་བླ་མའི་ཚུལ་བཟུང༌།།
ཟོལ་ཟོག་བླ་གོས་འོད་འབར།།
རང་རྒྱུད་མ་བཏུལ་དབང་བསྐུར།།
ང་ཆེ་སྙམ་པའི་ང་རྒྱལ།།
ལྷ་སྔགས་ཏིང་འཛིན་བོར་བའི།།
གྱེར་དབྱངས་སྟོང་བས་ཅི་བྱ།།
རང་འདོད་ཕུག་ལ་བཅུག་ནས།།
ཅི་རག་སྙམ་པའི་བླ་གྲྭ།།
གཟུགས་བྱད་ལེགས་པོ་ཡོད་ཀྱང༌།།
ཞེན་ཆགས་དབང་གིས་སྤྱོད་འགྲོས།།
འཇིག་རྟེན་ཕལ་ལས་ལོད་བྱུང༌།།
བདུད་ཀྱི་ཕྱེ་གཏོར་འགམ་པའི།།
དམྱལ་བའི་གཏིང་རྡོ་སྒྲུབ་པ།།
ལུས་ངག་ཡིད་ལ་གོ་དཀའ།།
ཆོས་བྱེད་རི་ཁྲོད་འགྲིམ་པའི།།
རྟོགས་ལྡན་ཕོ་མོས་གོ་དཀའ།།
གོ་དཀའ་འདི་ལ་ཉོན་དང༌།།
དབེན་གནས་རི་ཁྲོད་འགྲིམ་དང༌།།
གཞན་དོན་ཕྱོགས་མེད་འབྱུང་སོགས།།
གང་ཤར་སྤྱོད་པར་གཤེགས་དུས།།
སྡོམ་གསུམ་རྒྱན་གྱིས་རབ་བརྒྱན།།
བསླབ་གསུམ་ལྡན་པའི་རྟོགས་ལྡན།།
ཆགས་མེད་ཞེན་མེད་འགྲོ་དོན།།
ཁྱེར་སོ་གསུམ་གྱི་མཛད་སྤྱོད།།
ཕྱོགས་རིས་མེད་པར་སྐྱོངས་མཛོད།།
རང་རང་བློ་དང་འཚམ་པའི།།
ཆེ་ཆུང་ཐེག་པའི་ཆོས་བཤད།།
དཔལ་ལྡན་བླ་མའི་བཞེད་པ།།
རིས་མེད་འགྲོ་ལ་སྤེལ་མཛོད།།
ནོར་དང་ལོངས་སྤྱོད་བཀུར་སྟི།།
ཞེན་མེད་སྒྱུ་མར་རོལ་བའི།།
དེ་འདྲའི་རྟོགས་ལྡན་གོ་དཀའ།།
བླ་བཙོང་ཆོས་པའི་རྐང་འདྲེན།།
ཟོལ་ཟོག་ཅན་གྱི་རྫུ་འབག།
ཉམས་རྟོག་མེད་པའི་མིག་ཧྲིག།
གཏུམ་མོ་མེད་པའི་རས་གཟན།།
མཉམ་བཞག་མེད་པའི་སྒོམ་ཐག།
བསྐྱེད་རྫོགས་མེད་པའི་རལ་བ།།
མ་མཐོང་མངོན་ཤེས་འཆད་དང༌།།
མ་མཇལ་ལྷ་ཞལ་མཇལ་མདོག།
མ་རྟོགས་ཉམས་རྟོགས་སྐྱེས་མདོག།
མ་ཞིག་འཁྲུལ་ཞིག་ཡིན་མདོག།
སྤྱོད་པ་དུས་དང་མ་འབྲེལ།།
གྲུབ་ཆེན་སྤྱོད་ཡུལ་ཡིན་མདོག།
བག་མེད་ཤ་ཆང་ནག་སྤྱོད།།
རྐང་འདྲེན་དམྱལ་བའི་གཏིང་རྡོ།།
དེ་འདྲས་འདི་འདྲ་གོ་དཀའ།།
ཁྲིམས་ལྡན་བཙུན་པ་རྣམས་ཀྱིས།།
གོ་དཀའ་འདི་ལ་ཉོན་དང༌།།
འདུས་སྡེའི་སྒྲིག་ལ་འདུག་དུས།།
སྒྲིག་མཐུན་ཉམ་ཆུང་གྱིས་དང༌།།
མཐར་ཐུག་བཙན་ས་ཟིན་ཡོང༌།།
བླ་མ་ཆོས་ཁྲིམས་པ་ཡིས།།
མ་མཐོང་བ་ཡི་ས་རུ།།
ངན་སྤྱོད་ཁྲམ་ལས་མ་བྱེད།།
རང་རྒྱུད་ལེགས་པར་བཏུལ་མཛོད།།
གོ་དཀའ་མཆོག་ཏུ་བཤད་པ།།
ཚིག་སྙན་འདི་ལ་ཉོན་དང༌།།
དགེ་བསྙེན་དགེ་ཚུལ་དགེ་སློང༌།།
རང་རྒྱུད་བཏུལ་བའི་བཙུན་པ།།
རང་འདོད་མེད་པའི་རྒྱན་ཆ།།
གཞན་གནོད་གཞིར་བཅས་སྤོངས་དང༌།།
གཞན་ཕན་གཞིར་བཅས་སྒྲུབས་མཛོད།།
ཆོ་ག་ཆོས་སྤྱོད་གྱེར་དབྱངས།།
ཕྱག་རྒྱ་སྟངས་སྟབས་གར་འཆམ།།
ཀུན་སློང་རྣམ་དག་ལྷོད་མེད།།
བརྩོན་འགྲུས་བཟང་བོས་སྦྱངས་ནས།།
མདོ་སྔགས་རྒྱུད་ནས་གསུངས་པའི།།
དཔལ་ལྡན་བླ་མའི་བཞེད་དོན།།
བྱས་ཚད་ཆོས་སུ་འགྲོ་དང༌།།
བླ་མས་གང་གསུང་བཀའ་སྒྲུབས།།
མཆེད་ལྕམ་འདུས་སྡེར་བཀུར་སྟི།།
དག་སྣང་བཟང་བོ་ཡོད་པའི།།
དེ་འདྲའི་བཙུན་པ་གོ་དཀའ།།
ངན་སྤྱོད་ཁྲམ་ལས་བྱེད་པའི།།
བསྟན་པའི་ཆོམ་རྐུན་ཕུང་བྱེད།།
རང་མཚང་ངན་པ་གོ་དཀའ།།
གོ་དཀའ་འདི་ལ་ཉོན་དང༌།།
འདུས་པའི་གྲལ་དུ་འདུག་སྐབས།།
ཆོས་སྤྱོད་ཆོ་ག་བོར་ནས།།
ལོང་གཏམ་བག་མེད་ལས་སྤྱོད།།
ཕྱག་རྒྱ་གར་སྟབས་བོར་ནས།།
དགེ་བསྐོས་མ་མཐོང་ས་རུ།།
གོ་ཆ་མཚོན་ལ་བྱི་དོར།།
རྫས་དང་མདའ་ཆ་ཡང་སྒྲུབ།།
འདུས་སྡེ་བླ་མར་ལྐོག་ཁ།།
མཆེད་དང་བླ་གྲྭའི་བར་དུ།།
དབྱེན་ཁ་མང་བོས་དཀྲུག་དང༌།།
དབང་དང་སྒྲུབ་པའི་དཀྱིལ་འཁོར།།
སྒྲོན་མེ་གཅིག་ལ་བལྟ་ཞིང༌།།
སྲོག་གིས་བསྡུས་པའི་མཆེད་ལ།།
བསམ་སྦྱོར་ངན་པས་སྡང་བ།།
དགེ་འདུན་སྤྱི་ཡི་ནོར་ལ།།
ཧབ་ཐོབ་བྱེད་དང་ཚོང་འཕྲོག།
གཡོ་རྒྱུ་ཅན་གྱི་པན་འཁྲེབ།།
འཆི་བ་སྙིང་ནས་ཨེ་གོ།
ཆགས་ཞེན་སྐྱེ་བོ་ལས་ལོད།།
ཆགས་སྤྱོད་ངན་དགུ་ཅན་གྱི།།
དགེ་འདུན་དཀྲུག་པའི་གསོར་རྡོ།།
མི་ཆེན་བློན་འབངས་རྣམས་ཀྱི།།
གོ་དཀའ་འདི་ལ་ཉོན་དང༌།།
མི་ཆེན་གཡོ་སྒྱུ་མེད་པ།།
རང་འདོད་ཆུང་བའི་གྱད་བློན།།
གཞན་ཕན་སྒྲུབ་པའི་དཔའ་བོ།།
རྒྱལ་ཁྲིམས་སྲུང་བའི་སོ་པ།།
མི་ཆོས་ལྷ་ཆོས་ཟུང་འབྲེལ།།
དེ་འདྲའི་བློན་འབངས་གོ་དཀའ།།
རྒྱལ་སྲིད་ཆོས་ཀྱིས་སྐྱོང་བའི།།
བློན་འབངས་བཟང་བོ་འདི་ལྟར།།
རང་རྒྱུད་མདའ་བས་དྲང་བ།།
ནོར་ལ་འདོད་པ་ཆུང་བ།།
ཁ་མཆུ་རྩོད་པ་ཐུག་དང༌།།
རྒྱལ་ལ་ཞུ་བ་བྱུང་དུས།།
རང་གཞན་ཁྱད་པར་མ་བྱེད།།
རྒོད་ཞན་ཤུགས་ལ་མ་བསྐུར།།
ནོར་ཟས་ཕག་ནས་མ་ཟ།།
འདི་ཕྱི་གཞིག་པ་བྱེད་དང༌།།
ཞུ་བ་དྲང་བོར་ཕུལ་བའི།།
དེ་འདྲའི་མགྲོན་གཉེར་གོ་དཀའ།།
མི་ངན་ཕལ་གྱི་སྤྱོད་པ།།
གོ་དཀའ་འདི་ལ་ཉོན་དང༌།།
ཉམ་ཆུང་རྒོད་པོའི་བདེ་སྡུག།
དྲང་བོར་ཞུ་བ་མི་འབུལ།།
རང་ཕྱོགས་རྒྱལ་དང་གཞན་ཕམ།།
ཕུགས་སུ་བཅུག་པའི་འགོང་བོ།།
ཡང་ན་ནོར་རྫས་ལྐོག་ཟན།།
ཀ་ཆ་ཅི་འདོད་སྤྱད་ནས།།
བདེན་རྫུན་གོ་ལོག་ཞུ་བའི།།
བླ་བཙོང་དྲག་དྲག་འདོད་པ།།
སྡེ་དཔོན་མགོ་སྐེ་འབྱེད་པའི།།
གཡོ་ཅན་རྫུན་རྐྱལ་ཁ་མཁས།།
སྡེ་དཔོན་ཕུང་བའི་མི་ངན།།
གོ་བ་མེད་པའི་གླང་རྒན།།
འདི་ཕྱི་མེད་པའི་སྡིག་རྒན།།
དམྱལ་བས་གཏིང་རྡོ་དེ་འདྲས།།
འདི་འདྲའི་གོ་བ་གོ་དཀའ།།
སྟག་ཤར་རྣམས་ཀྱིས་གོ་དཀའ།།
གོ་དཀའ་འདི་ལ་ཉོན་དང༌།།
དྲིན་ཆེན་བྱས་པའི་ཕ་མ།།
སྙིང་དང་མིག་བཞིན་བཙའ་དགོས།།
དྲིན་ལན་བྱམས་པས་སྐྱོངས་དང༌།།
རང་ལ་ཕན་པའི་ཁ་ཏ།།
བྱམས་དང་གྱོང་བོས་ཅི་སྨྲས།།
ཁ་ཏ་དེ་ལ་ཉོན་དང༌།།
མི་བསླུ་བ་ལ་ཐག་ཆོད།།
བཀུར་སྟི་བཟང་བོ་བྱས་པས།།
སྙན་གྲགས་ལེགས་པོ་འཐོབ་ཡོང༌།།
རང་རྒྱུས་མེད་པའི་མི་དེའི།།
བཟང་བཟང་ཡག་ཡག་མཐོང་ཡང༌།།
བློ་གཏད་སྙིང་གཏམ་མ་སྔ།།
ཉེ་ཡ་ཤག་པོས་བསླུས་པ།།
གཏམ་རྒྱུད་མང་བོ་ཨེ་གོ།།
བློ་གཏད་མེད་པའི་མི་དེ།།
བཟང་བཟང་མང་པོ་ཡིན་མདོག།
བློ་སྙིང་གཏད་པའི་ཚིག་འདྲ།།
བྱ་བྱེད་སྣ་ཚོགས་བྱེད་པ།།
འཕྲལ་འཕྲལ་བཟང་བཟང་འདྲ་ཡང༌།།
རང་རྒྱུས་མི་ལ་མ་བསྐུར།།
སྔ་ཕྱི་ཅི་ཡོང་མ་བསམ།།
གློ་བུར་བྱ་བྱེད་མ་སྔ།།
སྤུན་ཟླ་ཆུང་མ་བུ་ཚ།།
མཛའ་བཤེས་རྟག་ཏུ་འགྲོགས་ལ།།
མཐུན་འཇུག་བཀུར་སྟི་རེམ་ཙམ།།
ཐང་ལྷོད་མེད་པར་བགྱིད་དགོས།།
རང་མཚང་རང་གིས་བརྟག་དགོས།།
མི་ལ་ཁྲེལ་ཁ་མ་ཆེ།།
མཐོ་དམན་མེད་པ་ཀུན་ལ།།
ངོ་ལྐོག་མེད་པའི་བྱ་སྤྱོད།།
རང་རྒྱུད་དྲང་བ་མཆོག་གཅེས།།
རང་རྩིས་ཆུང་ཞིང་གཞན་ཕན།།
ལྷག་བསམ་བཟང་བོའི་སྟག་ཤར།།
ཀུན་གྱི་གཙོ་བོར་འགྱུར་ཡོང༌།།
དེ་འདྲའི་སྤྱོད་པའི་མི་མཆོག།
དུས་ཀྱི་དབང་གིས་གོ་དཀའ།།
གོ་དཀའ་འདི་ལ་ཉོན་དང༌།།
གོ་དཀའ་ངན་པའི་རྗེས་བཏུལ།།
མི་ངན་ཐ་མའི་སྤྱོད་པ།།
དྲིན་ཆེན་ཕ་མ་རྒས་རྩ།།
དྲིན་ལན་ངན་འཇལ་བཏང་ནས།།
ཟས་གོས་ཐ་མ་སྟེར་དང༌།།
གྱོང་ཚིག་རྡེག་རྡུང་མང་བོས།།
ཨར་གཏད་ཡིད་ཕམ་བྱེད་པའི།།
ཁྲེལ་མེད་དམྱལ་བའི་གཏིང་རྡོ།།
སྤུན་ཟླ་བུ་ཚ་མི་དུམ།།
ངོ་ཤག་ལྐོག་ལབ་ཆེ་བ།།
གསར་འགྲོགས་ཆེ་ཞིང་རྫུན་རྐྱལ།།
ཕན་སེམས་ཁ་ཏས་བསྐྱངས་ལ།།
གོ་ལོག་དགྲ་རུ་ལྟ་བ།།
བཟང་བོས་ཁ་ལ་མི་ཉན།།
གཡོ་ཅན་རྫུན་རྐྱལ་ངན་པ།།
རང་རྒྱུད་བསླུ་བའི་མགོ་སྐོར།།
བཟང་བཟང་མང་པོ་སྨྲ་དུས།།
ཧ་གོ་མེད་པའི་གླང་རྒན།།
གསང་གཏམ་ངོམ་མཚང་ཡོད་ཚད།།
རང་རྒྱུད་དགྲ་ལ་བསྐུར་ནས།།
རང་གཞན་ཕུང་བའི་མི་ངན།།
གཞིག་ལོང་མེད་པའི་བྱ་སྤྱོད།།
ཕོ་སྒོ་མེད་པའི་ཚད་འདོད།།
ཅི་ཡང་མི་ཤེས་ཤག་སྨྲ།།
རང་ཕུང་རང་སྒྲུབ་བྱེད་པའི།།
མི་ངན་དེ་འདྲས་གོ་དཀའ།།
གོ་དཀའ་པི་ཝང་རྒྱུན་ཐག།
གོ་དཀའ་འདི་ལ་ཉོན་དང༌།།
ན་ཆུང་རྣམས་ཀྱིས་གོ་དཀའ།།
རང་ཁྱིམ་གོ་ལ་སྡོད་དུས།།
ཕ་མར་བཀུར་སྟི་བཟང་བོ།།
དྲིན་ལན་འཇལ་བའི་བུ་མོ།།
མིང་བོ་སྤུན་ཟླ་རྣམས་ལ།།
བྱམས་བརྩེའི་གཤིས་རྒྱུད་བཟང་བ།།
གཞན་གྱི་ཆུང་མར་འགྲོ་དུས།།
རང་འདོད་གཡོ་ཁྲམ་མེད་པའི།།
རྒན་རྒོན་བཟའ་མི་ཉམ་ཆུང༌།།
བཀུར་སྟི་བྱམས་པས་སྐྱོང་མཁན།།
སྤུན་ཟླ་ཆེ་ཆུང་མེད་ལ།།
མི་གཅིག་འདྲ་བའི་རྩིས་འཇོག།
གཞན་གཡེམ་ཆུང་ཞིང་གསང་ཐུབ།།
ནོར་གསོག་མཁས་ཤིང་མཛངས་ལྡན།།
བཟང་ངན་ཤེས་པའི་གོ་བ།།
གཉེན་འདུན་བྱམས་པས་སྐྱོང་མཁས།།
སྨྲ་ཉུང་ཆོས་ལ་དཀར་བ།།
ཁྱི་སྤྲང་སློང་མོ་ཀུན་ལ།།
སྦྱིན་བཏང་སྙིང་རྗེའི་རྩལ་ལྡན།།
དེ་འདྲའི་ན་ཆུང་གོ་དཀའ།།
གོ་དཀའ་ངན་དགུའི་གོ་དཀའ།།
གོ་དཀའ་འདི་ལ་ཉོན་དང༌།།
ན་ཆུང་ངན་པའི་སྤྱོད་འགྲོས།།
ཕ་མར་དྲིན་ལན་མི་འཇལ།།
མིང་བོ་བཟའ་མི་རྣམས་ལ།།
འཁོན་འཛིང་ལྐོག་ལབ་ཆེ་བ།།
ཁྱོ་དད་ཆེ་ཞིང་རྫུན་རྐྱལ།།
གསར་འགྲོགས་སྐྱེན་ཞིང་ཁྲེལ་མེད།།
རང་ལུས་མི་ཐུབ་ནེས་ཁུར།།
གཞན་གྱི་ཆུང་མར་སོང་ན།།
དང་པོ་གསར་འགྲོགས་བཟང་བཟང༌།།
དེ་ནས་ངན་མཚང་མངོནཡོང༌།།
རྒན་རྒོན་ཕ་མ་ཉམ་ཆུང༌།།
རྡེག་རྡུང་བྱེད་དང་ཟས་སྐལ།།
གཅོད་ཅིང་ངན་དགུ་བྱེད་དང༌།།
སྤུན་ཟླ་དབྱེན་དང་བཟའ་དཀྲུག།
ངན་དགུ་ཚང་བའི་བདུད་མོ།།
ཕྱི་ཚུལ་ལེགས་ཀྱང་ནང་ངན།།
དུག་རྐྱལ་འདྲ་བའི་བུད་མེད།།
གང་ལ་ལུས་ངག་འགྲོགས་ལ།།
ཕན་པ་མེད་པའི་གནོད་སྐྱེལ།།
གསང་མི་ཐུབ་ཅིང་མིག་སེར།།
བཟང་ལན་ངན་འཇལ་རྐུན་བྱེད།།
བསམ་སྦྱོར་གནག་ཅིང་དབྱེན་ཆེ།།
ནག་སྤྱོད་སྡིག་ལ་དགའ་བ།།
ཆོས་ལ་ནི་གུས་འབར་ཤ།།
སྙིང་རྗེ་མེད་ཅིང་གཡོ་ཁྲམ།།
སྤྲང་ལོང་ཁྱི་སྤྲང་རྣམས་ལ།།
རྡེག་རྡུང་བྱེད་ཅིང་ངན་སྤྱོད།།
ངན་དགུ་ཐམས་ཅད་ཚང་བའི།།
ནག་མོ་དེ་འདྲས་གོ་དཀའ།།
གོ་དཀའ་འདི་ལ་ཉོན་དང༌།།
ཀུན་གྱིས་གོ་རྒྱུའི་གོ་དཀའ།།
འཇིག་རྟེན་འདི་ན་སྡོད་དུས།།
ཟས་གོས་ལོངས་སྤྱོད་ཆ་རྐྱེན།།
སྔོན་གྱི་ལས་འབྲས་དབང་གིས།།
ལོངས་སྤྱོད་གང་འཛོམས་མ་གཏོགས།།
ཀུན་སློང་ཁོ་ནས་མ་འཁྲུག།
བཤས་ཁེ་སྡུག་ལས་མ་ཆེ།།
ཅི་ཡོད་ཆོག་ཤེས་ཆེ་དགོས།།
ཞར་བྱུང་དགེ་བ་སྒྲུབ་ཐབས།།
དཀའ་ཚེགས་མེད་པའི་ཚོགས་བསགས།།
ནངས་ནུབ་བརྒྱ་ཕྱག་ཕུལ་དང༌།།
དཀོན་མཆོག་དགྱེས་པའི་མཆོད་པ།།
སྤོས་དང་མར་མེ་ཡོན་ཆབ།།
རྟག་ཏུ་འབུལ་ཞིང་བརྩོན་འགྲུས།།
ཐང་ལྷོད་མེད་པར་རེམ་དགོས།།
གངས་ཅན་ལྗོངས་ཀྱི་ཡི་དམ།།
ལྷ་གཅིག་སྔགས་གཅིག་ཁོ་ནས།།
ངན་སོང་སྐྱེ་སྒོ་གཅོད་པའི།།
ཡི་གེ་དྲུག་མ་སྒྲོངས་དང༌།།
འཇིག་རྟེན་འདི་ན་སྐྱེས་པའི།།
མཐོ་དམན་མེད་པའི་ཕོ་མོ།།
སྐད་ཅིག་ཡད་ཡུད་ཙམ་ལས།།
མི་རྟག་འཆི་ལ་ཉེ་འགྲོ།།
སྡུག་གསོག་སེར་སྣས་བཅིངས་པའི།།
ནོར་རྫས་རྩྭ་ཁའི་ཟིལ་བ།།
གཅིག་ཀྱང་འཁྱེར་དབང་མེད་དོ།།
ལོངས་སྤྱོད་བཟའ་མི་གཉེན་འདུན།།
མདང་གསུམ་རྨི་ལམ་བཞིན་དུ།།
ལུས་སེམས་བྲལ་དུས་སོ་སོར།།
གཅིག་པུར་འགྲོ་བ་ཨེ་གོ།
ཚེ་འདིར་དགྲ་འདུལ་གཉེན་སྐྱོང༌།།
ཆགས་སྡང་དབང་གིས་སྤྱོད་ཚད།།
རང་ཕུང་རང་བརླགས་ཨེ་གོ།
ཚེ་འདིར་སངས་རྒྱས་སྟེར་མཁན།།
མཚན་ལྡན་རྗེ་བཙུན་བླ་མས།།
ཐར་བ་ཐོབ་པའི་ཐེམ་སྐས།།
ངན་སོང་ཆུ་བོ་བརྒལ་བའི།།
གྲུ་ཟམ་ལྟ་བུའི་ཆོས་བཤད།།
ཀུན་ལ་གོ་དཀའ་གསུང་དུས།།
རྣ་བའི་དབང་བོས་ཉན་དགོས།།
ཚེ་འདིར་སངས་རྒྱས་ལག་བཅང༌།།
མཚན་ལྡན་བླ་མས་གསུངས་པའི།།
རང་སེམས་ངོ་བོ་སྐྱོངས་དང༌།།
བཟང་ངན་བདེ་སྡུག་ཤར་མཁན།།
གང་ཤར་ངང་དུ་བལྟས་པས།།
གསལ་སྟོང་བརྗོད་མེད་འདུག་པ།།
གནས་པ་ཁོ་ནར་ཨེ་གོ།
ཚོགས་དྲུག་གང་གི་སྒོ་ནས།།
གཞན་དུ་འགྱུ་ནས་འཕྲོས་སར།།
འགྱུ་བ་ཡིན་པ་ཨེ་གོ།
དེ་དག་སོ་སོར་དབྱེ་མཁན།།
རིག་པ་ཡིན་པར་ཨེ་གོ།
བཟང་ངན་བདེ་སྡུག་ཐམས་ཅད།།
རྩ་བ་བཅད་ན་རང་སེམས།།
ཆོས་སྐུ་ཡིན་པར་ཨེ་གོ།
ཉོན་མོངས་དུག་ལྔའི་རྟོག་ཚོགས།།
སྤང་བླང་མེད་པར་རང་གྲོལ།།
རྒྱལ་བ་རིགས་ལྔའི་དགོངས་པ།།
རང་ཆས་ཡིན་པར་ཨེ་གོ།
རང་ལུས་ཕུང་ཁམས་སྐྱེ་མཆེད།།
ཞི་ཁྲོ་དམ་པ་རིགས་བརྒྱའི།།
སྐུ་དང་ཞིང་ཁམས་དབྱེར་མེད།།
རང་ལ་ཡོད་པ་ཨེ་གོ།
གཞན་ནས་འཚོལ་རྒྱུ་མེད་པའི།།
སྣང་སྲིད་ཆོས་སྐུའི་རོལ་བ།།
སྤང་བླང་མེད་པར་སྐྱོང་དགོས།།
བདེན་གཉིས་ལམ་དུ་འཁྱེར་བའི།།
རྟེན་འབྲེལ་བསླུ་མེད་གོ་དགོས།།
རིམ་གཉིས་ཟབ་མོར་སྦྱངས་པས།།
ཐམས་ཅད་སངས་རྒྱས་འགྲུབ་པར།།
འགྲོ་བ་ཀུན་གྱིས་ཨེ་གོ།།
མ་རྟོགས་འགྲོ་ལ་སྙིང་རྗེ།།
མཐར་ཐུག་སངས་རྒྱས་འགྲུབ་པའི།།
བསྔོ་སྨོན་དགེ་ལ་འབུངས་མཛོད།།
ང་རང་རི་བྱ་གོང་མོས།།
མང་པོ་བཤད་པ་མི་ཁོམ།།
མདོར་བསྡུས་དེ་ཚོ་ཨེ་གོ།
མི་ཆོས་ལྷ་ཆོས་སྒྲུབ་ཐབས།།
རང་སེམས་གསལ་བའི་ངོགས་ལ།།
མེ་ལོང་གཟུགས་བརྙན་བཞིན་དུ།།
རྟེན་འབྱུང་དབང་དུ་ཤར་ཚད།།
ཡི་གེའི་ལམ་དུ་བཀོད་པ།།
ཀུན་ལ་དགེ་བར་གྱུར་ཅིག།

རྩོམ་ཁུངས།