བསྟོད་ཚིག་ཐོལ་བྱུང་མ།།བཀའ་བབ་བྱེ་བ་མང་པོ་ནས།།ཕ་རོལ་ཕྱིན་དྲུག་རྫོགས་བྱས་ཏེ།།སྟོབས་བཅུའི་རྒྱལ་ཐབས་མཐོན་པོ་ལ།། རྟག་བཞུགས་འཇམ་དཔལ་ལ་ཕྱག་འཚལ།། ཟབ་མོ་ཆོས་རྣམས་ཀུན་གྱི་གཤིས།། མཐའ་བརྒྱད་སྤྲོས་ཆེན་བྲལ་པོ་རུ།། གཉིས་སྣང་མཚན་མ་ཉེར་ཞི་བ།། འཇམ་དཔལ་དེ་ལ་བདག་ཕྱག་འཚལ།།རྟག་ཆེན་ངེས་པ་ལྔ་ལྡན་སྐུ།། འོག་མིན་ཆེན་པོར་སྣང་བའི་གར།། རྣམ་མང་ཞིང་ན་སྒྱུར་མཛད་པ།།འཇམ་དཔལ་དབྱངས་ལ་རྟག་ཏུ་འདུད།། རྣམ་མང་ཞིང་ན་སྒྱུར་མཛད་པ།། འཇམ་དཔལ་དབྱངས་ལ་རྟག་ཏུ་འདུད།།གཞོན་ནུའི་གཟུགས་དང་རྒན་པོའི་གཟུགས།།བདེ་གཤེགས་སྐུ་དང་ཉན་རང་གཟུགས།། གཟུགས་ཀྱི་རོལ་པ་མང་པོ་ཡིས།། སྲིད་པ་སྐྱོབ་ལ་ཕྱག་འཚལ་ལོ།། སྙན་པར་སྨྲ་བ་རབ་མང་པོ།།ཟབ་མོའི་ཕྱོགས་དང་རྒྱ་ཆེའི་ཕྱོགས།།ལེགས་འདོམས་ཚངས་པའི་སྒྲ་དབྱངས་ལ།། དབང་མཛད་དེ་ལ་ཕྱག་འཚལ་ལོ།། ནམ་མཁའི་ཀློང་ལྟར་བརྟག་མེད་ཅིང་།། ཤེས་དང་ཤེས་བྱ་ཉེར་ཞི་བའི།། དབྱིངས་སུ་མི་རྟོག་ཡེ་ཤེས་ཆེ།། རོ་གཅིག་གྱུར་ལ་ཕྱག་འཚལ་ལོ།། རྣམ་པར་རྩོལ་ཞིང་རྟོག་མེད་ཀྱང་།། དཔག་བསམ་ཤིང་ལས་ཆར་འབེབས་བཞིན།།རྟག་ཁྱབ་ལྷུན་གྲུབ་ཕྲིན་ལས་ཆེ།། ཀུན་ཏུ་འབྱུང་ལ་ཕྱག་འཚལ་ལོ།།གྲངས་མེད་ཚོགས་གཉིས་བསགས་པའི་མཐུ།།ནམ་ཡང་རྒྱུན་ཆད་མེད་སྟོན་ཕྱིར།།  གཟུགས་སྐུ་བྱེ་བ་རྣམ་མང་པོས།། གཞན་ཕན་སྤྱོད་ལ་ཕྱག་འཚལ་ལོ།། གཟིགས་པར་མི་ཐོགས་ཡེ་ཤེས་ཅན།། འཇམ་དབྱངས་མགོན་ལ་ཕྱག་འཚལ་ལོ།། འགྲོ་རྣམས་རང་བཞིན་མེད་གཟིགས་བཞིན།། རྨི་ལམ་ལྟ་བུའི་འཁོར་བ་པར།།མི་དམིགས་ཐུགས་རྗེ་རྟག་འབྱུང་བ།།འཇམ་དབྱངས་དེ་ལ་གུས་ཕྱག་འཚལ།། རྒྱལ་སྲས་ཁྲག་ཁྲིག་དུ་མའི་དབུས།།སྨོན་ལམ་ཆེན་པོའི་གཟི་བརྗིད་གྱིས།། སྐར་མའི་དབུས་ན་ཟླ་བ་བཞིན།། བརྗིད་བྱས་དེ་ལ་ཕྱག་འཚལ་ལོ།། ཡོན་ཏན་བདག་ཉིད་ཆེ་རྣམས་ཀྱང་།། གང་ཞབས་ཕུ་དུད་ཡུལ་ཉིད་དུ།།བསྔགས་པ་ནམ་ཡང་མི་ལྷོད་པ།།འདྲེན་པ་བགྲང་ལས་འདས་མོད་དེ།། སྤྲང་སྨྱོན་བདག་གི་ངག་འདི་ཡང་།། བདག་ཉིད་ཆེན་པོའི་སྙན་དུ་ཕུལ།། ཅི་སླད་ཅེས་ན་ཐོག་མེད་ཀྱི།། དུས་ནས་ངག་གི་ཉེས་བྱས་པ།། དེ་ཀུན་ཚངས་པར་བགྱིད་སླད་དུ།། གཏམ་གྱི་རྫ་རྔ་འདི་བརྡུངས་སོ།།    ཅེས་སྨྱོན་གཏམ་ཅལ་ཅོལ་མ་འདིའང་ཡུད་ཙམ་ལ་བསམ་གཞིག་མ་བཏང་བར།།  འཇིགས་མེད་པས་བྲིས་སོ།།

རྩོམ་ཁུངས། མགོ་ལོག་ཁུལ་རྩོམ་སྒྱུར་ལས་ཁུངས་ཀྱིས་བསྒྲིགས་པའི